काठमाडौं:गभर्नर विश्वनाथ पौडेलविरुद्ध दायर रिटमा आज सर्वोच्च अदालतमा सुनुवाइ हुँदैछ।
मंगलबार अधिवक्ताहरू विशाल थापा, प्रतिभा उप्रेती र अनन्तराज लुइँटेलले पौडेलको गभर्नर नियुक्ति बदरको माग गर्दै सर्वोच्च अदालतमा रिट दायर गरेका थिए।
रिटमा नेपालको संविधान तथा नेपाल राष्ट्र बैंक ऐन, २०५८ अनुसार अनिवार्य योग्यता नपुगेका व्यक्तिलाई गभर्नरमा नियुक्त गरिएको दाबी गरिएको छ। पौडेलको सिफारिस, नियुक्ति र शपथसमेतको प्रक्रिया गैरकानुनी भएको उल्लेख गर्दै गम्भीर राष्ट्रिय महत्त्वका निर्णयहरूबाट राष्ट्रलाई असर पर्न सक्ने भन्दै उनीलाई कार्य सम्पादनबाट रोक्न परमादेशको माग गरिएको छ।
यसअघि पनि अधिवक्ताहरूले पौडेलको नियुक्ति रोक्न माग गर्दै सर्वोच्च अदालतमा रिट दर्ता गरेका थिए। तर प्रशासनले त्यो रिट दरपिठ गरेको थियो र इजलासले पनि दरपिठ कायम राखेको थियो।
सरकारले अर्थ मन्त्रालयअन्तर्गतका निकायका पदाधिकारी तथा सदस्य नियुक्ति सम्बन्धी मापदण्ड २०७३ संशोधन गरेपछि उक्त संशोधन खारेज गर्न माग गर्दै उनीहरूले अर्को रिट पनि दायर गरेका थिए।
त्यस रिटमाथि सुनुवाइ गर्दै सर्वोच्च अदालतले वैशाख २ गते गभर्नर नियुक्तिमा ६५ वर्षे उमेरहद हटाउन नमिल्ने भन्दै अन्तरिम आदेश जारी गरेको थियो। यही रिटसँग सम्बन्धित आजको सुनुवाइमा गभर्नर नियुक्तिविरुद्धका दाबीमाथि छलफल हुनेछ।
