काठमाडौं: प्रधानमन्त्री केपी शर्मा ओलीले राजनीतिक दलसम्बन्धी कानुन परिमार्जनको आवश्यकता भए पनि कुनै दललाई फुटाउने वा मिलाउने काम आफ्नो जिम्मेवारी नभएको दाबी गरेका छन्।

नेपाल पत्रकार महासंघका नवनिर्वाचित पदाधिकारीलाई प्रधानमन्त्री निवास बालुवाटारमा बधाई तथा शुभकामना दिँदै उनले दल विभाजन गराउने सम्बन्धी अध्यादेश ल्याउन लागेको झूटो प्रचार गरिएकोमा चिन्ता व्यक्त गरे। उनले दल विभाजन वा एकता सम्बन्धी विषय ती दलहरूको आन्तरिक मामला भएको स्पष्ट पारे।

प्रधानमन्त्री ओलीले विगतमा संसदीय दल र केन्द्रीय कमिटी दुवैमा ४० प्रतिशतको समर्थन चाहिने व्यवस्थाले जटिलता निम्त्याएको स्मरण गराउँदै त्यसलाई परिमार्जन गर्न अध्यादेश ल्याएको तर त्यसको विरोध भएपछि फिर्ता लिएको बताए। उनले अहिले विरोध गर्नेहरुकै पहलमा २० प्रतिशत सांसदको समर्थनबाटै दल विभाजन गर्न सकिने व्यवस्था गरिएको उल्लेख गर्दै आफूले यस्ता कुकर्मको मनसाय नराखेको दाबी गरे।

देश विकास र जनताको सेवा ध्यानमा राख्दै सरकारका विभिन्न अध्यादेश राष्ट्रपतिसमक्ष सिफारिस गरिए पनि झूठा र नकारात्मक वक्तव्यबाट गलत सन्देश प्रवाहित भएकोप्रति उनले आपत्ति जनाए। प्रधानमन्त्री ओलीले यस्ता गलत सूचनाका कारण जनताको सूचनाको हकमा बाधा पुग्ने र लोकतन्त्रको दुरुपयोग हुन नदिन पत्रकार महासंघले सक्रिय भूमिका खेल्नुपर्नेमा जोड दिए।

उनले जारी हुन बाँकी अध्यादेशलाई राति जारी गरियो भनेर गरिएको प्रचारलाई खण्डन गर्दै दिनरात नभनी देश र जनताको पक्षमा काम गरिरहेको स्पष्ट पारे। ‘हामी १०-५ को जागिरे होइनौं। देश र जनताप्रतिको जिम्मेवारी बोध गरेर दिउँसो वा राति काम गर्छौं। लुकाएर वा छलछाम गरेर होइन, देशका हितमा खुलेआम काम गर्छौं,’ उनले भने।

सञ्चार क्षेत्रमा कीर्ते र जाली काम रोक्न सरकारले कानुन ल्याउन लागेको जानकारी दिँदै उनले पत्रकारहरूको पेसागत सुरक्षामा राज्यको भूमिका रहने प्रतिबद्धता व्यक्त गरे।

सो अवसरमा महासंघका अध्यक्ष निर्मला शर्मासहितका पदाधिकारीलाई प्रधानमन्त्री ओलीले बधाई दिएका थिए। अध्यक्ष शर्माले महिला अध्यक्ष निर्वाचित हुनु पत्रकारिताको इतिहासमा नयाँ कीर्तिमान भएको भन्दै यसमा राजनीतिक दल, पत्रकार संगठन, र आम पत्रकारहरूको समर्थन रहेको उल्लेख गरिन्।

काठमाडौँ: सोमबार सेयर बजार परिसूचक नेप्से १५.५४ अंकले घट्दै २६१० बिन्दुबाट सुरु भएको बजार ०.५९ प्रतिशतले घटेर २५९४ बिन्दुमा झरेको छ।

सोमबार १७५ कम्पनीको सेयर मूल्यमा गिरावट आएको छ। आत्मनिर्भर लघुवित्त र सिन्धु विकास बैंकको मूल्यमा नकारात्मक सर्किट लाग्दा ती कम्पनीहरूको सेयर मूल्यमा ठूलो गिरावट देखियो। उता, ६३ कम्पनीको सेयर मूल्य बढेकोमा बाराही हाइड्रोपावरको मूल्यमा सकारात्मक सर्किट लागेर उल्लेख्य वृद्धि भएको छ।

सोमबारको कुल सेयर कारोबार ६ अर्ब ६५ करोड ८ लाख रुपैयाँमा सीमित रह्यो। सबैभन्दा धेरै कारोबार एनआरएन इन्फ्रास्ट्रक्चरको भयो, जसले ४५ करोड २५ लाख रुपैयाँको कारोबार गरे।

नेप्सेका सबै उपसमूहको सूचक समेत घटेको छ, जसले बजारको समग्र अवस्था कमजोर रहेको संकेत गरेको छ।

काठमाडौँ: नेपाल राष्ट्र बैङ्कले आजका लागि विदेशी मुद्राको विनिमय दर निर्धारण गरेको छ निर्धारित विनिमयदर अनुसार, अमेरिकी डलरको भाउ आज पुनःस्थिर रहेको छ । यस्तै, युरोपियन युरो, जापानी येनको मूल्य बढेको छ । त्यस्तै, युके पाउन्ड स्टर्लिङ, स्वीस फ्र्याङ्क, अष्ट्रेलियन डलर, क्यानेडियन डलर, सिङ्गापुर डलर, साउथ कोरियन वन, स्वीडिस क्रोनर, डेनिस क्रोनर, कुवेती दिनार, बहराइन दिनार र हङकङ डलरको मूल्य भने ओरालो लागेको छ ।

अमेरिकी डलर एकको खरिददर एक सय ३७ रुपैयाँ २५ पैसा र बिक्रीदर एक सय ३७ रुपैयाँ ८५ पैसा कायम भएको छ । युरोपियन युरो एकको खरिददर एक सय ४१ रुपैयाँ ६२ पैसा र बिक्रीदर एक सय ४१ रुपैयाँ २३ पैसा, युके पाउन्ड स्टर्लिङ एकको खरिदर एक सय ६७ रुपैयाँ ५६ पैसा र बिक्रीदर एक सय ६८ रुपैयाँ २९ पैसा, स्वीस फ्र्याङ्क एकको खरिदर एक सय ४९ रुपैयाँ ७६ पैसा र बिक्रीदर एक सय ५० रुपैयाँ ४२ पैसा कायम गरिएको छ ।

अष्ट्रेलियन डलर एकको खरिदर ८४ रुपैयाँ ३८ पैसा र बिक्रीदर ८४ रुपैयाँ ७५ पैसा, क्यानेडियन डलर एकको खरिदर ९५ रुपैयाँ १६ पैसा र बिक्रीदर ९५ रुपैयाँ ५८ पैसा, सिङ्गापुर डलर एकको खरिदर एक सय रुपैयाँ ०७ पैसा र बिक्रीदर एक सय रुपैयाँ ५१ पैसा निर्धारण गरिएको छ ।

जापानी येन १० को खरिदर आठ रुपैयाँ ७० पैसा र बिक्रीदर आठ रुपैयाँ ७४ पैसा, चिनियाँ युआन एकको खरिदर १८ रुपैयाँ ७२ पैसा र बिक्रीदर १८ रुपैयाँ ८० पैसा, साउदी अरेबियन रियाल एकको खरिदर ३६ रुपैयाँ ५६ पैसा र बिक्रीदर ३६ रुपैयाँ ७२ पैसा, कतारी रियाल एकको खरिददर ३७ रुपैयाँ ६५ पैसा र बिक्रीदर ३७ रुपैयाँ ८१ पैसा कायम भएको छ ।

केन्द्रीय बैङ्कका अनुसार थाई भाट एकको खरिदर तीन रुपैयाँ ९६ पैसा र बिक्रीदर तीन रुपैयाँ ९८ पैसा, युएई दिराम एकको खरिदर ३७ रुपैयाँ ३७ पैसा र बिक्रीदर ३७ रुपैयाँ ५३ पैसा, मलेसियन रिङ्गेट एकको खरिदर ३० रुपैयाँ ५२ पैसा र बिक्रीदर ३० रुपैयाँ ६६ पैसा, साउथ कोरियन वन एक सयको खरिददर नौ रुपैयाँ ३० पैसा र बिक्रीदर नौ रुपैयाँ ३५ पैसा, स्वीडिस क्रोनर एकको खरिदर १२ रुपैयाँ २३ पैसा र बिक्रीदर १२ रुपैयाँ २८ पैसा र डेनिस क्रोनर एकको खरिदर १८ रुपैयाँ ८५ पैसा र बिक्री दर १८ रुपैयाँ ९३ तोकिएको छ ।

राष्ट्र बैङ्कले हङकङ डलर एकको खरिदर १७ रुपैयाँ ६२ पैसा र बिक्रीदर १७ रुपैयाँ ७० पैसा, कुवेती दिनार एकको खरिदर चार सय ४४ रुपैयाँ ६१ पैसा र बिक्रीदर चार सय ४६ रुपैयाँ ५५ पैसा, बहराइन दिनार एकको खरिदर तीन सय ६४ रुपैयाँ ०६ पैसा र बिक्रीदर तीन सय ६५ रुपैयाँ ६५ पैसा, ओमनी रियाल एकको खरिदर तीन सय ५६ रुपैयाँ ५२ पैसा र बिक्रीदर तीन सय ५८ रुपैयाँ ०८ पैसा तथा भारतीय रुपैयाँ एक सयको खरिदर एक सय ६० रुपैयाँ र बिक्रीदर एक सय ६० रुपैयाँ १५ पैसा तोकेको छ ।

राष्ट्र बैङ्कले यो विनिमय दरलाई आवश्यकतानुसार जुनसुकै समयमा पनि संशोधन गर्न सकिने जनाएको छ । वाणिज्य बैङ्कले तोक्ने विनिमय दर भने फरक हुनसक्ने र अद्यावधिक विनिमय दर केन्द्रीय बैङ्कको वेबसाइटमा उपलब्ध हुने जनाइएको छ ।

बरहथवा (सर्लाही): सर्लाहीको हरिवन नगरपालिका र सिन्धुलीको हरिहरपुरगढी गाउँपालिकाले चारवटा सडक स्तरोन्नतिका लागि सम्झौता गरेका छन्। आइतबार हरिवन र हरिहरपुरगढी जोड्ने केरावारी–रानीचुरी–रागेदोभान, हरिवन–क्यानेश्वर, तित्रीगाछी–धुम्बे–भुताहा–बरुण, र अत्रौली–केवनचुली–भुताहा–बरुण सडक खण्डको स्तरोन्नतिमा सहमति भएको हो।

हरिवन नगरपालिकाका प्रमुख रमेश बुढाथोकी र हरिहरपुरगढी गाउँपालिकाका अध्यक्ष बज्रध्वज वाइबाले सम्झौतापत्रमा हस्ताक्षर गरेका छन्।

सिन्धुलीको हरिहरपुरगढीका अधिकांश गाउँका बासिन्दाको व्यापारिक केन्द्र हरिवन बजार भए पनि अव्यवस्थित सडकका कारण आवतजावतमा कठिनाइ हुँदै आएको छ। “सडक राम्रो नहुँदा व्यापार र उपचारका लागि हरिवन पुग्न स्थानीयले सास्ती भोग्नुपरेको छ,” अध्यक्ष वाइबाले बताए।

सडक स्तरोन्नतिको पहलमा बागमती प्रदेशका आर्थिक मामिला मन्त्री कुन्दनराज काफ्ले र मधेश प्रदेशका अर्थमन्त्री सुनील यादवले समेत चासो देखाउँदै अवलोकन भ्रमण गरेका थिए।

हरिवनदेखि मरिणसम्मको ३५ किलोमिटर दूरीलाई सहज बनाउन दुवै पालिकाले आ–आफ्नो सीमा क्षेत्रभित्रको सडक सुधार गर्ने प्रतिबद्धता जनाएका छन्।

काठमाडौँः राष्ट्रिय स्वतन्त्र पार्टीका सभापति रवि लामिछाने आज फेरि काठमाडौं जिल्ला अदालतमा उपस्थित हुँदैछन्।
काठमाडौं जिल्ला अदालतका न्यायाधीश माधवप्रसाद अधिकारीको एकल इजलासले सोमबार पुनः अदालत पेस गर्ने गरी हिरासतमा राख्ने आदेश दिएपछि लामिछानेलाई आइतबार प्रहरी हिरासतमा राखिएको थियो।

लामिछानेको बयान अधिकारीको इजलासमा आइतबार नै सम्पन्न भए पनि थुनछेक बहस सुरू नभएकाले सोमबार अदालतमा उपस्थित गराउने सर्तमा हिरासतमा राख्ने आदेश दिइएको हो।

आइतबार बिहानै बबरमहलस्थित काठमाडौं जिल्ला अदालत पुगेका लामिछानेले प्रारम्भमा नै बयान दिएका थिए। अदालतले कास्की जिल्ला अदालतझैं धरौटी माग गरेमा उनी छुट्ने सम्भावना रहेको जनाइएको छ। तर, थुनछेक बहस नसकिएकाले उनलाई कम्तिमा एक रात हिरासतमा बिताउनुपर्ने स्थिति आएको छ।

लामिछानेलाई अदालत परिसरबाट प्रहरी हिरासतमा लैजाँदा उनका समर्थकहरूले नाराबाजी गरेका थिए। हिरासतमा जानु अघि उनले सबैलाई ‘स्यालुट’ गर्दै समर्थनप्रति आभार व्यक्त गरेका थिए।

लामिछानेलाई सूर्य दर्शन सहकारी ठगी प्रकरणमा कार्तिक २ गते पक्राउ गरिएको थियो। ८४ दिनपछि गत बिहीबार उनले ६५ लाख धरौटी बुझाएर पोखराबाट रिहा भएका थिए।

हाल उनी कालिमाटीस्थित स्वर्णलक्ष्मी बहुउद्देश्यीय सहकारी संस्थामा भएको रकम अपचलनसम्बन्धी मुद्दामा प्रतिवादी बनेका छन्। यसै मुद्दामा बयानका लागि उनलाई काठमाडौं अदालतमा तलब गरिएको हो।

जिल्ला प्रहरी परिसर, काठमाडौंले गत पुस २१ गते लामिछानेसहित ३९ जनालाई प्रतिवादी बनाउँदै मुद्दा दर्ता गर्न सिफारिस गरेको थियो। स्वर्णलक्ष्मी सहकारीबाट ६९० बचतकर्ताको १ अर्ब १९ करोड ३० लाख ९० हजार ४९३ रुपैयाँ हिनामिना गरेको आरोप उनीहरूमाथि लागेको छ।

काठमाडौँः साझा यातायातले रिक्त प्रमुख कार्यकारी अधिकृत पदका लागि दरखास्त आह्वान गरेको छ। यस पदलाई खुला प्रतिस्पर्धात्मक प्रक्रियामार्फत पदपूर्ति गरिनेछ।

आवश्यक योग्यता पुगेका इच्छुक नेपाली नागरिकहरूले सूचना प्रकाशित मितिदेखि २१ दिनभित्र पुल्चोकस्थित साझा यातायातको प्रधान कार्यालयमा रीतपूर्वक दरखास्त दिनुपर्नेछ। निर्धारित समयसीमाभित्र प्राप्त नभएका वा रीत नपुगेका दरखास्त स्वीकृत नहुने सूचनामा उल्लेख गरिएको छ।

प्रमुख कार्यकारी अधिकृत पदका लागि व्यवस्थापन, कानुन, अर्थशास्त्र, वाणिज्य शास्त्र, जनप्रशासन वा इन्जिनियरिङ विषयमा मान्यता प्राप्त विश्वविद्यालयबाट कम्तीमा स्नातकोत्तर वा सो सरहको शैक्षिक उपाधि हासिल गरेको हुनुपर्नेछ।

आवेदकले कुनै सरकारी सेवा, प्रचलित कानुन बमोजिम दर्ता भएको सङ्गठित संस्था वा अन्तर्राष्ट्रिय संघ–संस्थामा अधिकृत स्तरमा कम्तीमा राजपत्राङ्कित द्वितीय श्रेणी, दशौँ तह वा सो सरहको पदमा सात वर्षको कार्य अनुभव हासिल गरेको हुनुपर्नेछ।

त्यसैगरी, दरखास्त दिने अन्तिम मितिसम्म उमेर कम्तीमा ३५ वर्ष पूरा भएको र ६३ वर्ष ननाघेको हुनुपर्ने सूचनामा जनाइएको छ।