काठमाडौँ: प्रधानमन्त्री केपी शर्मा ओलीले १८औँ गणतन्त्र दिवसको अवसरमा स्वदेश तथा विदेशमा रहेका सम्पूर्ण नेपाली दाजुभाइ तथा दिदीबहिनीहरूलाई शुभकामना व्यक्त गरेका छन्।

फेसबुकमार्फत शुभकामना सन्देश दिँदै प्रधानमन्त्री ओलीले लेखेका छन्, “शाही दमन चिरेर जनताले इतिहास लेखेको दिन हो आज। मुकुटको होइन—मुलुकको हितले स्थान पाएको दिन, सिंहासनको अभिमान तोडेर नागरिकको स्वाभिमान स्थापित भएको दिन, जनताको सात दशक लामो बलिदानीपूर्ण संघर्षले विजय प्राप्त गरेर गणतन्त्र आर्जन गरेको दिन।”

प्रधानमन्त्री ओलीले गणतन्त्र दिवसको गरिमामय अवसरमा सम्पूर्ण नेपालीहरूलाई ‘जय–जय–जय नेपाल’ भन्दै हार्दिक शुभकामना दिएका छन्।

गणतन्त्र स्थापना भएको सम्झनामा आज देशभर विविध कार्यक्रमहरू आयोजना गरी १८औँ गणतन्त्र दिवस मनाइँदैछ।

काठमाडौं: अमेरिकी राष्ट्रपति डोनाल्ड ट्रम्पको प्रशासनले सामाजिक सञ्जाल परीक्षण कडा बनाउने नीतिअन्तर्गत विश्वभरका अमेरिकी दूतावास र कन्सुलर कार्यालयहरूलाई विद्यार्थी भिसा (F, M, र J वर्ग) अन्तर्गतका नयाँ अन्तर्वार्ता तालिका बन्द गर्न निर्देशन दिएको छ।

मंगलबार जारी गरिएको कूटनीतिक केबलअनुसार, यहूदी-विरोधी भावना फैलाउने वा राष्ट्रिय सुरक्षामा खतरा उत्पन्न गर्न सक्ने सम्भावित अन्तर्राष्ट्रिय विद्यार्थीहरूलाई रोक्न लक्षित गर्दै यस्तो निर्णय गरिएको हो। नयाँ निर्देशन नआएसम्म नयाँ अन्तर्वार्ता तालिका नथप्न भनिएको छ भने पहिल्यै तय भइसकेका अन्तर्वार्ताहरू भने यथावत् सञ्चालन हुनेछन्।

अमेरिकी विदेश मन्त्रालयकी प्रवक्ता ट्यामी ब्रुसले भिसा प्रक्रियामा ढिलाइबारे टिप्पणी गर्न अस्वीकार गरिन्। तर, उनले अमेरिका प्रवेशसम्बन्धी जाँचलाई गम्भीरतापूर्वक लिइने स्पष्ट पारिन्। विदेशमन्त्री मार्को रुबियोले गत हप्ता विद्यार्थी भिसा ‘विशेषाधिकार’ भएको उल्लेख गर्दै क्याम्पसमा अव्यवस्था निम्त्याउने विद्यार्थीको भिसा खारेज गरिने चेतावनी दिएका थिए।

यो कदम हार्वर्ड विश्वविद्यालयमाथि विदेशी विद्यार्थी भर्ना रोक्ने गृह सुरक्षा विभागको प्रयासपछि आएको हो, जुन कदमलाई अदालतले शुक्रबार रोक लगाएको थियो।

त्यसैबीच, ट्रम्प प्रशासनले हार्वर्डसँगको १० करोड अमेरिकी डलरको सम्झौता रद्द गरी उक्त अनुदान ट्रेड स्कूलहरूमा स्थानान्तरण गर्ने योजना अघि सारेको छ।

यस नीतिले अमेरिकामा उच्च शिक्षा अध्ययनका लागि जाने हजारौं नेपाली विद्यार्थीहरूलाई पनि असर पर्ने देखिएको छ। अमेरिका हाल विश्वभरिबाट १० लाखभन्दा बढी अन्तर्राष्ट्रिय विद्यार्थीहरूलाई स्वीकृति दिने देश हो।

यसअघि नै लागू गरिएको सामाजिक सञ्जाल परीक्षण प्रणालीलाई यो निर्देशनले थप विस्तार गर्नेछ। यद्यपि यो विश्वव्यापी रूपमा लागू गरिए पनि कुनै देश विशेषका आवेदकमाथि अतिरिक्त छानबिन हुने हो वा होइन भन्ने अझै स्पष्ट गरिएको छैन।

काठमाडौं: नेपाली कांग्रेसका नेता तथा पूर्वमन्त्री मोहम्मद अफताब आलम उच्च अदालत जनकपुरको वीरगञ्ज इजलासबाट सफाइ पाएपछि रिहा भएका छन्।

बम विस्फोट गराई व्यक्तिहरूको हत्या गरेको आरोपमा जन्मकैदको सजाय भोगिरहेका आलमलाई उच्च अदालतको संयुक्त इजलासले दोषमुक्त ठहर गरेको हो। अदालतको आदेश नख्खु कारागारमा पुगेसँगै उनी रिहा भएका हुन्।

बुधवार न्यायाधीशद्वय खुशीप्रसाद थारु र अर्जुन महर्जनको संयुक्त इजलासले रौतहट जिल्ला अदालतको फैसला उल्टाउँदै आलमलाई सफाइ दिएको हो।

२०६४ सालको संविधानसभा निर्वाचनको अघिल्लो दिन, चैत २७ गते साँझ करिब ६ बजे, बम बनाउने क्रममा रौतहटको एक घरमा विस्फोट भएको थियो। उक्त घटनामा घाइते भएका पाँचजनालाई इँटाभट्टामा हालेर हत्या गरिएको आरोप आलममाथि लगाइएको थियो।

काठमाडौं: नेकपा एमालेका प्रमुख सचेतक महेश बर्तौलाले गृहमन्त्री बोल्न लाग्दा प्रमुख प्रतिपक्षले देखाएको कार्यशैलीलाई दुखद बताएका छन्।

बुधबार प्रतिनिधिसभाको बैठकपछि सञ्चारकर्मीसँग कुरा गर्दै उनले गृहमन्त्रीले सम्पूर्ण घटनाको बारेमा जवाफ दिने तयारीमा रहँदा प्रतिपक्षको अवरोध अस्वीकार्य भएको बताए।

उनले भने, “गृहमन्त्रीसँगको प्रश्नोत्तर हिजो प्रतिपक्षकै कारण रोकिएको हो। प्रमुख प्रतिपक्षले हिजोको बैठक रोकौं, भोलि सहज रूपमा अघि बढाऔं भन्ने प्रस्ताव राखेका कारण बैठक रोकिएको थियो। तर आज गृहमन्त्रीले जवाफ दिन लाग्दा उहाँको अभिव्यक्तिमा अवरोध गर्नु प्रमुख प्रतिपक्षको दुर्भाग्यपूर्ण कार्यशैली हो। यसरी संसद चलाउनु स्वीकार्य हुन सक्दैन।”

त्यसैगरी, राष्ट्रिय स्वतन्त्र पार्टीका सांसद मनिष झाले हालको गृह प्रशासनको कार्यशैलीप्रति आलोचना गर्दै सात वर्षमा सात लाख मानिस भिजिट भिसामा विदेश गएको र २० हजार मात्रै फर्किएको तथ्यांक गम्भीर भएको बताए।

उनले भने, “हामीले परिकल्पना गरेको व्यवस्था यो होइन। भुटानी शरणार्थी प्रकरण आयो, हामीले अपेक्षा गरेका थियौं कि गृहमन्त्री आउनुहुन्छ र छानबिन अघि बढ्छ। तर उहाँ त फाइल नै बन्द गर्न आउनुभयो। सात वर्षमा सात लाख मानिस भिजिट भिसामा विदेश गएका छन्, तर फर्किएका जम्मा २० हजार छन्। यो त गम्भीर समस्या हो, यस्ता तथ्यांकलाई नजरअन्दाज गर्न मिल्दैन।”

झाले संविधानअनुसार प्रस्तुत हुने भोलिको बजेटलाई अवरोध नगर्ने स्पष्ट पारे।

काठमाडौँ:त्रिभुवन विश्वविद्यालयका उपकुलपति प्राडा खड्क केसीको कार्यकक्षमा तोडफोड गरिएको छ। विभिन्न क्याम्पसहरूबाट स्वतन्त्र विद्यार्थी युनियन (स्ववियु) का अध्यक्ष तथा अन्य पदाधिकारीहरूमा निर्वाचित भएका नेविसंघसम्बद्ध विद्यार्थीहरूले उक्त तोडफोड गरेका हुन्।

विद्यार्थीहरूले शैक्षिक क्यालेन्डर विपरीत परीक्षाको समयमा विद्यार्थी भर्ना गर्न दबाब दिँदै तोडफोड गरेका हुन्। यसअघि पनि उनीहरूले विद्यार्थी भर्ना खोल्न माग गर्दै रेक्टर कार्यालय र रजिष्ट्रार कार्यालयमा तालाबन्दी गरेका थिए। तोडफोडपछि उपकुलपति कार्यालयमा समेत तालाबन्दी गरिएको छ।

सानोठिमी, भक्तपुर, पाटन र सरस्वती क्याम्पसबाट नेविसंघबाट निर्वाचित स्ववियु अध्यक्ष तथा सदस्यहरूले संयुक्त रूपमा आन्दोलन गरेका हुन्। उनीहरूले परीक्षा चलिरहेका बेला पनि नयाँ विद्यार्थी भर्ना गर्नुपर्ने माग गर्दै दबाब दिएका छन्।

यसअघि नेविसंघका विद्यार्थी नेताहरूले संयुक्त विज्ञप्ति जारी गर्दै भर्ना खोल्न माग गरेका थिए। उनीहरूको भनाइमा, स्ववियु निर्वाचनका कारण विद्यार्थी भर्ना रोकिएको थियो र अब निर्वाचन सम्पन्न भइसकेकोले भर्ना प्रक्रिया तुरुन्त खोलिनुपर्छ। त्रिविले २०८१ माघ ११ गतेदेखि स्नातक तह प्रथम वर्षको भर्ना प्रक्रिया रोकेको थियो।

विद्यार्थीहरूले तुरुन्त स्नातक तह प्रथम वर्षको भर्ना खोल्न माग गर्दै उपकुलपति कार्यालयमा तालाबन्दी गरेका छन्। सार्वजनिक युवा क्याम्पसका सन्तोष श्रेष्ठ, सरस्वती क्याम्पसका मुस्कानराज गौतम, कैलाशकुट क्याम्पसका मुरारी गौतम, पद्मकन्या क्याम्पसकी भूपी ऐर, पाटन क्याम्पसका रोहित कपाली लगायत १९ जना नेताहरूले संयुक्त रूपमा यो माग प्रस्तुत गरेका हुन्।

काठमाडौं: नेपालमा विद्युतीय सवारी साधन (ईभी) पूर्वाधार विस्तारमा ऐतिहासिक उपलब्धि हासिल गर्दै एमएडब्लू वृद्धि स्पीड चार्जर्सले जोमसोममा देशकै सबैभन्दा उच्च स्थानमा रहेको CCS2 ईभी चार्जिङ स्टेशन स्थापना गरी औपचारिक रूपमा उद्घाटन गरेको छ।

कठिन भौगोलिक अवस्थाको बाबजुद, जोमसोमजस्तो दुर्गम क्षेत्रमा प्रविधिमा आधारित यस्तो पूर्वाधारको विकास इन्जिनियरिङको दृष्टिले एक महत्वपूर्ण फड्को मानिएको छ। यस चार्जिङ स्टेशनको स्थापना पश्चात ईभी प्रयोगकर्ताहरूले अब पहाडी तथा पर्यटकीय क्षेत्रमा पनि सुरक्षित, सहज र भरपर्दो यात्रा गर्न सक्नेछन्।

एमएडब्लू स्पीड चार्जर्सले हालसम्म नेपालभर ११६ स्थानमा CCS2 चार्जिङ स्टेशनहरू सञ्चालनमा ल्याइसकेको छ। सहरदेखि सुदूर पर्यटकीय क्षेत्रसम्म चार्जिङ सुविधा विस्तार गर्नु कम्पनीको दीर्घकालीन रणनीतिक योजनाअन्तर्गत पर्छ, जसले देशको हरित यातायात प्रणालीलाई बलियो बनाउने लक्ष्य लिएको छ।

पर्यटकीय गन्तव्यको रूपमा प्रसिद्ध जोमसोममा यो चार्जिङ स्टेशनको स्थापना पर्यावरणमैत्री र दिगो पर्यटन प्रवर्द्धनतर्फको एक ठोस कदम मानिएको छ। कम्पनीका अनुसार, वातावरणप्रेमी यात्रुहरूका लागि हरित विकल्पप्रति आकर्षण बढाउने उद्देश्यले यो पूर्वाधार निर्माण गरिएको हो।

एमएडब्लू स्पीड चार्जर्सका प्रतिनिधिले भने, “हामी जहाँसुकै, जोकोहीका लागि स्वच्छ, सुरक्षित र भरपर्दो यातायात सम्भव बनाउने हाम्रो दृष्टिकोणतर्फ अघि बढिरहेका छौं। जोमसोम चार्जिङ स्टेशन केवल प्रविधिको उपलब्धि होइन, नेपाललाई हरित भविष्यतर्फ डोर्याउने हाम्रो दृढ प्रतिबद्धताको प्रमाण हो।”

नेपालकै पहिलो ईभी चार्जिङ नेटवर्कको रूपमा एमएडब्लू स्पीड चार्जर्सले घर, व्यवसाय र सार्वजनिक स्थानहरूमा स्मार्ट, पहुँचयोग्य र भरपर्दो चार्जिङ समाधान उपलब्ध गराउँदै दिगो मोबिलिटीलाई अघि बढाउने अभियानमा अगुवाइ गरिरहेको छ।

चार्जिङ स्टेशन तथा नेटवर्कसम्बन्धी थप जानकारीका लागि mawevcharging.com मा भ्रमण गर्न सकिनेछ।