काठमाडौं: अमेरिकाको बाइडेन प्रशासनले रुसमाथि अहिलेसम्मकै कठोर प्रतिबन्धहरू लागू गरेको छ। युक्रेनमाथि रुसको आक्रमण रोक्न र उसको युद्धको वित्तीय स्रोतलाई कमजोर पार्न लक्षित यस प्रतिबन्धको मुख्य उद्देश्य रूसको ऊर्जा राजस्वमा प्रभाव पार्नु हो।

२०० भन्दा बढी कम्पनी र व्यक्तिमाथि प्रतिबन्ध
अमेरिकी प्रतिबन्धले २०० भन्दा बढी कम्पनी र व्यक्तिहरूलाई प्रत्यक्ष रूपमा असर गर्नेछ, जसमा व्यापारीहरू, कार्यकारीहरू, बीमा कम्पनीहरू, र सयौं तेल ट्याङ्कर समावेश छन्। यस प्रतिबन्धले रुसको तेल र ग्यास निर्यातलाई झनै सीमित गर्दै पुटिन प्रशासनको राजस्व स्रोतलाई झट्का दिने उद्देश्य राखेको छ।

बेलायतको साथ
अमेरिकासँगै बेलायतले पनि ऊर्जा क्षेत्रमा सक्रिय रूसी कम्पनीहरू गाजप्रोम नेफ्ट र सर्गुटनेफ्तेगस जस्ता संस्थामाथि प्रत्यक्ष प्रतिबन्ध लगाउने घोषणा गरेको छ। यो बेलायतले पहिलो पटक यी कम्पनीहरूमाथि यस्ता कडा कदम चालेको हो।

बेलायतका विदेश सचिव डेभिड लाम्मीले भने,

“रुसी तेल कम्पनीहरूसँगको हाम्रो कारबाहीले पुटिनको युद्धको आर्थिक आधार कमजोर बनाउनेछ। पुटिनबाट खोसिएको प्रत्येक रुबलले युक्रेनी नागरिकको जीवन बचाउन मद्दत गर्नेछ।”

कानुनी रूपमा बलियो प्रतिबन्ध
अमेरिकी अर्थ मन्त्रालयले शुक्रबार घोषणा गरेका केही प्रतिबन्धलाई कानुनी मान्यता दिने तयारी गरिरहेको छ। यसले आगामी ट्रम्प प्रशासनले पनि यी प्रतिबन्ध हटाउन चाहेमा, त्यसो गर्न कांग्रेसबाट अनुमोदन गराउनुपर्नेछ।

रुसका सहयोगीहरूमाथि सीमितता
रुससँग कानुनी रूपमा ऊर्जा व्यापार गर्ने उसको सहयोगी मुलुकहरूलाई पनि अमेरिकाले नियन्त्रण गर्ने योजना बनाइरहेको छ। यो कदमले रुसको ऊर्जा व्यापारका वैकल्पिक मार्गहरूलाई पनि अवरोध पुर्‍याउने लक्ष्य राखेको छ।

व्यापक प्रभाव
यी प्रतिबन्धहरूले रुसको ऊर्जा निर्यातमा ठूलो धक्का लगाउने र उसको अर्थतन्त्रलाई दबाबमा राख्ने अपेक्षा गरिएको छ। साथै, पश्चिमी मुलुकहरूको यो संयुक्त कदमले युक्रेनको पुनर्निर्माण र युद्ध प्रतिरोधमा थप सहयोग पुर्‍याउने विश्वास व्यक्त गरिएको छ।

युक्रेनमाथिको आक्रमणपछि रुसमाथि लागेका अन्तर्राष्ट्रिय प्रतिबन्धहरू लगातार कडा बन्दै गएका छन्। यो पछिल्लो प्रतिबन्धले रूसको आक्रमणलाई वित्तीय रूपमा कमजोर पार्न महत्वपूर्ण भूमिका खेल्ने विश्वास गरिएको छ।

काठमाडौंमा शनिबारभन्दा आइतबारको न्यूनतम तापक्रम केही घटेको छ। जल तथा मौसम पूर्वानुमान महाशाखाका अनुसार, आइतबार बिहान ५:४५ बजे काठमाडौंको न्यूनतम तापक्रम ५ डिग्री सेल्सियस मापन गरिएको छ। यो शनिबारको ५.७ डिग्री सेल्सियस तापक्रमभन्दा थोरै कम हो।

मौसमविद् बिनु महर्जनका अनुसार, पश्चिमी न्यूनचापीय प्रणालीको प्रभाव आइतबारदेखि काठमाडौंमा पनि पर्न थालेको छ। यसका कारण दिउँसो हल्का बादल लाग्नेछ र अधिकतम तापक्रममा पनि केही कमी आउने सम्भावना छ। आइतबार काठमाडौंको अधिकतम तापक्रम १६ देखि १८ डिग्री सेल्सियसका बीचमा रहने अनुमान गरिएको छ।

त्यसैगरी, साँझपख खण्डित वर्षा हुने सम्भावना रहेको मौसमविद् महर्जनले बताइन्। “माथिल्लो भूभागमा छिटपुट रूपमा वर्षा हुन सक्छ,” उनले भनिन्।

एक सातामा न्यूनतम तापक्रमको उतारचढाव

काठमाडौंको न्यूनतम तापक्रममा गत आइतबारदेखि उतारचढाव देखिएको छ।

आइतबार: ७.२°C
सोमबार: ८.१°C
मंगलबार: ७°C
बुधबार: ६.३°C
बिहीबार: ४.५°C
शुक्रबार: ४.६°C
शनिबार: ५.७°C
आइतबारको न्यूनतम तापक्रम ५°C मा झरेसँगै काठमाडौंमा चिसो बढ्न थालेको संकेत देखिएको छ। मौसमविद्हरूले यस साता तापक्रममा अझै केही कमी आउने सम्भावना औंल्याएका छन्।

काठमाडौँ: गायक प्रकाश सपूत बहुआयामिक प्रतिभाका धनी हुनुहुन्छ। उहाँ गायक मात्र नभई सङ्गीतकार, गीतकार, अभिनेता र निर्देशकका रूपमा पनि परिचित हुनुहुन्छ। आफ्ना कथाहरू गीत र श्रव्यदृश्यमार्फत व्यक्त गर्दै आउनुभएका सपूतले अहिले चलचित्र निर्माणमा पनि पाइला चाल्नुभएको छ। चलचित्रमा पनि उहाँको बहुपक्षीय भूमिका देख्न पाइनेछ।

यति धेरै भूमिका निभाउन कठिनाइ त पक्कै हुन्छ। यस जिज्ञासामा सपूतले भविष्यमा एक विधामा मात्र केन्द्रित हुने प्रतिक्रिया दिनुभएको छ। शनिबार साँझ दरबारमार्गस्थित एक चलचित्र भवनमा आयोजित पत्रकार सम्मेलनमा उहाँले निर्देशन गर्नुभएको पहिलो चलचित्र वसन्तको पहिलो गीत साँझ पर्यो झमक्कै सार्वजनिक गर्नुभएको थियो।

उहाँले भन्नुभयो, “आफैले सबै जिम्मेवारी वहन गर्दा कठिनाइ भोग्नुपर्‍यो। विशेषगरी निर्देशन र अभिनयलाई एकसाथ सम्हाल्दा ऊर्जा बाँडिएको महसुस भयो। त्यसैले, आगामी चलचित्रमा यदि मैले निर्देशन गरेँ भने आफ्ना दृश्यहरू कम गर्नेछु। नत्र, निर्देशनको जिम्मा सुनिल विकलाई दिनेछु र अभिनयमा मात्र केन्द्रित हुने योजना छ। मेरो पछिल्ला कामभन्दा गुणस्तरमा कमी नआओस् भन्ने प्रयास सधैँ हुनेछ।”

गायक सपूतले अभिनय र निर्देशन दुवै गर्ने अनुभवका लागि निश्चल बस्नेत र अर्पण थापालगायतसँग परामर्श लिएको बताउनुभयो। गायनमा व्यस्त हुँदाहुँदै चलचित्र निर्देशनमा प्रवेश गर्नुको कारणबारे उहाँले भने, “गीतमार्फत आफ्ना कथा सुनाउँदै आएको थिएँ। तर ती कथा गीतमै सीमित राखूँ कि भन्ने लाग्यो। त्यसैले, चलचित्र बनाउने निर्णय गरेँ। यो चलचित्र मध्यमवर्गीय युवाहरूको संघर्षको कथा हो।” उहाँले चलचित्रमा आफ्ना व्यक्तिगत भोगाइहरूको झल्को भए पनि यो पूर्णतः आत्मकथा भने नभएको स्पष्ट पार्नुभयो।

अभिनेत्री स्वस्तिमा खड्काले सपूतलाई नयाँ कलाकारजस्तो नलागेको बताउँदै, “उहाँको काममा परिपक्वता देखियो। शान्ति नामक पात्रमा अभिनय गर्न पाउनु मेरो लागि विशेष अवसर हो, यो मेरो सम्झनामा सधैँ रहिरहने भूमिका हो,” भन्नुभयो।

सार्वजनिक साँझ पर्यो झमक्कै गीतमा शब्द, सङ्गीत र स्वर सपूतकै रहेको छ भने गायनमा शान्तिश्री परियारले साथ दिनुभएको छ। चलचित्रमा प्रभात पाल ठकुरी, अनुप बराल, कमलमणि नेपाल, प्रकाश घिमिरेलगायतका कलाकारहरूको अभिनय रहेको छ।

आर्थिक रूपमा विपन्न विश्वकर्मा समुदायका एक युवाको लेखक बन्ने सपनालाई प्राप्त गर्न गरेको सङ्घर्षलाई चलचित्रको मूल कथावस्तु बनाइएको निर्माण पक्षले जनाएको छ। यो चलचित्र आगामी चैत २२ गतेदेखि प्रदर्शनमा आउने छ।

पर्वत: जिल्ला अदालत पर्वतमा कार्यरत न्यायाधीश सरुवा भएसँगै चालु अवस्थामा रहेका मुद्दाहरू विगत १५ दिनदेखि सुनुवाइ प्रभावित भएका छन्। जिल्ला अदालतमा कार्यरत न्यायाधीश विद्याराज पौडेल पुस १२ गते सरुवा भएका थिए। सो दिनदेखि अदालतमा रहेका मुद्दाहरूको सुनुवाइ हुन सकेको छैन।

पौडेलको स्थानमा अछामबाट प्रकाश ढुङ्गाना सरुवा भएका छन्। तर, नयाँ न्यायाधीश ढुङ्गाना हालसम्म कार्यक्षेत्रमा उपस्थित नभएकाले दैनिक मुद्दा सुनुवाइ रोकिएको पर्वत जिल्ला अदालतका श्रेस्तेदार वीरेन्द्रप्रकाश खड्काले जानकारी दिएका छन्।

यौन दुर्व्यवहार घटनाकी पीडित एक महिलाले पटकपटक मुद्दा सुनुवाइ नहुँदा समयमा न्याय नपाएको गुनासो गरेकी छन्। २०८१ वैशाखमा भएको यौन दुर्व्यवहार घटनाका सम्बन्धमा ती महिलाको मुद्दा अदालतमा प्रक्रियागत रूपमा चलिरहेको छ। आरोपित पुर्पक्षका लागि थुनामा रहे पनि मुद्दा नौपटकसम्म इजलासमा पेश भएको तर छपटक विविध कारणले स्थगित भएको र दुईपटक मात्र आदेश जारी भएको अदालतको तथ्याङ्कले देखाएको छ।

न्यायका लागि अदालतमा आएका सर्वसाधारणहरू मुद्दा सुनुवाइ प्रक्रिया बारम्बार स्थगित हुँदा र समयमा मुद्दा फछ्र्योट हुन नसक्दा समस्यामा परेका छन्।

पर्वत जिल्ला अदालतमा न्यायाधीशको एउटा मात्र दरबन्दी रहेको छ। हाल न्यायाधीश नहुँदा दैनिक चारदेखि आठवटासम्म मुद्दाको सुनुवाइ स्थगित हुने गरेको छ। यद्यपि, सामान्य थुनछेक आदेशको काम भने नरोकिएको श्रेस्तेदार खड्काले बताए।

जिल्ला अदालतमा आर्थिक लेनदेनसँग सम्बन्धित मुद्दा तथा देवानी मुद्दाहरूको सङ्ख्या पछिल्लो समय बढ्दो रहेको उनले जानकारी दिएका छन्।

बैतडी:प्रधानमन्त्री कप टी–२० महिला क्रिकेट राष्ट्रिय प्रतियोगिताका लागि सुदूरपश्चिम प्रदेशको अन्तिम टोली घोषणा गरिएको छ। प्रतियोगिताका लागि बिन्दु रावलको कप्तानीमा १४ सदस्यीय टोली छनोट गरिएको सुदूरपश्चिम प्रादेशिक क्रिकेट संघका सचिव लक्ष्मणदत्त भट्टले जानकारी दिएका छन्।

घोषित टोलीमा रहेका खेलाडीहरू:

बिन्दु रावल (कप्तान)
रितु कनौजिया
कविता कुँवर
शोभा रोकाया
करिश्मा थापा
जानकी थापा
रविना साउद
चेतना कुँवर
रेवती धामी
मञ्जु विष्ट
मनिषा बोहरा
रविना धामी
आशिका महरा
मनिषा खत्री
सचिव भट्टका अनुसार प्रशिक्षकमा नीरज चन्द, व्यवस्थापकमा पार्वती बोहरा, तथा फिजियो र सहायक प्रशिक्षकमा दिपेन्द्र बोहरा रहेका छन्।

यो टोली सुदूरपश्चिम प्रदेशस्तरीय छनोट क्रिकेट प्रतियोगितामा उत्कृष्ट प्रदर्शन गर्ने २० खेलाडीको बन्द प्रशिक्षणपछि घोषणा गरिएको हो। बैतडीको दशरथचन्द क्रिकेट मैदान, सुन्दरखालीमा बन्द प्रशिक्षण आयोजना गरिएको थियो।

प्रादेशिक क्रिकेट संघका अध्यक्ष वासुदेव जोशीका अनुसार राष्ट्रिय खेलकुद परिषद्को कार्यक्रमअन्तर्गत नेपाल क्रिकेट संघको आयोजनामा तथा सुदूरपश्चिम प्रादेशिक क्रिकेट संघको व्यवस्थापनमा आगामी माघ १ गतेदेखि धनगढीमा प्रधानमन्त्री कप महिला क्रिकेट राष्ट्रिय प्रतियोगिता हुने तय गरिएको छ।

डुम्रे (तनहुँ):‘ऋषिङ समृद्धिको आधार, कृषि, संस्कृति, पर्यटन र पूर्वाधार’ नाराका साथ आयोजित चौथो ऋषिङ अल्ट्रा म्याराथनमा नेपाली सेनाका होमलाल श्रेष्ठले उत्कृष्ट प्रदर्शन गर्दै प्रथम स्थान हासिल गरेका छन्।

श्रेष्ठले ४२.२ किलोमिटरको दुरी २ घण्टा ५७ मिनेट ४४ सेकेन्डमा पूरा गर्दै पहिलो स्थान हात पारे। यो उपलब्धिसँगै उनले नगद रु ६५,००० पुरस्कार प्राप्त गरे।

नेपाली सेनाकै राजन मेयोङ्वाले २ घण्टा ५९ मिनेट ३६ सेकेन्डमा दुरी पार गर्दै दोस्रो स्थान हासिल गरे। उनले नगद रु ४०,००० पुरस्कार जिते। यस्तै, सेनाकै जुनेश खड्काले २ घण्टा ५९ मिनेट ५९ सेकेन्डमा दुरी पूरा गरी तेस्रो स्थान प्राप्त गरे। खड्काले नगद रु २५,००० पुरस्कार प्राप्त गरे।

प्रतियोगितामा उत्कृष्ट प्रदर्शन गर्ने अन्य धावकहरूमा नवलपुरका रिखुलाल सिञ्जाली मगर, सोलुखुम्बुका अर्जुन कुलङ राई, सोलुखुम्बुकै मिलन राई, र स्याङ्जाका हरि सिञ्जाली मगरले सान्त्वना पुरस्कार स्वरूप जनही रु १०,००० प्राप्त गरेका छन्।

ऋषिङ गाउँपालिकाका सूचना अधिकारी सौगात तिमिल्सिनाका अनुसार म्याराथनमा नेपाली सेना, सशस्त्र प्रहरी बल, नेपाल प्रहरी लगायत विभिन्न निकायका ५० धावकहरूले सहभागिता जनाएका थिए।
यो प्रतियोगिता ऋषिङ क्षेत्रको कृषि, पर्यटन, संस्कृति र पूर्वाधार प्रवर्द्धनका लागि आयोजना गरिएको हो।

काठमाडौं। हाल देशमा पश्चिमी न्यून चापीय प्रणालीको आंशिक प्रभाव कायम रहेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार कर्णाली, सुदूरपश्चिम, र गण्डकी प्रदेशका उच्च पहाडी तथा हिमाली क्षेत्रहरूमा आंशिकदेखि सामान्य बदली रहेको छ। बाँकी भूभागमा भने मौसम मुख्यतया सफा छ।

दिउँसो देशभर आंशिकदेखि साधारणतया बदली रहने सम्भावना छ। लुम्बिनी, कर्णाली, र सुदूरपश्चिम प्रदेशका केही स्थानमा तथा बागमती र गण्डकी प्रदेशका थोरै स्थानमा हल्का वर्षा हुनसक्ने महाशाखाले जनाएको छ। साथै, देशका उच्च पहाडी तथा हिमाली क्षेत्रका धेरै स्थानमा हल्का हिमपातको सम्भावना रहेको छ।

राति कोशी, मधेश, र बागमती प्रदेशका पहाडी क्षेत्रहरूमा साधारणतया बदली रहनेछ भने बाँकी भूभागमा आंशिक बदलीदेखि मौसम मुख्यतया सफा रहनेछ। बागमती, गण्डकी, र कर्णाली प्रदेशका थोरै स्थानहरूमा तथा अन्य भूभागका एक-दुई स्थानमा छिटपुट हल्का वर्षा हुनसक्छ।

उच्च पहाडी र हिमाली भूभागमा, विशेषगरी कोशी, बागमती, र गण्डकी प्रदेशका केही स्थानहरूमा, हल्का हिमपातको सम्भावना छ। बाँकी उच्च पहाडी तथा हिमाली क्षेत्रका थोरै स्थानमा पनि हिमपातको सम्भावना रहेको छ।

लुम्बिनी, कर्णाली, र सुदूरपश्चिम प्रदेशका केही स्थानमा तथा बागमती र गण्डकी प्रदेशका थोरै स्थानमा हल्का वर्षा र देशका उच्च पहाडी तथा हिमाली भूभागमा हल्का हिमपातको सम्भावना भएकाले यसले जनजीवन, स्वास्थ्य, यातायात, पर्यटन, र हवाई उडानमा असर पार्न सक्ने महाशाखाले चेतावनी दिएको छ।
महाशाखाले यस्ता असरबाट जोगिन आवश्यक सतर्कता अपनाउन सबैलाई आग्रह गरेको छ।