काठमाडौँ । सङ्घीय संसद् प्रतिनिधिसभाको बैठक आज बस्दैछ। बैठक दिउँसो १ बजे सिंहदरबारमा हुने तय भएको छ।

आजको बैठकमा ‘राष्ट्रिय विधि विज्ञान प्रयोगशाला (स्थापना तथा सञ्चालन) विधेयक, २०८१’, ‘पर्यटन विधेयक, २०८१’ र ‘चलचित्र विधेयक, २०८१’ पेश गर्ने सम्भावित कार्यसूची रहेको छ।

सुनसरी । कोशी प्रदेश भ्रमण वर्ष–२०८२ को अवसरमा सुनसरीको वराहक्षेत्रमा ‘कोशी पर्यटन महोत्सव’ आयोजना हुने भएको छ। कोशी प्रदेश सरकारको सहयोगमा सञ्चालन हुने उक्त महोत्सव यही चैत २५ गतेदेखि २७ गतेसम्म आयोजना गरिने आयोजकले पत्रकार सम्मेलनमार्फत जानकारी दिएको हो।

सप्तकोशी नदी किनारलाई प्रमुख पर्यटकीय गन्तव्यका रूपमा प्रवर्द्धन गर्नुका साथै स्थानीय धार्मिक तथा सांस्कृतिक सम्पदाको प्रचारप्रसार र लोपोन्मुख कला–संस्कृतिको संरक्षण गर्ने उद्देश्यले महोत्सव आयोजना गरिएको अध्यक्ष अङ्गत राईले बताए।

महोत्सव अवधिभर मौलिक सांस्कृतिक नृत्य तथा झाँकी प्रदर्शन गरिनुका साथै कोशी टप्पु वन्यजन्तु आरक्षमा वन्यजन्तु तथा चरा अवलोकन, रामधुनी मन्दिर दर्शन तथा बोराबाँधमा सूर्यास्त अवलोकन गराउने कार्यक्रम तय गरिएको सहसंयोजक भविश श्रेष्ठले जानकारी दिए।

साँझको समयमा लाखे नाच र धान नाच प्रस्तुत गरिनेछ। महोत्सवको अन्तिम दिन चैत २७ गते आन्तरिक तथा बाह्य पर्यटकलाई वराहक्षेत्र मन्दिर दर्शन गराइनेछ। त्यसपछि बोराबाँधसम्म ¥याफ्टिङ, जेट बोट, एटिभी राइडिङ, नौका सयर तथा बगर खेलकुदजस्ता साहसिक गतिविधि सञ्चालन गरिने आयोजकले जनाएको छ।

महोत्सवमा नेपालका विभिन्न स्थान, भारतसहित अन्य मुलुकका पर्यटक तथा विशिष्ट अतिथिको सहभागिता रहने अपेक्षा गरिएको छ। आगन्तुकहरूका लागि स्थानीय अर्गानिक परिकारको व्यवस्था गरिनेछ।

पर्यटन कार्यालय धरानका अधिकृत केशव फुयाँलले यस्ता कार्यक्रमले कोशी प्रदेशको पर्यटन प्रवर्द्धनमा टेवा पुर्‍याउनुका साथै कोशी किनारको पर्यटकीय सम्भावनालाई अन्तर्राष्ट्रिय स्तरसम्म चिनाउन मद्दत पुग्ने विश्वास व्यक्त गरे।

म्याग्दी । म्याग्दीको प्रमुख धार्मिक तथा पर्यटकीय गन्तव्य मालिका धुरी अब तीनतर्फबाट सडक सञ्जालमा जोडिएको छ। समुद्री सतहदेखि करिब तीन हजार ४०० मिटर उचाइमा अवस्थित मालिका धुरी मालिका र रघुगंगा गाउँपालिकाको सिमानामा पर्छ।

मङ्गला गाउँपालिका–२ हिदीदेखि मालिकाको फेदीस्थित जुगेदेउरालीसम्म सडक मार्ग खुलेसँगै भक्तजन तथा पर्यटकका लागि यहाँ पुग्ने तेस्रो विकल्प थपिएको हो। यसअघि मालिका गाउँपालिकाको दरवाङ–बिम–बाइन्दफाँट हुँदै २०८० सालमा र रघुगंगा गाउँपालिकाको ठाडाखानी हुँदै २०८१ सालमा सडक सञ्जाल पुगेको थियो।

हिदीदेखि सुर्ती चढाउने डाँडा, गिद्रे देउराली र धौलेखर्क हुँदै जोगी देउरालीसम्म करिब ४.५ किलोमिटर सडक निर्माण गरिएको निर्माण समितिका अध्यक्ष थमप्रसाद पुनले जानकारी दिए। चालु आर्थिक वर्षमा गाउँपालिकाले विनियोजन गरेको ३० लाख रुपैयाँ बजेटबाट २.५ किलोमिटर सडक निर्माण गरिएको र बाँकी खण्ड स्थानीय तथा देश–विदेशमा रहेका व्यक्तिहरूको सहयोगबाट निर्माण भइरहेको उनले बताए।

हाल सडकको ग्रेड मिलाउने र घुम्ती सुधार गर्ने काम भइरहेको छ। सम्पूर्ण काम सम्पन्न भएपछि आम्दानी–खर्च विवरण सार्वजनिक गरिने जनाइएको छ।

सडक सञ्चालनमा आएपछि हिदीबाट करिब एक घण्टामै मालिका पुग्न सकिनेछ भने बेनीबाट हिदी हुँदै करिब चार घण्टामा मालिका पुग्न सकिने भएको छ। यसअघि पैदल यात्रा गर्दा हिदीदेखि मालिका पुग्न चारदेखि पाँच घण्टा लाग्ने गरेको थियो।

मालिका धुरीबाट धौलागिरि र अन्नपूर्ण हिमश्रृंखलाका दर्जनौं हिमालहरू, सूर्योदय–सूर्यास्त, पहाडी भू–दृश्य र वनजंगलको अवलोकन गर्न सकिन्छ। चण्डी, जेठी र कार्तिक पूर्णिमामा विशेष पूजाआजा हुने यस मन्दिरमा मनोकामना पूरा हुने जनविश्वास रहेको छ। विसं १९१० देखि पूजाआजा सुरु भएको इतिहास बोकेको यस स्थानमा कालिका, मालिका र जालपादेवीका मूर्तिहरू रहेका छन्।

काठमाडौँ । नेपाल राष्ट्र बैंकले आजका लागि विदेशी मुद्राको विनिमयदर सार्वजनिक गरेको छ। केन्द्रीय बैंकका अनुसार अमेरिकी डलर एकको खरिददर १४८ रुपैयाँ ६० पैसा र बिक्रीदर १४९ रुपैयाँ २० पैसा तोकिएको छ।

यस्तै, युरोपियन युरो एकको खरिददर १७१ रुपैयाँ ५३ पैसा र बिक्रीदर १७२ रुपैयाँ २२ पैसा रहेको छ भने युके पाउण्ड स्ट्रलिङ एकको खरिददर १९६ रुपैयाँ ६८ पैसा र बिक्रीदर १९७ रुपैयाँ ४७ पैसा कायम गरिएको छ। स्वीस फ्रयाङ्क एकको खरिददर १८६ रुपैयाँ ११ पैसा र बिक्रीदर १८६ रुपैयाँ ८६ पैसा निर्धारण गरिएको छ।

अष्ट्रेलियन डलर एकको खरिददर १०२ रुपैयाँ ९१ पैसा र बिक्रीदर १०३ रुपैयाँ ३२ पैसा, क्यानेडियन डलर एकको खरिददर १०६ रुपैयाँ ७६ पैसा र बिक्रीदर १०७ रुपैयाँ १९ पैसा तथा सिङ्गापुर डलर एकको खरिददर ११५ रुपैयाँ ६८ पैसा र बिक्रीदर ११६ रुपैयाँ १५ पैसा तोकिएको छ।

जापानी येन १० को खरिददर ९ रुपैयाँ ३१ पैसा र बिक्रीदर ९ रुपैयाँ ३५ पैसा रहेको छ भने चिनियाँ युआन एकको खरिददर २१ रुपैयाँ ५९ पैसा र बिक्रीदर २१ रुपैयाँ ६८ पैसा कायम गरिएको छ। साउदी अरेबियन रियाल एकको खरिददर ३९ रुपैयाँ ५८ पैसा र बिक्रीदर ३९ रुपैयाँ ७४ पैसा तथा कतारी रियाल एकको खरिददर ४० रुपैयाँ ७५ पैसा र बिक्रीदर ४० रुपैयाँ ९१ पैसा निर्धारण गरिएको छ।

त्यस्तै, थाइ भाट एकको खरिददर ४ रुपैयाँ ५७ पैसा र बिक्रीदर ४ रुपैयाँ ५९ पैसा, युएई दिराम एकको खरिददर ४० रुपैयाँ ४६ पैसा र बिक्रीदर ४० रुपैयाँ ६२ पैसा, मलेसियन रिङ्गेट एकको खरिददर ३६ रुपैयाँ ९० पैसा र बिक्रीदर ३७ रुपैयाँ ०५ पैसा तोकिएको छ। साउथ कोरियन वन १०० को खरिददर ९ रुपैयाँ ८८ पैसा र बिक्रीदर ९ रुपैयाँ ९२ पैसा, स्वीडिस क्रोनर एकको खरिददर १५ रुपैयाँ ७८ पैसा र बिक्रीदर १५ रुपैयाँ १५ रुपैयाँ ८४ पैसा तथा डेनिस क्रोनर एकको खरिददर २२ रुपैयाँ ९५ पैसा र बिक्रीदर २३ रुपैयाँ ०५ पैसा कायम गरिएको छ।

राष्ट्र बैंकका अनुसार हङकङ डलर एकको खरिददर १८ रुपैयाँ ९६ पैसा र बिक्रीदर १९ रुपैयाँ ०४ पैसा रहेको छ। कुवेती दिनार एकको खरिददर ४८४ रुपैयाँ १२ पैसा र बिक्रीदर ४८६ रुपैयाँ ०७ पैसा, बहराइन दिनार एकको खरिददर ३९४ रुपैयाँ १६ पैसा र बिक्रीदर ३९५ रुपैयाँ ७६ पैसा तथा ओमानी रियाल एकको खरिददर ३८५ रुपैयाँ ९७ पैसा र बिक्रीदर ३८७ रुपैयाँ ५३ पैसा तोकिएको छ।

त्यसैगरी, भारतीय रुपैयाँ १०० को खरिददर १६० रुपैयाँ र बिक्रीदर १६० रुपैयाँ १५ पैसा कायम गरिएको छ।

राष्ट्र बैंकले आवश्यकतानुसार विनिमयदर जुनसुकै समयमा संशोधन गर्न सकिने जनाएको छ। वाणिज्य बैंकहरूले तोक्ने दर फरक हुन सक्ने र अद्यावधिक जानकारी केन्द्रीय बैंकको वेबसाइटमार्फत उपलब्ध हुने पनि जनाइएको छ।

काठमाडौं । हाल देशमा पश्चिमी न्यून चापिय प्रणालीसँगै स्थानीय वायुको प्रभाव कायम रहेको छ। यसको असरका कारण गण्डकी, कर्णाली र सुदूरपश्चिम प्रदेशसहित देशका पहाडी तथा हिमाली भूभागमा सामान्यदेखि पूर्ण बदली रहेको छ भने अन्य भूभागमा आंशिक बदली देखिएको छ।

हाल गण्डकी प्रदेशका धेरै स्थानहरूमा, बागमती प्रदेशको पहाडी भूभागका केही स्थानहरूमा तथा अन्य पहाडी र हिमाली क्षेत्रमा छिटफुट रूपमा मेघगर्जन र चट्याङ्गसहित हल्का देखि मध्यम वर्षा भइरहेको छ। उच्च हिमाली क्षेत्रमा भने हिमपातसमेत भइरहेको छ।

आज दिउँसो देशका पहाडी र हिमाली भूभागमा सामान्य बदली रहने तथा बाँकी भूभागमा आंशिक बदली रहने मौसम पूर्वानुमान गरिएको छ। पहाडी तथा हिमाली क्षेत्रका थोरै स्थानहरूमा तथा कोशी प्रदेशको तराईका एक–दुई स्थानमा मेघगर्जन र चट्याङ्गसहित मध्यम वर्षाको सम्भावना रहेको छ।

आज राति पनि गण्डकी, लुम्बिनी, कर्णाली र सुदूरपश्चिम प्रदेशका साथै बागमती र कोशी प्रदेशका हिमाली क्षेत्रमा सामान्य बदली रहनेछ भने अन्य स्थानमा आंशिक बदली रहनेछ। लुम्बिनी, कर्णाली, सुदूरपश्चिम र गण्डकी प्रदेशका पहाडी तथा हिमाली भूभागका थोरै स्थानहरूमा तथा बागमती र कोशी प्रदेशका हिमाली क्षेत्रमा एक–दुई स्थानमा मेघगर्जन, चट्याङ्गसहित मध्यम वर्षा र हिमपातको सम्भावना रहेको छ।

काठमाडौं । इस्लामिक रिभोलुसनरी गार्ड कोर्प्स (आइआरजीसी) को गुप्तचर शाखाका प्रमुख माजिद खादेमी अमेरिका र इजरायलको आक्रमणमा मारिएका छन्।

आइआरजीसीले विज्ञप्ति जारी गर्दै खादेमीको सोमबार बिहान मृत्यु भएको पुष्टि गरेको हो।

इजरायलका रक्षामन्त्री इजरायल काट्ज र इजरायल रक्षा बल (आइडीएफ) ले उक्त कारबाहीको जिम्मेवारी लिएका छन्। आइडीएफले सामाजिक सञ्जालमार्फत यसलाई आइआरजीसीका लागि “अर्को ठूलो धक्का” भएको जनाएको छ।

यसअघि १५ जुन २०२५ मा इजरायली आक्रमणमा मोहम्मद काजेमी मारिएपछि चार दिनमै खादेमीलाई आइआरजीसी गुप्तचर संगठनको प्रमुख नियुक्त गरिएको थियो।

गत वर्ष अगस्टमा खादेमीले इरानको साइबर क्षेत्रको सार्वभौमसत्ता जोगाउन घरेलु इन्ट्रानेट प्रणाली विकासलाई प्राथमिकता दिनुपर्ने बताएका थिए।

काठमाडौं । प्रधानमन्त्री वालेन्द्र शाहले सोमबार लुम्बिनी प्रदेशबाट निर्वाचित प्रतिनिधिसभा सदस्यहरूसँग सिंहदरबारमा विस्तृत छलफल गरेका छन्। प्रधानमन्त्री तथा मन्त्रिपरिषद् कार्यालयको आयोजनामा बिहान ११ बजेदेखि दिउँसो १ बजेसम्म बैठक सञ्चालन भएको थियो।

छलफलमा चालु आर्थिक वर्षभित्र कार्यान्वयन गर्न सकिने कार्यक्रम, दीर्घकालीन पूर्वाधार विकास, कृषि, पर्यटन, स्वास्थ्य, शिक्षा, सुशासन तथा सामाजिक विषयहरूमा व्यापक बहस भएको थियो। सहभागी सांसदहरूले आफ्ना निर्वाचन क्षेत्रका समस्या, सम्भावना र योजनाहरू प्रस्तुत गरेका थिए।

अधिकांश सांसदहरूले कपिलवस्तु केन्द्रित विकासका प्रस्ताव अघि सारे। कपिलवस्तु–२ का सांसद विक्रम थापाले तिलौराकोटलाई “स्मार्ट हेरिटेज सिटी” का रूपमा विकास गर्ने प्रस्ताव राख्दै युनेस्को विश्व सम्पदा सूचीमा सूचीकृत गर्ने, डिजिटल प्रविधिमार्फत ऐतिहासिक अनुभव गराउने तथा अन्तर्राष्ट्रिय अनुसन्धान केन्द्र स्थापना गर्ने योजना प्रस्तुत गरेका थिए।

त्यसैगरी, वाणगंगा नदी नियन्त्रण, ५४ किलोमिटर तटबन्ध निर्माण तथा भारत सरकारको सहयोगमा स्वीकृत डीपीआर कार्यान्वयन गर्नुपर्ने माग गरिएको थियो।

कृषि क्षेत्रमा मल अभाव गम्भीर समस्या रहेको उल्लेख गर्दै तत्काल आपूर्ति व्यवस्थापन गर्न सांसदहरूले आग्रह गरेका छन्। साथै बाँदरको कारण कृषि क्षेत्रमा भइरहेको क्षतिबारे पनि चिन्ता व्यक्त गरिएको छ।

सिँचाइ, खानेपानी र स्वास्थ्य क्षेत्रमा विशेष जोड दिँदै जगदीशपुर ताल पुनःसंरचना गरी करिब ६२ सय हेक्टर जमिनमा सिँचाइ विस्तार गर्नुपर्ने विषय उठाइएको छ। कपिलवस्तुका विभिन्न स्थानमा आर्सेनिकयुक्त पानीका कारण ३० देखि ४५ हजार नागरिक जोखिममा रहेको उल्लेख गर्दै दीर्घकालीन समाधानको माग गरिएको छ।

भूमिहीन, सुकुम्बासी तथा अव्यवस्थित बसोवासीको व्यवस्थापन, लालपुर्जा वितरण र एकीकृत बस्ती विकासका विषयमा पनि छलफल भएको थियो।

पूर्वाधारतर्फ लुम्बिनीदेखि तिलौराकोटसम्म चार लेन सडक, मर्यादपुर–तिलौराकोट सडक, तथा पाल्पा, अर्घाखाँची, प्युठान, रोल्पा हुँदै सल्यान जोड्ने रणनीतिक सडक निर्माणलाई प्राथमिकता दिनुपर्ने माग गरिएको छ। कालिगण्डकी करिडोर, रिङरोड र ग्रामीण सडक स्तरोन्नतिको विषय पनि उठाइएको छ।

पर्यटन विकासतर्फ रामग्राम स्तूप, देवदह लगायत ऐतिहासिक तथा बौद्ध क्षेत्रहरूको एकीकृत विकास, इको–टुरिजम, ट्रेकिङ, होमस्टे र जडीबुटी आधारित अर्थतन्त्रको सम्भावना प्रस्तुत गरिएको छ।

शिक्षा क्षेत्रमा प्राविधिक शिक्षालय, डिजिटल शिक्षण प्रणाली तथा विश्वविद्यालय स्तरोन्नति, स्वास्थ्य क्षेत्रमा अस्पताल स्तरोन्नति, ट्रमा सेन्टर स्थापना र विशेषज्ञ सेवा विस्तारको माग गरिएको छ।

सामाजिक सद्भाव, धार्मिक सहिष्णुता कायम राख्न र सीमावर्ती क्षेत्रमा सुरक्षा सुदृढ गर्न सरकारको विशेष ध्यान आवश्यक रहेको पनि सांसदहरूले बताएका छन्।

छलफलमा सुशासन प्रवर्द्धनका लागि भ्रष्टाचार नियन्त्रणसम्बन्धी निकाय सुदृढ गर्नुपर्ने विषय पनि उठाइएको छ।

प्रधानमन्त्री शाहले सांसदहरूले उठाएका विषयहरूलाई प्राथमिकताका आधारमा कार्यान्वयन गर्ने प्रतिबद्धता व्यक्त गरेका छन्। संघ, प्रदेश र स्थानीय तहबीच समन्वय गर्दै लुम्बिनी प्रदेशको समग्र विकास अघि बढाउने निष्कर्षसहित बैठक सम्पन्न भएको छ।

काठमाडौँ । सञ्चार तथा सूचना प्रविधि मन्त्रालयले नतिजामा आधारित शासकीय व्यवस्थापन प्रणालीलाई प्रभावकारी बनाउने उद्देश्यले १० वटा प्रमुख सुधारात्मक कार्यक्रमसहितको विस्तृत कार्ययोजना स्वीकृत गरेको छ।

मन्त्रिपरिषद्को चैत १३ गतेको निर्णयअनुसार सार्वजनिक सेवा प्रवाहलाई नागरिकमैत्री, छरितो, पारदर्शी र प्रविधिमैत्री बनाउने लक्ष्यसहित कार्ययोजना कार्यान्वयनमा ल्याइएको मन्त्रालयका प्रवक्ता उदयबहादुर रानामगरले जानकारी दिए।

उनका अनुसार डिजिटल शासनलाई सुदृढ गर्दै सेवा प्रवाहमा सहजता, लागत न्यूनीकरण र समय बचत गर्ने उद्देश्यले विभिन्न प्राथमिकताका कार्यक्रम अघि बढाइएका छन्।

मन्त्रालयले नागरिक एपमार्फत प्रहरी प्रतिवेदन, राहदानी र सवारीचालक अनुमतिपत्रलगायत सेवाहरूलाई एकीकृत गर्दै ४५ दिनभित्र एकीकृत आवेदन प्रणाली सञ्चालनमा ल्याउने तयारी गरेको छ। यसमध्ये प्रहरी प्रतिवेदन प्राप्त गर्ने सेवा कार्यान्वयन भइसकेको छ।

त्यसैगरी, ९० दिनभित्र हुलाक सेवालाई सरकारी कुरियर सेवाका रूपमा विकास गरी राहदानी, सवारीचालक अनुमतिपत्र, शैक्षिक प्रमाणपत्र तथा सिमकार्डलगायत कागजात देशभर वितरण गर्ने योजना रहेको छ। स्वास्थ्य परीक्षणका नमुना सुरक्षित रूपमा प्रयोगशालासम्म पुर्‍याउने व्यवस्था पनि मिलाइनेछ।

यातायात व्यवस्था विभागबाट विवरण प्राप्त भएको २४ घण्टाभित्रै सवारीचालक अनुमतिपत्र छपाइ गरी वितरण गर्ने प्रणाली सुरु गरिएको छ। हाल बाँकी करिब २९ लाख लाइसेन्स आगामी असार मसान्तसम्म छपाइ सम्पन्न गर्ने लक्ष्य राखिएको छ।

नेपाल दूरसञ्चार प्राधिकरणको सहकार्यमा मोबाइल डेटा सेवामा सुधार गर्दै ९० प्रतिशत डेटा प्रयोग भएपछि सूचना दिने, ‘पे–एज–यू–गो’ विकल्प उपलब्ध गराउने तथा सदस्यता मोडेलमा सेवा सञ्चालन गर्ने व्यवस्था गरिनेछ।

सरकारी वेबसाइट र मोबाइल एपलाई प्रयोगकर्तामैत्री बनाउन २५० भन्दा बढी प्लेटफर्मलाई अपाङ्गतामैत्री र सहज प्रयोगयोग्य बनाइनेछ। प्रयोगकर्तालाई सहयोग गर्ने भिडियो सामग्रीसमेत तयार गरिनेछ।

यसैगरी, ३० दिनभित्र फोरजी सेवासम्बन्धी नीतिगत व्यवस्था परिमार्जन गरी गुणस्तर सुधार गर्न थप फ्रिक्वेन्सी उपलब्ध गराइनेछ। नेपाल टेलिकमका सेवामा ‘एकपटक विवरण दिएपछि पुनः नदिनु पर्ने’ वान टाइम केवाईसी प्रणाली लागू गरिनेछ। साथै इ–सिम वितरण, गुनासो व्यवस्थापन, हराएको सिम पुनःप्राप्ति तथा स्वामित्व हस्तान्तरणजस्ता सेवाहरू पूर्ण रूपमा अनलाइन गरिनेछन्।

मन्त्रालयले ‘एकल विन्दु सेवा’ सहायता कक्ष स्थापना गरी दूरसञ्चार सेवाको पहुँच सहज बनाउने जनाएको छ। साथै सूचना प्रविधि, विद्युतीय शासन, साइबर सुरक्षा, डाटा संरक्षण र कृत्रिम बौद्धिकतासम्बन्धी विधेयकहरू ९० दिनभित्र तयार गरिनेछन्।

स्वीकृत कार्ययोजना समयसीमाभित्र कार्यान्वयन गरी सार्वजनिक सेवा प्रवाहलाई थप प्रभावकारी, पारदर्शी र नागरिकमैत्री बनाउने मन्त्रालयले प्रतिबद्धता जनाएको छ।

काठमाडौँ । सर्वोच्च अदालतले ज्यान सम्बन्धी कसूरको अनुसन्धानका क्रममा हिरासतमा रहेका नेकपा एमालेका अध्यक्ष केपी शर्मा ओली र नेपाली कांग्रेसका नेता रमेश लेखकलाई चैत २५ गतेपछि थुनामुक्त गर्न परमादेश जारी गरेको छ।

न्यायाधीशद्वय विनोद शर्मा र सुनिलकुमार पोखरेलको संयुक्त इजलासले सोमबार यस्तो आदेश दिएको हो। काठमाडौँ जिल्ला अदालतबाट पछिल्लो पटक थपिएको ५ दिनको म्याद चैत २५ गते सकिने भएकाले सो अवधिभित्र अनुसन्धान सम्पन्न गरेर वा म्याद सकिएलगत्तै उनीहरूलाई हिरासतबाट मुक्त गर्न अदालतले निर्देशन दिएको छ।

अदालतले पक्राउ प्रक्रिया र म्याद थपलाई कानुनसम्मत ठहर गरेको छ। तर मानवीय तथा विशिष्ट परिस्थितिका कारण उनीहरूलाई निरन्तर थुनामा राखेर अनुसन्धान गरिरहनु आवश्यक नभएको ठहर गरेको हो।

ओली र लेखक दुवै आफ्ना माता–पिताको निधनपश्चात् आशौचमा रहेको र केपी शर्मा ओली गम्भीर बिरामी भई शिक्षण अस्पतालमा उपचाररत रहेको अवस्थालाई अदालतले प्रमुख आधार मानेको छ।

सोही घटनामा पक्राउ परेका तत्कालीन काठमाडौँका प्रमुख जिल्ला अधिकारी छविलाल रिजाललाई यसअघि नै हाजिर जमानीमा रिहा गरिएको सन्दर्भमा ओली र लेखकलाई मात्र थुनामा राखिरहनु न्यायोचित नहुने अदालतले उल्लेख गरेको छ।

अदालतका अनुसार बयान लगायतका मुख्य अनुसन्धान कार्य सम्पन्न भइसकेको देखिएकाले उनीहरूलाई हिरासत बाहिरै राखेर थप प्रक्रिया अघि बढाउन सकिनेछ।

सर्वोच्चको आदेशअनुसार प्रहरीले चैत २५ गतेभित्र वा सोअगावै अनुसन्धान सकेर मुलुकी फौजदारी कार्यविधि संहिता, २०७४ को दफा १५ बमोजिम हाजिर जमानी वा तारिखमा रहने गरी उनीहरूलाई रिहा गर्नुपर्नेछ।

भदौ २३ र २४ गते भएको प्रदर्शनका क्रममा भएको धनजनको क्षतिको घटनामा संलग्नताको आरोपमा उनीहरूलाई चैत १४ गते पक्राउ गरिएको थियो। उनीहरूको तर्फबाट पत्नीहरू राधिका शाक्य र यशोदा लेखकले सर्वोच्च अदालतमा बन्दीप्रत्यक्षीकरण रिट दायर गरेका थिए।

काठमाडौं । स्टक ब्रोकर एसोसिएसन अफ नेपालका पदाधिकारीहरूसँग भएको भेटमा अर्थमन्त्री स्वर्णिम वाग्लेले आगामी बजेट २०४८ यताकै रूपान्तरणकारी र ऐतिहासिक हुने दाबी गरेका छन्।

आज बिहान भएको भेटमा उनले नेपाललाई ‘ग्रे लिष्ट’बाट बाहिर ल्याउन सरकार सुशासन सुदृढ गर्न केन्द्रित रहेको बताए। “नेपाललाई ग्रे लिष्टबाट बाहिर ल्याउनु छ, त्यसका लागि सुशासनका काम गर्नुपर्छ,” उनले भने, “जनमत पनि यही हो, हामी यसैमा केन्द्रित छौँ।”

अर्थमन्त्री वाग्लेले राष्ट्रिय स्वतन्त्र पार्टी र सरकार निजी क्षेत्रविरोधी नभएको स्पष्ट पार्दै अर्थतन्त्र रूपान्तरण गर्ने दिशामा काम भइरहेको बताए। “आगामी बजेट २०४८ यताकै रूपान्तरणकारी र ऐतिहासिक हुनेछ,” उनले भने, “अब नेपालको अर्थतन्त्रका लागि स्वर्णिम समय आउँदैछ, हल्ला र गलत अफवाहको पछि नलागौँ।”

उनका अनुसार केही अनुसन्धान पुरानै भए पनि अन्तिम चरणमा पुगेका छन्। उनले अपराध गर्नेहरूलाई उन्मुक्ति नदिने तर कसैप्रति छानीछानी प्रतिशोध पनि नलिइने स्पष्ट पारे। साथै सरकार निजी क्षेत्रमैत्री रहेको दाबी गर्दै आफ्नो पहिलो निर्णयले नै त्यसको संकेत दिएको उनको भनाइ थियो।

शेयर बजारबारे उनले सरकारको धारणा स्पष्ट पार्दै आफ्नो पार्टी बजारप्रति उदार रहेको र घोषणापत्रमै स्पष्ट दृष्टिकोण राखिएको बताए। बजारमा फैलाइएका अफवाहप्रति सचेत रहन उनले सबैलाई आग्रह गरे।

भेटमा एसोसिएसनका पूर्वअध्यक्ष प्रियराज रेग्मी लगायत प्रतिनिधिहरूले बजारमा गलत हल्ला फैलिएको गुनासो गरेका थिए। उनीहरूले केही समूहले साना लगानीकर्तालाई त्रसित बनाउने उद्देश्यले अफवाह फैलाइरहेको बताएका थिए।

प्रतिनिधिहरूले संस्थागत लगानीकर्ताका लागि सहज वातावरण आवश्यक रहेको उल्लेख गर्दै निजी क्षेत्रमाथिको अनुसन्धान जायज भए पनि गोप्य रूपमा सञ्चालन हुनुपर्ने धारणा राखे। साथै पूँजीबजार सुधार कार्यदलका सुझावहरू कार्यान्वयन गर्न सरकारसँग माग गरेका थिए।