काठमाडौँ: सवारी चालक अनुमति पत्र (लाइसेन्स) परीक्षा प्रक्रियामा भ्रष्टाचार भएको उजुरीका आधारमा अख्तियार दुरुपयोग अनुसन्धान आयोगको टोलीले चितवनको भरतपुरस्थित यातायात व्यवस्था कार्यालयमा छापा मारेर कार्यालय सहायकसहितका कर्मचारी र बिचौलियालाई नियन्त्रणमा लिएको छ।
आयोगका प्रवक्ता राजेन्द्रकुमार पौडेलका अनुसार कार्यालय सहायक इन्द्रजित गुरुङ र बिचौलिया सुरज पाठकलाई रु १ लाख ८५ हजार नगदसहित कार्यालय परिसरबाट पक्राउ गरिएको हो। आयोगको टङ्गालस्थित कार्यालयबाट खटिएको टोलीले उनीहरूलाई रंगेहात नियन्त्रणमा लिएको हो।
लाइसेन्स परीक्षामा पैसा लिएर पास गराउने
प्राप्त जानकारीअनुसार महालक्ष्मी, गुरुङ र कुमार ड्राइभिङ सेन्टरका सञ्चालक तथा यातायात कार्यालयका केही कर्मचारीको मिलेमतोमा लाइसेन्स परीक्षामा असफल भएका परीक्षार्थीबाट सवारीको वर्गअनुसार रु १५ हजारदेखि २५ हजारसम्म रकम लिई पास गराउने अवैध कारोबार भइरहेको थियो।
प्रमुखसहितको मोबाइल, ल्यापटप र कागजात नियन्त्रणमा
आयोगले सो प्रकरणमा कार्यालय प्रमुख विष्णु भट्टराई, अन्य कर्मचारीहरू तथा विभिन्न ड्राइभिङ सेन्टरका सञ्चालकहरूमाथि पनि अनुसन्धान सुरु गरेको छ। अनुसन्धानका क्रममा ३१ थानभन्दा बढी मोबाइल फोन, २ थान ल्यापटप र अन्य महत्वपूर्ण कागजातहरू समेत नियन्त्रणमा लिइएको प्रवक्ता पौडेलले जानकारी दिनुभयो।
हाल पक्राउ परेकाहरू तथा बरामद सामग्रीहरूमाथि थप अनुसन्धान भइरहेको आयोगले जनाएको छ।
