विराटनगर । प्लानिङ ब्वाइज काठमाडौँले १६औँ संस्करणको अन्तर्राष्ट्रिय आमन्त्रण रेडबुल इटहरी गोल्डकप फुटबल प्रतियोगिताको फाइनलमा स्थान बनाएको छ। आयोजक राष्ट्रिय जागृति क्लबद्वारा इटहरीस्थित रंगशालामा रात्रिकालीन रूपमा सञ्चालन भइरहेको प्रतियोगिताअन्तर्गत शनिबार सम्पन्न सेमिफाइनल खेलमा प्लानिङ ब्वाइजले सातदोबाटो यूथ क्लब, ललितपुरलाई ६–१ को फराकिलो अन्तरले पराजित गर्दै उपाधि नजिक पुगेको हो।

खेलको सुरुआतदेखि नै आक्रामक देखिएको प्लानिङ ब्वाइजका लागि रोमन भुजेलले ५औँ मिनेटमा पहिलो गोल गर्दै टोलीलाई अग्रता दिलाए। त्यसपछि फागुराम थारुले २९औँ, ३३औँ, ६४औँ र ६८औँ मिनेटमा लगातार चार गोल गर्दै उत्कृष्ट प्रदर्शन गरे। खेलको अन्त्यतिर प्रताप सिंह राईले ७८औँ मिनेटमा थप एक गोल गर्दै जित सुनिश्चित गरे।

सातदोबाटो यूथ क्लबका तर्फबाट सकल रेग्मीले ४७औँ मिनेटमा सान्त्वना गोल फर्काए पनि त्यसले खेलको नतिजामा कुनै प्रभाव पार्न सकेन।

उत्कृष्ट प्रदर्शन गरेका प्लानिङ ब्वाइजका फागुराम थारु ‘प्लेयर अफ द म्याच’ घोषित भए। उनलाई नगद १० हजार रुपैयाँ प्रदान गरिएको कार्यक्रम संयोजक अनुरोध थापाले जानकारी दिए।

प्रतियोगिताको फाइनल खेल आगामी सोमबार वैशाख ७ गते हुनेछ। विजेता टोलीले १० लाख रुपैयाँ र उपविजेताले ५ लाख रुपैयाँ नगद पुरस्कार प्राप्त गर्नेछन्। साथै, सर्वोत्कृष्ट खेलाडीलाई १ लाख, सर्वाधिक गोलकर्तालाई २५ हजार तथा विभिन्न विधाका उत्कृष्ट खेलाडीलाई जनही २० हजार रुपैयाँ पुरस्कार प्रदान गरिने आयोजकले जनाएको छ।

काठमाडौं । राष्ट्रिय जेनजी नागरिक अभियानले पेट्रोलियम पदार्थको चर्को मूल्यवृद्धि फिर्ता लिन माग गर्दै नेपाल आयल निगम र सरकारलाई २४ घण्टे अल्टिमेटम दिएको छ। शनिबार राजधानीमा आयोजित पत्रकार सम्मेलनमार्फत अभियानले मूल्य समायोजन नभए आयल निगम घेराउ गर्ने चेतावनी दिएको हो।

अभियानका संयोजक सुनिल सिंहले २४ घण्टाभित्र मूल्य घटाउन सरकारलाई आग्रह गर्दै अन्यथा कडा आन्दोलनमा उत्रिने बताए। “जनतालाई पुराना संरचनाबाट मुक्त गर्ने भन्दै आएका नयाँ शक्तिहरूले नै महँगीको भारी थप्नु विडम्बना हो,” उनले भने, “यदि जनताको आवाज नसुने आयल निगमको अस्तित्वमै प्रश्न उठ्ने गरी आन्दोलन हुन्छ।”

सह–संयोजक अजय सोडारीले छिमेकी मुलुकहरूमा मूल्य स्थिर रहँदा नेपालमा अत्यधिक वृद्धि गरिएको भन्दै आपत्ति जनाए। “भारतमा पेट्रोलको मूल्य करिब ९५ रुपैयाँ हुँदा नेपालमा २१९ रुपैयाँ पुग्नु लाजमर्दो अवस्था हो,” उनले भने।

सोडारीले कर छुटको नाममा जनतालाई भ्रममा पारिएको आरोप लगाउँदै सरकारले मूल्यवृद्धि तत्काल फिर्ता लिनुपर्ने माग गरे। उनका अनुसार पेट्रोलको मूल्य प्रतिलिटर १५७ रुपैयाँबाट बढेर २१९ रुपैयाँ पुगेको छ भने डिजेल/मट्टितेल १४२ रुपैयाँबाट २३७ रुपैयाँसम्म पुगेको छ।

सरकारका निर्णयप्रति व्यापक विरोध हुनुपर्ने बेला समाज मौन रहेकोप्रति पनि उनले असन्तुष्टि व्यक्त गरे। “महँगी निरन्तर बढिरहँदा पनि सबै चुप लागेर बस्नु चिन्ताजनक छ,” उनले भने।

अभियानका अन्य वक्ताहरूले समेत इन्धनको मूल्यवृद्धिले जनजीवनमा गम्भीर असर परेको उल्लेख गर्दै तत्काल मूल्य समायोजन गर्न सरकारसँग माग गरेका छन्। साथै, मूल्य नघटाइए थप सशक्त आन्दोलन गर्ने चेतावनी दिएका छन्।

तेहरान । विश्वव्यापी ऊर्जा आपूर्तिको प्रमुख केन्द्र मानिने हर्मुज जलसन्धिमा इरानले पुनः पूर्ण नियन्त्रण कायम गरेको घोषणा गरेको छ।

केही समयअघि जलमार्गलाई केही सहज बनाउने संकेत दिएको इरानले आफ्नो निर्णय उल्ट्याउँदै अब कडा प्रतिबन्ध लागू गरेको जनाएको छ। यस आकस्मिक निर्णयले विश्व बजारमा तेलको मूल्य र भूराजनीतिक स्थिरतामा नयाँ चुनौती थपिएको छ।

इरानको संयुक्त सैन्य कमान्डद्वारा जारी वक्तव्यअनुसार उक्त जलमार्ग अहिले पूर्ण रूपमा इरानी सशस्त्र बलको कडा निगरानीमा रहेको छ। इरानी अधिकारीहरूले जलमार्ग ‘पुरानै अवस्था’मा फर्किएको उल्लेख गर्दै अमेरिकाले इरानी बन्दरगाहमाथिको नाकाबन्दी नहटाएसम्म कडा नियम जारी रहने स्पष्ट पारेका छन्।

तेहरानले आफ्नो निर्णयको बचाउ गर्दै अमेरिकामाथि विश्वास तोडेको आरोप लगाएको छ। अमेरिकाले सम्झौता कार्यान्वयन नगरी नाकाबन्दी कायम राखेकाले आफूहरू बाध्य भएको इरानको भनाइ छ।

यसअघि इरानले केही तेल ट्यांकर र व्यावसायिक जहाजलाई सीमित रूपमा आवागमन अनुमति दिएको थियो। तर अमेरिकाले सैन्य दबाब नघटाएपछि इरान पुनः कडा रुखमा फर्किएको हो।

उता अमेरिकी राजधानीबाट कडा प्रतिक्रिया आएको छ। अमेरिकी राष्ट्रपति डोनाल्ड ट्रम्पले इरानको कदम अस्वीकार्य भन्दै आलोचना गरेका छन्।

उनले सामाजिक सञ्जालमार्फत इरानले विश्व समुदायलाई धम्क्याइरहेको आरोप लगाउँदै यसले विश्व अर्थतन्त्रमा नकारात्मक असर पार्ने बताएका छन्। अमेरिकी प्रशासनले यस कदमलाई ‘समुद्री लुटपाट’को संज्ञा दिँदै कूटनीतिक तथा रणनीतिक प्रतिवाद गर्ने चेतावनी दिएको छ।

हर्मुज जलसन्धि विश्वको करिब २० प्रतिशत पेट्रोलियम आपूर्ति हुने अत्यन्त महत्वपूर्ण समुद्री मार्ग हो। यहाँ इरानले कडा नियन्त्रण कायम गरेसँगै अन्तर्राष्ट्रिय बजारमा चिन्ता बढेको छ।

हाल खाडी क्षेत्रमा अमेरिकी र इरानी सेनाको उपस्थिति बाक्लिँदै गएको छ। दुई देशबीचको बढ्दो तनावले मध्यपूर्वको अवस्था थप जटिल बन्दै गएको विश्लेषण गरिएको छ।

इरानले आफ्नो नियन्त्रणमा रहेका जहाजलाई इरानी जलक्षेत्रमार्फत मात्र आवतजावत गर्न र विशेष अनुमति लिन अनिवार्य बनाएको छ। यसले उक्त मार्ग प्रयोग गर्ने व्यावसायिक जहाजहरूको सुरक्षाप्रति विश्व समुदायमा गम्भीर चिन्ता थपिएको छ।

काठमाडौं । इरानले विश्व व्यापारको अत्यन्त महत्वपूर्ण जलमार्ग ‘हर्मुज जलसन्धि’ पुनः खुला गर्ने घोषणा गरेसँगै अन्तर्राष्ट्रिय बजारमा सुन र चाँदीको मूल्यमा उल्लेखनीय वृद्धि भएको छ।

न्युयोर्कको वस्तु विनिमय बजारमा भएको कारोबारअनुसार जुन महिनाका लागि तय भएको सुनको मूल्य करिब २ प्रतिशतले बढेको छ भने मे महिनाका लागि तय भएको चाँदीको मूल्य ४ प्रतिशतभन्दा बढीले उकालो लागेको छ।

इरानको उक्त निर्णयले कच्चा तेलको मूल्यमा भने तीव्र गिरावट आएको छ। विश्लेषकहरूका अनुसार तेलको मूल्य घट्दा छोटो अवधिमा मुद्रास्फीतिको दबाब कम हुने र बजारमा सकारात्मक संकेत देखिने सम्भावना रहेको छ।

यसैबीच, अमेरिकी डलर कमजोर हुनु र तेलको मूल्यमा आएको गिरावटका कारण लगानीकर्ताहरू बहुमूल्य धातुतर्फ आकर्षित भएका छन्। डलर कमजोर हुँदा सुन र चाँदीको माग बढ्ने भएकाले मूल्यमा वृद्धि देखिएको हो।

इरानी विदेशमन्त्री सैयद अब्बास अराघचीले सामाजिक सञ्जालमार्फत लेबनानमा भएको युद्धविरामको भावनाअनुसार हर्मुज जलसन्धि सबै व्यावसायिक जहाजका लागि खुला गरिएको जानकारी दिएका छन्। उनले युद्धविराम अवधिभर यो मार्ग पूर्ण रूपमा सञ्चालनमा रहने स्पष्ट पारेका छन्।

काठमाडौं। नेपालको राजनीतिमा केपी शर्मा ओली एक प्रभावशाली नामका रूपमा स्थापित रहँदै आएका छन्, जसले दशकौँसम्म कम्युनिस्ट आन्दोलन र राष्ट्रिय राजनीतिमा आफ्नो प्रभाव कायम राखे।

तर २०८३ वैशाखसम्म आइपुग्दा नेकपा (एमाले) भित्रको आन्तरिक र बाह्य अवस्था हेर्दा गम्भीर प्रश्नहरू उठ्न थालेका छन्—के ‘ओली युग’ वास्तवमै ओरालो लाग्दै छ? के उनका विश्वासपात्रहरू समेत टाढिँदै छन्?

हालैको आम निर्वाचनमा एमालेले अपेक्षाअनुसार नतिजा ल्याउन नसक्दा पार्टीभित्र असन्तुष्टि चुलिएको छ। त्यससँगै अध्यक्ष ओली आफैं कानुनी झमेला र हिरासतको अवस्थाबाट गुज्रिनुले नेतृत्वमाथि थप दबाब सिर्जना भएको देखिन्छ।

यो हार केवल सिट संख्यामा सीमित नभई वैचारिक र संगठनात्मक कमजोरीका रूपमा पनि विश्लेषण भइरहेको छ। ‘ओली पथ’ माथि जनमतले प्रश्न उठाएको हो कि भन्ने बहस पार्टीभित्र तीव्र बनेको छ।

पार्टीभित्र देखिएको हस्ताक्षर अभियान, विशेष महाधिवेशनको माग र नेतृत्व परिवर्तनको आवाज सामान्य असन्तुष्टि नभई गहिरो असन्तुलनको संकेत मानिएको छ। पहिले ओलीका निर्णयमा समर्थन जनाउने नेताहरू नै अहिले ‘पार्टी पुनर्गठन’ को एजेन्डा अघि सार्दै देखिनु आन्तरिक समीकरण फेरिएको प्रमाण हो।

विश्लेषकहरूका अनुसार निर्णय प्रक्रियामा अत्यधिक केन्द्रीकरण, टिकट वितरणमा विवाद, र सीमित ‘कोर टिम’ मा निर्भरता जस्ता कारणले पार्टीभित्र दूरी बढाएको छ। तल्लो तहका कार्यकर्तामा देखिएको निराशाले नेतृत्वप्रति विश्वास कमजोर बनाएको संकेत गर्छ।

अहिले एमालेभित्र पुरानो नेतृत्वलाई निरन्तरता दिने कि नयाँ पुस्तालाई अवसर दिने भन्ने बहस चर्किएको छ। कतिपय नेताहरू खुला रूपमा नबोले पनि ‘पार्टी र देशको आवश्यकता’ भन्दै परिवर्तनको संकेत गर्न थालेका छन्।

राजनीतिमा नजिकका सहयोगीहरूको मौनता वा असहयोगलाई सत्तासमीकरण परिवर्तनको संकेतका रूपमा लिइन्छ। यही अवस्था अहिले एमालेमा देखिँदै गएको छ।

ओलीको आगामी राजनीतिक यात्रा कस्तो हुने भन्ने प्रश्न अझै खुला छ। तर यथार्थ के हो भने, हिजोको प्रभाव र आजको चुनौतीबीचको दूरी घटाउन उनलाई कठिन हुने देखिन्छ। अब एमालेको भविष्य धेरै हदसम्म नेतृत्वको निर्णय क्षमतामा निर्भर रहनेछ—तर एउटा प्रश्न भने कायम छ: के एमाले अब ओली बिनाको मार्गतर्फ अघि बढ्न तयार हुँदैछ?

काठमाडौं। विशेष महाधिवेशनबाट सभापति बनेका गगन थापा नेतृत्वको कार्यसमितिलाई अधिकारिकता दिने सर्वोच्च अदालतको फैसलालाई नेपाली कांग्रेसको देउवा पक्षले अन्ततः स्वीकार गर्ने निष्कर्ष निकालेको छ।

शनिबार बसेको देउवा पक्षको बैठकले अदालतको निर्णयलाई मान्ने निर्णय गरेको हो। कांग्रेस नेता मिन विश्वकर्मा ले पार्टीभित्र मतभेद भए पनि स्वतन्त्र न्यायपालिकाको निर्णय स्वीकार गर्ने परम्पराअनुसार अघि बढ्ने बताए।

उनका अनुसार कांग्रेसले सधैं न्यायालयका निर्णयलाई आत्मसात गर्दै आएको छ। यसपटक फैसलाप्रति असन्तुष्टि भए पनि संस्थागत मर्यादालाई ध्यानमा राख्दै स्वीकार गर्ने निर्णय गरिएको हो।

‘अदालतमा दुवै पक्ष आफ्ना-आफ्ना दाबी लिएर गएका थिए। त्यसक्रममा गतिविधि बढाउनु स्वाभाविक थियो,’ उनले भने, ‘हामीले पनि त्यही गरेका हौं। अर्को पक्षले गैरकानुनी भन्नु निरर्थक र हास्यास्पद थियो।’

विश्वकर्माले सर्वोच्च अदालतले राजनीतिक दलसम्बन्धी ऐनको व्याख्या गरेको विषयमा केही असन्तुष्टि रहेको संकेत गरे। साथै देशभर पार्टी एकताको आवश्यकता बढ्दै गएको उल्लेख गर्दै अब सबै पक्ष पार्टीलाई कसरी अघि बढाउने भन्ने विषयमा केन्द्रित हुने बताए।

उनले सभापति गगन थापा कै काँधमा पार्टी एकताको जिम्मेवारी रहेको पनि स्पष्ट पारे।

यसअघि देउवा पक्षले थापाको नेतृत्व अस्वीकार गर्दै पूर्णबहादुर खड्का लाई कार्यवाहक सभापतिका रूपमा प्रस्तुत गर्दै निर्वाचन आयोग र अदालतमा दाबी गर्दै आएको थियो।

काठमाडौं । नेकपा एमालेका अध्यक्ष केपी शर्मा ओली शनिबार अस्पतालबाट डिस्चार्ज भएका छन्।

त्रिवि शिक्षण अस्पतालबाट साँझ डिस्चार्ज भएको जानकारी उनको सचिवालयले दिएको हो। उनको पत्थरीको सफल शल्यक्रिया गरिएको थियो।

जेनजी आन्दोलनसम्बन्धी घटनाको छानबिन गर्न गठित उच्चस्तरीय आयोगको प्रतिवेदनका आधारमा अनुसन्धानका क्रममा प्रहरी हिरासतमा रहेका उनी पक्राउ परेदेखि नै अस्पतालमा उपचाररत थिए।

यसअघि २६ चैतमा अदालतले उनलाई रिहा गर्न आदेश दिएको थियो। तर स्वास्थ्य अवस्था पूर्ण रूपमा सुधार नभएकाले उनी चिकित्सकको निगरानीमा अस्पतालमै बस्दै आएका थिए। अहिले स्वास्थ्यमा सुधार आएपछि उनलाई डिस्चार्ज गरिएको हो।

काठमाडौं । काठमाडौंको ऐतिहासिक असन क्षेत्रको मौलिकता संरक्षण र पुनरुत्थानका लागि हरेक शनिबार विशेष कार्यक्रम सञ्चालन गरिने भएको छ। वडा नं. २७ कार्यालयको नेतृत्वमा अन्नपूर्ण आरसीटी क्लब, स्थानीय क्लब, टोल सुधार समिति, गुठियार तथा सरोकारवालाको सहभागितामा कार्यक्रम सुरु गरिने जानकारी शुक्रबार आयोजित पत्रकार भेटघाटमा दिइएको हो।

महानगरपालिकाको सभा कक्षमा कार्यवाहक प्रमुख सुनिता डंगोलसहित आयोजित कार्यक्रममा प्रवक्ता नवीन मानन्धरले कार्यक्रमबारे जानकारी दिएका थिए। कार्यक्रममा प्रमुख प्रशासकीय अधिकृत सरोज गुरागाईं, सम्पदा तथा पर्यटन समितिका संयोजक आशामान संगत, वडा नं. २७ का अध्यक्ष योगेशकुमार खड्गी र वडा नं. २५ का अध्यक्ष राजेश डंगोललगायतको उपस्थिति रहेको थियो।

कमलाक्षी चोक, भोटाहिटी र महाबौद्ध हुँदै असनसम्मका क्षेत्रमा कार्यक्रम सञ्चालन गरिनेछ। कार्यक्रम हुने प्रत्येक शनिबार उक्त क्षेत्रमा सवारी साधन प्रवेशमा रोक लगाइनेछ।

महानगरपालिकाले मूर्त, अमूर्त, प्राकृतिक तथा अभिलेख सम्पदाको संरक्षण, संवर्धन र प्रवर्धनमा निरन्तर काम गरिरहेको जनाउँदै यस कार्यक्रमले काठमाडौंको सांस्कृतिक पहिचान, परम्परागत जीवनशैली र संस्कार–संस्कृतिको पुस्तान्तरणमा टेवा पुग्ने विश्वास व्यक्त गरिएको छ।

२०८३ वैशाख ५ गतेदेखि ‘जीवन्त असन’ नारासहित सुरु हुने यस अभियानले आधुनिकतासँगै हराउँदै गएको असन बजारको सांस्कृतिक र ऐतिहासिक स्वरूप पुनर्जीवित गर्ने लक्ष्य लिएको छ।

पछिल्लो समय बढ्दो भीडभाड र सवारी चापका कारण भित्री सहरमा व्यवस्थापन चुनौती बढ्दै जाँदा परम्परागत चिनारी हराउँदै गएको छ। नुनदेखि सुनसम्म पाइने बजार, परम्परागत उपचार प्रणाली र सांस्कृतिक अभ्यासहरू क्रमशः लोप हुँदै गएका छन्, जसले काठमाडौंको पहिचानमै असर पारिरहेको छ।

महानगरपालिकाले यस्ता कार्यक्रममार्फत समुदाय, गुठियार र सरोकारवालासँग सहकार्य गर्दै परम्परागत सम्पदाको संरक्षण र प्रवर्द्धनलाई अझ सशक्त बनाउने जनाएको छ।

काठमाडौं । नेपाली कांग्रेसको संसदीय दलको बैठक आज (शनिबार) पुनः बस्ने भएको छ। शुक्रबारको बैठकले दलको नेता टुंगो लगाउन नसकेपछि सहमति खोज्न फेरि बैठक बोलाइएको हो।

दलको नेताका लागि अर्जुननरसिंह केसी र भीष्मराज आङ्देम्बे प्रमुख दाबेदारका रूपमा रहेका छन्। प्रतिनिधिसभामा कांग्रेसका ३८ सांसद छन्।

कांग्रेसले सर्वसम्मत रूपमा दलको नेता चयन गर्ने प्रयास जारी राखेको छ।