काठमाडौं: माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ ले पूर्वराजा ज्ञानेन्द्र शाहप्रति तीव्र आलोचना गर्दै विभिन्न आरोप लगाएका छन्।
शुक्रबार सिन्धुपाल्चोकको मेलम्ची नगरपालिकामा आयोजित माओवादी केन्द्रको तेस्रो नगर सम्मेलनलाई सम्बोधन गर्दै उनले पूर्वराजालाई ‘ठूला मूर्ति चोर’ र ‘वंश नास गर्ने’ व्यक्ति भन्दै कटाक्ष गरे। उनले राजसंस्थालाई पुनःस्थापित गर्ने प्रयासहरूप्रति चेतावनीसमेत दिएका छन्।
उनले भने, “धेरै चुरीफुरी नगरे हुन्छ। इतिहासलाई नेपाली जनताले बिर्सेका छैनन्। दरबार हत्याकाण्ड कसले गर्यो भन्ने पनि जनतालाई थाहा छ। धेरै मुर्खता पहिला भइसकेका छन्, अर्को मुर्खता गरे नेपाली जनता र राजनीतिक दलहरू उदार हुने छैनन्।”
पूर्वराजा ज्ञानेन्द्रको पुन: सक्रियताप्रति संकेत गर्दै प्रचण्डले पछिल्ला घटनाक्रमलाई दुस्साहसको रूपमा व्याख्या गरे। उनले भने, “यो जुन नौटंकीहरू देखाइँदै छ, नेपाली जनताले सबैकुरा बुझेका छन्। २५० वर्ष शासन गरेका राजाहरूले देशलाई कहाँ पुर्याए? ठूला मूर्ति चोर को हुन्? सुन तस्करीमा को को संलग्न थिए? नेपाली जनताले बिर्सिएको ठानेर भ्रममा नपर्नुहोस।”
प्रचण्डले दरबार हत्याकाण्डबारे पुनः छानबिन हुनुपर्ने धारणा पनि व्यक्त गरे। उनले पहिलो कार्यकालमै छानबिनको पहल गर्ने योजना रहे पनि, कार्यकाल छोटिएपछि त्यो सम्भव नभएको उल्लेख गरे। उनले भने, “मैले पहिलो पटक प्रधानमन्त्री हुँदा दरबार हत्याकाण्डको पुनः छानबिन हुनुपर्छ भनेको थिएँ। यदि पाँच वर्ष शासन गर्न पाएको भए, छानबिन गरी दोषीलाई इतिहासको कठघरामा उभ्याउने थिएँ।”
उनको अभिव्यक्तिले नेपाली राजनीतिक वृत्तमा थप बहस निम्त्याउने देखिन्छ।
