बैतडी: एसिसी मेन्स यु–१६ इस्ट जोन कप–२०२५ को सुदूरपश्चिम क्षेत्रीय छनोटमा कैलालीले लगातार दोस्रो जित निकाल्दै फाइनल प्रवेशको दाबी बलियो बनाएको छ। पहिलो खेलमा अछामलाई ७१ रनले हराएको कैलालीले सोमबार दार्चुलामाथि ९४ रनको फराकिलो जित दर्ता गर्‍यो।

पहिले ब्याटिङ गर्दै कैलालीले निर्धारित २० ओभरमा ६ विकेटको क्षतिमा १३० रन बनायो। अविरल विकले अविजित ५३ रनको अर्धशतकीय पारी खेले। दार्चुलाका रोशन मिश्र र पुरषोत्तम रावलले दुई–दुई विकेट लिए।

१३१ रनको लक्ष्य लिएर जवाफी ब्याटिङमा उत्रिएको दार्चुला १६.३ ओभरमै जम्मा ३६ रनमा अलआउट भयो। दार्चुलाका कुनै पनि ब्याटरले दोहोरो अंकमा रन जोड्न सकेनन्। कैलालीका रुद्रप्रसाद आचार्यले उत्कृष्ट बलिङ गर्दै ५ विकेट लिएर ‘प्लेयर अफ द म्याच’ घोषित भए। स्कोरर नुरेन अन्सारीका अनुसार यो दार्चुलाको लगातार दोस्रो हार हो, जसले टोली प्रतियोगिताबाट बाहिरिएको छ।

सोमबार नै तय भएको अछाम र कञ्चनपुरबीचको खेल वर्षाका कारण रद्द भयो, जसले दुवै टोलीले समान अंक बाँडेका छन्। आज (मंगलबार) हुने कैलाली र कञ्चनपुरबीचको खेलले फाइनलमा पुग्ने टोली तय गर्नेछ।

सुदूरपश्चिम प्रादेशिक क्रिकेट संघको आयोजनामा जेठ ८ गतेदेखि सुरु भएको प्रतियोगितामा नेपाल क्रिकेट संघमा आबद्ध सुदूरपश्चिमका आठ जिल्लाको सहभागिता छ। उत्कृष्ट प्रदर्शन गर्ने खेलाडीलाई प्रदेशस्तरीय टोलीमा छनोट गरिने संघका प्रशिक्षक दीपेन्द्रबहादुर चन्दले जानकारी दिएका छन्।

एसियन क्रिकेट काउन्सिल (एसीसी) को आयोजनामा हुने यु–१६ इस्ट जोन कपका लागि नेपाल क्रिकेट संघले यही महिनाभित्र राष्ट्रिय स्तरको छनोट प्रतियोगिता आयोजना गर्ने तयारी गरिरहेको छ।

काठमाडौं: कोसी प्रोजेक्ट शोकेसको उपाधि एक्मी इन्जिनियरिङले जितेको छ। आइतबार काठमाडौंमा सम्पन्न फाइनल चरणमा नौ वटा टोलीलाई पछि पार्दै एक्मी इन्जिनियरिङ कलेजको ‘एक्मी कोस्टर’ टोलीले उपाधि हात पारेको हो।

कोसी प्रदेशको पर्यटन प्रवर्द्धन र प्रवर्द्धनात्मक योजनाहरू खोज्न एलिसन हस्पिटालिटीले आयोजना गरेको कोसी प्रोजेक्ट शोकेसमा फस्ट रनरअपको रुपमा पुल्चोक इन्जिनियरिङ कलेजको ‘फुल्चोक इयर फाइभ’ टोली र सेकेन्ड रनरअपको रुपमा नेपाल इन्जिनियरिङ कलेजको ‘एग्रो बस्ती’ टोली चयन भएका छन्।

प्रतियोगिताको उपाधि जित्ने ‘एक्मी कोस्टर’ टोलीले नगद एक लाख रुपैयाँ, ट्रफी र प्रमाणपत्र प्राप्त गर्नेछ भने फस्ट रनरअपले रु ५० हजार र सेकेन्ड रनरअपले रु २५ हजार नगदसहित ट्रफी, प्रमाणपत्र र विभिन्न उपहारहरू प्राप्त गर्नेछन्। साथै उत्कृष्ट १० टोलीले आगामी दिनमा कोसी प्रदेशका लगानीकर्ता र सरोकारवालाहरू माझ पुनः आफ्नो प्रोजेक्ट प्रदर्शन गरेपछि थप पुरस्कार प्रदान गरिनेछ।

फाइनल चरणमा निर्णायकको रूपमा इन्जिनियर मन्दाकिनी कार्की, बैंकर नवराज सत्याल, आर्किटेक्ट पुनम शाह, युवा व्यवसायी तथा शैक्षिक सल्लाहकार शिशिर सिंखडा र पर्यटन व्यवसायी चन्द्र रिजालले सहभागी टोलीका प्रोजेक्टहरूको विस्तृत अध्ययन, अवलोकन र प्रस्तुति मूल्यांकन गरेका थिए।

नेपालमै पहिलो पटक सिभिल इन्जिनियरिङ र आर्किटेक्चरका विद्यार्थीहरूलाई समेटेर आयोजना गरिएको प्रतियोगिताले इन्जिनियरिङ र पर्यटनलाई जोड्दै नयाँ पर्यटकीय क्षेत्रहरूको पहिचान गरेको र गाउँ पर्यटनलाई प्रवर्द्धन गर्ने महत्वपूर्ण भूमिका निर्वाह गरेको बताइएको छ।

एलिसन हस्पिटालिटीकी अध्यक्ष एलिना मगरका अनुसार, लगानीकर्ता, स्थानीय तह वा सरकारले प्रोजेक्ट कार्यान्वयन गर्न इच्छुक भएमा आवश्यक सहजीकरण प्रदान गरिनेछ। तीन दिनसम्म चलेको कोसी प्रोजेक्ट शोकेसले नेपालको पर्यटन क्षेत्रमा युवापुस्तालाई आकर्षित गर्नुका साथै मुलुकको अर्थतन्त्र सुधार र रोजगारी सृजनामा टेवा पुर्‍याउने अपेक्षा गरिएको छ।

प्रतियोगिताको उत्कृष्ट १० टोलीमा ‘बियोन्ड द ब्रिज’ (ख्वप इन्जिनियरिङ कलेज), ‘कोशी एक्स्प्लोरर’ (पुल्चोक क्याम्पस), ‘पाथ फाइन्डर’ (पुल्चोक क्याम्पस), ‘केटुपिए’ (पुल्चोक क्याम्पस), ‘विनर’ (पुल्चोक क्याम्पस), ‘स्केच स्क्वायर्ड’ (पुल्चोक क्याम्पस), ‘रुलर रिज बिल्डर्स’ (नेपाल इन्जिनियरिङ कलेज) रहेका थिए।

त्यसअघि प्रारम्भिक चरणमा २१ टोलीले प्रतिस्पर्धा गरेका थिए।

फाइनल चरणमा छनोट भएका टोलीहरूले कन्सेप्ट पेपरमा तोकिएका डाँडाबजार, राजारानी, रौता पोखरी, सोलु, सङ्खुवासभा, पानीटार इलाम, सूर्योदय अन्तु इलाम, माई पोखरी, ओखलढुंगा लिखु, मुन्धुम सर्किट लगायतका क्षेत्रमा आधारित परियोजनाहरू तयार पारेका थिए र ती डमी प्रदर्शनीमा राखिएका थिए।

कोसी प्रदेश सरकार, नेपाल पर्यटन बोर्ड, नेपाल टेलिकम लगायत संस्थाले कोसी प्रोजेक्ट शोकेसलाई सहयोग गरेका थिए भने कार्यक्रम व्यवस्थापन काफल इभेन्टले गरेको थियो।

पोखरा: पोखरा महानगरपालिकाले बालबालिकाको स्वास्थ्य सुरक्षामा महत्वपूर्ण योगदान पुर्‍याउने उद्देश्यसहित “पूर्ण खोप सुनिश्चितता दिगोपना” घोषणा गरेको छ। नगर प्रमुख धनराज आचार्यले एक औपचारिक समारोहमा उक्त घोषणा गर्नुभएको हो।

नेपाल सरकारको प्राथमिकता प्राप्त राष्ट्रिय खोप कार्यक्रमअन्तर्गत महानगरभित्रका सबै बालबालिकाले समयमै आवश्यक खोप प्राप्त गरेको सुनिश्चित गर्ने लक्ष्य यो घोषणाको आधार हो। नगर प्रमुख आचार्यले बालबालिकाको सुरक्षित भविष्यका लागि खोप र अन्य स्वास्थ्य सेवा प्रभावकारी रूपमा उपलब्ध गराउनु महानगरपालिकाको प्रमुख दायित्व भएको स्पष्ट पार्नुभयो। साथै, स्वास्थ्यकर्मीहरूलाई खोप र पोषण कार्यक्रमहरू थप प्रभावकारी रूपमा सञ्चालन गर्न निर्देशन दिनुभयो।

महानगरपालिकाकी कार्यवाहक प्रमुख मन्जुदेवी गुरुङले बालबालिकाका लागि खोप अत्यावश्यक र प्रभावकारी कार्यक्रम भएकाले यसलाई सम्पूर्ण वडामा विस्तार गर्न महानगरपालिका प्रतिबद्ध रहेको बताउनुभयो।

स्वास्थ्य महाशाखा प्रमुख भरतराज पौडेलले विगत एक वर्षमा ०–१५ महिनाका ५ हजार ३४१ र १६–२३ महिनाका ४ हजार १५० बालबालिकाको घरघरमा खोप अवस्थाको अध्ययन गरिएको जानकारी दिनुभयो। अध्ययन क्रममा जन्मदेखि खोप नपाएका एक बालकलाई खोपको पहुँचमा ल्याइएको र ४१ जना अपूर्ण खोपप्राप्त बालबालिकालाई पूर्ण खोप दिइएको उल्लेख गर्नुभयो।

वडा नं. १२ का अध्यक्ष सन्तोष बास्तोलाले बालबालिकालाई आधारभूत स्वास्थ्य सेवा उपलब्ध गराउन सबै वडा कार्यालय प्रतिबद्ध रहेको जानकारी दिनुभयो। महिला सामुदायिक स्वास्थ्य स्वयंसेविका सञ्जाल कास्कीकी अध्यक्ष भीमा पौडेलले खोप अभियानमा महिला स्वयंसेविकाको सक्रियता र योगदान उल्लेखनीय रहेको बताए।

जनस्वास्थ्य अधिकृत तेजाखर लम्सालका अनुसार नगर क्षेत्रका खोप योग्य सबै बालबालिकालाई खोप लगाइएको सुनिश्चित भएपछि यो घोषणा गरिएको हो। कार्यक्रममा सहभागी विश्व स्वास्थ्य सङ्गठनका प्रतिनिधिहरूले पोखराको बालस्वास्थ्य प्रवर्द्धनमा उल्लेखनीय प्रगति भएको प्रशंसा गरेका छन्।

पूर्ण खोप भन्नाले राष्ट्रिय खोप तालिकाअनुसार १५ महिना उमेर भित्र दिइने सबै खोपहरू प्राप्त गरेका बालबालिकालाई जनाइन्छ। पूर्ण खोप सुनिश्चितता घोषणाका लागि १६ देखि ५९ महिना उमेर समूहका बालबालिकामा खोप अवस्थाको मूल्याङ्कन गरिन्छ।

काठमाडौं: अमेरिकी पूर्वराष्ट्रपति डोनाल्ड ट्रम्पले युक्रेनमा भइरहेको रुसी बमबारीप्रति आक्रोश व्यक्त गर्दै रुसी राष्ट्रपति भ्लादिमिर पुटिनलाई ‘पागल’को संज्ञा दिएका छन्। उनले रुसविरुद्ध थप प्रतिबन्धको तयारी भइरहेको संकेत पनि गरेका छन्।

ट्रम्पले आफ्ना विचारहरू ट्रुथ सोशलमा पोस्ट गर्दै लेखेका छन्, “मेरो रूसका भ्लादिमिर पुटिनसँग सधैं राम्रो सम्बन्ध रह्यो, तर अहिले उनलाई के भएको हो भन्ने थाहा छैन। उनले बिना कारण धेरै मानिसहरू मारिरहेका छन्, र म केवल सैनिकहरूको कुरा गरिरहेको छैन। युक्रेनी शहरहरूमा मिसाइल र ड्रोन आक्रमणहरू भइरहेको छ, जुन पूर्णतः अनावश्यक छ।”

पुटिनबारे ट्रम्पले लेखे, “मैले सधैं भनेको छु कि उनी युक्रेनको एक टुक्रा मात्र होइन, सम्पूर्ण युक्रेन चाहन्छन्। र त्यो कुरा सत्य साबित हुँदै गएको देखिन्छ। तर यदि उनले युक्रेन कब्जा गर्न खोजे भने, त्यसको परिणाम रूसको पतन नै हुनेछ।”

ट्रम्पले युक्रेनी राष्ट्रपति भोलोडिमिर जेलेन्स्कीप्रति पनि आलोचनात्मक टिप्पणी गर्दै भने, “जेलेन्स्कीले आफ्नो अभिव्यक्तिको शैलीले आफ्नै देशलाई हानी पुर्‍याइरहेका छन्। उनले बोलेका अधिकांश कुराले समस्या बढाउँछ, र यो बन्द हुनु राम्रो हुनेछ।”

जेलेन्स्कीले केही दिनअघि अमेरिकाको ‘मौनता’ले पुटिनलाई उत्साहित गरिरहेको टिप्पणी गरेका थिए।

ट्रम्पले अमेरिकी राष्ट्रपति जो बाइडेनमाथि पनि आरोप लगाउँदै भने, “यो यस्तो युद्ध हो, जुन म राष्ट्रपति भएको भए कहिल्यै सुरु हुने थिएन। यो जेलेन्स्की, पुटिन र बाइडेनको युद्ध हो, ट्रम्पको होइन। म त केवल एउटा ठूलो संकटको सामना गर्न मद्दत गरिरहेको छु, जुन पूर्ण असक्षमता र घृणाबाट सुरु भएको हो।”

काठमाडौं: नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले समाजवादी क्रान्तिको तयारीका लागि आवश्यक पर्ने कम्युनिष्ट एकताको प्रक्रियामा गम्भीर ढंगले अगाडि बढिरहेको बताएका छन्।

सोमबार काठमाडौंमा आयोजित पार्टी समायोजन कार्यक्रममा बोल्दै अध्यक्ष दाहालले समाजवादी आन्दोलन अघि बढ्दै जाँदा एकीकरण, समायोजन र ध्रुवीकरणको प्रक्रिया पनि सँगसँगै अगाडि बढ्ने बताउँदै अहिले कम्युनिष्ट एकताको दिशामा गम्भीर प्रयास भइरहेको उल्लेख गरे।

उनले भने, “हामी समाजवादी क्रान्तिको तयारीका लागि आवश्यक पर्ने कम्युनिष्ट एकताको प्रक्रियामा गम्भीर ढंगले अघि बढिरहेका छौं। यसअघि ०६४ सालको निर्वाचनमा प्राप्त जनमत जोगाउन नसक्दा पार्टी विभाजन भयो, जसले श्रमजीवी वर्गलाई ठूलो क्षति पुर्‍यायो। महान सहिदहरुको सपना ओझेलमा पर्‍यो। तर संविधान घोषणापछि फेरि एकताको प्रक्रिया सुरु भएको छ।”

प्रचण्डले विश्वभर भएका क्रान्ति र प्रतिक्रान्तिका अनुभवका आधारमा नेपालमा मौलिक ढंगले समाजवादतर्फ अघि बढ्ने लक्ष्य राखेको उल्लेख गरे। साथै, नेकपा एमालेसँग पनि समाजवादी क्रान्तिको दिशामा सहकार्यको प्रयास गरे तापनि देशी-विदेशी प्रतिगामी शक्तिहरूको कारण ती प्रयास सफल हुन नसकेको आरोप लगाए।

त्यसै अवसरमा नेसपा (नेपाल समाजवादी पार्टी) का अध्यक्ष गंगानारायण श्रेष्ठले अतीतमा पार्टीबाट अलग हुनु गल्ती भएको स्वीकार गर्दै पार्टी एकताको पहल सुरु गरिएको जानकारी दिए।