भर्जिनिया, स्यानटिली: अमेरिकाको भर्जिनियाको स्यानटिली सहरमा पोखरीमा गाडी डुब्दा दुई नेपालीको मृत्यु भएको छ। मृतकमध्ये ५५ वर्षीय कर्ण खड्का र २० वर्षीय निश्चल भट्ट रहेका छन्।
एनबीसी वाशिंगटनका अनुसार, यो घटना जनवरी ९ बिहीबार बिहान एउटा होटल बाहिरको पोखरीमा भएको हो। उक्त स्थानमा गाडी डुबेको अवस्थामा भेटिएको थियो, जसमा दुईजनाको शव फेला परेको थियो। शवको पहिचानपछि दुबै नेपाली नागरिक भएको पुष्टि भएको हो।
खड्का गाडीका चालक थिए भने भट्ट यात्रु रहेको खुल्न आएको छ। रिपोर्टअनुसार, गाडी आंशिक रूपमा हिउँले जमेको पानीमा डुबेको थियो, जसका कारण दुबैजना गाडीभित्र फसेका थिए।
खड्का स्थानीय विङ्गेट नामक संस्थामा काम गर्थे भने भट्टले जागिरका लागि आवेदन दिने योजना बनाएका थिए। उनीहरू आपसमा साथी रहेको र भट्ट खड्कासँग कामको प्रक्रियाबारे छलफल गर्न गएका हुन सक्ने अनुमान गरिएको छ।
यो घटनापछि नेपाली समुदायमा शोक छाएको छ। स्थानीय प्रहरी र आपतकालीन सेवा निकायले घटनाको अनुसन्धान गरिरहेका छन्। गाडी डुब्ने कारणमा सडक सतह चिप्लो हुनु वा अन्य प्राविधिक समस्या हुन सक्ने आशंका गरिएको छ।
यस घटनाले पुनः जाडो मौसममा गाडी चलाउँदा सतर्क रहनु पर्ने चेतना दिलाएको छ। मृतकको परिवारप्रति श्रद्धाञ्जली व्यक्त गर्दै नेपाली समुदायले सहयोग संकलन अभियान सुरु गरेको छ।
