काठमाडौँ: नेपाल राष्ट्र बैङ्कले आजका लागि विदेशी मुद्राको विनिमय दर निर्धारण गरेको छ निर्धारित विनिमयदर अनुसार, अमेरिकी डलरको भाउ आज पुनःस्थिर रहेको छ । यस्तै, युरोपियन युरो, जापानी येनको मूल्य बढेको छ । त्यस्तै, युके पाउन्ड स्टर्लिङ, स्वीस फ्र्याङ्क, अष्ट्रेलियन डलर, क्यानेडियन डलर, सिङ्गापुर डलर, साउथ कोरियन वन, स्वीडिस क्रोनर, डेनिस क्रोनर, कुवेती दिनार, बहराइन दिनार र हङकङ डलरको मूल्य भने ओरालो लागेको छ ।

अमेरिकी डलर एकको खरिददर एक सय ३७ रुपैयाँ २५ पैसा र बिक्रीदर एक सय ३७ रुपैयाँ ८५ पैसा कायम भएको छ । युरोपियन युरो एकको खरिददर एक सय ४१ रुपैयाँ ६२ पैसा र बिक्रीदर एक सय ४१ रुपैयाँ २३ पैसा, युके पाउन्ड स्टर्लिङ एकको खरिदर एक सय ६७ रुपैयाँ ५६ पैसा र बिक्रीदर एक सय ६८ रुपैयाँ २९ पैसा, स्वीस फ्र्याङ्क एकको खरिदर एक सय ४९ रुपैयाँ ७६ पैसा र बिक्रीदर एक सय ५० रुपैयाँ ४२ पैसा कायम गरिएको छ ।

अष्ट्रेलियन डलर एकको खरिदर ८४ रुपैयाँ ३८ पैसा र बिक्रीदर ८४ रुपैयाँ ७५ पैसा, क्यानेडियन डलर एकको खरिदर ९५ रुपैयाँ १६ पैसा र बिक्रीदर ९५ रुपैयाँ ५८ पैसा, सिङ्गापुर डलर एकको खरिदर एक सय रुपैयाँ ०७ पैसा र बिक्रीदर एक सय रुपैयाँ ५१ पैसा निर्धारण गरिएको छ ।

जापानी येन १० को खरिदर आठ रुपैयाँ ७० पैसा र बिक्रीदर आठ रुपैयाँ ७४ पैसा, चिनियाँ युआन एकको खरिदर १८ रुपैयाँ ७२ पैसा र बिक्रीदर १८ रुपैयाँ ८० पैसा, साउदी अरेबियन रियाल एकको खरिदर ३६ रुपैयाँ ५६ पैसा र बिक्रीदर ३६ रुपैयाँ ७२ पैसा, कतारी रियाल एकको खरिददर ३७ रुपैयाँ ६५ पैसा र बिक्रीदर ३७ रुपैयाँ ८१ पैसा कायम भएको छ ।

केन्द्रीय बैङ्कका अनुसार थाई भाट एकको खरिदर तीन रुपैयाँ ९६ पैसा र बिक्रीदर तीन रुपैयाँ ९८ पैसा, युएई दिराम एकको खरिदर ३७ रुपैयाँ ३७ पैसा र बिक्रीदर ३७ रुपैयाँ ५३ पैसा, मलेसियन रिङ्गेट एकको खरिदर ३० रुपैयाँ ५२ पैसा र बिक्रीदर ३० रुपैयाँ ६६ पैसा, साउथ कोरियन वन एक सयको खरिददर नौ रुपैयाँ ३० पैसा र बिक्रीदर नौ रुपैयाँ ३५ पैसा, स्वीडिस क्रोनर एकको खरिदर १२ रुपैयाँ २३ पैसा र बिक्रीदर १२ रुपैयाँ २८ पैसा र डेनिस क्रोनर एकको खरिदर १८ रुपैयाँ ८५ पैसा र बिक्री दर १८ रुपैयाँ ९३ तोकिएको छ ।

राष्ट्र बैङ्कले हङकङ डलर एकको खरिदर १७ रुपैयाँ ६२ पैसा र बिक्रीदर १७ रुपैयाँ ७० पैसा, कुवेती दिनार एकको खरिदर चार सय ४४ रुपैयाँ ६१ पैसा र बिक्रीदर चार सय ४६ रुपैयाँ ५५ पैसा, बहराइन दिनार एकको खरिदर तीन सय ६४ रुपैयाँ ०६ पैसा र बिक्रीदर तीन सय ६५ रुपैयाँ ६५ पैसा, ओमनी रियाल एकको खरिदर तीन सय ५६ रुपैयाँ ५२ पैसा र बिक्रीदर तीन सय ५८ रुपैयाँ ०८ पैसा तथा भारतीय रुपैयाँ एक सयको खरिदर एक सय ६० रुपैयाँ र बिक्रीदर एक सय ६० रुपैयाँ १५ पैसा तोकेको छ ।

राष्ट्र बैङ्कले यो विनिमय दरलाई आवश्यकतानुसार जुनसुकै समयमा पनि संशोधन गर्न सकिने जनाएको छ । वाणिज्य बैङ्कले तोक्ने विनिमय दर भने फरक हुनसक्ने र अद्यावधिक विनिमय दर केन्द्रीय बैङ्कको वेबसाइटमा उपलब्ध हुने जनाइएको छ ।

बरहथवा (सर्लाही): सर्लाहीको हरिवन नगरपालिका र सिन्धुलीको हरिहरपुरगढी गाउँपालिकाले चारवटा सडक स्तरोन्नतिका लागि सम्झौता गरेका छन्। आइतबार हरिवन र हरिहरपुरगढी जोड्ने केरावारी–रानीचुरी–रागेदोभान, हरिवन–क्यानेश्वर, तित्रीगाछी–धुम्बे–भुताहा–बरुण, र अत्रौली–केवनचुली–भुताहा–बरुण सडक खण्डको स्तरोन्नतिमा सहमति भएको हो।

हरिवन नगरपालिकाका प्रमुख रमेश बुढाथोकी र हरिहरपुरगढी गाउँपालिकाका अध्यक्ष बज्रध्वज वाइबाले सम्झौतापत्रमा हस्ताक्षर गरेका छन्।

सिन्धुलीको हरिहरपुरगढीका अधिकांश गाउँका बासिन्दाको व्यापारिक केन्द्र हरिवन बजार भए पनि अव्यवस्थित सडकका कारण आवतजावतमा कठिनाइ हुँदै आएको छ। “सडक राम्रो नहुँदा व्यापार र उपचारका लागि हरिवन पुग्न स्थानीयले सास्ती भोग्नुपरेको छ,” अध्यक्ष वाइबाले बताए।

सडक स्तरोन्नतिको पहलमा बागमती प्रदेशका आर्थिक मामिला मन्त्री कुन्दनराज काफ्ले र मधेश प्रदेशका अर्थमन्त्री सुनील यादवले समेत चासो देखाउँदै अवलोकन भ्रमण गरेका थिए।

हरिवनदेखि मरिणसम्मको ३५ किलोमिटर दूरीलाई सहज बनाउन दुवै पालिकाले आ–आफ्नो सीमा क्षेत्रभित्रको सडक सुधार गर्ने प्रतिबद्धता जनाएका छन्।

काठमाडौँः राष्ट्रिय स्वतन्त्र पार्टीका सभापति रवि लामिछाने आज फेरि काठमाडौं जिल्ला अदालतमा उपस्थित हुँदैछन्।
काठमाडौं जिल्ला अदालतका न्यायाधीश माधवप्रसाद अधिकारीको एकल इजलासले सोमबार पुनः अदालत पेस गर्ने गरी हिरासतमा राख्ने आदेश दिएपछि लामिछानेलाई आइतबार प्रहरी हिरासतमा राखिएको थियो।

लामिछानेको बयान अधिकारीको इजलासमा आइतबार नै सम्पन्न भए पनि थुनछेक बहस सुरू नभएकाले सोमबार अदालतमा उपस्थित गराउने सर्तमा हिरासतमा राख्ने आदेश दिइएको हो।

आइतबार बिहानै बबरमहलस्थित काठमाडौं जिल्ला अदालत पुगेका लामिछानेले प्रारम्भमा नै बयान दिएका थिए। अदालतले कास्की जिल्ला अदालतझैं धरौटी माग गरेमा उनी छुट्ने सम्भावना रहेको जनाइएको छ। तर, थुनछेक बहस नसकिएकाले उनलाई कम्तिमा एक रात हिरासतमा बिताउनुपर्ने स्थिति आएको छ।

लामिछानेलाई अदालत परिसरबाट प्रहरी हिरासतमा लैजाँदा उनका समर्थकहरूले नाराबाजी गरेका थिए। हिरासतमा जानु अघि उनले सबैलाई ‘स्यालुट’ गर्दै समर्थनप्रति आभार व्यक्त गरेका थिए।

लामिछानेलाई सूर्य दर्शन सहकारी ठगी प्रकरणमा कार्तिक २ गते पक्राउ गरिएको थियो। ८४ दिनपछि गत बिहीबार उनले ६५ लाख धरौटी बुझाएर पोखराबाट रिहा भएका थिए।

हाल उनी कालिमाटीस्थित स्वर्णलक्ष्मी बहुउद्देश्यीय सहकारी संस्थामा भएको रकम अपचलनसम्बन्धी मुद्दामा प्रतिवादी बनेका छन्। यसै मुद्दामा बयानका लागि उनलाई काठमाडौं अदालतमा तलब गरिएको हो।

जिल्ला प्रहरी परिसर, काठमाडौंले गत पुस २१ गते लामिछानेसहित ३९ जनालाई प्रतिवादी बनाउँदै मुद्दा दर्ता गर्न सिफारिस गरेको थियो। स्वर्णलक्ष्मी सहकारीबाट ६९० बचतकर्ताको १ अर्ब १९ करोड ३० लाख ९० हजार ४९३ रुपैयाँ हिनामिना गरेको आरोप उनीहरूमाथि लागेको छ।

काठमाडौँः साझा यातायातले रिक्त प्रमुख कार्यकारी अधिकृत पदका लागि दरखास्त आह्वान गरेको छ। यस पदलाई खुला प्रतिस्पर्धात्मक प्रक्रियामार्फत पदपूर्ति गरिनेछ।

आवश्यक योग्यता पुगेका इच्छुक नेपाली नागरिकहरूले सूचना प्रकाशित मितिदेखि २१ दिनभित्र पुल्चोकस्थित साझा यातायातको प्रधान कार्यालयमा रीतपूर्वक दरखास्त दिनुपर्नेछ। निर्धारित समयसीमाभित्र प्राप्त नभएका वा रीत नपुगेका दरखास्त स्वीकृत नहुने सूचनामा उल्लेख गरिएको छ।

प्रमुख कार्यकारी अधिकृत पदका लागि व्यवस्थापन, कानुन, अर्थशास्त्र, वाणिज्य शास्त्र, जनप्रशासन वा इन्जिनियरिङ विषयमा मान्यता प्राप्त विश्वविद्यालयबाट कम्तीमा स्नातकोत्तर वा सो सरहको शैक्षिक उपाधि हासिल गरेको हुनुपर्नेछ।

आवेदकले कुनै सरकारी सेवा, प्रचलित कानुन बमोजिम दर्ता भएको सङ्गठित संस्था वा अन्तर्राष्ट्रिय संघ–संस्थामा अधिकृत स्तरमा कम्तीमा राजपत्राङ्कित द्वितीय श्रेणी, दशौँ तह वा सो सरहको पदमा सात वर्षको कार्य अनुभव हासिल गरेको हुनुपर्नेछ।

त्यसैगरी, दरखास्त दिने अन्तिम मितिसम्म उमेर कम्तीमा ३५ वर्ष पूरा भएको र ६३ वर्ष ननाघेको हुनुपर्ने सूचनामा जनाइएको छ।

काठमाडौं: पुरानो बसपार्कस्थित भ्युटावरको नक्सा प्रक्रिया निष्क्रिय गर्ने निर्णय

काठमाडौं महानगरपालिकाले पुरानो बसपार्कमा निर्माणाधीन भ्युटावरको नक्सा प्रक्रिया निष्क्रिय गर्ने निर्णय गरेको छ। आइतबार एक सूचना जारी गर्दै महानगरले यो कदम चालेको हो।

सूचनामा भनिएको छ, “काठमाडौं महानगरपालिका र जलेश्वर स्वच्छन्द बिकोई बिल्डर्स प्रालिबीच २०७१ साल फागुन २२ गते काठमाडौं भ्युटावर निर्माणका लागि सम्झौता भएको थियो। उक्त प्रालिबाट निर्माण हुँदै गरेको भ्युटावर भवनको नक्सा पाससम्बन्धी छानबिन समिति गठन भई काम भइरहेको हुँदा छानबिनको प्रतिवेदन प्राप्त नभएसम्मका लागि उक्त भवनको नक्सा पास प्रक्रिया निष्क्रिय रहने छ।”

यसअघि, काठमाडौं महानगरपालिकाले नक्सा पासमा अनियमितता भएको आशंकामा प्रमुख प्रशासकीय अधिकृत सुरेश गुरागाईंलाई निलम्बन गरेको थियो।

महानगरले सरोकारवालाहरूलाई छानबिन प्रक्रिया पूरा नभएसम्म नक्सा पाससँग सम्बन्धित कुनै पनि काम नगर्न सूचित गरेको छ।

काठमाडौं: सरकारले माघ पहिलो साता संसद्को हिउँदे अधिवेशन बोलाउने तयारी गरेको छ। विपक्षी दलका नेताहरूले संसद् अधिवेशन छलेर अध्यादेशबाट सरकार सञ्चालन गर्न लागेको आरोप लगाइरहेका बेला सरकार यस्तो तयारीमा जुटेको हो।

नेकपा एमालेका प्रमुख सचेतक महेश बर्तौलाले संसद् त सरकारलाई नै आवश्यक रहेको बताउँदै, माघ पहिलो साता अधिवेशन बोलाउने प्रक्रिया अघि बढिरहेको जानकारी दिए। उनका अनुसार कानुन निर्माणमा ढिलाइ भएपछि सरकार अध्यादेश ल्याउन बाध्य भएको हो।

शुक्रबारको मन्त्रिपरिषद् बैठकले विभिन्न २७ ऐन अध्यादेशमार्फत संशोधन गर्न राष्ट्रपतिसमक्ष सिफारिस गर्ने निर्णय गरेको थियो। साथै, आर्थिक कार्यविधि तथा वित्तीय उत्तरदायित्व ऐन र निजीकरण ऐनमा संशोधन गरी अन्य दुई अध्यादेश जारी गरिएको छ।

विपक्षीको असन्तुष्टि
प्रमुख प्रतिपक्षी दल माओवादीका उपाध्यक्ष अग्निप्रसाद सापकोटाले संसद्को हिउँदे अधिवेशन ढिलो गराइएकोमा असन्तुष्टि जनाए। काठमाडौँमा भएको एक कार्यक्रममा उनले संसद् अधिवेशन नियमित समयमै आह्वान हुनुपर्नेमा जोड दिए।

यता, नेकपा एमालेका उपमहासचिव प्रदीप ज्ञवालीले संसद् अधिवेशन नचलिरहेको बेला संविधानको धारा ११४ बमोजिम अध्यादेश ल्याउन सकिने बताए। उनले अध्यादेशलाई संसद्को अधिकार कटौती भन्नु अनुचित भएको तर्क गर्दै, सदनको पहिलो बैठकमा अध्यादेशहरू पेस गरिने स्मरण गराए।

तर, सत्तारुढ दलकै नेता एनपी साउदले अध्यादेशमार्फत कानुन निर्माण गर्न सरकारको प्राथमिकता देखिएकोमा असन्तुष्टि व्यक्त गरे।

अन्य दलहरूको प्रतिक्रिया
राप्रपाका अध्यक्ष राजेन्द्र लिङ्देनले सरकारलाई अध्यादेशमार्फत सर्वसत्तावादतर्फ उन्मुख भएको आरोप लगाए। नेकपा (एकीकृत समाजवादी) का अध्यक्ष माधवकुमार नेपालले सरकार सदनसँग डराएर समस्याको समाधान अध्यादेशमार्फत खोज्न लागेको टिप्पणी गरे।

संसद्को बर्षे अधिवेशन भदौ ३१ गते अन्त्य गरिएको थियो। संघीय संसद् सचिवालयले अधिवेशन बोलाउनेबारे सरकार र सभामुखबीच अनौपचारिक छलफल भइरहेको हुनसक्ने जानकारी दिए।

काठमाडौं: अमेरिकाको प्रमुख उड्डयन कम्पनी बोइङले डोनाल्ड ट्रम्पको सपथ ग्रहण समारोहका लागि १० लाख अमेरिकी डलर सहयोग गरेको पुष्टि गरेको छ। बीबीसीलाई दिएको जानकारी अनुसार, यो योगदान राष्ट्रपतिको शपथ ग्रहण समारोहलाई समर्थन गर्ने बोइङको दीर्घकालीन परम्पराको हिस्सा हो।

बोइङमात्र होइन, प्रविधि क्षेत्रका दिग्गज कम्पनीहरू गुगल र माइक्रोसफ्टले पनि समान रकम ($१ मिलियन) सहयोग गरेका छन्। यसका साथै, तेल उत्पादक कम्पनी शेभरन र टेक्नोलोजी क्षेत्रमा अग्रणी मेटा (पूर्व फेसबुक), अमेजन, र उबरले पनि योगदान दिएको पुष्टि भएको छ।

कार निर्माता कम्पनीहरू फोर्ड, जनरल मोटर्स, र टोयोटाले पनि ट्रम्पको सपथ ग्रहण समारोहमा १-१ मिलियन डलर प्रदान गरेका छन्।

बोइङको परम्परा बोइङका प्रवक्ताले भने, “हामी बोइङको द्विपक्षीय परम्परालाई निरन्तरता दिँदै अमेरिकी राष्ट्रपतिको शपथ ग्रहणलाई समर्थन गर्न पाउँदा खुसी छौं।”

बोइङले पछिल्लो तीन राष्ट्रपतिको शपथ ग्रहणका लागि पनि समान स्तरको आर्थिक सहयोग गरेको बताएको छ।

डोनाल्ड ट्रम्प आगामी जनवरी २० मा अमेरिकाको राष्ट्रपति पदको दोस्रो कार्यकालका लागि सपथ ग्रहण गर्दैछन्। यसलाई ऐतिहासिक अवसरको रूपमा लिने तयारी गरिएको छ, जसमा ठूला अमेरिकी कम्पनीहरूले ठूलो मात्रामा आर्थिक सहयोग पुर्‍याएका छन्।

यस किसिमका सहयोगहरूले ठूला कम्पनीहरूले राजनीतिक घटनामा खेल्ने भूमिकामाथि थप चर्चा सिर्जना गरेको छ। आलोचकहरूले यसलाई कर्पोरेट प्रभावको संकेत मान्ने गरे पनि, समर्थकहरूले यसलाई लोकतान्त्रिक परम्पराको समर्थनको रूपमा हेर्ने गर्छन्।

सपथ ग्रहण समारोहमा योगदान पुर्‍याउने यी ठूला कम्पनीहरूको भूमिका अमेरिकी राजनीतिमा कर्पोरेट सहभागिताबारे नयाँ बहसको विषय बन्नसक्छ।