रौतहट । रौतहटको मध्य तथा दक्षिणी भेगमा पर्ने बौधिमाई र मौलापुर नगरपालिकाका किसानहरू यतिबेला जङ्गली जनावर नीलगाई (घोडगदा)को आतङ्कका कारण ठूलो सास्ती खेपिरहेका छन्। पछिल्लो समय यी क्षेत्रमा नीलगाईको सङ्ख्या र सक्रियता बढेसँगै किसानले लगाएका नगदे तथा खाद्यान्न बालीमा ठूलो क्षति पुगिरहेको छ।

स्थानीय किसानका अनुसार नीलगाईको बथान नै खेतमा पसेर गहुँ, मुसुरो (दलहन), तोरी (तेलहन) तथा मौसमी तरकारी बाली नष्ट गरिरहेका छन्। नीलगाईले बाली खाने मात्र होइन, खेतमा दौडेर र कुल्चेर बिरुवाहरू सखाप पार्ने गरेको किसानहरूको गुनासो छ।

बौधिमाई नगरपालिकाका किसान विजय साह भन्छन्, “दिनरात पसिना बगाएर हुर्काएको गहुँ र तरकारी एकै रातमा नीलगाईले सखाप पारिदिन्छ। बिहान खेतमा जाँदा सबै नष्ट भएको देख्दा मन नै रुन्छ। यसपालि घर खर्च कसरी चलाउने भन्ने चिन्ताले सताएको छ।”

पछिल्लो समय नीलगाई बिहान सबेरै र दिउँसोसमेत निर्धक्क गाउँ नजिकका खेतमा आउन थालेका छन्। मौलापुर नगरपालिकाका विभिन्न टोलका किसानहरू अहिले आफ्नो बाली जोगाउन लाठी र टर्च बोकेर रातभर खेतमै जाग्राम बस्न बाध्य भएका छन्।

कतिपय किसानले खेत वरिपरि जाली वा झुल लगाएर छेक्ने प्रयास गरे पनि नीलगाईको बथानले सजिलै भत्काएर भित्र पस्ने गरेको स्थानीयको भनाइ छ।

नीलगाईको समस्या बढेपछि किसानहरूले स्थानीय सरकार र डिभिजन वन कार्यालयलाई जानकारी गराए पनि हालसम्म प्रभावकारी पहल नभएको उनीहरूको आरोप छ। स्थानीय किसान कृष्ण दयाल भन्छन्, “हामीले कति दिनसम्म खेतमै सुतेर बाली कुरिरहने? वन कार्यालय र नगरपालिकाले क्षतिपूर्ति र सुरक्षाका लागि उचित व्यवस्था मिलाइदिनुपर्छ।”

वन क्षेत्रबाट आउने यी जनावरको सङ्ख्या बढ्दै जाँदा किसानहरू कृषि पेशाबाटै पलायन हुनुपर्ने अवस्था आउन सक्ने चिन्ता व्यक्त गरिएको छ। वन ऐन तथा वन्यजन्तु संरक्षणसम्बन्धी नियमका कारण किसानहरूले चाहेर पनि यी जनावरलाई नियन्त्रण गर्न कठिनाइ हुने गरेको उनीहरूको भनाइ छ।

स्थानीयले नीलगाई नियन्त्रण गरी सुरक्षित स्थानमा स्थानान्तरण गर्न वा खेतको घेराबन्दीका लागि सहयोग गर्न सरकारसँग माग गरेका छन्। समयमै समस्या समाधान नगरे रौतहटमा कृषि उत्पादन घट्ने र किसान ऋणको चपेटामा पर्ने अवस्था आउन सक्ने स्थानीयको चिन्ता छ।

काठमाडौं । हाल नेपालमा पश्चिमी वायु, उपल्लो वायुमण्डलमा रहेको उच्च चापीय प्रणाली तथा नेपालको पूर्वी भूभाग नजिक तल्लो वायुमण्डलमा रहेको न्यून चापीय क्षेत्रको आंशिक प्रभाव देखिएको छ।

हाल कोशी, मधेश, बागमती र गण्डकी प्रदेशसहित कर्णाली र सुदूरपश्चिम प्रदेशका हिमाली भूभागमा सामान्यदेखि बाक्लो बदली रहेको छ भने बाँकी भूभागमा आंशिक बदली रहेको मौसम पूर्वानुमान महाशाखाले जनाएको छ। कोशी प्रदेशका केही पहाडी क्षेत्रमा हल्का वर्षा भइरहेको छ।

आज दिउँसो कोशी, मधेश, बागमती, गण्डकी र लुम्बिनी प्रदेशसहित कर्णाली र सुदूरपश्चिम प्रदेशका पहाडी भूभागमा सामान्यतया बदली रहनेछ भने अन्य स्थानमा आंशिक बदली रहने सम्भावना छ। कोशी प्रदेश तथा बागमती र गण्डकी प्रदेशका पहाडी र हिमाली भूभागका केही स्थानमा, लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रका केही स्थानमा र मधेश प्रदेशका थोरै स्थानमा मेघगर्जन र चट्याङसहित हल्का वर्षा तथा हिमपात हुने सम्भावना रहेको छ। साथै बागमती, गण्डकी र लुम्बिनी प्रदेशका तराईका एक–दुई स्थानमा पनि हल्का वर्षा हुन सक्ने जनाइएको छ।

आज राति पनि कोशी प्रदेशसहित देशका पहाडी भूभागमा सामान्यतया बदली रहनेछ भने अन्य क्षेत्रमा आंशिक बदली रहने अनुमान छ। कोशी प्रदेशका केही स्थानमा, बागमती र गण्डकी प्रदेशका पहाडी तथा हिमाली भूभागका थोरै स्थानमा तथा लुम्बिनी, कर्णाली र सुदूरपश्चिम प्रदेशका पहाडी तथा हिमाली भूभागका एक–दुई स्थानमा मेघगर्जन र चट्याङसहित हल्का वर्षा तथा हिमपातको सम्भावना रहेको मौसमविद्ले बताएका छन्।

तेहरान। मध्यपूर्वमा जारी युद्ध झन् चर्किँदै गएको छ। बुधबार इरानले इजरायल तथा खाडी क्षेत्रका विभिन्न लक्ष्यहरूतर्फ नयाँ आक्रमण सुरु गरेको जनाएको छ। साउदी अरबको तेल क्षेत्रसमेत लक्षित भएको खबर सार्वजनिक भएपछि विश्व ऊर्जा बजारमा अस्थिरता बढेको छ।

युद्धका कारण तेल आपूर्ति प्रभावित हुन सक्ने आशंकाबीच अन्तर्राष्ट्रिय बजारमा तनाव बढेको छ। यद्यपि ठूलो परिमाणमा तेल भण्डार सार्वजनिक गर्ने प्रस्तावसम्बन्धी समाचारले बजारलाई केही हदसम्म शान्त पार्ने प्रयास भइरहेको बताइएको छ।

अमेरिका र इजरायलले इरानमाथि गरेको आक्रमणपछि सुरु भएको यो युद्ध अहिले क्षेत्रभर फैलिएको छ। यसको प्रभाव ऊर्जा बजारदेखि सर्वसाधारणको दैनिक जीवनसम्म देखिन थालेको छ। केही स्थानमा इन्धनको राशनिङ सुरु भएको छ भने विद्यालयहरू समेत बन्द गरिएका छन्।

ऊर्जा आपूर्ति र युद्धको आर्थिक प्रभावबारे छलफल गर्न जी–७ देशका नेताहरू बुधबार भिडियो सम्मेलनमार्फत बैठक बस्ने तयारीमा छन्। यसैबीच अन्तर्राष्ट्रिय ऊर्जा एजेन्सीले इतिहासकै ठूलो परिमाणमा तेल भण्डार सार्वजनिक गर्ने विषयमा निर्णय गर्न सक्ने सम्भावना रहेको वाल स्ट्रिट जर्नलले जनाएको छ।

अमेरिकाले मंगलबार होर्मुज जलडमरूमध्य नजिक इरानका बारुदी सुरुङ बिछ्याउन सक्ने जहाजहरूलाई लक्षित गरी प्रहार गरेको जनाएको छ। अमेरिकी सेनाले सार्वजनिक गरेको भिडियोमा इरानी डुङ्गाहरू ध्वस्त पारिएको देखिएको बताइएको छ। अमेरिकाका अनुसार विश्वको करिब पाँचौँ भाग तेल ओसारपसार हुने यस जलमार्ग नजिकै १६ वटा माइन बिछ्याउने जहाज नष्ट गरिएको छ।

अमेरिकी राष्ट्रपति Donald Trump ले सामाजिक सञ्जालमार्फत चेतावनी दिँदै यदि जलडमरूमध्यमा बारुदी सुरुङ राखिएको पुष्टि भए र तुरुन्त हटाइएन भने इरानले “पहिले कहिल्यै नदेखिएको स्तरको सैन्य परिणाम” भोग्नुपर्ने बताएका छन्।

यसैबीच इरानले युद्धविरामको कुनै संकेत नदिएको स्पष्ट पारेको छ। इरानी संसद्का अध्यक्ष Mohammad Bagher Ghalibaf ले सामाजिक सञ्जालमार्फत इरान युद्धविराम खोजिरहेको छैन र आक्रमणकारीलाई सजाय दिनुपर्ने बताएका छन्।

इरानी सेनाले इजरायलका सहरहरूतर्फ क्षेप्यास्त्र प्रहार गरेको जनाएको छ। Jerusalem मा हवाई हमलाको साइरन र विस्फोटको आवाज सुनिएको एएफपीका पत्रकारहरूले बताएका छन्। आपतकालीन सेवाहरूले तत्काल ठूलो क्षतिको विवरण सार्वजनिक नगरे पनि Tel Aviv मा केही मानिस घाइते भएको स्थानीय टेलिभिजनले जनाएको छ।

इरानको रिभोलुसनरी गार्ड्सले बहराइन र इराकी कुर्दिस्तानतर्फ पनि आक्रमण गरेको दाबी गरेको छ। कुवेतस्थित अमेरिकी सैन्य अड्डा समेत लक्षित गरिएको इरानी मिडियाले जनाएको छ। यद्यपि Kuwait ले आठ वटा ड्रोन खसालेको मात्र पुष्टि गरेको छ।

युद्धको प्रभाव क्षेत्रीय सीमाभन्दा बाहिर पनि फैलिन थालेको छ। इराक र लेबनानमा प्रोक्सी द्वन्द्व चर्किएको छ। लेबनानमा इरान समर्थित Hezbollah लाई लक्षित इजरायली आक्रमणपछि सयौँ मानिस मारिएका छन् र लाखौँ विस्थापित भएका छन्।

इरानको स्वास्थ्य मन्त्रालयका अनुसार मार्च ८ सम्म युद्धमा १ हजार २०० भन्दा बढी मानिस मारिएका छन् भने १० हजारभन्दा बढी घाइते भएका छन्। पेन्टागनका अनुसार सात अमेरिकी सैनिकको मृत्यु भएको छ र करिब १४० जना घाइते भएका छन्।

युद्धको असर विश्वभर देखिन थालेको छ। United Nations Conference on Trade and Development ले इन्धन र खाद्यान्नको मूल्य बढ्दै जाँदा विश्वका कमजोर समुदाय सबैभन्दा बढी प्रभावित हुने चेतावनी दिएको छ।

यसैबीच Egypt मा सरकारले इन्धनको मूल्य करिब ३० प्रतिशत बढाएपछि सर्वसाधारण चिन्तित भएका छन्। राजधानी Cairo मा भेटिएकी छ सन्तानकी आमा ओम मोहम्मदले पहिले नै जीवन धान्न गाह्रो भएको भन्दै अब परिवार चलाउन अझ कठिन हुने चिन्ता व्यक्त गरिन्।

झापा । नेपाली कांग्रेस झापाको जिल्ला कार्यसमितिले पार्टी हितविपरीत गतिविधि गरेको आरोपमा पाँच जनामाथि पार्टीको साधारण सदस्यसमेत नरहने गरी निष्कासनको प्रक्रिया अघि बढाएको छ।

जिल्ला कार्यसमितिका सदस्य ठमनाथ नेपाल (झापा) र मुना भट्टराई (बुद्धशान्ति) तथा क्षेत्रीय प्रतिनिधि शम्भु खड्का (कन्काई), टेकनारायण सङ्गगौला (कन्काई) र दिपेन्द्र थापा (गौरिगञ्ज) ले केही समयदेखि पार्टी हितविपरीत गतिविधि गरेको पाइएपछि यस्तो निर्णय गरिएको जनाइएको छ।

जिल्ला कार्यसमितिको फागुन २६ गते बसेको बैठकले प्रतिनिधिसभा निर्वाचन–२०८२ मा पार्टीले उठाएको उम्मेदवारको विरुद्धमा गतिविधि गर्दै विपक्षी उम्मेदवारको पक्षमा प्रचार–प्रसार गरेको निष्कर्ष निकालेको थियो। सोही आधारमा उनीहरूलाई पार्टीको साधारण सदस्यसमेत नरहने गरी निष्कासनको कारबाही गर्न सिफारिस गरिएको हो।

नेपाली कांग्रेस झापा जिल्ला कार्यसमिति सचिव कृष्ण हुमागाईंले जारी गरेको विज्ञप्तिमा पार्टी अनुशासनविपरीत गतिविधि गर्नेहरूलाई कारबाही गरिएको उल्लेख गरिएको छ। साथै कारबाहीका लागि नेपाली कांग्रेस केन्द्रीय अनुशासन समितिमा सिफारिस गरिएको जनाइएको छ।

जिल्ला कार्यसमितिले पार्टीको नीति, अनुशासन र निर्णयको पालना गर्न सबै सदस्यलाई आग्रह समेत गरेको छ।

मुगु । कर्णाली प्रदेशको जुम्लास्थित कर्णाली स्वास्थ्य विज्ञान प्रतिष्ठान पछिल्लो समय चिकित्सा शिक्षा अध्ययनको महत्वपूर्ण केन्द्रका रूपमा स्थापित हुँदै गएको छ। अध्ययन, अनुसन्धान तथा स्वास्थ्य सेवा प्रवाहमा सक्रिय प्रतिष्ठानमा अहिले भारतसहित नेपालका विभिन्न जिल्लाबाट विद्यार्थीहरू अध्ययनका लागि पुगेका छन्।

देशका सुविधा सम्पन्न शहरहरू छाडेर दुर्गम मानिने जुम्लालाई अध्ययनको गन्तव्य बनाउने विद्यार्थीको संख्या पछिल्लो समय उल्लेख्य रूपमा बढ्दै गएको छ। अहिले प्रतिष्ठानमा भारतका ५ जना विद्यार्थी सहित पूर्व मेचीदेखि पश्चिम महाकालीसम्मका विभिन्न जिल्लाबाट कुल १३० जना विद्यार्थी चिकित्सा शिक्षा अध्ययनका लागि भर्ना भएका छन्।

धनुषा, धरान, कैलाली, तनहुँ, प्युठान, नवलपरासी, धादिङ, कालीकोट, कञ्चनपुर, दैलेख, मोरङ, लमजुङ, पोखरा, रुपन्देही, रौतहट, बाँके, बैतडी, सुर्खेत, महोत्तरी, अर्घाखाँची, रुकुम पश्चिम, चितवन, सिराहा, बारा, मुस्ताङ, बझाङ, कपिलवस्तु, दाङ, म्याग्दी लगायत जिल्लाबाट आएका विद्यार्थीलाई मंगलबार स्वागत तथा अभिमुखीकरण कार्यक्रममार्फत औपचारिक रूपमा स्वागत गरिएको थियो।

प्रतिष्ठानका शिक्षाध्यक्ष डा. डबलबहादुर धामीका अनुसार नयाँ शैक्षिक सत्र २०८२ का लागि विभिन्न संकायमा गरी १३० जना विद्यार्थी भर्ना भएका छन्। जसअनुसार एमबीबीएसतर्फ ५० जना, नर्सिङतर्फ २० जना, बीएनएसतर्फ २० जना, बीपीएचतर्फ २० जना, बीएससी नर्सिङतर्फ २० जना र बी–फार्मातर्फ २० जना विद्यार्थी अध्ययनका लागि जुम्ला पुगेका छन्।

मेडिकल काउन्सिलका विभिन्न लाइसेन्स परीक्षामा प्रतिष्ठानका विद्यार्थीहरूले शतप्रतिशत सफलता हासिल गरेपछि प्रतिष्ठानप्रति विद्यार्थी र अभिभावकको विश्वास बढ्दै गएको उनले बताए। सीमित स्रोत–साधन र राज्यको अपेक्षाकृत कम ध्यानका बाबजुद जुम्ला चिकित्सा शिक्षा अध्ययनको रोजाइ बन्नु गौरवको विषय भएको धामीले उल्लेख गरे।

गत वर्ष विभिन्न संकायमा १०४ जना विद्यार्थी भर्ना भएका थिए भने यस वर्ष २६ जना थपिएर संख्या १३० पुगेको छ। वर्षेनी विद्यार्थी संख्या बढ्दै जानुले जुम्ला चिकित्सा शिक्षा अध्ययनको केन्द्रका रूपमा स्थापित हुँदै गएको संकेत गरेको छ।

प्रतिष्ठानका उपकुलपति डा. पुजन रोकायाले देशभरबाट आएका विद्यार्थीलाई स्वागत गर्दै कर्णालीलाई विश्वास गरेर अध्ययनको गन्तव्य बनाउनु प्रतिष्ठानका लागि गर्वको विषय भएको बताए। सुविधा सम्पन्न विश्वविद्यालय छाडेर जुम्ला रोज्नुले प्रतिष्ठानलाई थप जिम्मेवार बनाएको उनले बताए।

दाङबाट एमबीबीएस अध्ययन गर्न जुम्ला पुगेका विद्यार्थी अमय आचार्यले आफूले सुनेकोभन्दा देखेको जुम्ला निकै फरक रहेको अनुभव सुनाए।

उनले भने, “जुम्लामा राम्रो बाटो छैन, निकै दुर्गम छ भन्ने धेरैले भनेका थिए। तर यहाँ आएपछि त्यो भ्रम मात्रै रहेछ भन्ने लाग्यो। जुम्ला चिकित्सा शिक्षा अध्ययनको केन्द्र मात्र होइन, भाषा, साहित्य, संस्कृति, जडीबुटी र प्राकृतिक सुन्दरताको अध्ययन गर्ने राम्रो थलो पनि रहेछ।”

विद्यार्थीहरूले अब ढुक्कका साथ अध्ययन पूरा गरेर दक्ष चिकित्सक बनेर फर्किने विश्वास व्यक्त गरेका छन्।

सुर्खेत । वीरेन्द्रनगर नगरपालिका–४ स्थित जनजागरण सामुदायिक वनमा अचेत अवस्थामा भेटिएकी १६ वर्षीया इनिसा विकको मृत्यु प्रकरणले यतिबेला व्यापक ध्यान तानेको छ। घटनामा संलग्न भएको आशंकामा प्रहरीले चार जना नाबालकलाई नियन्त्रणमा लिएर अनुसन्धान गरिरहेको छ।

घटनापछि सामाजिक सञ्जालमा विभिन्न प्रतिक्रिया आइरहेका छन् भने राजनीतिक दल, अधिकारकर्मी तथा कलाकारहरूले पनि न्यायको माग गर्दै चासो व्यक्त गरेका छन्।

यसैबीच कर्णाली प्रदेशका मुख्यमन्त्री यामलाल कँडेलले बुधबार इनिसाको घरमै पुगेर परिवारसँग भेट गरेका छन्। भेटपछि उनले घटनाको स्वतन्त्र र निष्पक्ष अनुसन्धान गर्न सुरक्षा निकायलाई निर्देशन दिएका छन्।

मुख्यमन्त्री कँडेलले सरकारले घटनाको सत्यतथ्य बाहिर ल्याई कानुनअनुसार दोषीमाथि कारबाही गर्ने प्रक्रिया अघि बढाउने बताएका छन्। पीडित परिवारलाई न्याय दिलाउन प्रदेश सरकार प्रतिबद्ध रहेको पनि उनले उल्लेख गरेका छन्।

सामाजिक सञ्जालमा आफूले पीडित परिवारसँग गरेको भेटघाटबारे भ्रमपूर्ण टिप्पणी भएको भन्दै उनले त्यसप्रति गम्भीर ध्यानाकर्षण भएको बताए। दुःखद घडीमा परिवारलाई सान्त्वना दिनु, पीडा सुन्नु र न्यायका लागि पहल गर्नु मानवीय दायित्व भएको उनले स्पष्ट पारे।

उनका अनुसार भेटका क्रममा इनिसाकी आमासँग कुरा गर्दै घटनाको निष्पक्ष र कानुनी ढङ्गले अनुसन्धान हुने र कानुनअनुसार न्याय सुनिश्चित गरिने विश्वास दिलाइएको थियो। साथै कुनै प्रकारको दबाब दिने वा प्रभाव पार्ने आरोप निराधार रहेको पनि उनले बताएका छन्।

यस घटनालाई लिएर पीडित परिवार र स्थानीयले वीरेन्द्रनगरमा ‘बालिकामाथि हुने बलात्कार, हत्या र हिंसा बन्द गर’ जस्ता नारासहित दबाबमूलक आन्दोलनसमेत गरेका छन्।

गुर्भाकोट नगरपालिका–६ बडाखोली स्थायी घर भई हाल वीरेन्द्रनगर नगरपालिका–१ मा बस्दै आएकी इनिसा शनिबार बिहान ट्युसन पढ्न जाने भन्दै घरबाट निस्किएकी थिइन्। तर बिहान करिब ९ बजे वीरेन्द्रनगर बजारको उत्तरतर्फ पर्ने जनजागरण सामुदायिक वनमा उनी अचेत अवस्थामा भेटिएकी थिइन्।

प्रहरीले उनलाई प्रदेश अस्पताल पुर्‍याउँदा चिकित्सकले मृत घोषणा गरेका थिए। सोही दिन प्रहरीले १६ वर्षीय एक किशोरलाई नियन्त्रणमा लिएको थियो, जसले इनिसासँग प्रेम सम्बन्ध रहेको बताएका छन्।

पीडित पक्षले फागुन २४ गते उजुरी दिएपछि प्रहरीले थप तीन जना नाबालक—१५, १६ र १७ वर्षका—लाई पनि नियन्त्रणमा लिएर अनुसन्धान गरिरहेको जिल्ला प्रहरी कार्यालय सुर्खेतका प्रहरी नायव उपरीक्षक मोहनजंग बुढ्थापाले जानकारी दिएका छन्।

मृतक इनिसा वीरेन्द्रनगरस्थित उषा बालबाटिकामा कक्षा ११ मा अध्ययनरत थिइन्। प्रारम्भिक अनुसन्धानमा पक्राउ परेका किशोरले मर्निङ वाक गर्ने क्रममा उनीहरूबीच शारीरिक सम्बन्ध भएको र त्यस क्रममा अत्यधिक रक्तस्राव भएको बयान दिएका छन्। उनले इनिसा अचेत भएपछि साथीहरूको सहयोगमा अस्पताल लैजान खोजिएको पनि बताएका छन्।

घटनाबारे थप अनुसन्धान जारी रहेको छ भने पोस्टमार्टम रिपोर्ट आउन बाँकी रहेको प्रहरीले जनाएको छ। पीडित परिवारले भने सामूहिक बलात्कारपछि हत्या भएको आरोप लगाउँदै उजुरी दिएका छन्। पक्राउ परेका सबै किशोर इनिसाकै कक्षाका साथी रहेको पनि खुलेको छ।

प्रहरीले घटनासम्बन्धी सबुत सङ्कलन, प्राविधिक विश्लेषण तथा अन्य अनुसन्धानका काम जारी राखेको जनाएको छ।

काठमाडौं । फागुन २१ गते सम्पन्न प्रतिनिधिसभा सदस्य निर्वाचनको मतपरिणाम सार्वजनिक हुने क्रम अन्तिम चरणमा पुगेको छ। निर्वाचन आयोगले अन्तिम नतिजा सार्वजनिक गरेलगत्तै प्रतिनिधिसभाको बैठक बोलाउने तयारी सुरु गरिएको संघीय संसद् सचिवालयले जनाएको छ।

नेपालको संविधानको धारा ९३ अनुसार प्रतिनिधिसभा निर्वाचनको अन्तिम परिणाम घोषणा भएको मितिले ३० दिनभित्र राष्ट्रपतिले संघीय संसद्को अधिवेशन आह्वान गर्नुपर्ने व्यवस्था छ।

संविधानमा ३० दिनको समयावधि भए पनि विगतका अभ्यासअनुसार एक वा दुई हप्ताभित्रै संसद् बैठक बोलाइने गरेको सचिवालयका प्रवक्ता एकराम गिरीले जानकारी दिए।

उनका अनुसार सचिवालयले नवनिर्वाचित सांसदहरूलाई काठमाडौं आउनका लागि करिब १० दिनको समय दिँदै संसद् बैठकका लागि सूचना जारी गर्छ। यसबीचमा प्रतिनिधिसभाका ज्येष्ठ सदस्यले राष्ट्रपतिबाट शपथ लिने र सोही सदस्यले अन्य सांसदलाई शपथ गराउने व्यवस्था रहेको छ।

सभामुखको निर्वाचन नभएसम्म ज्येष्ठ सदस्यले सभामुखको भूमिका निर्वाह गर्ने कानुनी प्रावधान रहेको प्रवक्ता गिरीले बताए। पहिलो बैठकले सभामुख निर्वाचनको मिति घोषणा गर्ने र सभामुखको अनुपस्थितिमा बैठक सञ्चालन गर्न प्रत्येक दलबाट तीन–तीन जना सांसदको नाम अनुमोदन गर्ने प्रक्रिया पनि तय हुने उनले बताए।

निर्माणाधीन संसद् भवनका कारण वैकल्पिक हलमा बैठक

निर्माणाधीन संघीय संसद् भवन अझै सम्पन्न नभएकाले केही समयका लागि प्रतिनिधिसभाको बैठक अर्को प्रयोजनका लागि बनाइएको हलमा बस्ने तयारी भइरहेको छ। प्रवक्ता गिरीका अनुसार प्रतिनिधिसभा र राष्ट्रियसभाका लागि निर्माणाधीन भवनको बीचमा रहेको हलमा बैठक सञ्चालनका लागि आवश्यक प्राविधिक व्यवस्थापनको काम भइरहेको छ।

सहरी विकास मन्त्रालय र निर्माण कम्पनी टुण्डी–सेक ज्वाइन्ट भेञ्चरबीच २०७६ असोज १६ गते भएको सम्झौताअनुसार संघीय संसद् भवन तीन वर्षभित्र अर्थात् २०७९ असोज १५ गतेसम्म निर्माण सम्पन्न हुनुपर्ने थियो। तर कोरोना महामारीलगायत विभिन्न कारणले भवन निर्माण अझै पूरा हुन सकेको छैन।

करिब १५१ रोपनी क्षेत्रफलमा निर्माण भइरहेको परियोजनाअन्तर्गत प्रतिनिधिसभा भवन, राष्ट्रियसभा भवन, अतिविशिष्ट कक्षसहित अन्य कार्यालय गरी १२ वटा भवन निर्माण हुनेछन्। भवन परिसरमा ३५० सिट क्षमताको संयुक्त लबी, विभिन्न संसदीय दलका कार्यालय, संसद् सचिवालय भवन, संसद् लाइब्रेरी, क्यान्टिन तथा करिब ३९० वटा गाडी पार्किङको व्यवस्था हुने बताइएको छ।

काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेले आफ्नो चुनावी खर्च ९ लाख ८९ हजार ९८७ रुपैयाँ रहेको विवरण सार्वजनिक गरेका छन्।

फागुन २१ गते सम्पन्न प्रतिनिधिसभा सदस्य निर्वाचनमा लामिछाने चितवन–२ बाट विजयी भएका थिए।

बुधबार सार्वजनिक गरिएको खर्च विवरणअनुसार सबैभन्दा बढी रकम यातायात र इन्धनमा खर्च भएको देखिएको छ। यस शीर्षकमा २ लाख ९५ हजार रुपैयाँ खर्च भएको उल्लेख गरिएको छ।

त्यस्तै खाद्यान्न तथा रासनमा १ लाख ९६ हजार रुपैयाँ र गोष्ठी तथा भेलामा १ लाख ८० हजार रुपैयाँ खर्च भएको विवरणमा जनाइएको छ।

लामिछानेले मंगलबार निर्वाचन आयोगको कार्यालयमा आफ्नो चुनावी खर्च विवरण पेश गरेका थिए।

काठमाडौं । ट्रान्सपरेन्सी इन्टरनेशनल नेपालले नवनिर्वाचित जनप्रतिनिधि र राजनीतिक दलहरूलाई लोकतन्त्रको आवरणमा हुने लुटतन्त्र अन्त्य गर्न आग्रह गरेको छ।

भर्खरै सम्पन्न प्रतिनिधिसभा निर्वाचनको परिणामले नेपाली जनताको सुशासन र समृद्धिको चाहनालाई अभूतपूर्व रूपमा प्रदर्शन गरेको निष्कर्ष निकाल्दै संस्थाले सत्ता र शक्तिलाई निजी वा दलीय स्वार्थमा नभई जनहितमा प्रयोग गर्न ध्यानाकर्षण गराएको हो।

अध्यक्ष मदनकृष्ण शर्माद्वारा जारी विज्ञप्तिमा युवा पुस्ताको भावना र संलग्नता अङ्गालेर उदाएको राष्ट्रिय स्वतन्त्र पार्टी (रास्वपा) लगायत सम्पूर्ण राजनीतिक दलबाट विजयी जनप्रतिनिधिहरूलाई बधाई ज्ञापन गरिएको छ।

विज्ञप्तिमा भनिएको छ, “कानुनी राज्यको उपहास गर्दै चरम भ्रष्टाचारले देशको अवस्था सोच्नै नसक्ने गरी कमजोर र शिथिल बनाउन जिम्मेवार राजनीतिक दल र प्रतिनिधिहरूलाई पाखा लगाउन सफल यस निर्वाचनले लोकतान्त्रिक प्रणालीप्रति जनविश्वास थपेको छ।”

संस्थाले नागरिकले दिएको यस अभूतपूर्व जनादेश र विश्वासलाई अब गठन हुने प्रतिनिधिसभा र संघीय सरकारले पूर्ण सम्मान गर्नुपर्ने बताएको छ। साथै निर्वाचनका क्रममा मत माग्दा जनतासामु गरेका प्रतिबद्धता पूरा गर्न र कुनै बहानामा ढिलाइ नगरी आम नागरिकले सुशासनको स्पष्ट अनुभूति गर्ने गरी काम गर्न सरकारसँग अपेक्षा गरिएको छ।