काठमाडौं । राष्ट्रपति कार्यालय शीतल निवासबाट चोरी भएको हात्तीको दाह्रा प्रकरणमा प्रहरीले पाँच जना युवालाई पक्राउ गरेको छ। काठमाडौं उपत्यका अपराध अनुसन्धान कार्यालयको टोलीले उनीहरूलाई दाह्राका टुक्रा तथा लागूऔषधसहित नियन्त्रणमा लिएको हो।

पक्राउ पर्नेहरूमा काठमाडौं तार्केश्वर–९ मनमैजुका २५ वर्षीय राजिव महर्जन, गोरखाको धार्चे–४ घर भई मनमैजु बस्ने २६ वर्षीय टेकप्रसाद गुरुङ, काठमाडौं महानगरपालिका–१७ का २७ वर्षीय आयुष महर्जन, बैतडीको डिलासैनी–३ घर भई टोखा बस्ने २४ वर्षीय पुरन बोहरा तथा गोरखाको अजिरकोट–४ घर भई मनमैजु बस्ने २० वर्षीय सन्तबहादुर भुजेल रहेका छन्।

काठमाडौं उपत्यका अपराध अनुसन्धान कार्यालयका प्रवक्ता एसपी शरद थापाका अनुसार मनमैजु क्षेत्रमा हात्तीको दाह्रा बिक्री–वितरण हुन लागेको विशेष सूचनाका आधारमा प्रहरी परिचालन गरिएको थियो।

प्रहरीले सुरुमा राजिव, आयुष र टेकप्रसादलाई नियन्त्रणमा लिएको थियो। सोधपुछका क्रममा उनीहरूले हात्तीको दाह्रालाई टुक्रा–टुक्रा पारेर लुकाएको खुलेको प्रहरीले जनाएको छ। प्रहरीले राजिवको घर खानतलासी गर्दा हात्तीको दाह्राका दुई टुक्रा तथा लागूऔषध ट्रामाडोल १५० ट्याब्लेट बरामद गरेको थियो।

अनुसन्धानका क्रममा थप संलग्नता खुलेपछि प्रहरीले पुरन बोहरालाई नियन्त्रणमा लिएको थियो। पुरनको बयानका आधारमा मनमैजुस्थित सन्तबहादुर भुजेलको कोठाबाट थप दुई टुक्रा दाह्रा बरामद गरिएको प्रहरीले जनाएको छ।

प्रहरीका अनुसार आरोपितहरूले चोरी गरिएको दाह्रा आपसमा बाँडफाँट गर्नका लागि टुक्रा–टुक्रा पारेका थिए। पक्राउ परेका पाँचै जनामाथि लागूऔषध तथा राष्ट्रिय निकुञ्ज तथा वन्यजन्तु संरक्षण ऐनअन्तर्गत थप अनुसन्धान भइरहेको छ।

अनुसन्धानका क्रममा बरामद गरिएको दाह्रा राष्ट्रपति कार्यालय शीतल निवासबाट चोरी भएको पुष्टि भएको प्रहरीले जनाएको छ। गत भदौ २३ र २४ गते भएको ‘जेनजी’ आन्दोलनका क्रममा शीतल निवास परिसरमा तोडफोड र आगजनी भएको थियो। सोही क्रममा हराएका दुई थान हात्तीका दाह्रा करिब नौ महिनापछि फेला परेको प्रहरीले जनाएको छ।

काठमाडौं । राष्ट्रिय प्रजातन्त्र पार्टी (राप्रपा) भित्रको आन्तरिक विवाद उत्कर्षमा पुगेपछि नेता डा. धवलशम्शेर राणाले पार्टी परित्याग गर्दै नयाँ राजनीतिक दल गठनको प्रक्रिया अघि बढाएका छन्।

राप्रपा छाडेर नयाँ राजनीतिक शक्ति निर्माणको तयारीमा रहेका राणाले अध्यक्ष राजेन्द्र लिङ्देनले आफूलाई पार्टीमा फर्कन र महाधिवेशनमा सहभागी हुन गरेको सार्वजनिक आह्वानलाई अस्वीकार गर्दै त्यसलाई ‘भ्रमपूर्ण अभिव्यक्ति’ को संज्ञा दिएका छन्।

बुधबार जारी गरेको विज्ञप्तिमार्फत राणाले राप्रपाको केन्द्रीय समिति वैधानिक रूपमा निष्क्रिय भइसकेको दाबी गर्दै पार्टीभित्रको संगठनात्मक संकट गहिरिएको बताएका छन्।

उनले राप्रपाले २०७८ मा सम्पन्न गरेको एकता महाधिवेशनपछि पार्टी विधानअनुसार चार वर्षे कार्यकाल पूरा गरिसकेको र थप गरिएको समयावधिसमेत सकिएकाले अहिलेको नेतृत्व संरचनाले वैधानिक आधार गुमाइसकेको जिकिर गरेका छन्।

राणाका अनुसार महाधिवेशन समयमै सम्पन्न गर्नका लागि एक वर्षअघि नै सुझाव समिति गठन गरिएको थियो र उक्त समितिले समयमै महाधिवेशन गर्न लिखित सुझाव दिएको भए पनि नेतृत्वले त्यसलाई बेवास्ता गरेको आरोप लगाए।

अध्यक्ष लिङ्देनले महाधिवेशनको तालिका निर्माणको जिम्मेवारी आफूलाई दिइएको तर आफू उत्तरदायित्वबाट पन्छिएको आरोप लगाएको विषयमा राणाले आपत्ति जनाउँदै नेतृत्वले आफ्ना सुझाव र वैधानिक निर्णयहरू कार्यान्वयन नगरेको बताएका छन्।

उनले नेतृत्वको कार्यशैली, आत्मकेन्द्रित प्रवृत्ति र निर्णय प्रक्रियामाथि प्रश्न उठाउँदै त्यसकै कारण पार्टीले राजनीतिक प्रभाव, वैचारिक आधार र जनविश्वास गुमाउँदै गएको दाबी गरेका छन्।

राणाले राप्रपालाई अहिले ‘मक्किएको र अलपत्र परेको घर’ जस्तो अवस्था पुगेको टिप्पणी गर्दै पुराना राष्ट्रवादी शक्ति र समूहलाई नयाँ वैकल्पिक अभियानमा एकताबद्ध हुन आह्वान गरेका छन्।

नयाँ राष्ट्रवादी शक्ति निर्माणका लागि देशव्यापी रूपमा नयाँ मोर्चा र राजनीतिक दल गठनको अभियान अघि बढाउने संकेत गर्दै राणाले आफ्नो राजनीतिक यात्राले नयाँ मोड लिएको बताएका छन्।

काठमाडौं । अध्ययन बिदाको नाममा लामो समयसम्म सेवामा नफर्किएर विश्वविद्यालयलाई आर्थिक नोक्सानी पुर्‍याएका त्रिभुवन विश्वविद्यालय (त्रिवि) का प्राध्यापकहरूले धमाधम रकम फिर्ता गर्न थालेका छन्।

अध्ययन बिदाको दुरुपयोगबारे सरकारको चासो र सक्रियता बढेसँगै हालसम्म ४१ जना प्राध्यापकले नियमविपरीत बुझेको रकम फिर्ता गरिसकेको त्रिविले जनाएको छ। विश्वविद्यालयका अनुसार यसबाट १० करोड ४६ लाख ५६ हजार ८०४ रुपैयाँ त्रिविको पेन्सन कोषमा जम्मा भएको छ।

छानबिन समितिका संयोजक डा. जीवन काफ्लेका अनुसार अध्ययन बिदामा गएर सेवामा नफर्किएका १९१ प्राध्यापकमध्ये ४१ जनाले रकम बुझाइसकेका छन्। साथै, थप ६२ जनाले रकम फिर्ता गर्न समितिसमक्ष निवेदन दिएका छन्, जसमध्ये ५४ जनालाई समितिले औपचारिक पत्राचार गरिसकेको छ।

त्रिविको नियमअनुसार शिक्षक तथा कर्मचारीले बढीमा पाँच वर्षसम्म अध्ययन बिदा पाउने व्यवस्था भए पनि अध्ययन बिदामा गएर सेवामा नफर्किने क्रम बढ्दा विश्वविद्यालयलाई दुई अर्ब रुपैयाँभन्दा बढी आर्थिक क्षति पुगेको अनुमान गरिएको छ।

शिक्षा तथा खेलकुद मन्त्री सस्मित पोखरेलको विशेष चासोपछि मन्त्रालयले कबुलियतनामाअनुसारको रकम फिर्ता प्रक्रिया तीव्र बनाउन निर्देशन दिएको थियो। त्यसपछि त्रिवि कार्यकारी परिषद्ले २०८१ पुस २५ गते डा. काफ्लेको संयोजकत्वमा तीन सदस्यीय छानबिन समिति गठन गरेको थियो।

समितिको अध्ययनअनुसार अध्ययन बिदा लिएर विदेश वा अन्यत्र गएर नफर्किएका १९१ जना तथा बिदा स्वीकृत गराएर पनि अध्ययन पूरा नगर्ने २०७ जना गरी कुल ३९८ प्राध्यापकबाट अध्ययन बिदाको दुरुपयोग भएको पाइएको छ।

समितिका अनुसार अध्ययन बिदाको दुरुपयोगका कारण विश्वविद्यालयले आर्थिक क्षतिमात्र होइन, शैक्षिक र नैतिक क्षति समेत व्यहोर्नुपरेको छ।

त्रिविका अनुसार बिदा दुरुपयोग गर्ने एक प्राध्यापकले न्यूनतम १० लाखदेखि अधिकतम ५० लाख रुपैयाँसम्म विश्वविद्यालयलाई फिर्ता गर्नुपर्ने देखिएको छ।

विश्वविद्यालय प्रशासनले अझै सम्पर्कमा नआएका प्राध्यापकहरूलाई तत्काल रकम फिर्ता गर्न आग्रह गरेको छ भने निर्धारित समयभित्र अटेर गर्नेहरूको नाम सार्वजनिक गर्ने तयारी भइरहेको जनाएको छ।

गण्डकी । विश्व पर्वतारोहण इतिहासमा विशेष महत्त्व राख्ने अन्नपूर्ण हिमालको पहिलो सफल आरोहण भएको दिन जुन ३ लाई गण्डकी प्रदेशभर विभिन्न कार्यक्रमसहित मनाइँदै छ। अन्नपूर्ण हिमालले पोखरासहित समग्र गण्डकी प्रदेशलाई अन्तर्राष्ट्रिय पर्यटन नक्सामा स्थापित गर्न महत्वपूर्ण योगदान पुर्‍याएको मानिन्छ।

सन् १९५० जुन ३ मा फ्रान्सेली पर्वतारोही मौरिस हर्जोग नेतृत्वको टोलीले म्याग्दीको नारच्याङ हुँदै उत्तरी मोहोडाबाट अन्नपूर्ण प्रथम हिमालको सफल आरोहण गरेको थियो। यही सफलतासँगै विश्व पर्वतारोहण क्षेत्रमा नयाँ अध्याय सुरु भएको मानिन्छ।

आठ हजार ९१ मिटर उचाइ रहेको अन्नपूर्ण प्रथम विश्वको पहिलो सफलतापूर्वक आरोहण गरिएको आठ हजार मिटरभन्दा अग्लो हिमाल हो। अन्नपूर्णको सफल आरोहणपछि मात्रै सन् १९५३ मा सर्वोच्च शिखर सगरमाथाको आरोहण सम्भव भएको इतिहासले देखाउँछ।

यस वर्ष पनि अन्नपूर्ण गाउँपालिका, ट्रेकिङ एजेन्सिज एसोसिएसन अफ नेपाल (टान) गण्डकी, अन्नपूर्ण सेन्चुरी पर्यटन समिति लगायतका संघसंस्थाले विविध कार्यक्रम आयोजना गरेका छन्। अन्नपूर्ण सेन्चुरी पर्यटन समितिले अन्नपूर्ण आधार शिविरदेखि घान्द्रुकसम्म अन्नपूर्ण म्याराथनसमेत आयोजना गरेको जनाएको छ।

पर्यटन व्यवसायीहरूका अनुसार अन्नपूर्ण हिमालको सफल आरोहणपछि पोखरासहित गण्डकी प्रदेशमा विदेशी पर्यटक आगमन र पर्वतीय पर्यटनको विकासले गति लिएको हो। अन्नपूर्ण क्षेत्र अहिले विश्वप्रसिद्ध पदयात्रा गन्तव्यका रूपमा स्थापित छ।

गण्डकी प्रदेशमा अन्नपूर्ण, धवलागिरि, मनास्लुजस्ता प्रमुख हिमशृङ्खला रहे पनि पर्वतीय पर्यटनको सम्भावना अझै पूर्ण रूपमा उपयोग हुन नसकेको पर्यटन क्षेत्रका सरोकारवालाहरू बताउँछन्।

विशेषज्ञहरूका अनुसार अन्नपूर्ण संरक्षण क्षेत्र, पदयात्रा मार्ग, हिमाल आरोहण र साहसिक पर्यटनलाई एकीकृत रूपमा प्रवर्द्धन गर्न सके गण्डकी प्रदेशको पर्यटन क्षेत्रले अझ ठूलो लाभ लिन सक्नेछ।

अन्नपूर्ण क्षेत्र अहिले ‘अन्नपूर्ण सर्किट’, अन्नपूर्ण आधार शिविर, मर्दी हिमाल, घान्द्रुक–मुल्डे–हिडन लेक लगायतका पदमार्गका कारण स्वदेशी तथा विदेशी पर्यटकको प्रमुख आकर्षणको केन्द्र बनेको छ।

काठमाडौं । समस्याग्रस्त सहकारी व्यवस्थापन समितिको कार्यालयले समस्याग्रस्त घोषणा गरिएका विभिन्न सहकारी संस्थाका सञ्चालकहरूको विवरण सार्वजनिक गरेको छ।

समितिको २०८३ जेठ ८ गतेको निर्णयअनुसार बचतकर्ताको रकम फिर्ता, सम्पत्ति खोजी तथा दायित्व व्यवस्थापन प्रक्रियालाई थप प्रभावकारी र पारदर्शी बनाउने उद्देश्यले उक्त विवरण सार्वजनिक गरिएको जनाएको छ।

सार्वजनिक विवरणमा समस्याग्रस्त घोषित सहकारी संस्थाका अध्यक्ष, उपाध्यक्ष, सचिव, कोषाध्यक्ष तथा सञ्चालक समितिका सदस्यहरूको नाम, ठेगाना र पारिवारिक विवरणसमेत समावेश गरिएको छ।

कार्यालयका अनुसार हालसम्म हाम्रो बहुउद्देश्यीय सहकारी संस्था, हाम्रो संसार बहुउद्देश्यीय सहकारी संस्था तथा नागरिक कल्याण बहुउद्देश्यीय सहकारी संस्था लगायतका संस्थाका पदाधिकारीहरूको नामावली सार्वजनिक सूचीमा समावेश गरिएको छ।

कार्यालयले प्रकाशित विवरणमा कुनै त्रुटि, फरक जानकारी वा अद्यावधिक गर्नुपर्ने अवस्था भए सम्बन्धित पक्षलाई तत्काल सम्पर्क गर्न आग्रह गरेको छ।

यसैबीच, सहकारीको बचत रकम वा सम्पत्ति हिनामिना गरी परिवार, आफन्त वा अन्य व्यक्तिको नाममा लुकाएर राखिएको जानकारी भए गोप्य रूपमा सूचना उपलब्ध गराउन आम नागरिकलाई पनि अनुरोध गरिएको छ।

समितिले समस्याग्रस्त सहकारीका सञ्चालकहरूलाई आफ्नो दायित्व फछ्र्योट गर्न, ऋण असुली प्रक्रियामा सहकार्य गर्न तथा सम्पत्ति पहिचान र व्यवस्थापनमा पूर्ण सहयोग गर्न निर्देशन दिएको छ।

तोकिएको समयभित्र सहयोग नगरे वा अटेर गरे प्रचलित कानुनअनुसार कडा कानुनी प्रक्रिया अघि बढाइने चेतावनीसमेत कार्यालयले दिएको छ।

काठमाडौं । नेपाल सरकारअन्तर्गतका विभिन्न सरकारी अस्पतालहरूमा लामो समयदेखि बिग्रिएर थन्किएका स्वास्थ्य उपकरणहरूको अवस्था पहिचान गरी पुनः सञ्चालनमा ल्याउने विषयमा महत्वपूर्ण छलफल भएको छ।

सरकारी अस्पतालमा प्रयोगविहीन बनेका स्वास्थ्य उपकरणहरूलाई राष्ट्रिय आविष्कार केन्द्रमार्फत मर्मत सम्भार गरी पुनः सञ्चालनमा ल्याउने विषयमा स्वास्थ्य तथा खाद्य स्वच्छता मन्त्री र राष्ट्रिय आविष्कार केन्द्रका अध्यक्ष महावीर पुनबीच विशेष भेटवार्ता तथा छलफल भएको हो।

छलफलमा सरकारी अस्पतालहरूमा बिग्रिएका उपकरणका कारण स्वास्थ्य सेवा प्रभावित भइरहेको अवस्थालाई सुधार गर्न आवश्यक समन्वय र सहकार्यलाई प्राथमिकता दिइएको बताइएको छ।

राष्ट्रिय आविष्कार केन्द्रको प्राविधिक क्षमता उपयोग गर्दै राज्यको ठूलो लगानीमा खरिद गरिएका तर मर्मत अभावमा प्रयोगविहीन बनेका उपकरणहरू पुनः सञ्चालनमा ल्याउन सके अस्पतालहरूको सेवा प्रवाहमा सुधार आउने र सरकारी स्रोत–साधनको प्रभावकारी उपयोग हुने विश्वास व्यक्त गरिएको छ।

दुवै पक्षबीच भएको छलफललाई स्वास्थ्य क्षेत्रको पूर्वाधार व्यवस्थापन सुधार तथा सार्वजनिक स्वास्थ्य सेवाको गुणस्तर वृद्धि गर्ने दिशामा सकारात्मक पहलका रूपमा हेरिएको छ।

काठमाडौं । भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालयले सहकारी क्षेत्रका बेथिति तथा अनियमिततामाथिको छानबिन प्रक्रिया तीव्र बनाएको छ। मन्त्रालयले सहकारीमा देखिएका समस्यासम्बन्धी आयोगको प्रतिवेदन कार्यान्वयन प्रक्रिया अघि बढाएको जनाएको छ।

नेपाल सरकारको मन्त्रिपरिषद् निर्णयअनुसार गठित ‘सहकारीमा भएको बेथिति जाँचबुझ आयोग, २०८२’ ले पेस गरेको प्रतिवेदनका सुझाव तथा सिफारिस कार्यान्वयन गर्ने क्रममा मन्त्रालयले सम्बन्धित पदाधिकारी तथा कर्मचारीसँग स्पष्टीकरण मागेको हो।

मन्त्रिपरिषद्को २०८३ जेठ ११ गते सार्वजनिक गरिएको प्रतिवेदनमा सहकारी दर्ता, कार्यक्षेत्र विस्तार, सेवा केन्द्र तथा शाखा कार्यालय स्वीकृति र एकीकरणलगायतका प्रक्रियामा सहकारी सिद्धान्त, मूल्य–मान्यता तथा प्रचलित कानुनविपरीत भूमिका देखिएको उल्लेख गरिएको छ।

प्रतिवेदनले १४ जना तत्कालीन पदाधिकारी तथा कर्मचारीको नाम किटान गर्दै थप छानबिन गर्न सिफारिस गरेको थियो। स्पष्टीकरण सोधिएका व्यक्तिहरूमा शाखा अधिकृतदेखि सहसचिव तहसम्मका कर्मचारीहरू रहेका छन्।

मन्त्रालयले सम्बन्धित व्यक्तिहरूलाई सात दिनभित्र आयोगको प्रतिवेदनमा उल्लेखित कार्यमा आफ्नो संलग्नता रहे–नरहेकोबारे आधारसहित लिखित जवाफ पेस गर्न निर्देशन दिएको छ। तोकिएको अवधिभित्र जवाफ प्राप्त नभए प्रचलित कानुनअनुसार आवश्यक प्रक्रिया अघि बढाइने मन्त्रालयले जनाएको छ।

थप अध्ययनका लागि समिति गठन

आयोगको प्रतिवेदन कार्यान्वयन तथा थप अध्ययनका लागि मन्त्रालयले प्रशासन महाशाखा प्रमुखको संयोजकत्वमा पाँच सदस्यीय समिति गठन गरेको छ।

समितिमा सहकारी नियमन प्राधिकरणका निर्देशक, मन्त्रालयको कानुन महाशाखाका उपसचिव, सहकारी विभागका उपरजिस्ट्रार तथा मन्त्रालयको सहकारी प्रवर्द्धन शाखाका उपसचिव सदस्य–सचिव रहने व्यवस्था गरिएको छ।

समितिलाई आयोगको प्रतिवेदनको विस्तृत अध्ययन, दीर्घकालीन सुधारका सुझाव तयार गर्ने, प्राप्त स्पष्टीकरणहरूको विश्लेषण गर्ने, नयाँ सहकारी ऐनको मस्यौदा तयारीमा सहयोग गर्ने तथा प्रतिवेदनमा औँल्याइएका फाइलहरूको अध्ययन–विश्लेषण गर्ने जिम्मेवारी दिइएको छ।

विभागीय मन्त्री प्रतिभा रावलले प्रतिवेदन कार्यान्वयनलाई प्राथमिकतामा राख्दै सहकारी क्षेत्रको संरचनागत सुधारका लागि ठोस योजना कार्यान्वयन सुरु भइसकेको बताइन्।

काठमाडौं । भारत भ्रमणमा रहेका राष्ट्रिय स्वतन्त्र पार्टी (रास्वपा) का सभापति रवि लामिछाने नेतृत्वको प्रतिनिधिमण्डलले भारतका गृहमन्त्री अमित शाहसँग भेटवार्ता गरेको छ।

मंगलबार भएको भेटवार्तामा नेपाल–भारतबीचको द्विपक्षीय सम्बन्ध, विकास साझेदारी, आपसी हित तथा सहकार्यका विविध विषयमा छलफल भएको जनाइएको छ।

भेटका क्रममा दुवै पक्षले नेपाल–भारतबीचको विशेष सम्बन्धलाई अझ सुदृढ बनाउँदै साझा हितका विषयमा सहकार्य विस्तार गर्ने प्रतिबद्धता व्यक्त गरेको बताइएको छ।

भेटमा भारतीय गृहमन्त्री अमित शाहले निर्वाचनमा रास्वपाले हासिल गरेको सफलताका लागि रवि लामिछानेलाई बधाई दिँदै नयाँ सरकारको सफल कार्यकालका लागि शुभकामना व्यक्त गरेका थिए।

रास्वपा नेतृत्वको भारत भ्रमणलाई नेपाल–भारत सम्बन्ध र राजनीतिक संवादको दृष्टिले अर्थपूर्ण रूपमा हेरिएको छ।

काठमाडौं । हाल देशमा उपल्लो वायुमण्डलमा रहेको पश्चिमी न्यून चापीय रेखा तथा स्थानीय वायुको आंशिक प्रभाव कायम रहेको मौसमविद्हरूले बताएका छन्।

हाल गण्डकी, लुम्बिनी, कर्णाली र सुदूरपश्चिम प्रदेशका साथै कोशी र बागमती प्रदेशका पहाडी तथा हिमाली भूभागमा आंशिकदेखि सामान्य बदली रहेको छ भने कोशी, मधेश र बागमती प्रदेशका तराई क्षेत्रको मौसम मुख्यतः सफा रहेको छ।

लुम्बिनी र कर्णाली प्रदेशका पहाडी तथा हिमाली क्षेत्रका केही स्थानहरूमा तथा कोशी, बागमती र गण्डकी प्रदेशका एक–दुई स्थानमा मेघगर्जन र चट्याङसहित हल्का वर्षा भइरहेको छ।

आज दिउँसो देशका पहाडी तथा हिमाली भूभागमा सामान्य बदली रहने तथा तराई क्षेत्रमा आंशिक बदली रहने पूर्वानुमान गरिएको छ। मौसम पूर्वानुमान अनुसार पहाडी तथा हिमाली क्षेत्रका केही स्थानहरूमा तथा लुम्बिनी र सुदूरपश्चिमका तराई क्षेत्रका एक–दुई स्थानमा मेघगर्जन, चट्याङसहित मध्यम वर्षा तथा उच्च हिमाली क्षेत्रमा हिमपातको सम्भावना रहेको छ।

यस्तै, मधेश प्रदेश तथा कोशी, बागमती र गण्डकी प्रदेशका तराई क्षेत्रमा तातो दिनको अवस्था कायम रहने सम्भावना रहेको मौसमविद्हरूले बताएका छन्।

आज राति हिमाली भूभागमा सामान्य बदली, पहाडी क्षेत्रमा आंशिक बदली तथा तराई क्षेत्रमा मौसम मुख्यतः सफा रहने अनुमान गरिएको छ। कोशी प्रदेशका पहाडी तथा हिमाली क्षेत्रका साथै बागमती, गण्डकी र कर्णाली प्रदेशका हिमाली भूभागका केही स्थानमा हल्का वर्षा तथा हिमपातको सम्भावना रहेको छ।

काठमाडौं । सूचना तथा सञ्चार मन्त्री डा. विक्रम तिमिल्सिना र स्याटेलाइट प्रविधिमा आधारित इन्टरनेट सेवा प्रदायक कम्पनी स्टारलिंककी निर्देशक रेबिका हन्टरबीच मंगलबार मन्त्रालयमा भेटवार्ता भएको छ।

भेटका क्रममा हन्टरले स्टारलिंकले नेपालमा इन्टरनेट सेवा सञ्चालनका लागि अनुमति प्राप्त गर्न चाहेको तर केही नीतिगत तथा कानुनी जटिलताका कारण प्रक्रिया अघि बढ्न नसकेको बताइन्।

उनले लाइसेन्स प्रक्रियामा स्वामित्व संरचनासम्बन्धी विषयहरू महत्वपूर्ण रहेको उल्लेख गर्दै सेवा विस्तार तथा व्यावसायिक सहकार्यका लागि नेपालका केही सेवा प्रदायकहरूसँग छलफल भइरहेको जानकारी दिइन्।

भेटमा सञ्चार मन्त्री डा. तिमिल्सिनाले नेपालको विद्यमान दूरसञ्चार नीति र कानुनी व्यवस्थाअनुसार आवश्यक प्रक्रिया पूरा गरेर सेवा सञ्चालन गर्न चाहने कम्पनीहरूका लागि कुनै अवरोध नरहेको बताएका छन्।

दुवै पक्षबीच नेपालमा स्याटेलाइट–आधारित इन्टरनेट सेवाको सम्भावना, नियामकीय प्रक्रिया तथा सम्भावित सहकार्यका विषयमा छलफल भएको जनाइएको छ।