झापा: नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले अहिलेको राजनीतिक संघर्ष यथास्थितिवाद, दलाल पुँजीवाद र गणतन्त्रविरोधी शक्तिहरूविरुद्ध केन्द्रित भएको स्पष्ट पारेका छन्।
झापाको दमकमा आयोजित कोच, धिमाल, मेचे, सन्थाल, झाँगड र उराँव समुदायको संयुक्त सम्मेलनको उद्घाटन सत्रलाई सम्बोधन गर्दै अध्यक्ष प्रचण्डले सो धारणा व्यक्त गरे।
उनले भने, “हामी यथास्थितिवाद र प्रतिगमनविरुद्धको लडाइँमा छौं। एकातिर दलाल पुँजीवादीहरूको घेराबन्दी छ भने अर्कातिर गणतन्त्रविरोधी प्रतिक्रियावादी शक्तिहरूको चुनौती छ। यी सबैविरुद्ध दृढतापूर्वक संघर्ष गर्नुपर्नेछ।”
प्रचण्डले पछिल्लो संसद् अवरोधको उद्देश्य सरकार फाल्ने नभई भ्रष्टाचारविरुद्ध सुशासनको एजेन्डालाई प्राथमिकता दिलाउने रहेको स्पष्ट पारे। उनले भने, “हामी संसद् अनन्तकालसम्म रोक्ने सोचमा थिइनौं। नागरिकता, विद्यालय शिक्षा, निजामति सेवा जस्ता विधेयकहरू वर्षौंदेखि संसद्मा अल्झिएका छन्। ती विधेयकहरू हामीले नै सरकारमा रहँदा अघि बढाएका थियौं। यी जनजीविकासँग, शान्ति प्रक्रियासँग र संघीयताको कार्यान्वयनसँग सम्बन्धित छन्। सरकारलाई छानबिन समिति गठन गर्न बाध्य बनाएपछि संसद् सञ्चालनमा आएको हो।”
उनले माओवादी केन्द्र सधैं विचार, बहस र नीतिमा आधारित राजनीति गर्ने पार्टी भएको बताए। “हामी पद र शक्तिका लागि होइन, जनताको मुद्दा उठाउन कांग्रेस र एमालेसँग संसद्मा बहस गर्न चाहन्छौं,” उनले स्पष्ट पारे। “सरकार बनाउने कुरा हाम्रो प्राथमिकता होइन।”
प्रचण्डले माओवादी केन्द्रप्रति जनसमर्थनको लहर देखिएको वर्तमानमा पार्टीलाई बदनाम गर्न नियोजित षड्यन्त्रहरू भइरहेको गम्भीर आरोप पनि लगाए। उनले पार्टी सत्तामा रहेर होस् या बाहिर, उत्पीडित समुदाय र जनताको पक्षमा निरन्तर उभिइरहने प्रतिवद्धता जनाए।
उनले माओवादी केन्द्रले संघीय संरचना, समावेशी शासन प्रणाली र पहिचानको आधारमा अधिकार प्रत्याभूतिको पक्षमा निरन्तर संघर्ष गरिरहेको उल्लेख गरे।
त्यस्तै, काठमाडौं उपत्यकामा नेवार समुदायसँग प्रत्यक्ष संवादका लागि आयोजित ‘नेवा सम्मेलन’ र भेलाको स्मरण गर्दै, उनले पहिचान भएका सबै समुदायको सशक्त सहभागिता सुनिश्चित गर्न पार्टीले अग्रसरता लिएको जानकारी पनि दिए।
