बुटवल: रुपन्देही जिल्ला अदालतमा राष्ट्रिय स्वतन्त्र पार्टीका सभापति रवि लामिछानेको बयान सकिए पनि थुनछेक बहस आज नहुने भएको छ।

न्यायाधीश पल्हादकुमार योगीको इजलासमा लामिछानेको बयान मात्र सकिएकाले थुनछेक बहस बुधवार नहुने अदालतका सूचना अधिकारी अनन्तराज मरासिनीले जानकारी दिए।

बुटवलको सुप्रिम सहकारीको बचत ठगीसम्बन्धी आरोपमा आइतबार पूरक अभियोग दर्ता गरिएको थियो। बयानका लागि मंगलबार लामिछाने भैरहवा पुगेका थिए।

यस मुद्दामा लामिछानेसहित छविलाल जोशी, जीबी राई र अन्य ४२ जनाविरुद्ध जिल्ला अदालतमा मुद्दा दायर गरिएको छ। आरोपअनुसार सुप्रिम सहकारीका १,८३१ बचतकर्ताको ८६ करोड १८ लाख २३ हजार ७५४ रुपैयाँ हिनामिना गरिएको छ।

पछिल्लो छानबिनमा प्रहरीले सहकारीबाट १४ करोड २९ लाख रुपैयाँभन्दा बढी रकम गोर्खा मिडिया नेटवर्क प्रालिमा गएकाे र २ करोड रुपैयाँ लामिछानेको नाममा ऋण गएकाे पत्ता लगाएको थियो।

यसअघि लामिछाने कास्की र काठमाडौंका मुद्दामा क्रमशः ६५ लाख र ६० लाख धरौटी बुझाएर रिहा भएका थिए। हाल उनीमाथि चितवन र पर्साका अदालतमा बयान दिन बाँकी छ। चितवन र पर्साका सरकारी वकिलसमक्ष बयानका लागि उनीमाथि पक्राउ पुर्जी जारी भएको छ।

मोरङ: नेपाली कांग्रेसका केन्द्रीय सदस्य डा. शेखर कोइरालाले वर्तमान गठबन्धन सरकार कुनै पनि अवस्थामा परिवर्तन नहुने स्पष्ट पारेका छन्।

आज विराटनगरस्थित कोइराला निवासमा नेपाल प्रेस युनियन, मोरङले आयोजना गरेको पत्रकार भेटघाटमा बोल्दै डा. कोइरालाले नेपाली कांग्रेस र नेकपा एमालेबीचको सात बुँदे सहमतिको आधारमा निर्माण भएको सरकार परिवर्तन हुने कुनै कारण नरहेको बताए।

उनले भने, “छ महिनाको अवधिमा कुनै सरकारले ठूलो उपलब्धि हासिल गर्न सक्दैन।” संविधान संशोधन, सुशासन, र आर्थिक विकासजस्ता विषयमा सरकारले गम्भीर भएर अघि बढ्नुपर्ने उनको सुझाव थियो। साथै, संविधान संशोधनको मुद्दालाई जनतामाझ लैजान जोड दिनुपर्ने धारणा व्यक्त गरे।

डा. कोइरालाले हालैको आफ्नो बेलायत भ्रमणका क्रममा त्यहाँका उद्योगपतिहरूलाई नेपालमा संयुक्त उद्योग स्थापना गर्न आह्वान गरेको जानकारी दिए। उनले यसले नेपालको दुई छिमेकी मुलुकसँगको व्यापार घाटा कम गर्ने विश्वास समेत व्यक्त गरे।

काठमाडौँ । देशभर हाल पश्चिमी न्यून चापीय प्रणालीको आंशिक प्रभाव रहेको मौसम पूर्वानुमान महाशाखाले जनाएको छ। यस प्रभावका कारण कर्णाली र सुदूरपश्चिम प्रदेशका पहाडी क्षेत्रमा आंशिक बदली छ भने अन्य स्थानमा मौसम सामान्यतया सफा रहेको छ। तराईका धेरै भूभागमा भने बिहान हुस्सु र कुहिरो लागिरहेको छ।

आज कोशी, मधेस, बागमती र लुम्बिनी प्रदेशका धेरै स्थानमा मौसम मुख्यतया सफा रहने सम्भावना छ। गण्डकी, कर्णाली, र सुदूरपश्चिम प्रदेशमा भने आंशिकदेखि सामान्य बदलीको सम्भावना रहेको महाशाखाले जानकारी दिएको छ। उच्च पहाडी र हिमाली भूभागका केही स्थानमा हल्का हिमपात हुन सक्ने पूर्वानुमान छ।

विशेष गरी कर्णाली र सुदूरपश्चिम प्रदेशका उच्च पहाडी तथा हिमाली क्षेत्रमा केही स्थानमा र गण्डकी प्रदेशका उच्च पहाडी तथा हिमाली भूभागमा हल्का हिमपातको सम्भावना रहेको छ। तराई र उपत्यकाका धेरै ठाउँमा बिहान हुस्सु र कुहिरोले ढाक्ने सम्भावना छ।

मौसमको यस परिस्थितिले दैनिक जनजीवन, कृषि, स्वास्थ्य, यातायात, र हवाई उडानमा असर पर्न सक्ने भएकाले आवश्यक सतर्कता अपनाउन महाशाखाले आग्रह गरेको छ।

काठमाडौं: अमेरिकाको ४७औं राष्ट्रपतिको रूपमा डोनाल्ड ट्रम्पले पद तथा गोपनियताको सपथ लिएका छन्। सपथपछि ३० मिनेट लामो सम्बोधनमा उनले मेक्सिकोसँगको दक्षिणी सिमामा संकटकाल घोषणा गर्दै अबैध आप्रवासीलाई देश निकाला गर्ने र तेल तथा ग्यास उत्पादन बढाउनेजस्ता झन्डै चार दर्जन योजना सार्वजनिक गरेका छन्।

ट्रम्प परिवारको इतिहास
डोनाल्ड ट्रम्पका हजुरबुवा फ्रेडरिक ट्रम्प जर्मनीमा जन्मेका थिए। उनी १६ वर्षको उमेरमा जर्मनीको सेनामा भर्ती हुनुपर्ने कानुनबाट बच्न अमेरिका आएका थिए। उनले न्यूयोर्कमा नाइको काम सुरु गरे र पछि अलास्कामा खानी व्यवसायबाट धेरै सम्पत्ति जोडे।

उनका छोरा फ्रेड ट्रम्पले घर निर्माण व्यवसायमार्फत ट्रम्प परिवारको प्रतिष्ठा स्थापना गरे। उनले दोस्रो विश्वयुद्धका समयमा सरकारी योजनाहरूको फाइदा उठाउँदै ब्रुकलिन र क्वीन्सजस्ता क्षेत्रमा सस्तो घर निर्माण गरेका थिए।

डोनाल्ड ट्रम्पको जन्म १४ जुन १९४६ मा न्यूयोर्कमा भएको हो। उनी फ्रेड ट्रम्पका पाँच सन्तानमध्ये चौथो हुन्। धनी परिवारमा जन्मेका कारण ट्रम्पलाई ‘चाँदीको चम्चा लिएर जन्मेका’ भनेर पनि उल्लेख गरिन्छ।

ट्रम्पले आफ्नो व्यवसायिक करियरमा ठूलाठूला परियोजनाहरू पूरा गरे। तर, उनीसँग केही विवाद पनि जोडिएका छन्। १९७० को दशकमा उनीमाथि अश्वेतहरूलाई घर भाडामा नदिएको आरोप लागेको थियो।

सपथपछि घोषणा गरिएको नीतिहरू
सपथ ग्रहणपछि ट्रम्पले:

मेक्सिको सिमानामा संकटकाल लागू।
अबैध आप्रवासीलाई देश निकाला।
देशमा तेल र ग्यास उत्पादन वृद्धि।
पनामा नहरको स्वामित्व लिने।
डोनाल्ड ट्रम्पको यो सपथग्रहणले अमेरिकी नीतिमा नयाँ आयाम थप्ने अपेक्षा गरिएको छ।

काठमाडौं: धरान उपमहानगरपालिकाका मेयर हर्क साम्पाङले प्रधानमन्त्री केपी शर्मा ओलीले आफूसँग भेट गर्न नचाहेको आरोप लगाएका छन्।

मंगलबार सिंहदरबारमा प्रधानमन्त्रीलाई भेट्न पुगेका मेयर साम्पाङले प्रधानमन्त्रीसँग भेट गर्न नपाएपछि सामाजिक सञ्जालमा लेखे, ‘केपी ओलीले मलाई फेस गर्न सकेनन्।’

खानेपानीको समस्याबारे कुरा राख्न मेयर साम्पाङ सोमबार रित्तो गाग्रोसहित काठमाडौं आएका थिए। मंगलबार सिंहदरबार पुगेका बेला प्रहरीद्वारा गाग्रो खोसिएको बताइएको छ।

उनले खानेपानी मन्त्रालयलाई धरानको पानी समस्या समाधानका लागि बारम्बार ध्यानाकर्षण गराए पनि कुनै सुनुवाइ नभएको गुनासो व्यक्त गरेका छन्।

काठमाडौं: गायक शिव परियारले खेम सेन्चुरीलाई सुझाव दिएका छन् कि उनले आफूलाई अन्य कलाकार जस्तो बनाउनको लागि प्रयास नगर्नुहोस्। भ्वाइस अफ नेपालमा जर्जको रूपमा देखा परेका परियारले बर्जर थिच्ने विषयमा व्यापक आलोचना भएसँगै यस्तो टिप्पणी गरेका हुन्। खुट्टाले बर्जर थिच्ने नक्कल अरू कसैबाट गरेको भन्ने परियारको धारणा छ।

“खेम भाइको भिडियो हेर्दा अलिकति अस्वाभाविक लाग्यो। भविष्यमा आफूलाई छोडेर अरूको जस्तो बन्ने प्रयास नगर्नुहोस्,” उनले सामाजिक सञ्जालमार्फत भनेका छन्। “मौलिक खेम सेन्चुरी नै नेपाली लोकसंगीतलाई प्रिय र आवश्यक छ। आफूलाई छोडेर अरुजस्तो बन्ने प्रयास गर्दा प्रायः नकारात्मक अनुभवहरू सिर्जना हुने गर्छ। भाइको अवस्थाले भविष्यमा सोच्नुपर्ने विषय हो।”

परियारले संगीतमा केही विवाद उत्पन्न हुँदा जात, धर्म, वर्गमाथि आक्रमण हुने विषयमा धारणा राखेका छन्। “मैले पढेको संगीतको शास्त्रमा संगीतको कुनै जात, धर्म, वर्ग, रंग र भूगोल हुँदैन भनेर उल्लेख छ। म त्यही शास्त्रको आधारमा संगीतमा जीवनको यात्रा गरिरहेको छु,” उनले थपे। “तर मेरो देशमा संगीतकार कलाकारको विवाद आउँदा पहिलो हमला जात र वर्गमा गरिन्छ। यसपटक पनि यही भयो।” परियारले सामाजिक सञ्जालमा जात भनेर गाली गर्नेहरूलाई संगीतका श्रोता नभई जातका श्रोता र हिमायती रहेको टिप्पणी गरेका छन्।