काठमाडौँ: नेपाल राष्ट्र बैंकले आजका लागि विदेशी मुद्राको विनिमय दर सार्वजनिक गरेको छ। बैंकका अनुसार अमेरिकी डलर एकको खरिददर १३६ रुपैयाँ ०५ पैसा र बिक्रीदर १३६ रुपैयाँ ६५ पैसा कायम गरिएको छ।

अन्य प्रमुख मुद्राहरूको विनिमय दर निम्नानुसार रहेको छ:

युरोपियन युरो: खरिददर १५४.५१, बिक्रीदर १५५.१९

युके पाउण्ड स्ट्रलिङ: खरिददर १८३.६७, बिक्रीदर १८४.४८

स्वीस फ्र्याङ्क: खरिददर १६४.८५, बिक्रीदर १६५.५८

अष्ट्रेलियन डलर: खरिददर ८७.९४, बिक्रीदर ८८.३३

क्यानेडियन डलर: खरिददर ९८.५०, बिक्रीदर ९८.९३

सिङ्गापुर डलर: खरिददर १०५.८१, बिक्रीदर १०६.२८

जापानी येन (१० यन): खरिददर ९.५०, बिक्रीदर ९.५४

चिनियाँ युआन: खरिददर १८.९४, बिक्रीदर १९.०२

साउदी रियाल: खरिददर ३६.२७, बिक्रीदर ३६.४३

कतारी रियाल: खरिददर ३७.३३, बिक्रीदर ३७.४९

थाइ भाट: खरिददर ४.१७, बिक्रीदर ४.१९

युएई दिराम: खरिददर ३७.०४, बिक्रीदर ३७.२०

मलेसियन रिङ्गेट: खरिददर ३२.१६, बिक्रीदर ३२.३०

दक्षिण कोरियन वन (१०० वन): खरिददर ९.९४, बिक्रीदर ९.९८

स्वीडिस क्रोनर: खरिददर १४.२८, बिक्रीदर १४.३४

डेनिस क्रोनर: खरिददर २०.७१, बिक्रीदर २०.८०

हङकङ डलर: खरिददर १७.३७, बिक्रीदर १७.४५

कुवेती दिनार: खरिददर ४४३.६१, बिक्रीदर ४४५.५६

बहराइन दिनार: खरिददर ३६०.८५, बिक्रीदर ३६२.४४

ओमनी रियाल: खरिददर ३५३.४०, बिक्रीदर ३५४.९६

भारतीय रुपैयाँ (१०० रुपैयाँ): खरिददर १६०.००, बिक्रीदर १६०.१५

राष्ट्र बैंकले विनिमय दर आवश्यकतानुसार कुनै पनि समयमा संशोधन गर्न सकिने जनाएको छ। साथै, वाणिज्य बैंकहरूले तोक्ने दर फरक हुनसक्ने र अद्यावधिक विवरण नेपाल राष्ट्र बैंकको वेबसाइटमा उपलब्ध हुने जानकारी दिइएको छ।

काठमाडौं: नेपालमा विपद् जोखिम न्यूनीकरण र समयमै वित्तीय प्रतिकार्य सुनिश्चित गर्न रणनीतिक योजना निर्माण गर्ने उद्देश्यले स्टार्ट नेटवर्क नेपालले तीन दिने कार्यशाला सम्पन्न गरेको छ।

‘स्टार्ट रेडी’ कार्यक्रमअन्तर्गत सम्पन्न उक्त कार्यशालामा स्टार्ट नेटवर्क नेपालका सदस्य संस्थाहरूका ३६ जना प्रतिनिधिको सहभागिता थियो। कार्यशालामा नेपालको सन्दर्भमा विपद् जोखिम वित्तीयकरणका प्राथमिकता, रणनीतिक मार्गचित्र र परिवर्तनको सिद्धान्तको प्रारम्भिक मस्यौदा तयार गरिएको साझेदारी विज्ञ सम्झना घिमिरेले जानकारी दिइन्।

कार्यशालाको पहिलो दिन पूर्वानुमानमा आधारित कार्यको अवधारणा, जलवायुजन्य जोखिम (जस्तै बाढी, पहिरो, शीतलहर, तातो हावा र खडेरी) तथा विपद् व्यवस्थापन चक्रबारे गहन छलफल गरिएको थियो। साथै, तयारीका लागि आवश्यक संरचना र पूर्वतयारी योजनाको प्रारूप प्रस्तुत गरिएको थियो।

दोस्रो दिन जोखिम विश्लेषण, वित्तीय प्रवाह तथा वित्तीय खाडलको विश्लेषण, सरोकारवाला नक्सांकन र प्राथमिकता निर्धारणमा सहभागीहरूलाई सक्रिय गराइएको थियो।

तेस्रो दिन रणनीतिक तथा दीर्घकालीन कार्ययोजना निर्माण, कार्यसञ्चालन संरचना र परिवर्तन सिद्धान्तको अभ्यास गरिएको थियो।

कार्यशालामा अन्तर्राष्ट्रिय तथा राष्ट्रिय विज्ञहरू एला जेरी, एनिस्थेसिया निकोसा, सेरेना सुन, सिसल अधिकारी, प्रणव दाहाल, सम्झना घिमिरे र राजु प्रसाद आचार्यले सहजीकरण गरेका थिए। उनीहरूले सहभागीहरूको नेतृत्व क्षमता विकासमा विशेष ध्यान दिएका थिए।

बेलायतको परराष्ट्र, राष्ट्रमण्डल तथा विकास कार्यालयको सहयोगमा सन् २०२१ देखि सञ्चालित स्टार्ट फन्ड नेपालमार्फत स्टार्ट नेटवर्क नेपालले बाढी, पहिरो, भूकम्पलगायत साना तथा मध्यमस्तरका संकटमा छिटो र प्रभावकारी प्रतिकार्य गर्दै आएको छ।

कार्यशालाबाट विकसित रणनीति र कार्ययोजनाहरूले नेपालको विपद् वित्तीयकरण प्रणालीलाई संस्थागत गर्न मार्गदर्शन गर्ने अपेक्षा गरिएको छ। स्टार्ट नेटवर्क नेपालका राष्ट्रिय प्रवन्धक सिसल अधिकारीले यस कार्यशालालाई नेपालमा पूर्वतयारी र सशक्त प्रतिकार्यको दिशामा एक महत्वपूर्ण पहलका रूपमा व्याख्या गरेका छन्।

भक्तपुर:भक्तपुरमा सुरु भएको कुमार ग्वाछा स्मृति खुला फिडे रेपिड रेटिङ (२००० मुनि) बुद्धिचाल प्रतियोगितामा आठ वर्षदेखि ६८ वर्ष उमेर समूहका राष्ट्रिय तथा अन्तरराष्ट्रिय खेलाडीहरूले प्रतिस्पर्धा गरेका छन्।

भक्तपुर युवा टिम गोल्मढीको आयोजनामा भएको प्रतियोगितामा भारत र इङ्ग्ल्याण्डसहित नेपालका २५ जिल्लाबाट पाँच महिलासहित १२७ जना खेलाडी सहभागी छन्। सहभागीमध्ये भारतबाट चार र इङ्ग्ल्याण्डबाट एक जना खेलाडी रहेका छन्।

नेपालका पहिलो अन्तरराष्ट्रिय आरबिटर ज्ञानेन्द्र खाइजुले प्रतियोगिताअन्तर्गत शुक्रबार पाँच राउण्ड खेल सम्पन्न भएको र शनिबार थप चार राउण्ड खेलिने जानकारी दिनुभयो।

प्रतियोगिताको उद्घाटन गर्दै नेपाल मजदुर किसान पार्टीका सचिव तथा सङ्घीय सांसद प्रेम सुवालले बुद्धिचाल बौद्धिक क्षमताले भरिएको खेल भएको बताउँदै अन्तरराष्ट्रिय स्तरमा नेपालको प्रभावशाली उपस्थिति सुनिश्चित गर्नका लागि दक्ष खेलाडी उत्पादन गर्न आवश्यक रहेको धारणा राख्नुभयो।

काठमाडौँ: हाल देशभर पश्चिमी वायु र स्थानीय वायुले प्रभाव पारेको छ भने बङ्गालको खाडी र अरब सागरबाट आएको जलवाष्पयुक्त हावाले समेत आंशिक असर पारेको छ।

मौसम पूर्वानुमान महाशाखाका अनुसार कोशी, मधेस, बागमती लगायतका पहाडी भूभागमा आंशिकदेखि सामान्य बदली छ भने बाँकी क्षेत्रमा मौसम प्रायः सफा वा आंशिक बदली रहेको छ।

बागमती प्रदेशका केही स्थानहरूमा तथा कोशी, मधेस, गण्डकी र कर्णाली प्रदेशका एक–दुई स्थानमा हाल चट्याङसहित हल्कादेखि मध्यम वर्षा भइरहेको छ।

आज दिउँसो सातै प्रदेशमा आंशिकदेखि सामान्य बदली रहने र एक–दुई स्थानमा चट्याङसहित हल्कादेखि मध्यम वर्षाको सम्भावना रहेको छ। साथै, हिमाली क्षेत्रका एक–दुई स्थानमा हल्का वर्षासहित हिमपातको सम्भावना पनि रहेको छ।

महाशाखाले सातै प्रदेशमा चट्याङसहित वर्षा हुने सम्भावना रहेकाले दैनिक जनजीवन, कृषि, स्वास्थ्य, सडक तथा हवाई यातायातमा प्रभाव पर्न सक्ने भन्दै आवश्यक सतर्कता अपनाउन आग्रह गरेको छ।

काठमाडौं: अमेरिकाको सान डिएगोमा बिहीबार बिहान एक निजी विमान दुर्घटनाग्रस्त हुँदा प्रसिद्ध संगीत एजेन्ट डेभ शापिरोको ज्यान गएको छ।

शापिरो ‘साउन्ड ट्यालेन्ट ग्रुप’ का सह-संस्थापक थिए र ‘सम ४१’, ‘स्टोरी अफ द इयर’ र ‘पियर्स द भिल’ जस्ता चर्चित रक ब्यान्डहरूसँग आबद्ध थिए।

दुर्घटनामा मेटल ब्यान्ड ‘द डेभिल वियर्स प्राडा’ का पूर्व ड्रमर डेनियल विलियम्सको पनि मृत्यु भएको आशंका गरिएको छ। मिडिया रिपोर्टअनुसार, उनले उडान अघि सामाजिक सञ्जालमार्फत विमानको फोटो पोस्ट गरेका थिए।

विमान दुर्घटनाले सान डिएगोको मर्फी क्यान्यन क्षेत्रमा रहेको एक घर पूर्णरूपमा ध्वस्त बनाएको छ भने वरपरका करिब दसवटा भवनमा क्षति पुगेको छ। सडकमा जलेका गाडीहरू र तिनीहरूको भग्नावशेष छरिएका छन्। दुर्घटनामा अन्य आठ जना घाइते भएको स्थानीय अधिकारीहरूले जनाएका छन्।

साउन्ड ट्यालेन्ट ग्रुपले बीबीसीलाई जारी गरेको विज्ञप्तिमा भनिएको छ, “हाम्रा सह-संस्थापक, सहकर्मी र साथीको निधनले हामी गहिरो शोकमा छौं। पीडित परिवारहरू र यस घटनाबाट प्रभावित सबैप्रति हाम्रो समवेदना छ।”

उड्डयन कम्पनीले दुर्घटनामा आफ्ना तीन कर्मचारीको मृत्यु भएको पुष्टि गर्दै शापिरो पनि तिनैमध्ये एक रहेको जनाएको छ। यद्यपि, अन्य मृतकहरूको पहिचान अहिलेसम्म सार्वजनिक गरिएको छैन।

सान डिएगोका अधिकारीहरूले हालसम्म दुई जनाको मृत्यु पुष्टि गरेका छन्। उता, दुर्घटनाको अनुसन्धान गरिरहेको अमेरिकी राष्ट्रिय यातायात सुरक्षा बोर्ड (NTSB) ले मृतकको कुल संख्या यकिन भइनसकेको बताएको छ। अधिकारीहरूले हालसम्म कसैको नाम औपचारिक रूपमा सार्वजनिक गरेका छैनन्।

काठमाडौं: बेलायतले हिन्द महासागरमा अवस्थित चागोस टापुहरू मौरिससलाई हस्तान्तरण गरेको छ। यस सम्बन्धमा बिहीबार बेलायत र मौरिससबीच औपचारिक सम्झौतामा हस्ताक्षर भएको हो।

चागोस द्वीपसमूहको सबैभन्दा ठूलो टापु, डिएगो गार्सिया, बेलायती र अमेरिकी सेनाको लागि रणनीतिक रूपमा अत्यन्त महत्वपूर्ण मानिन्छ, जहाँ नौसेना तथा बमवर्षक विमानको स्थायी आधारस्थल छ।

बेलायती सरकारका अनुसार, यो हस्तान्तरणले अमेरिका–बेलायत सैन्य सहकार्यलाई थप सुनिश्चित गर्नेछ। यसै कारण डिएगो गार्सिया भने बेलायत र अमेरिकाको संयुक्त नियन्त्रणमै रहनेछ।

चागोस टापुहरू लामो समयदेखि बेलायती अधीनमा थिए, र तिनको स्वामित्वबारे दुई देशबीच वर्षौँदेखि वार्ता चलिरहेको थियो।