काठमाडौंः ब्रिटिश–नेपाली लेखक, निर्देशक तथा निर्माता प्रदीप शाही सन् २०२५ मा आयोजना हुने Cannes Producers Network का लागि चयन भएका छन्। यो नेटवर्क विश्वप्रसिद्ध कान्स फिल्म फेस्टिभल अन्तर्गतको Marché du Film को प्रतिष्ठित कार्यक्रम हो, जसमा विश्वभरका अग्रणी निर्माता तथा सर्जकहरूलाई आमन्त्रण गरिन्छ। यस उपलब्धिले शाहीलाई अन्तर्राष्ट्रिय फिल्म निर्माणको केन्द्रमा स्थापित गरेको छ।
शाहीले यस वर्ष मे महिनामा हुने कान्स फिल्म मार्केटमा आफ्नो नयाँ साइ–फाइ थ्रिलर फिल्म ‘एक्लो’ प्रस्तुत गर्नेछन्। पोस्ट-प्रोडक्सन चरणमा रहेको यो जम्बी थ्रिलर चलचित्र हिमालय क्षेत्रको आध्यात्मिकता र मिथकीय पृष्ठभूमिमा आधारित छ। चलचित्रले अस्तित्वको संकट, पौराणिक विश्वास र अदृश्य शक्तिहरूबीचको सम्बन्ध उजागर गर्दै मानव सभ्यताको सम्भावित विनाशको चित्रण गर्दछ।
‘एक्लो’ त्रयी (ट्रिलोजी) चलचित्रको पहिलो भाग हो। निर्देशक शाहीका अनुसार, “कान्स प्रोड्यूसर्स नेटवर्कमा सहभागी हुन पाउनु केवल व्यक्तिगत सफलता होइन, नेपाललाई अन्तर्राष्ट्रिय मञ्चमा चिनाउने अवसर पनि हो। ‘एक्लो’ मार्फत मैले नेपालमै बसेर पनि विश्वस्तरीय सिनेमा निर्माण सम्भव छ भन्ने सन्देश दिन खोजेको हुँ।”
यसअघि शाहीले ‘1915: Legend of the Gurkha’ र ‘The Last Ritual’ निर्देशन गरिसकेका छन्, जसले पूर्वी संस्कृति र पश्चिमी कथावाचनबीचको सन्तुलन प्रस्तुत गरेका छन्। यी दुवै चलचित्र Amazon Prime मा उपलब्ध छन्।
‘एक्लो’ मा प्रदीप खड्का, बेनिसा हमाल, विजय लामा, सुनील थापा, दिया पुन, दिनेश डीसी, सुरज सिंह ठकुरी, एवन राज उप्रेति, कविता नेपाली, त्रुचु राई, कृष्णभक्त महर्जन, विकास अधिकारी, दिग्गज खत्री, विनोद सुवेदी ‘क्षितिज’, श्रीशेष श्रेष्ठ, बाल कलाकार जेभिन श्रेष्ठ र स्योन सविक सिंहको अभिनय रहेको छ। साथै, बेलायती अभिनेता जेमी बेकनले पनि प्रमुख भूमिका निभाएका छन्।
शाइ प्रोडक्सन नेपाल को ब्यानरमा निर्माण भइरहेको चलचित्रमा ह्याम्साएर एकाउन्टेन को सहकार्य रहेको छ। चलचित्रका निर्माता राजु कुमार गुरुङ, हरि श्रेष्ठ, विष्णु तामाङ, उत्सव विष्ट, संगिता वादी श्रेष्ठ, भाइराजा थापा, नवीन सिवा र बागवीर पुन रहेका छन् भने कार्यकारी निर्माता विनोद सुवेदी ‘क्षितिज’ हुन्। चलचित्रमा बाबु श्रेष्ठको छायांकन, राजु तामाङको द्वन्द्व निर्देशन, राजु पेन्टरको सेट डिजाइन तथा सन्तोष लामाको कला निर्देशन रहेको छ।
‘एक्लो’ लाई नेपाली सिनेमाको इतिहासमा नयाँ ढोका खोल्ने महत्वाकांक्षी प्रयासको रूपमा हेरिएको छ, जसले नेपालको सांस्कृतिक गहिराइ र सिनेम्याटिक क्षमतालाई अन्तर्राष्ट्रिय स्तरमा प्रस्तुत गर्ने अपेक्षा गरिएको छ।
