काठमाडौं। नेपाल राष्ट्र बैंकले आजका लागि विदेशी मुद्राको विनिमयदर सार्वजनिक गरेको छ। सार्वजनिक दरअनुसार अमेरिकी डलर एकको खरिददर १४६ रुपैयाँ ६ पैसा र बिक्रीदर १४६ रुपैयाँ ६६ पैसा कायम गरिएको छ।

युरोपियन युरो एकको खरिददर १७१ रुपैयाँ २८ पैसा र बिक्रीदर १७१ रुपैयाँ ९९ पैसा तोकिएको छ। युके पाउण्ड स्ट्रलिङ एकको खरिददर १९५ रुपैयाँ ७९ पैसा र बिक्रीदर १९६ रुपैयाँ ६० पैसा तथा स्वीस फ्रयाङ्क एकको खरिददर १८८ रुपैयाँ ५३ पैसा र बिक्रीदर १८९ रुपैयाँ ३० पैसा निर्धारण गरिएको छ।

अष्ट्रेलियन डलर एकको खरिददर १०३ रुपैयाँ ४५ पैसा र बिक्रीदर १०३ रुपैयाँ ८८ पैसा, क्यानेडियन डलर एकको खरिददर १०६ रुपैयाँ ९३ पैसा र बिक्रीदर १०७ रुपैयाँ ३७ पैसा तथा सिङ्गापुर डलर एकको खरिददर ११४ रुपैयाँ ८५ पैसा र बिक्रीदर ११५ रुपैयाँ ३३ पैसा कायम गरिएको छ।

जापानी येन १० को खरिददर ९ रुपैयाँ ३१ पैसा र बिक्रीदर ९ रुपैयाँ ३४ पैसा तोकिएको छ। चिनियाँ युआन एकको खरिददर २१ रुपैयाँ २२ पैसा र बिक्रीदर २१ रुपैयाँ ३१ पैसा छ। साउदी अरेबियन रियाल एकको खरिददर ३८ रुपैयाँ ९१ पैसा र बिक्रीदर ३९ रुपैयाँ ७ पैसा तथा कतारी रियाल एकको खरिददर ३९ रुपैयाँ ९६ पैसा र बिक्रीदर ४० रुपैयाँ १३ पैसा निर्धारण गरिएको छ।

थाइ भाट एकको खरिददर ४ रुपैयाँ ६४ पैसा र बिक्रीदर ४ रुपैयाँ ६६ पैसा, युएई दिराम एकको खरिददर ३९ रुपैयाँ ७६ पैसा र बिक्रीदर ३९ रुपैयाँ ९३ पैसा तथा मलेसियन रिङ्गेट एकको खरिददर ३७ रुपैयाँ १९ पैसा र बिक्रीदर ३७ रुपैयाँ ३५ पैसा कायम गरिएको छ। साउथ कोरियन वन १०० को खरिददर १० रुपैयाँ २ पैसा र बिक्रीदर १० रुपैयाँ ६ पैसा तोकिएको छ। स्वीडिस क्रोनर एकको खरिददर १६ रुपैयाँ २ पैसा र बिक्रीदर १६ रुपैयाँ ९ पैसा तथा डेनिस क्रोनर एकको खरिददर २२ रुपैयाँ ९३ पैसा र बिक्रीदर २३ रुपैयाँ २ पैसा निर्धारण गरिएको छ।

हङकङ डलर एकको खरिददर १८ रुपैयाँ ६७ पैसा र बिक्रीदर १८ रुपैयाँ ७५ पैसा, कुवेती दिनार एकको खरिददर ४७७ रुपैयाँ ७९ पैसा र बिक्रीदर ४७९ रुपैयाँ ७५ पैसा, बहराइन दिनार एकको खरिददर ३८७ रुपैयाँ २ पैसा र बिक्रीदर ३८८ रुपैयाँ ६१ पैसा तथा ओमानी रियाल एकको खरिददर ३७९ रुपैयाँ १३ पैसा र बिक्रीदर ३८० रुपैयाँ ६९ पैसा कायम भएको छ। भारतीय रुपैयाँ १०० को खरिददर १६० रुपैयाँ र बिक्रीदर १६० रुपैयाँ १५ पैसा तोकिएको छ।

राष्ट्र बैंकका अनुसार आवश्यक परे विनिमयदर जुनसुकै समयमा संशोधन गर्न सकिनेछ। वाणिज्य बैंकहरूले निर्धारण गर्ने दर भने फरक हुनसक्ने र अद्यावधिक विवरण केन्द्रीय बैंकको वेबसाइटमा उपलब्ध हुने जनाइएको छ।

काठमाडौं। निर्वाचन आयोगले निर्वाचन आचारसंहिता प्रभावकारी कार्यान्वयनका लागि अनुगमन अधिकृतहरूलाई थप निर्देशन दिएको छ। आयोगले आजदेखि मतदानको दिन मतदान केन्द्र बन्द नहुन्जेलसम्म पालना गर्नुपर्ने विशेष आचरण कडाइका साथ लागू गर्न निर्देशन जारी गरेको हो।

यही फागुन २१ गते हुने प्रतिनिधिसभा सदस्य निर्वाचनलाई लक्षित गर्दै सहायक प्रमुख जिल्ला अधिकारी र कोष तथा लेखा नियन्त्रक कार्यालयका प्रमुखलाई फरक–फरक जिम्मेवारीसहित निर्वाचन आचारसंहिता अनुगमन अधिकृत तोकिएको छ।

निर्वाचन आचारसंहिता, २०८२ को दफा १७ अनुसार मतदान हुने दिनको अघिल्लो ४८ घण्टादेखि मतदान सम्पन्न नहुन्जेलसम्म विशेष आचरण पालना गर्नुपर्ने व्यवस्था छ। सोही प्रावधानको प्रभावकारी परिपालना सुनिश्चित गर्न आयोगले सम्बन्धित निकायलाई सूक्ष्म अनुगमन गर्न निर्देशन दिएको हो।

मतदानको दिन पालना गर्नुपर्ने आचरणसम्बन्धी प्रावधानको अनुगमन गरी जिल्लास्तरमा कडाइका साथ कार्यान्वयन गर्न तथा आवश्यक परे जिल्ला आचारसंहिता अनुगमन समितिसँग समन्वय गरेर कारबाही प्रक्रिया अघि बढाउन पनि आयोगले स्पष्ट पारेको छ।

निर्वाचन (कसुर तथा सजाय) ऐन, २०७३ तथा प्रचलित कानुन विपरीत गतिविधि भएको पाइएमा सोही ऐनअनुसार कारबाही गरिने चेतावनी दिइएको छ।

प्रचारप्रसार निषेध अवधिमा कानुनले गर्न नहुने ठहर गरेका कुनै पनि गतिविधि नगर्न तथा नगराउन आयोगले सबै सरोकारवालासँग हार्दिक अनुरोध गरेको छ।

काठमाडौं। बिहीबार हुने प्रतिनिधिसभा सदस्य निर्वाचनअन्तर्गत आज मध्यरातदेखि मौन अवधि सुरु भएको छ। राजनीतिक दल र उम्मेदवारलाई दिइएको प्रचारप्रसारको समय सकिएसँगै अब मतदान सम्पन्न नभएसम्म कुनै पनि प्रकारको प्रचार गतिविधि गर्न पाइने छैन।

निर्वाचन आयोगले फागुन ४ गतेदेखि सोमबार राति १२ बजेसम्म प्रचारप्रसारको समय निर्धारण गरेको थियो। मतदान हुनुभन्दा ४८ घण्टाअघि सुरु हुने मौन अवधिमा भाषण, भेला, छलफल, समीक्षा, मत माग्ने कार्य तथा निर्वाचनलाई प्रभाव पार्ने गरी कुनै पनि गतिविधि गर्न निषेध गरिएको छ।

आयोगका कार्यवाहक प्रमुख निर्वाचन आयुक्त रामप्रसाद भण्डारीका अनुसार मौन अवधिमा निर्वाचनलाई प्रभाव पार्ने उद्देश्यले आर्थिक कारोबार गरिएको पाइए उम्मेदवारी खारेज हुने र दोषी व्यक्तिलाई छ वर्षसम्म कुनै पनि निर्वाचन प्रक्रियामा भाग लिन नपाउने व्यवस्था छ। आयोगले प्रभाव पार्ने गतिविधिमाथि शून्य सहनशीलताको नीति अपनाइने स्पष्ट पारेको छ।

मौन अवधिको उद्देश्य मतदातालाई शान्त, स्वतन्त्र र भयरहित वातावरणमा विवेकपूर्ण निर्णय लिन अवसर प्रदान गर्नु हो। यस अवधिमा निर्वाचन व्यवस्थापन गर्ने निकायले मतदान केन्द्रको तयारी, मतदाता लाइन व्यवस्थापन तथा शान्ति–सुरक्षाको अवस्था मूल्यांकन गर्ने कामलाई प्राथमिकता दिनेछन्।

निर्वाचन आचारसंहिताअनुसार मौन अवधि सुरु हुनुअघि मतदान केन्द्रको ३०० मिटर वरिपरि राखिएका प्रचार सामग्री हटाइसकिएको हुनुपर्छ। साथै एसएमएस, फेसबुक, भाइबरजस्ता सामाजिक सञ्जालमार्फत मत माग्न वा प्रचारप्रसार गर्न पनि पूर्ण रोक लगाइएको छ। उम्मेदवार वा दलको पक्षमा प्रभाव पार्ने समाचार वा सूचना प्रकाशन तथा प्रसारण गर्नसमेत पाइने छैन।

विश्वका विभिन्न मुलुकमा २४ देखि ७२ घण्टासम्म मौन अवधि तोक्ने प्रचलन छ। स्वच्छ, निष्पक्ष र प्रभावकारी निर्वाचन सम्पन्न गर्न तथा मतदातालाई सुसूचित र सचेत निर्णयमा पुग्न सहयोग पुर्‍याउने उद्देश्यले मौन अवधिलाई महत्वपूर्ण मानिएको छ।

काठमाडौं । रामेछाप नगरपालिका–२ स्थित सिरूबारीमा निर्वाचन सामग्री बोकेको गाडी सोमबार अपराह्न दुर्घटनामा परेको छ। दुर्घटनामा परी प्रहरी सहायक निरीक्षक (असई) पर्शुराम यादवको घटनास्थलमै मृत्यु भएको छ भने सात जना घाइते भएका छन्।

जिल्ला प्रहरी कार्यालय रामेछापका डिएसपी तथा सहप्रवक्ता शैलेन्द्र थापाका अनुसार अपराह्न करिब ४ बजेतिर मन्थलीबाट कालिका देवी माध्यमिक विद्यालय र देउराली माध्यमिक विद्यालयस्थित मतदान केन्द्रका लागि निर्वाचन सामग्री तथा कर्मचारी लिएर जाँदै गरेको गाडी सडकबाट करिब २०० मिटर तल खसेको हो। गाडीमा चालकसहित ११ जना सवार रहेको बताइएको छ, जसमध्ये तीन जना दुर्घटनाअघि नै गाडीबाट हाम फालेका थिए।

दुर्घटनापछि सशस्त्र प्रहरी बल नेपाल अन्तर्गत विपद् उद्धार वेश खुर्कोटबाट सशस्त्र प्रहरी नायब निरीक्षक रमेशबहादुर थापाको कमाण्डमा गोताखोरसहित विपद् व्यवस्थापन तालिमप्राप्त टोली तत्काल उद्धार कार्यमा खटिएको थियो।

उद्धारपश्चात् घाइतेहरूलाई उपचारका लागि मन्थली अस्पताल पठाइएको प्रहरीले जनाएको छ। दुर्घटनाको कारणबारे थप अनुसन्धान भइरहेको छ।

काठमाडौं । कुवेतको कुवेतको रक्षा मन्त्रालय ले देशमा अमेरिकी लडाकू विमान दुर्घटनाग्रस्त भएको पुष्टि गरेको छ। सामाजिक सञ्जालमा सार्वजनिक भएको एक भिडियोमा लडाकू विमान आकाशबाट खसिरहेको दृश्य देखिएको छ।

मन्त्रालयका अनुसार दुर्घटनामा संलग्न सबै चालक दलका सदस्यहरू सुरक्षित रहेका छन्। एक पाइलटले समयमै इजेक्ट गरेर ज्यान जोगाएको प्रारम्भिक जानकारीमा उल्लेख छ। घटनाबारे थप विवरण आउन बाँकी रहेको छ।

अन्तर्राष्ट्रिय सञ्चारमाध्यम अल जजीरा ले घटनाको स्वतन्त्र पुष्टि तथा थप विवरण संकलन गर्ने प्रयास गरिरहेको जनाएको छ।

दुर्घटनापछि कुवेती सुरक्षाकर्मीहरूले तत्काल खोज तथा उद्धार अभियान सञ्चालन गरेका थिए। उद्धार गरिएका चालक दलका सदस्यलाई उपचारका लागि अस्पताल पुर्‍याइएको र उनीहरूको स्वास्थ्य अवस्था स्थिर रहेको रक्षा मन्त्रालयले जनाएको छ।

कुवेती अधिकारीहरू अमेरिकी पक्षसँग समन्वय गर्दै घटनाको कारणबारे अनुसन्धान गरिरहेका छन्। दुर्घटनाको यथार्थ कारणबारे औपचारिक प्रतिवेदन सार्वजनिक हुन बाँकी छ।

काठमाडौं । यही फागुन २१ गते हुने प्रतिनिधिसभा सदस्य निर्वाचनको प्रचारप्रसार आज राति १२ बजेदेखि पूर्ण रूपमा बन्द हुने भएको छ। निर्वाचन आयोग नेपाल ले मतदान मितिभन्दा ४८ घण्टा अघिदेखि ‘प्रचारप्रसार निषेध अवधि’ लागू हुने जनाएको छ।

आयोगका सहायक प्रवक्ता कुलबहादुर जिसीका अनुसार आज राति १२ बजेपछि कुनै पनि राजनीतिक दल, उम्मेदवार वा सम्बन्धित व्यक्तिले मत माग्ने, प्रचारप्रसार गर्ने वा निर्वाचनसँग सम्बन्धित सन्देश प्रवाह गर्न पाउने छैनन्। निर्वाचन आचारसंहिता, २०८२ मा यस अवधिमा पालना गर्नुपर्ने विशेष आचरण स्पष्ट रूपमा उल्लेख गरिएको छ।

गत फागुन ४ गतेदेखि सुरु भएको चुनावी प्रचार आज रातिसम्म जारी रहनेछ। त्यसपछि मतदातालाई स्वतन्त्र र निष्पक्ष रूपमा निर्णय गर्न वातावरण सिर्जना गर्न ‘मौन अवधि’ अनिवार्य गरिएको आयोगको भनाइ छ। यसले स्वच्छ र निष्पक्ष प्रतिस्पर्धालाई टेवा पुग्ने विश्वास गरिएको छ।

प्रचारप्रसारको अन्तिम दिन आज हिमाली तथा पहाडी जिल्लामा फागु पूर्णिमा पर्व परेकाले चाडपर्वसँगै चुनावी गतिविधि पनि देखिएको छ। निर्वाचनमा सहभागी दल तथा उम्मेदवारहरू आज अन्तिम प्रचार अभियानमा व्यस्त छन्।

प्रचारप्रसार निषेध अवधिमा राजनीतिक विज्ञापन, सामाजिक सञ्जालमा पोष्ट वा शेयर, अनलाइन तथा छापा माध्यममार्फत कुनै पनि प्रकारको चुनावी सन्देश प्रसारण गर्न पाइने छैन। साथै, मतदानस्थलको ३०० मिटर वरिपरि राखिएका दल वा उम्मेदवारका प्रचार सामग्री आज राति १२ बजेसम्म हटाइसक्नुपर्ने व्यवस्था गरिएको छ।

त्यस्तै, मतदान सुरु हुनुभन्दा तीन घण्टा अघिदेखि मतदान कार्य सम्पन्न नभएसम्म मतदाता, मतदान केन्द्रमा खटिएका कर्मचारी वा सुरक्षाकर्मीलाई कुनै प्रकारले अवरोध पुर्‍याउन नपाइने आचारसंहितामा उल्लेख छ।

आयोगले संविधानले दिएको अधिकारअनुसार निर्वाचनको सञ्चालन, रेखदेख, निर्देशन, नियन्त्रण र समन्वयसम्बन्धी सम्पूर्ण तयारी अन्तिम चरणमा पुगेको जनाएको छ। आचारसंहिताको इमान्दारीपूर्वक पालना भएमा निर्वाचनको निष्पक्षता र विश्वसनीयता थप मजबुत हुने आयोगको विश्वास छ।

काठमाडौं । इरानको इस्लामिक क्रान्तिकारी गार्ड कोर (IRGC) ले सोमबार इजरायली प्रधानमन्त्री बेन्जामिन नेतन्याहू को कार्यालय तथा इजरायली वायुसेना प्रमुखको मुख्यालयलाई लक्षित गरी क्षेप्यास्त्र आक्रमण गरेको दाबी गरेको छ।

इरानी समाचार एजेन्सी फार्स समाचार एजेन्सी मार्फत जारी विज्ञप्तिमा गार्डले “यहुदी शासनका अपराधी प्रधानमन्त्रीको कार्यालय र वायुसेना प्रमुखको मुख्यालय निशानामा पारिएको” उल्लेख गरेको छ।

गार्डको जनसम्पर्क विभागलाई उद्धृत गर्दै तस्नीम समाचार एजेन्सी ले खैबर नामक क्षेप्यास्त्र प्रयोग गरी “लक्षित तथा आकस्मिक आक्रमण” गरिएको जनाएको छ। विज्ञप्तिमा ती संरचनाहरू “गम्भीर रूपमा क्षतिग्रस्त” भएको दाबी गरिएको छ।

इरानले उक्त कारबाहीलाई शनिबार भएको संयुक्त अमेरिकी–इजरायली आक्रमणको प्रतिशोधस्वरूप गरिएको “दशौं चरण” को प्रतिक्रिया भएको बताएको छ। केही इरानी सञ्चारमाध्यमहरूले नेतन्याहूको अवस्थाबारे “अनिश्चितता” रहेको दाबी गरे पनि त्यसको स्वतन्त्र पुष्टि भने भएको छैन।

तेहरानले आफ्नो कदमलाई अन्तर्राष्ट्रिय कानुनअनुसार वैध आत्मरक्षाको अधिकारको प्रयोगका रूपमा व्याख्या गरेको छ। इरानी अधिकारीहरूले इजरायली भूभागसँगै खाडी क्षेत्रका अमेरिकी सैन्य अड्डाहरूलाई समेत सम्भावित लक्ष्य बनाइरहेको बताएका छन्।

यता, इजरायली पक्षले नेतन्याहूको कार्यालयमा आक्रमण भएको दाबीबारे कुनै आधिकारिक प्रतिक्रिया सार्वजनिक गरेको छैन। सामान्यतया, इजरायलले रणनीतिक तथा सरकारी संरचनासम्बन्धी क्षतिबारे सूचना सार्वजनिक गर्न कडा नियन्त्रण राख्ने गरेको छ।

हाल क्षेत्रीय तनाव तीव्र बन्दै गएको छ। इजरायल, इरान र खाडी मुलुकहरू वरपर अमेरिकी सैन्य संरचनामाथि क्षेप्यास्त्र तथा ड्रोन आक्रमणका घटनाहरू बढिरहेका छन्। इरान र उसका सहयोगी समूहहरूले कथित “आक्रामकता” अन्त्य नभएसम्म प्रतिकारात्मक कारबाही जारी रहने चेतावनी दिएका छन्।

तेहरान/जेरुसेलम – इजराइल, अमेरिका र इरानबीच जारी सैन्य द्वन्द्व तेस्रो दिनमा प्रवेशसँगै मध्यपूर्व क्षेत्रको सुरक्षा अवस्था थप जटिल बन्दै गएको छ। क्षेत्रीय शक्ति सन्तुलन र विश्व ऊर्जा आपूर्तिमा यसको प्रभाव पर्ने आकलन गरिएको छ।

यसैबीच इरानले साउदी अरबको महत्वपूर्ण ‘रास तनुरा’ तेल रिफाइनरीमा आक्रमण गरेको खबर सार्वजनिक भएको छ। साउदीको सरकारी तेल कम्पनी Saudi Aramcoअन्तर्गत सञ्चालनमा रहेको उक्त रिफाइनरी हमलापछि बन्द गरिएको अन्तर्राष्ट्रिय समाचार स्रोतहरूले जनाएका छन्। दैनिक करिब ५.५ देखि ६ लाख ब्यारेल कच्चा तेल प्रशोधन क्षमता रहेको यो संरचना विश्वकै प्रमुख अपतटीय तेल लोडिङ टर्मिनलमध्ये एक मानिन्छ। यहाँबाट अमेरिका, एसिया र युरोपलगायतका देशहरूमा तेल निर्यात हुँदै आएको छ।

इरानका शीर्ष राष्ट्रिय सुरक्षा अधिकारी अली लारीजानीले अमेरिकासँग कुनै वार्ता नगर्ने स्पष्ट पारेका छन्। उनले इरानले अमेरिकासँग पुनः वार्ता सुरु गर्ने प्रयास गरेको भन्ने समाचारलाई अस्वीकार गरेका छन्।

त्यसैगरी, इरानले इजराइलबाहेक कतार, बहराइन र संयुक्त अरब इमिरेट्समा पनि आक्रमण पुनः सुरु गरेको दाबी गरिएको छ। अर्कोतर्फ, लेबनानस्थित सशस्त्र समूह Hezbollah पनि द्वन्द्वमा सहभागी भएको बताइएको छ। इरानको समर्थनप्राप्त हिजबुल्लाहले इजराइलका विभिन्न स्थानमा आक्रमण गरेको र प्रतिशोध लिने घोषणा गरेको खबर आएको छ।

अन्तर्राष्ट्रिय सञ्चारमाध्यमका अनुसार अमेरिका र इजराइलले संयुक्त रूपमा इरानका सयौँ स्थानमा हमला गरेका छन्। प्रारम्भिक ३० घण्टामै हजारौँ बम खसालिएको दाबी गरिएको छ। यी हमलामा हालसम्म २०० भन्दा बढी व्यक्तिको मृत्यु तथा ७४० भन्दा बढी घाइते भएको जानकारी सार्वजनिक गरिएको छ।

एक विद्यालयमा मिसाइल खस्दा ठूलो मानवीय क्षति भएको समाचार पनि बाहिरिएको छ। यद्यपि, उपलब्ध विवरणहरूको स्वतन्त्र पुष्टि भने हुन बाँकी रहेको बताइएको छ।

फेब्रुअरी २८ देखि सुरु भएको भनिएको यस द्वन्द्वको पहिलो दिन नै इरानका सर्वोच्च नेता Ali Khamenei मारिएको दाबी गरिए पनि त्यसबारे आधिकारिक पुष्टि स्पष्ट रूपमा सार्वजनिक भएको छैन। साथै, आइतबार तीन अमेरिकी सैनिकको मृत्यु भएको समाचार पनि आएको छ।

समग्र घटनाक्रमले मध्यपूर्व मात्र नभई विश्व राजनीतिमा पनि गम्भीर प्रभाव पार्ने देखिएको छ। विश्व समुदायले परिस्थितिलाई नजिकबाट नियालिरहेको छ।

सर्लाही – प्रतिनिधिसभा निर्वाचन नजिकिँदै गर्दा सर्लाही–४ यसपटक राष्ट्रिय राजनीतिको केन्द्रबिन्दु बनेको छ। गगन थापा आफ्नो निर्वाचन क्षेत्र काठमाडौं–४ छाडेर मधेश झरेपछि यहाँको चुनावी समीकरण थप रोचक बनेको हो।

नेपाली कांग्रेसका सभापति थापा आमसभा र घरदैलो अभियानमा सक्रिय छन्। जेन–जी आन्दोलनपछि पार्टी रुपान्तरणको एजेन्डासहित विशेष महाधिवेशनमार्फत नेतृत्वमा पुगेका थापाले मधेशमा उम्मेदवारी दिएपछि सिंगो देशको ध्यान सर्लाही–४ मा केन्द्रित भएको छ। यद्यपि, स्थानीय भाषा र सामाजिक परिवेशसँगको सामञ्जस्य उनको लागि प्रारम्भिक चुनौती बनेको विश्लेषण गरिन्छ।

यस क्षेत्रमा थापा पूर्व विजेता अमरेश कुमार सिंहसँग प्रतिस्पर्धामा छन्। हाल राष्ट्रिय स्वतन्त्र पार्टी (रास्वपा)बाट उम्मेदवार बनेका सिंह २०७०, २०७४ र २०७९ मा लगातार तीनपटक निर्वाचित भइसकेका छन्। २०७९ मा स्वतन्त्र उम्मेदवारका रूपमा २०,०१७ मत ल्याएर जितेका सिंह यसपटक पार्टी संगठनसहित मैदानमा उत्रिएका छन्।

त्यसैगरी, नेपाल कम्युनिष्ट पार्टी (एमाले)बाट अमनिशकुमार यादव उम्मेदवार बनेपछि समीकरण झन् जटिल भएको छ। उनका पिता शिवपूजन राय यादवलाई यस क्षेत्रमा प्रभावशाली ‘भोट बैंक’ भएका नेताका रूपमा हेरिन्छ। स्थानीय तहमा उनको प्रभाव अझै कायम रहेको चर्चा छ।

सर्लाही–४ मा धनकौल, रामनगर, बलरा, विष्णु, बसबरिया गाउँपालिका तथा बरहथवा नगरपालिकाका केही वडासहित कुल ५१ वडा समेटिएका छन्। करिब १ लाख २५ हजार मतदाता रहेको यस क्षेत्रमा स्थानीय तह निर्वाचनपछि विभिन्न दलका वडाध्यक्ष तथा कार्यकर्ता कांग्रेस प्रवेश गरेका कारण थापाको संगठनात्मक आधार बलियो बनेको दाबी गरिएको छ।

२०७९ को स्थानीय निर्वाचनमा विष्णु गाउँपालिकाका अध्यक्ष कांग्रेसबाट निर्वाचित भएका थिए भने अन्य स्थानीय तहमा विभिन्न दलका प्रतिनिधि रहेका छन्। बलरा नगरपालिकाका ११ वडामध्ये ६ वडाध्यक्ष कांग्रेसका हुनु र केही अन्य दलका निर्वाचित जनप्रतिनिधि पार्टी प्रवेश गर्नुले कांग्रेसलाई उत्साहित बनाएको छ।

उपसभापति विश्वप्रकाश शर्माले थापाको उम्मेदवारीलाई मधेशप्रतिको सम्मानका रूपमा व्याख्या गर्दै यसलाई राष्ट्रिय महत्वको निर्णय बताएका छन्। उनका अनुसार मधेशबाट नेतृत्व स्थापित गर्नु कांग्रेसको रणनीतिक सन्देश पनि हो।

सर्लाही–४ ऐतिहासिक रूपमा कांग्रेसको गढ मानिँदै आएको क्षेत्र हो। २०४८ देखि २०५६ सम्म महन्थ ठाकुरले यहाँबाट विजय हासिल गरेका थिए। पछिल्ला तीन निर्वाचनमा काठमाडौं–४ बाट विजयी हुँदै आएका थापाको मधेश प्रवेशलाई राजनीतिक ‘टेस्ट केस’का रूपमा हेरिएको छ।

त्रिकोणीय प्रतिस्पर्धा, स्थानीय प्रभावशाली नेताहरूको भूमिका र पार्टी प्रवेशको लहरले सर्लाही–४ यसपटकको सबैभन्दा चासोको निर्वाचन क्षेत्रमध्ये एक बनेको छ। अन्तिम परिणाम जे भए पनि यहाँको चुनावले राष्ट्रिय राजनीतिमा दूरगामी सन्देश दिने निश्चित देखिएको छ।

वीरगञ्ज – वीरगञ्ज महानगरपालिका–२४ रामगढवा स्थित एक उद्योगमा मेसिनमा च्यापिएर एक मजदुरको मृत्यु भएको छ। पर्सागढी नगरपालिका–५ हर्दियाका अन्दाजी २६/२७ वर्षीय विरेन्द्र पण्डितको ज्यान गएको हो।

महेश शर्माले सञ्चालन गरेको ‘एक्स पिएम’ उद्योगमा साँझ काम गर्ने क्रममा मेसिनले च्यापिएर उनको मृत्यु भएको बताइएको छ।

जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतका अनुसार घटनाबारे अनुसन्धान भइरहेको छ। “काम गर्ने क्रममा मजदुरको मृत्यु भएको जानकारी आएको छ। अनुसन्धानका लागि वडा प्रहरी कार्यालय श्रीपुरबाट टोली खटिएको छ,” उनले बताए।

घटनापछि मृतकका आफन्त र गाउँले आइतबार साँझ उद्योग परिसरमा पुगेका थिए। उनीहरूले घटना शंकास्पद भएको दाबी गर्दै उद्योगका सञ्चालक उपस्थित भएपछि मात्र अन्य कानुनी प्रक्रिया अघि बढाउनुपर्ने माग गरेका छन्।

पर्सागढी नगरपालिका–५ का वडा अध्यक्ष नितेश मिश्रले घटनाको वास्तविकता बुझ्न कम्पनीका मालिकको प्रतीक्षामा रहेको बताए। उनका अनुसार काम गरिरहेको सिसिटिभी फुटेज र प्रहरी उद्योगमा पुगेको फुटेज उपलब्ध भए पनि घटना भएको क्षणको फुटेज नरहेको पाइएको छ। “घटना शंकास्पद देखिएको छ, कम्पनीका मालिक सम्पर्कमा आएका छैनन्,” उनले भने।

प्रहरीका अनुसार अनुसन्धानपछि घटनाबारे यथार्थ विवरण सार्वजनिक गरिनेछ।