काठमाडौँ: नेपाल राष्ट्र बैङ्कले बिहीबारका लागि विदेशी मुद्राको विनिमय दर निर्धारण गरेको छ । निर्धारित विनिमयदरअनुसार अमेरिकी डलर एकको खरिददर एक सय ३६ रुपैयाँ ७४ पैसा र बिक्रीदर एक सय ३७ रुपैयाँ ३४ पैसा कायम भएको छ ।

युरोपियन युरो एकको खरिददर एक सय ४१ रुपैयाँ ३५ पैसा र बिक्रीदर एक सय ४२ रुपैयाँ १५ पैसा, युके पाउन्ड स्टर्लिङ एकको खरिददर एक सय ७१ रुपैयाँ २५ पैसा र बिक्रीदर एक सय ७२ रुपैयाँ, स्विस फ्र्याङ्क एकको खरिददर एक सय ५० रुपैयाँ ७० पैसा र बिक्रीदर एक सय ५१ रुपैयाँ ३६ पैसा कायम गरिएको छ ।

अष्ट्रेलियन डलर एकको खरिददर ८४ रुपैयाँ ६२ पैसा र बिक्रीदर ८४ रुपैयाँ ९९ पैसा, क्यानेडियन डलर एकको खरिददर ९५ रुपैयाँ ०७ पैसा र बिक्रीदर ९५ रुपैयाँ ४९ पैसा, सिङ्गापुर डलर एकको खरिददर एक सय रुपैयाँ १६ पैसा र बिक्रीदर एक सय रुपैयाँ ६० पैसा निर्धारण गरिएको छ ।

जापानी येन १० को खरिददर आठ रुपैयाँ ७२ पैसा र बिक्रीदर आठ रुपैयाँ ७६ पैसा, चिनियाँ युआन एकको खरिददर १८ रुपैयाँ ७३ पैसा र बिक्रीदर १८ रुपैयाँ ८१ पैसा, साउदी अरेबियन रियाल एकको खरिददर ३६ रुपैयाँ ४० पैसा र बिक्रीदर ३६ रुपैयाँ ५६ पैसा, कतारी रियाल एकको खरिददर ३७ रुपैयाँ ५१ पैसा र बिक्रीदर ३७ रुपैयाँ ६७ पैसा कायम भएको छ ।

केन्द्रीय बैङ्कका अनुसार थाई भाट एकको खरिददर तीन रुपैयाँ ९९ पैसा र बिक्रीदर चार रुपैयाँ, युएई दिराम एकको खरिददर ३७ रुपैयाँ २३ पैसा र बिक्रीदर ३७ रुपैयाँ ३९ पैसा, मलेसियन रिङ्गेट एकको खरिददर ३० रुपैयाँ ५८ पैसा र बिक्रीदर ३० रुपैयाँ ७१ पैसा निर्धारण भएको छ ।

साउथ कोरियन वन एक सयको खरिददर नौ रुपैयाँ २५ पैसा र बिक्रीदर नौ रुपैयाँ २९ पैसा, स्विडिस क्रोनर एकको खरिददर १२ रुपैयाँ ३५ पैसा र बिक्रीदर १२ रुपैयाँ ४० पैसा र डेनिस क्रोनर एकको खरिददर १८ रुपैयाँ ९९ पैसा र बिक्रीदर १९ रुपैयाँ ०७ पैसा तोकिएको छ ।

राष्ट्र बैङ्कले हङ्कङ डलर एकको खरिददर १७ रुपैयाँ ६० पैसा र बिक्रीदर १७ रुपैयाँ ६८ पैसा, कुवेती दिनार एकको खरिददर चार सय ४३ रुपैयाँ ६० पैसा र बिक्रीदर चार सय ४५ रुपैयाँ ५५ पैसा, बहराइन दिनार एकको खरिददर तीन सय ६२ रुपैयाँ ७२ पैसा र बिक्रीदर तीन सय ६४ रुपैयाँ ३१ पैसा, ओमनी रियाल एकको खरिदर तीन सय ५५ रुपैयाँ ६३ पैसा र बिक्रीदर तीन सय ५७ रुपैयाँ १९ पैसा तोकिएको छ । त्यसैगरी, भारतीय रुपैयाँ एक सयको खरिददर एक सय ६० रुपैयाँ र बिक्रीदर एक सय ६० रुपैयाँ १५ पैसा तोकिएको छ ।

यो विनिमय दरलाई आवश्यकतानुसार जुनसुकै समयमा पनि संशोधन गर्न सकिने राष्ट्र बैङ्कले जनाएको छ । वाणिज्य बैङ्कले तोक्ने विनिमय दर भने फरक हुनसक्ने र अद्यावधिक विनिमय दर केन्द्रीय बैङ्कको वेबसाइटमा उपलब्ध हुनेसमेत जनाइएको छ ।

वासिङ्टन: अमेरिकी शहर न्यु अर्लिन्सको एक व्यस्त पर्यटकीय क्षेत्रमा बुधबार राति भएको दुर्घटनामा एउटा सवारी साधनले भीडलाई ठक्कर दिँदा कम्तीमा १० जनाको मृत्यु भएको छ भने ३० जना घाइते भएका छन्।

स्थानीय प्रशासनका अनुसार यो घटना वर्षको उत्सव मनाइरहेका मानिसहरूको घुइँचो रहेको स्थानमा भयो। एक तीव्र गतिमा आएको ट्रकले भीडलाई ठक्कर दिएपछि स्थिति थप भयावह बनेको थियो।

अमेरिकी सञ्चार माध्यम सिबिएस न्युजले प्रत्यक्षदर्शीहरूको भनाइ उद्धृत गर्दै ट्रकको चालकले भीडलाई ठक्कर दिएपछि गाडीबाट निस्केर हतियार निकालेर अन्धाधुन्ध गोली चलाएको उल्लेख गरेको छ। प्रहरीले तुरुन्तै जवाफी फायर गर्दै परिस्थितिलाई नियन्त्रणमा लिएको थियो।

घटनापछि स्थानीय अधिकारीहरूले ट्रकका चालकलाई नियन्त्रणमा लिएको र उनीमाथि अनुसन्धान भइरहेको जनाएका छन्। प्रारम्भिक विवरणअनुसार यो घटना ‘जानाजान गराइएको आक्रमण’ हुनसक्ने आशङ्का गरिएको छ। सुरक्षाकर्मीहरूले घटनास्थल वरपरको क्षेत्रलाई घेरा हालेर थप साक्ष्य संकलन गरिरहेका छन्।

घाइते भएका ३० जना व्यक्तिहरूलाई स्थानीय अस्पतालहरूमा पुर्याइएको छ। त्यसमध्ये केहीको अवस्था गम्भीर रहेको बताइएको छ। स्वास्थ्य अधिकारीहरूले घाइतेहरूको उपचारमा कुनै कमी हुन नदिने र आपतकालीन सेवाहरू पूर्ण क्षमतामा परिचालन गरिएको जानकारी दिएका छन्।

यस घटनापछि न्यु अर्लिन्सको सुरक्षामा कडाइ गरिएको छ। अन्य भीडभाड हुने स्थानहरूमा पनि प्रहरीले गस्ती बढाएको छ। अधिकारीहरूले यस आक्रमणलाई आतङ्कवादी हमलाको कोणबाट पनि अनुसन्धान गरिरहेका छन्।

यस भयावह घटनाले अमेरिकी शहरहरूमा ठूला चाडपर्व र सार्वजनिक उत्सवको सुरक्षा व्यवस्थालाई लिएर थप प्रश्न खडा गरेको छ।

काठमाडौं। चिनियाँ राष्ट्रपति सी जिनपिङले २३ करोड जनसंख्या रहेको टापु राष्ट्र ताइवानका स्वतन्त्रता समर्थक शक्तिलाई कडा चेतावनी दिएका छन्। उनले मंगलबार (३१ डिसेम्बर) नयाँ वर्षको सम्बोधनमा चीनसँग ताइवानको एकीकरण अपरिहार्य रहेको र यो प्रक्रियालाई कसैले रोक्न नसक्ने दाबी गरे।

गत वर्ष चीनले ताइवानमाथि निरन्तर सैन्य दबाब बढाएको थियो। चीनले आफ्नो सिमाना नजिक युद्धपोत पठाउनुका साथै प्रायः दिनहुँ ताइवानी हवाई क्षेत्रको उल्लंघन गरिरहेको छ। यसलाई ताइवानी अधिकारीहरूले टापुमा चीनको सैन्य उपस्थिति सामान्य बनाउन गरिएको रणनीति भनी टिप्पणी गरेका छन्।

चीनले ताइवानलाई आफ्नो क्षेत्रको रूपमा दाबी गर्दै आएको छ, भने ताइवानले आफ्नो लोकतान्त्रिक शासनलाई बलियो पार्दै बेइजिङको दाबीलाई अस्वीकार गरेको छ। ताइवानी सरकारका अनुसार ताइवानका जनताले मात्र आफ्नो भविष्यको निर्णय गर्न सक्ने छन्, र चीनले यो हकलाई सम्मान गर्नुपर्नेछ।

सी जिनपिङको सन्देश

राष्ट्रिय टेलिभिजनमा बोल्दै राष्ट्रपति सी जिनपिङले ताइवान र चीनका जनतालाई एउटै परिवारको रूपमा वर्णन गरे। उनले भने, ‘ताइवान र चीनका जनता एउटै परिवार हुन्। हाम्रो पारिवारिक बन्धनलाई कसैले तोड्न सक्दैन। ताइवानसँग चीनको एकीकरण निश्चित छ, र यो प्रक्रियालाई कसैले रोक्न सक्दैन।’

ताइवानमा चिनियाँ दबाब

चीनको निरन्तर दबाबको कारण ताइवानमा चिनियाँ प्रभावलाई लिएर चासो बढेको छ। ताइवानले अन्तर्राष्ट्रिय सहयोग बढाउँदै लोकतन्त्र र सार्वभौमिकताको रक्षा गर्न कूटनीतिक प्रयासहरूलाई तीव्र बनाएको छ।

यसैबीच, अमेरिका र उसका गठबन्धन राष्ट्रहरूले ताइवानलाई आफ्नो समर्थन जनाएको छ। अमेरिकाले ताइवानी सुरक्षाका लागि सैन्य उपकरणको आपूर्ति बढाउँदै चीनलाई सैन्य आक्रामकताबाट पछाडि हट्न आग्रह गरेको छ।

तनावपूर्ण सम्बन्ध

चीन र ताइवानबीचको सम्बन्ध विगतका वर्षहरूमा झन् तनावपूर्ण बन्दै गएको छ। चीनले ताइवानको स्वतन्त्रतासम्बन्धी कुनै पनि कदमलाई आफ्नो क्षेत्रीय अखण्डताको उल्लंघन मान्ने चेतावनी दिँदै आएको छ। भने, ताइवानले आफ्नो सार्वभौमिक अस्तित्वलाई कायम राख्न कुनै सम्झौता नगर्ने अडान लिएको छ।

राष्ट्रपति सीको पछिल्लो सम्बोधनले चीन-ताइवान सम्बन्ध थप जटिल हुने सङ्केत गरेको छ। अन्तर्राष्ट्रिय समुदायले यस क्षेत्रको स्थिरता र शान्तिका लागि गम्भीर चासो व्यक्त गरिरहेको छ।

काठमाडौं। नेपाल प्रहरीका पाँच जना वरिष्ठ उपरीक्षक (एसएसपी) हरूको सरुवा भएको छ। मंगलबार राति प्रहरी प्रधान कार्यालयको सिफारिसमा गृह मन्त्रालयले यी सरुवाहरूलाई अनुमोदन गरेको हो।

सरुवा विवरणअनुसार उपत्यका ट्राफिक प्रहरी कार्यालयमा एसएसपी विनोद घिमिरेको नियुक्ति भएको छ। यसअघि काठमाडौं परिसरबाट छोटो समयमै सरुवा गरिएका एसएसपी भुपेन्द्रबहादुर खत्रीलाई भरतपुर शिक्षालयमा स्थानान्तरण गरिएको छ।

ललितपुर परिसरमा रहेका एसएसपी शेखर खनाललाई काठमाडौं उपत्यका प्रहरी कार्यालय, रानीपोखरी पठाइएको छ। ललितपुर परिसरको नेतृत्व भने अब एसएसपी श्यामकृष्ण अधिकारीले सम्हाल्ने भएका छन्। त्रिभुवन अन्तर्राष्ट्रिय विमानस्थलमा एसएसपी सोमेन्द्र सिंह राठौरको सरुवा गरिएको छ।

यसबीच, जिल्ला प्रहरी परिसर काठमाडौंमा कुनै परिवर्तन गरिएको छैन। यद्यपि, एसएसपी वसन्तबहादुर रजौरेलाई हटाएर पदस्थापन गर्न केही एसएसपीले सक्रिय प्रयास जारी राखेको बताइएको छ।

काठमाडौं: नेकपा एकता राष्ट्रिय अभियानका अध्यक्ष वामदेव गौतमले नेकपा एकीकृत समाजवादी पार्टीसँग एकता गर्ने सहमति भइसकेको बताएका छन्।

आज नेकपा एकीकृत समाजवादीको पार्टी कार्यालयमा अध्यक्ष माधव नेपालसँगको छलफलपछि सञ्चारकर्मीसँग कुरा गर्दै गौतमले पार्टी एकताका लागि समझदारी बनेको स्पष्ट पारे।

‘माधवजी र म एकजुट हुने निर्णयमा पुगिसकेका छौं। एकताका लागि दुवै पार्टीबीच समझदारी बनेको छ। जब एकता औपचारिक रूपमा हुनेछ, त्यस दिन मिडियालाई जानकारी गराइनेछ,’ गौतमले भने। उनले एकता प्रक्रिया ढिलो नहुने पनि बताए।

छलफलमा एकीकृत समाजवादीका अध्यक्ष माधव नेपालसहित महासचिव घनश्याम भूषाल, प्रकाश ज्वालालगायतका नेताहरू सहभागी थिए।

एकीकृत समाजवादीका नेता गौतमलाई तेस्रो वरियतामा राख्ने सहमति भए पनि उनीसँग आउने अन्य नेताहरूको भूमिकाबारे अझै पूर्ण सहमति जुट्न बाँकी रहेको जनाइएको छ। आजको बैठक मुख्य रूपमा यसै विषयमा केन्द्रित भएको थियो।

काठमाडौं: नेपाल विद्युत् प्राधिकरणले काठमाडौँ–तराई–मधेश द्रुतमार्ग (फास्ट ट्र्याक) अन्तर्गत मकवानपुरको भीमफेदी–माण्डु र इन्द्रसरोवरको सिस्नेरी क्षेत्रमा निर्माण कार्यलाई अवरोध हुन नदिन वैकल्पिक विद्युत् आपूर्ति गर्ने तयारी गरेको छ।

फास्ट ट्र्याकका संरचना निर्माणका लागि झन्डै १२ मेगावाट विद्युत् आवश्यक पर्नेसमेत प्राधिकरणले जनाएको छ। बाढीपहिरोका कारण हाल विद्युत् आपूर्ति अवरुद्ध भए पनि प्राधिकरणले आपूर्ति सुनिश्चित गर्न कुलेखानी जलविद्युत् केन्द्रको ढोर्सिङ्ग सबस्टेसनबाट वैकल्पिक व्यवस्थाका लागि आवश्यक पहल थालेको छ।

पहिले सञ्चालनमा रहेको ६६ केभी लाइनलाई ११ केभीमा रूपान्तरण गरी कुलेखानीको ढोर्सिङ्ग सबस्टेसनबाट माण्डुसम्म विद्युत् पुर्याउने काम अगाडि बढाइएको छ। यसका लागि २२.५ एमभि क्षमताको नयाँ ट्रान्सफर्मर जडान गरिनेछ।

ढोर्सिङ्ग सबस्टेसनमा हाल पाँच एमभि क्षमताको ट्रान्सफर्मर पूर्ण भारमा रहेकाले थप विद्युत् प्रवाह गर्न असम्भव भएकाले नयाँ ट्रान्सफर्मर राख्नुपर्ने प्राधिकरणले स्पष्ट पारेको छ।

गत असोजमा आएको बाढीले माण्डु हाइड्रोपावरको २२ मेगावाट क्षमताको बागमतीखोला साना जलविद्युत् आयोजना पूर्णरूपमा क्षतिग्रस्त बनाएको थियो। बाढीले आयोजनाको स्वीचयार्ड, ट्रान्सफर्मर, र प्रसारण लाइनहरूमा क्षति पुर्याएपछि फास्ट ट्र्याक क्षेत्रमा विद्युत् आपूर्ति बन्द भएको थियो।

नेपाली सेनाले विद्युत् अभावले निर्माण कार्यमा समस्या भएको जानकारी गराएपछि प्राधिकरणका कार्यकारी निर्देशक कुलमान घिसिङको नेतृत्वमा उच्चस्तरीय टोलीले माण्डु क्षेत्रको स्थलगत निरीक्षण गरेको थियो। टोलीले पुनःनिर्माण भइरहेको बागमतीखोला जलविद्युत् आयोजना र ढोर्सिङ्ग सबस्टेसनको अवलोकन गर्दै तत्काल विद्युत् आपूर्ति गर्ने विभिन्न विकल्पबारे छलफल गरेको थियो।

प्राधिकरणले आयोजना पुनःनिर्माण चैत मसान्तसम्म सक्ने लक्ष्य राखेको छ। पुनःनिर्माणपछि पुरानै संरचनाबाट विद्युत् आपूर्ति पुनर्स्थापित हुने बताइएको छ।

कार्यकारी निर्देशक घिसिङले भने, “राष्ट्रिय गौरवको आयोजनालाई अवरोध हुन दिन सकिँदैन। जलविद्युत् आयोजनाबाट विद्युत् उत्पादन पुनः सुरु नभएसम्म वैकल्पिक आपूर्ति सुनिश्चित गरिनुपर्छ। यसका लागि तत्काल काम सुरु गरौँ।”

उपकार्यकारी निर्देशक मनोज सिलवालले स्थानीय स्तरमा लाइन पुनःस्थापनाका लागि आवश्यक काम तीव्रगतिमा अगाडि बढाउन निर्देशन दिनुभएको छ।

प्राधिकरणको यो पहलले द्रुतमार्गको निर्माण कार्यलाई पुनः गतिमा ल्याउने अपेक्षा गरिएको छ। वैकल्पिक आपूर्ति कार्य सम्पन्न भएपछि निर्माण प्रक्रियामा थप सहजता आउने विश्वास गरिएको छ।