काठमाडौं । नेपाल कम्युनिष्ट पार्टी (एमाले)का अध्यक्ष केपी शर्मा ओलीले चुनाव नजिकिँदै गर्दा झापा क्षेत्र नं. ५ मा घरदैलो अभियान तीव्र बनाएका छन्।

ओलीले गौरादह क्षेत्रका मियाटोली, दुर्गाचोक, मजुवालगायत बस्तीमा पुगेर मतदातासँग प्रत्यक्ष भेटघाट गरेका हुन्। उनले स्थानीय बासिन्दासँग संवाद गर्दै पार्टीका एजेन्डा र आगामी योजनाबारे जानकारी गराएका थिए।

उम्मेदवार स्वयं घर–घरमा पुगेर मत माग्दा चुनावी माहोल थप तातिएको छ। कार्यकर्ताहरू पनि सक्रिय रूपमा परिचालन भएका छन् भने स्थानीय तहमा चुनावी चहलपहल बढेको देखिन्छ।

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले फागुन २१ गते हुने निर्वाचनमा रास्वपालाई प्रतिपक्षविहीन बनाउने गरी मत दिन आह्वान गरेका छन्। शुक्रबार चितवनको गेस्ट हाउस चौरमा आयोजित ‘परिवर्तन उद्घोष’ कार्यक्रममा उनले पुराना दललाई पाँच वर्ष सडकमा बस्ने प्रतिपक्ष बनाउने गरी मत दिन आग्रह गरे।

‘यो पटक अन्य पार्टीले एक सिट पनि जित्नु हुँदैन। यता पनि रास्वपा, उता पनि रास्वपा,’ उनले भने, ‘उहाँहरूले इतिहासमा गरेका योगदानको कदरस्वरूप पाँच वर्ष सडकको प्रतिपक्ष बनाउनुपर्छ।’

मौन अवधि सुरु हुन तीन दिन बाँकी रहँदा रास्वपाले रविको निर्वाचन क्षेत्र चितवन–२ मा शक्ति प्रदर्शन गरेको हो। कार्यक्रममा पार्टीले भावी प्रधानमन्त्रीका रूपमा प्रस्तुत गरेका वरिष्ठ नेता बालेन्द्र शाह (बालेन), उपसभापति डा. स्वर्णिम वाग्ले, चितवन–१ का उम्मेदवार हरि ढकाल र चितवन–३ की उम्मेदवार सोविता गौतम सहभागी थिए। ‘निलो चितवन, निलो क्रान्ति’को उद्गम जिल्ला भएकाले देशभर परिवर्तनको घण्टी बज्ने रविको दाबी थियो।

सहकारी ठगी प्रकरणबारे बोल्दै रविले गगन थापाले प्रमाण भएको दाबी गरेको ६५८ दिन बितिसक्दा पनि प्रमाण सार्वजनिक गर्न नसकेको आरोप लगाए। पुर्पक्षमा पठाउने अदालतको आदेश कार्यान्वयनका क्रममा एक प्रहरी अधिकृतले आफूलाई राति शयनकक्षमै पुगेर ‘अन्तिम इच्छा’ सोधेको भन्दै उनले असन्तोष व्यक्त गरे। ‘मेरो अन्तिम इच्छा के हो? फागुन २१ गते भोटबाट देखाइदिनुहोला,’ उनले भने।

कार्यक्रममा बालेन शाहले वर्तमान राज्य सञ्चालनप्रति व्यंग्य गर्दै देश हेटौँडा सिमेन्ट कारखानाजस्तै अलपत्र परेको टिप्पणी गरे। ‘सबै संरचना छन्, तर चल्दैनन्। हामीलाई चलाउने जिम्मा दिनुस्, हामी चलाउँछौँ,’ उनले भने।

उपसभापति डा. स्वर्णिम वाग्लेले लामो समयदेखि जरा गाडेर बसेको भ्रष्ट नेतृत्व विस्थापन गर्न यो निर्वाचन निर्णायक जनमत भएको बताए। उनले दलीय सेन्डिकेट अन्त्य गरी सुशासन स्थापना गर्ने प्रतिबद्धता व्यक्त गरे।

चितवन–१ का उम्मेदवार हरि ढकालले आसन्न निर्वाचनलाई ‘जनमत संग्रह’ को संज्ञा दिँदै १५१ सिट जितेर आवश्यक कानुन संशोधन गर्ने दाबी गरे। चितवन–३ की उम्मेदवार सोविता गौतमले सही नेतृत्व छनोट गर्न नसके देशले ‘दिशा होइन, दशा’ भोग्नुपर्ने चेतावनी दिइन्।

रास्वपा नेताहरूले फागुन २१ को निर्वाचनलाई ‘नयाँ राजनीतिक युग’ सुरु गर्ने अवसरका रूपमा प्रस्तुत गरेका छन्।

जेनेभा। मध्यपूर्वमा बढ्दो युद्ध जोखिमका बीच इरानको आणविक कार्यक्रमबारे United States र Iranबीच भएको पछिल्लो अप्रत्यक्ष वार्ता कुनै ठोस सहमतिविना टुंगिएको छ। जेनेभामा बिहीबार घण्टौँ चलेको संवादपछि दुवै पक्ष बाहिरिए पनि तनाव घट्ने स्पष्ट संकेत देखिएको छैन।

वार्ताको मध्यस्थता गरिरहेका ओमानका विदेशमन्त्री बद्र अल-बुसाइदीले ‘उल्लेखनीय प्रगति’ भएको दाबी गरे पनि औपचारिक सहमति सार्वजनिक भएन। वार्ता अन्त्य हुनुअघि इरानी राज्य सञ्चारमाध्यमले तेहरानले युरेनियम संवर्धन जारी राख्ने अडान दोहोर्‍याएको, संवर्धित सामग्री विदेश पठाउने प्रस्ताव अस्वीकार गरेको तथा अन्तर्राष्ट्रिय प्रतिबन्ध हटाइनुपर्ने माग कायम राखेको जनाएको थियो।

अमेरिकी राष्ट्रपति Donald Trump इरानको आणविक कार्यक्रम पूर्ण रूपमा रोक्ने सहमति चाहन्छन्। तर इरानले शान्तिपूर्ण प्रयोजनका लागि युरेनियम संवर्धन गर्ने अधिकार आफ्नो भएको बताउँदै लामो दूरीको क्षेप्यास्त्र कार्यक्रम वा Hamas र Hezbollahलाई समर्थनबारे छलफल गर्न अस्वीकार गर्दै आएको छ।

आगामी हप्ता International Atomic Energy Agency (आइएइए) को मुख्यालय भियनामा प्राविधिक तहका वार्ता जारी रहने जनाइएको छ। सम्भावित सहमतिमा आइएइएको भूमिका निर्णायक हुने अपेक्षा गरिएको छ।

इरानका विदेशमन्त्री Abbas Araghchiले यस चरणलाई ‘सबैभन्दा गहन र लामो वार्ता’ बताएका छन्। सम्भावित युद्ध ‘विनाशकारी’ हुने चेतावनी दिँदै उनले अमेरिकी आक्रमण भए क्षेत्रीय रूपमा तनाव फैलिन सक्ने संकेत गरे। इरानले अमेरिकी सैन्य अड्डा र Israelलाई समेत सम्भावित लक्ष्य मान्ने चेतावनी दिँदै आएको छ।

इन्टरनेसनल क्राइसिस ग्रुपका विश्लेषक अली वेजका अनुसार वार्तापछि अमेरिकी टोली तुरुन्तै नहट्नु सकारात्मक संकेत हुन सक्छ, जसले केही साझा आधार अझै बाँकी रहेको देखाउँछ।

सन् २०१५ को आणविक सम्झौताबाट अमेरिका बाहिरिएपछि इरानले युरेनियम संवर्धन ६० प्रतिशतसम्म पुर्‍याएको थियो, जुन हतियार-ग्रेड ९० प्रतिशतको नजिक मानिन्छ। अमेरिकी गुप्तचर मूल्याङ्कनअनुसार इरानले औपचारिक रूपमा हतियार कार्यक्रम पुनः सुरु नगरे पनि आवश्यक पूर्वाधार बलियो बनाउने गतिविधि गरिरहेको देखिन्छ।

तनावकै प्रभाव अन्तर्राष्ट्रिय बजारमा पनि परेको छ। बेन्चमार्क ब्रेन्ट क्रुडको मूल्य प्रतिब्यारेल करिब ७० डलर पुगेको छ। पर्सियन खाडीस्थित Strait of Hormuzबाट विश्वको झन्डै पाँचौँ भाग व्यापारिक तेल आपूर्ति हुने भएकाले त्यहाँको अस्थिरताले ऊर्जा बजारमा थप दबाब सिर्जना गर्ने आशंका गरिएको छ।

वार्ता पूर्ण रूपमा असफल भए सम्भावित सैन्य कारबाहीको दिशा र आकार अझै अनिश्चित छ। सीमित आक्रमणले समाधान ल्याउने कि दीर्घकालीन द्वन्द्वतर्फ धकेल्ने भन्ने प्रश्न अनुत्तरित नै रहेको छ।

काठमाडौं । भारतको राजधानी नयाँ दिल्लीस्थित राउज एभिन्यू अदालतले मदिरा नीति घोटालासँग सम्बन्धित सीबीआई मुद्दामा दिल्लीका पूर्व मुख्यमन्त्री अरविन्द केजरीवाल र पूर्व उपमुख्यमन्त्री मनीष सिसोदियालाई सफाइ दिएको छ।

शुक्रबार विशेष न्यायाधीश जितेन्द्र सिंहले दुवै विरुद्ध लगाइएका आरोपहरू प्रमाणित हुन नसक्ने ठहर गर्दै आरोपपत्र दर्ता गर्न अस्वीकार गरेका हुन्। सीबीआईले यस मुद्दामा कुल २३ जना विरुद्ध आरोपपत्र दायर गरेको थियो। अदालतले सबै अभियुक्तलाई सफाइ दिएको जनाएको छ।

सफाइपछि अदालत परिसर बाहिर सञ्चारकर्मीसँग प्रतिक्रिया दिँदै केजरीवाल भावुक देखिएका थिए। उनले भारतीय न्याय प्रणालीप्रति विश्वास व्यक्त गर्दै अदालतको निर्णयलाई “सत्यको विजय” बताएका छन्। उनले आफूहरूविरुद्ध राजनीतिक षड्यन्त्र रचिएको आरोप पनि लगाए।

सिसोदियाले पनि अदालतको निर्णयप्रति सन्तोष व्यक्त गर्दै संविधान र यसका निर्माता भीमराव रामजी अम्बेडकरप्रति गर्व व्यक्त गरेका छन्। उनले सत्य अन्ततः विजयी भएको बताएका छन्।

यता, केन्द्रीय अनुसन्धान ब्यूरो (सीबीआई)ले भने अदालतको निर्णयप्रति असहमति जनाउँदै अनुसन्धानका विभिन्न पक्षहरू पर्याप्त रूपमा विचार नगरिएको दाबी गरेको छ। सीबीआईले ट्रायल कोर्टको निर्णयविरुद्ध दिल्ली उच्च अदालतमा अपील गर्ने जनाएको छ।

उक्त मुद्दा मदिराको उत्पादन शुल्क नीति सम्बन्धी विवादसँग जोडिएको हो, जसले भारतीय राजनीतिक वृत्तमा ठूलो बहस निम्त्याएको थियो।

काठमाडौं । फागुन २१ गते हुने प्रतिनिधिसभा सदस्य निर्वाचन, २०८२ को तयारी अन्तिम चरणमा पुगेको निर्वाचन आयोगले जनाएको छ। आयोगले आज आयोजित साप्ताहिक पत्रकार सम्मेलनमार्फत देशभर आवश्यक निर्वाचन सामग्री पुगिसकेको जानकारी दिएको हो।

आयोगका सहसचिव तथा प्रवक्ता नारायणप्रसाद भट्टराईका अनुसार मतपत्र, मतपेटिका र अन्य आवश्यक सामग्री सबै जिल्लामा ढुवानी गरिसकिएको छ। अब मतदान केन्द्रस्तरमा व्यवस्थापनको काम तीव्र पारिएको छ।

मतदाता शिक्षा कार्यक्रम देशभरका ७५३ स्थानीय तहका ६ हजार ७४३ वडामा सञ्चालन भइरहेको छ। फागुन ३ गतेदेखि सुरु भएको उक्त कार्यक्रम फागुन १७ गतेसम्म जारी रहनेछ। यसका लागि स्वयंसेवक परिचालन गरिएको आयोगले जनाएको छ।

यसैबीच, मतदान केन्द्रमा खटिने कर्मचारी र सुरक्षाकर्मीहरू आ–आफ्नो गन्तव्यतर्फ प्रस्थान गर्न थालेका छन्। मतदानका लागि प्रयोग हुने विद्यालय, स्वास्थ्य संस्था, वडा कार्यालयलगायतका संरचना उपलब्ध गराइदिन नेपाल सरकार तथा सम्बन्धित स्थानीय तहलाई अनुरोध गरिसकिएको प्रवक्ता भट्टराईले बताए।

निर्वाचन सुरक्षादेखि अत्यावश्यक सेवाको सञ्चालन, समन्वय र व्यवस्थापनसम्बन्धी आवश्यक निर्णयहरू आयोगले गरिसकेको जनाएको छ। निर्वाचन शान्तिपूर्ण, निष्पक्ष र व्यवस्थित रूपमा सम्पन्न गर्ने तयारी पूरा भएको आयोगको दाबी छ।

काठमाडौँ । नेपाली कांग्रेसका सभापति गगनकुमार थापा लाई सर्लाही–४ बाट प्रतिनिधिसभा निर्वाचनमा हराउने प्रयास भएको दाबी गर्दै कांग्रेस नेता शेखर कोइराला सँग सम्बन्धित भनिएको एक अडियो सार्वजनिक भएको छ ।

मोरङ–६ बाट प्रतिनिधिसभा उम्मेदवारसमेत रहेका कोइरालाले सभापति थापालाई हराउन कांग्रेस कार्यकर्ता परिचालन गरेको आरोप लागेको छ । थापालाई पराजित गराई सर्लाही–४ का रास्वपा उम्मेदवार अमरेश कुमार सिंह लाई विजयी गराउने उद्देश्यले कोइरालाले आफ्ना स्वकीय सचिव दिनेशचन्द्र थपलियामार्फत भूमिका खेलेको दाबी गरिएको छ ।

सार्वजनिक अडियो संवादमा धनुषाको ढल्केबरका ‘सिंह’ थरका एक कांग्रेस कार्यकर्तासँग थपलियाको टेलिफोन संवाद सुनिन्छ । उक्त संवादमा उपेन्द्र कुशवाहालाई मिलाएपछि पैसा कसले दिने भन्ने प्रश्नमा थपलियाले “अमरेशले” भन्ने जवाफ दिएको सुनिन्छ । ती व्यक्ति सर्लाही–४ को धनकौल क्षेत्रमा अस्वाभाविक गतिविधि गरिरहेको अवस्थामा स्थानीय कांग्रेस कार्यकर्ताले नियन्त्रणमा लिएको र त्यसपछि अडियो बाहिर आएको दाबी गरिएको छ ।

कांग्रेसको १४औँ महाधिवेशनमा कोइराला र थापा एउटै समूहबाट क्रमशः सभापति र महामन्त्रीका प्रत्याशी थिए । पछिल्लो समय दुवै नेताबीच दूरी बढेको चर्चा रहँदै आएको छ । विशेष महाधिवेशनमार्फत नेतृत्व परिवर्तन भएपछि कोइराला असन्तुष्ट बनेका थिए । निर्वाचन आयोगले विशेष महाधिवेशनलाई मान्यता दिएपछि कोइराला सभापति थापाको हस्ताक्षरमा टिकट लिएर मोरङ–६ बाट उम्मेदवार बनेका हुन् ।

कांग्रेस केन्द्रीय समितिले थापालाई भावी प्रधानमन्त्रीका रूपमा अघि सारेको छ । संस्थापन पक्षका केही नेताहरूले सर्लाही–४ मा थापालाई पराजित गराउन सके संसदीय दलको नेतृत्वमा प्रभाव जमाउन सकिने आँकलनसहित षड्यन्त्र रचिएको हुनसक्ने आशंका व्यक्त गरेका छन् ।

सर्लाहीका एक कांग्रेस कार्यकर्ताका अनुसार शेखर पक्षले पूर्व प्रदेश सांसद उपेन्द्र कुशवाहालाई अमरेशको पक्षमा ल्याउने प्रयास गरेको थियो । तर कुशवाहा हाल सभापति थापाको चुनावी अभियानमा सक्रिय रहेको बताइएको छ । नियन्त्रणमा लिइएका व्यक्तिको मोबाइल कल विवरणमा शेखरका स्वकीय सचिव थपलिया र अमरेश सिंहसँग नियमित सम्पर्क देखिएको दाबी गरिएको छ ।

यसअघि स्वतन्त्र रूपमा प्रतिनिधिसभा निर्वाचन जितेका अमरेशले गगन थापाविरुद्ध सार्वजनिक अभिव्यक्ति दिँदै आएका थिए भने शेखर कोइरालाप्रति नरम धारणा राख्दै आएका थिए । स्रोतका अनुसार निर्वाचन घोषणा भएपछि कोइराला र अमरेशबीच भेटघाटसमेत भएको दाबी गरिएको छ ।

काठमाडौं । देशभर चुनावी सरगर्मी बढेसँगै उम्मेदवारहरू यतिबेला मतदाताको घरदैलोमा व्यस्त छन् । बिहान र साँझको समयमा बढी सक्रिय देखिने नेताहरू घर–घर पुगेर मत मागिरहेका छन् । सामान्य अवस्थामा मतदाताले नेतालाई नमस्कार गर्ने चलन भए पनि चुनावी माहोलमा भने दृश्य उल्टिएको छ—नेताहरू नै हात जोडेर मतदातालाई नमस्कार गरिरहेका छन् ।

यसै क्रममा बिहीबार ललितपुर–३ की राष्ट्रिय स्वतन्त्र पार्टी (रास्वपा) उम्मेदवार डा. तोसिमा कार्की घरदैलो कार्यक्रममा सहभागी भइन् । बिहान ८ बजे ललितपुर महानगरपालिका–२३ को हात्तीवनस्थित ऐरावल टोलसुधार समिति चोकमा पुगेकी कार्की करिब २०–२५ जना नेता–कार्यकर्तासहित मतदातालाई भेट्दै, नमस्कार गर्दै र भोट माग्दै हिँडेकी थिइन् ।

चोकमा केही मतदाता उनलाई पर्खेर बसेका थिए । कार्की पुग्नासाथ महिला मतदाताहरूले अँगालो हालेर स्वागत गरे र सेल्फी खिचे । ७० वर्षीया सलिना अधिकारीले यसपटक आफ्नो परिवारको सबै भोट ‘घण्टी’ चुनाव चिह्नमा जाने बताइन् । अर्की एक महिला मतदाताले पनि परिवर्तनको अपेक्षासहित घण्टीमा भोट हाल्ने बताइन् ।

मतदाताको समर्थनले उत्साहित हुँदै कार्यकर्ताहरूले ‘भोट केमा, घण्टीमा’ भन्दै नारा लगाए । केहीबेर गीत–संगीतसहित नाचगानसमेत भयो । त्यसपछि कार्कीले माइकमार्फत छोटो सम्बोधन गर्दै आफूहरू इमानदार, पारदर्शी र जनताप्रति जवाफदेही रहेको दाबी गरिन् । उनले जनताका प्रश्नबाट नभाग्ने र तथ्यांक तथा अनुसन्धानमा आधारित नीति ल्याउने प्रतिबद्धता व्यक्त गरिन् ।

घरदैलोका क्रममा केही मतदाताले भने आलोचनात्मक प्रश्न पनि उठाए । एक युवा मतदाताले नयाँ दलहरूप्रति पूर्ण विश्वास अझै कायम नभएको टिप्पणी गर्दै प्रतिबद्धता र योजनाका आधारमा मात्र भोट दिने बताए । अर्का एक मतदाताले नयाँ शक्तिहरूले पनि शतप्रतिशत विश्वास जित्न नसकेको धारणा राखे ।

घरदैलो अघि बढ्दै जाँदा जेम्स स्कुल नजिक एक चिया पसलमा मतदातासँग कुराकानी भयो । स्थानीय मतदाता सबिना तिमल्सिनाले आफ्नो क्षेत्रमा सडक र खानेपानीको समस्या रहेको गुनासो गरिन् । तीन वर्षदेखि खानेपानीको शुल्क तिरे पनि पानी नआएको र सडक कालोपत्रे नभएको बताउँदै उनले समाधानको माग गरिन् । कार्कीले समस्या बुझेर समाधानका लागि पहल गर्ने आश्वासन दिइन् ।

अघिल्लो निर्वाचनमा डा. कार्की ३१ हजार १३६ मतसहित विजयी भएकी थिइन् । यसपटक उनीसँग नेपाली कांग्रेसका जितेन्द्र श्रेष्ठ, नेकपा एमालेका सन्दन थापा मगर र नेपाल कम्युनिस्ट पार्टीका राजकाजी महर्जन प्रतिस्पर्धामा छन् ।

काठमाडौं । पुष्पकमल दाहाल ‘प्रचण्ड’ नुवाकोटका उम्मेदवारद्वारा आयोजना गरिने मतदाता भेटघाट कार्यक्रममा सहभागी हुने भएका छन्।

नेपाल कम्युनिस्ट पार्टीका संयोजक प्रचण्ड शुक्रबार बालाजुस्थित अनुपमद्वार पार्टी भेन्यूमा आयोजित कार्यक्रममा उपस्थित रहने जनाइएको छ। कार्यक्रम दिउँसो १२ः३० बजे सुरु हुनेछ।

नुवाकोट–काठमाडौं सम्पर्क समन्वय समितिको आयोजनामा हुन लागेको उक्त कार्यक्रममा नुवाकोटका दुवै निर्वाचन क्षेत्रका उम्मेदवारहरूको उपस्थिति रहनेछ। समितिका अनुसार मतदाता भेटघाटसहित काठमाडौं केन्द्रित वृहत् चुनावी कार्यक्रम सञ्चालन गरिनेछ।

कार्यक्रममा पार्टी नेता–कार्यकर्ता, शुभेच्छुक तथा नुवाकोटबाट काठमाडौंमा बसोबास गर्दै आएका मतदाताको उल्लेखनीय सहभागिता रहने अपेक्षा गरिएको छ।

काठमाडौं । बेनी हाईड्रोपावर प्रोजेक्ट लिमिटेडले आगामी चैत १ गतेदेखि प्रारम्भिक सार्वजनिक निष्कासन (आईपीओ) जारी गर्ने भएको छ। कम्पनीले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपाली नागरिकलाई लक्षित गर्दै आईपीओ निष्कासन गर्न लागेको हो।

कम्पनीले गत माघ २९ गते नेपाल धितोपत्र बोर्डबाट १ अर्ब ४ करोड रुपैयाँ जारी पूँजीको २० प्रतिशत अर्थात् २० करोड ८० लाख रुपैयाँ बराबरको १०० रुपैयाँ अंकित दरका २० लाख ८० हजार कित्ता साधारण शेयर निष्कासन गर्न अनुमति प्राप्त गरेको थियो।

जारी गरिने कुल शेयरमध्ये १० प्रतिशत अर्थात् १० करोड ४० लाख रुपैयाँ बराबरको १० लाख ४० हजार कित्ता शेयर आयोजना प्रभावित क्षेत्रका बासिन्दाका लागि छुट्याइएको छ।

यसअन्तर्गत सोलुखुम्बु जिल्लाको सोलुदुधकुण्ड नगरपालिका वडा नं. २, ३ र ४ का अति प्रभावित क्षेत्रका स्थायी बासिन्दालाई ५ लाख २० हजार कित्ता (५० प्रतिशत), वडा नं. ५, ६, ७ र ११ का प्रभावित क्षेत्रका बासिन्दालाई ३ लाख १२ हजार कित्ता (३० प्रतिशत) तथा अन्य क्षेत्रका स्थायी बासिन्दालाई २ लाख ८ हजार कित्ता (२० प्रतिशत) शेयर निष्कासन गरिनेछ।

स्थानीयमा बाँडफाँट सम्पन्न भएपछि सर्वसाधारणतर्फको १० लाख ४० हजार कित्तामध्ये १ लाख ४ हजार कित्ता शेयर वैदेशिक रोजगारीमा रहेका नेपाली नागरिकका लागि छुट्याइएको छ। यदि छुट्याइएको शेयर पूर्ण रूपमा बिक्री नभएमा बाँकी शेयर सर्वसाधारणमा समायोजन गरी निष्कासन गरिने कम्पनीले जनाएको छ।

आयोजना प्रभावित क्षेत्रका बासिन्दा तथा वैदेशिक रोजगारीमा रहेका नेपाली नागरिकले न्यूनतम १० कित्ता र अधिकतम १० हजार कित्तासम्म आवेदन दिन सक्ने व्यवस्था गरिएको छ।

विराटनगर । चुनावी रिपोर्टिङका क्रममा झापा क्षेत्र नम्बर ५ मा पुगेका अर्जुन आचार्यमाथि भएको आक्रमण र दुर्व्यवहारप्रति प्रेस सेन्टर नेपाल मोरङले घोर निन्दा तथा भर्त्सना गरेको छ।

प्रेस सेन्टर मोरङका सचिव अनिल श्रेष्ठले बिहीबार जारी गरेको विज्ञप्तिमा ‘हाम्रो मत’का कार्यकारी सम्पादक तथा ‘रातोपाटी’का संवाददाता आचार्यमाथिको साङ्घातिक हमला प्रेस स्वतन्त्रतामाथिको ठाडो हस्तक्षेप भएको बताएका छन्।

बिहीबार झापाको कमल गाउँपालिकामा केपी शर्मा ओलीको घरदैलो कार्यक्रममा रिपोर्टिङ गर्ने क्रममा आचार्यमाथि आक्रमण भएको जनाइएको छ। विज्ञप्तिअनुसार एमाले निकट ‘भोलेन्टियर फोर्स’ का कार्यकर्ताहरूले भिडियो खिचिरहेका आचार्यमाथि हातपात गर्दै मोबाइल र क्यामेरा खोसेका थिए। बा २५६१ नम्बरको स्कर्पियोमा आएको समूहले कुटपिट र लुटपाटसमेत गरेको दाबी गरिएको छ।

पार्टी अध्यक्षकै उपस्थितिमा पत्रकारमाथि आक्रमण हुँदा सुरक्षा निकायले प्रभावकारी हस्तक्षेप नगरेको, एमाले नेतृत्व मौन बसेको तथा आचार्यको मोबाइल र चस्मा अझै फिर्ता नभएको भन्दै प्रेस सेन्टरले उक्त घटनालाई निन्दनीय र आपत्तिजनक भनेको छ।

प्रेस सेन्टरले भौतिक आक्रमणमार्फत पत्रकारको आवाज दबाउने प्रयास नगर्न चेतावनी दिँदै घटनामा संलग्नलाई तत्काल कानुनी दायरामा ल्याउन माग गरेको छ। साथै निर्वाचन अवधिमा पत्रकारहरूलाई सुरक्षित र निर्बाध रूपमा काम गर्ने वातावरण सुनिश्चित गर्न सरकारसँग जोडदार आग्रह गरिएको छ।