काठमाडौं । बेल्जियम को बुगेनहाउट क्षेत्रमा रेल र विद्यालयको मिनीबस एकआपसमा ठोक्किँदा धेरै जनाको मृत्यु भएको स्थानीय सञ्चारमाध्यमहरूले जनाएका छन्।

स्थानीय सार्वजनिक प्रसारण संस्थाका अनुसार लेभल क्रसिङमा भएको दुर्घटनाका बेला मिनीबसमा सात जना बालबालिका, एक सहायक कर्मचारी र चालक सवार थिए।

जुहाल डेमिर ले सामाजिक सञ्जालमार्फत घटनाप्रति दुःख व्यक्त गर्दै प्रभावित परिवारप्रति समवेदना प्रकट गरेकी छन्। उनले यस घटनालाई अत्यन्तै पीडादायी र दुःखद बताएका छन्।

संघीय प्रहरीकी प्रवक्ता एन बर्गर का अनुसार स्थानीय समयअनुसार बिहान करिब ८ बजे लेभल क्रसिङका अवरोध खुला रहेका बेला दुर्घटना भएको हो।

उनले मृतक तथा घाइतेको यकिन संख्या तत्काल सार्वजनिक गर्न नसकिने बताउँदै मिनीबसमा सवार व्यक्तिका परिवारलाई प्राथमिक रूपमा जानकारी गराउने काम भइरहेको बताइन्। साथै, रेलमा रहेका यात्रुहरू भने सुरक्षित रहेको जानकारी दिइएको छ।

काठमाडौं । इरानका सर्वोच्च नेता मोज्तबा खामेनी ले अमेरिकी सैन्य आक्रमणपछि जारी गरेको लिखित सन्देशमा खाडी क्षेत्रका देशहरू अब अमेरिकी सैन्य अड्डाहरूको “ढाल” बन्न नसक्ने बताएका छन्।

बीबीसी फारसी सेवाका अनुसार उक्त सन्देश इरानको सरकारी टेलिभिजनमार्फत प्रसारण गरिएको हो। यो सन्देश दक्षिणी इरानमा अमेरिकी सेनाले गरेको नयाँ आक्रमणपछि सार्वजनिक भएको बताइएको छ।

अमेरिकी सेनाले इरानी क्षेप्यास्त्र अड्डा तथा समुद्रमा बारुदी सुरुङ बिछ्याउने प्रयास गरिरहेका जहाजहरूलाई लक्षित गरेर कारबाही गरिएको जनाएको छ। अमेरिकी केन्द्रीय कमान्डका अनुसार उक्त आक्रमण आत्मरक्षाका लागि गरिएको हो।

मार्चमा सर्वोच्च नेता चयन भएयता खामेनी सार्वजनिक रूपमा देखिएका छैनन्। उनले हालसम्म लिखित सन्देशमार्फत मात्रै आफ्नो धारणा सार्वजनिक गर्दै आएका छन्।

सन्देशमा खामेनीले अमेरिकाको प्रभाव क्रमशः कमजोर बन्दै गएको दाबी गर्दै क्षेत्रीय देशहरू अब अमेरिकी सैन्य उपस्थितिको सुरक्षा कवच नबन्ने बताएका छन्।

उनले Israel को पनि आलोचना गर्दै इजरायल “आफ्नो अन्तिम अवस्थातर्फ अघि बढिरहेको” टिप्पणी गरेका छन्। साथै, उनले आफ्ना बुबाले एक दशकअघि व्यक्त गरेको भनाइ स्मरण गर्दै “इजरायलले अब २५ वर्षको भविष्य देख्न सक्दैन” भन्ने अभिव्यक्ति दोहोर्‍याएका छन्।

वीरगन्ज । जिल्ला अदालत पर्साले राजेशमान सिंह सहित चार जनाविरुद्ध पक्राउ पुर्जी जारी गरेको छ। झुटो विवरण पेश गरी जन्मदर्ता, नागरिकता र राहदानी बनाएको आरोपमा अदालतले जिल्ला प्रहरी कार्यालय पर्सालाई पक्राउ पुर्जी कार्यान्वयन गर्न आदेश दिएको हो।

अदालतले जारी गरेको पक्राउ पुर्जीको चलानी नम्बर २३९१२ रहेको बताइएको छ। गत जेठ १ गते चारवटा मुद्दा दर्ता भएपछि यस प्रकरणको अनुसन्धान र कानुनी प्रक्रिया थप तीव्र बनेको छ।

जिल्ला सरकारी वकिल कार्यालय पर्साले दायर गरेको अभियोगपत्रअनुसार मेयर सिंहले सिन्धुपाल्चोकको इन्द्रावती गाउँपालिकाकी रिता भट्टराईलाई आफ्नी श्रीमतीका रूपमा उल्लेख गर्दै २०७१ माघ २० गते रुबिना श्रेष्ठको जन्मदर्ता गराएका थिए। अनुसन्धानका क्रममा सोही जन्मदर्ताका आधारमा २०७५ साउन १० गते नागरिकता र त्यसको १२ दिनपछि राहदानीसमेत बनाइएको खुलेको छ।

यस घटनामा मेयर सिंह, रिता भट्टराई, रुबिना श्रेष्ठ तथा वीरगन्ज महानगरपालिकाका तत्कालीन पञ्जीकरण अधिकारी भिखारी रायविरुद्ध लिखत सम्बन्धी कसुर, नागरिकता कीर्ते तथा राहदानी कीर्ते लगायतका अभियोगमा मुद्दा दायर गरिएको छ।

जिल्ला प्रहरी कार्यालय पर्साले प्रमाण संकलन तथा प्राविधिक अनुसन्धानलाई प्राथमिकतामा राखेर अनुसन्धान अघि बढाइरहेको जनाएको छ। पर्साका प्रहरी उपरीक्षक सुदीप राज पाठक ले अनुसन्धानलाई पारदर्शी र प्रभावकारी बनाउन निरन्तर काम भइरहेको बताएका छन्।

जिल्ला अदालत पर्साका श्रेस्तेदार प्रभाकरकुमार मल्लिकका अनुसार अभियुक्तहरूमाथि मुलुकी अपराध संहिता २०७४, नागरिकता ऐन २०६३ तथा अपराध पीडित संरक्षण ऐन २०७५ अन्तर्गत विभिन्न कसुरमा मुद्दा चलाइएको छ। अभियोग प्रमाणित भएमा १५ हजारदेखि ५ लाख रुपैयाँसम्म जरिवाना तथा ६ महिनादेखि ३ वर्षसम्म कैद सजाय हुन सक्ने कानुनी व्यवस्था रहेको छ।

हाल प्रहरीले पक्राउ पुर्जी कार्यान्वयन गर्दै अभियुक्तहरूको खोजी तथा थप अनुसन्धान अघि बढाइरहेको जनाएको छ।

काठमाडौं । सभामुख डिपी अर्यालले प्रधानमन्त्री बालेन शाहले बजेट भाषणपछि प्रतिनिधिसभामा उपस्थित भएर सांसदहरूले उठाएका प्रश्नको जवाफ दिने बताएका छन्।

मंगलबार बसेको प्रतिनिधिसभा बैठकमा सभामुख अर्यालले प्रतिपक्षी सांसदहरूले उठाउँदै आएको प्रधानमन्त्रीको उपस्थितिसम्बन्धी मागबारे सरकारसँग निरन्तर संवाद भइरहेको जानकारी दिएका हुन्।

प्रतिपक्षी दलका सांसदहरूले प्रधानमन्त्री संसदमा उपस्थित भएर सदनमा उठेका विषयमा जवाफ दिनुपर्ने माग गर्दै लगातार विरोध जनाइरहेका छन्। त्यसक्रममा सभामुख अर्यालले उक्त माग संविधान, नियमावली र कानुनसम्मत रहेको बताए।

उनले प्रधानमन्त्री, सरकार, सत्तापक्ष तथा प्रतिपक्षी दलका नेताहरूसँग यस विषयमा पटक–पटक छलफल भइरहेको उल्लेख गर्दै प्रधानमन्त्री शाह सदनमा आउने तयारीमा रहेको जानकारी दिए।

सभामुख अर्यालले केही दिनमै बजेट प्रस्तुत हुने भएकाले सोही सन्दर्भमा प्रधानमन्त्रीले संसदमा उपस्थित भएर सांसदहरूको जिज्ञासा र प्रश्नको जवाफ दिने विश्वास व्यक्त गरे।

उनले भने, “प्रधानमन्त्रीज्यूले छिट्टै सदनमा उपस्थित भएर यहाँहरूले उठाउनुभएको प्रश्नको जवाफ दिनुहुनेछ।”

सभामुखको उक्त भनाइपछि संस्कृति, पर्यटन तथा नागरिक उड्डयनमन्त्री गनेश पौडेललाई पर्यटन विधेयक २०८२ माथि विचार गरियोस् भन्ने प्रस्ताव प्रस्तुत गर्न अनुमति दिइएको थियो।

तर त्यसलगत्तै नेपाली कांग्रेस, नेकपा एमाले, नेकपा, श्रम संस्कृति पार्टी, राष्ट्रिय प्रजातन्त्र पार्टीलगायत प्रतिपक्षी दलका सांसदहरूले आ–आफ्नो स्थानबाट उभिएर विरोध जनाएका थिए।

प्रतिपक्षी सांसदहरूको विरोधपछि सभामुख अर्यालले केही समयका लागि पर्यटनमन्त्री पौडेललाई विधेयक प्रस्तुत गर्न रोकेका थिए। उनले सांसदहरूलाई बस्न आग्रह गर्दै सरकार यस विषयमा जानकार रहेको र प्रधानमन्त्रीले जवाफ दिने तयारी गरिरहेको दोहोर्‍याए।

यद्यपि विरोध जारी रहेपछि सभामुखले फेरि पर्यटनमन्त्रीलाई विधेयक प्रस्तुत गर्न अनुमति दिएका थिए। त्यसपछि प्रतिपक्षीहरूको नाराबाजीबीच पर्यटनमन्त्री पौडेलले पर्यटन विधेयक २०८२ माथि विचार गरियोस् भन्ने प्रस्ताव सदनमा प्रस्तुत गरेका थिए।

काठमाडौं । श्रम संस्कृति पार्टीले आफ्ना सबै सांगठनिक तथा प्रचारप्रसारका कार्यक्रमहरूमा पार्टी अध्यक्ष हर्क साम्पाङको तस्वीर अनिवार्य रूपमा प्रयोग गर्न निर्देशन जारी गरेको छ।

पार्टीको कोशी प्रदेश कमिटीले मातहतका सबै संरचनालाई औपचारिक परिपत्र जारी गर्दै ब्यानर, पोस्टर तथा अन्य प्रचार सामग्रीमा अध्यक्ष साम्पाङको तस्वीर समावेश गर्न आग्रह गरेको हो।

कोशी प्रदेश अध्यक्ष प्रताप राई र सचिव दिपक तिमिल्सिनाले संयुक्त रूपमा हस्ताक्षर गरेको पत्रमार्फत उक्त निर्देशन जारी गरिएको जनाइएको छ।

प्रदेश कमिटीद्वारा जारी परिपत्रमा कोशी प्रदेश अन्तर्गत रहेका जिल्ला, महानगरपालिका, उपमहानगरपालिका, पालिका, वडा तथा टोल समितिहरूलाई सम्बोधन गरिएको छ।

पत्रमा श्रम संस्कृति पार्टी अन्तर्गत सञ्चालन हुने विभिन्न कार्यक्रमका ब्यानर तथा प्रचार सामग्रीमा ‘श्रद्धेय श्रम पिता अध्यक्ष हर्क साम्पाङ’ को तस्वीर अनिवार्य रूपमा प्रयोग गर्न भनिएको छ।

धरान उपमहानगरपालिकाका प्रमुखसमेत रहेका साम्पाङलाई पार्टीले श्रम संस्कृतिको अभियानका अगुवाका रूपमा प्रस्तुत गर्दै ‘श्रद्धेय श्रम पिता’ को उपाधिसमेत दिएको छ।

पार्टीले संगठनभित्र अनुशासन, प्रचारशैली र प्रस्तुतीकरणमा एकरूपता कायम गर्न यस्तो निर्णय गरिएको जनाएको छ। साथै उक्त निर्देशनलाई तल्लो तहसम्म प्रभावकारी रूपमा कार्यान्वयन गर्न समेत आग्रह गरिएको छ।

काठमाडौं । प्रधानमन्त्री बालेन शाहले नेपालले छिमेकी मुलुक, विकास साझेदार तथा मित्र राष्ट्रहरूसँग पारस्परिक सम्मान, सार्वभौम समानता र साझा समृद्धिको आधारमा सम्बन्ध अघि बढाइरहेको बताएका छन्।

मंगलबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा काठमाडौं र नयाँदिल्लीस्थित युरोपेली संघ सदस्य राष्ट्रका राजदूत तथा कूटनीतिक नियोग प्रमुखहरूसँग भएको संयुक्त भेटमा प्रधानमन्त्री शाहले नेपालको सन्तुलित र व्यवहारिक परराष्ट्र नीतिलाई पुनः दोहोर्‍याएका हुन्।

प्रधानमन्त्री शाहले नेपालको विकास प्रयासमा अन्तर्राष्ट्रिय समुदायबाट प्राप्त सहयोग र सद्भावप्रति आभार व्यक्त गर्दै आगामी दिनमा सहकार्य अझ सुदृढ हुने विश्वास व्यक्त गरे।

उनले सुशासन सुनिश्चित गर्दै समावेशी आर्थिक समृद्धि हासिल गर्ने सरकारको प्रतिबद्धता दोहोर्‍याउँदै विश्व बजारबाट लाभ लिन, प्रशासनिक प्रक्रियालाई सरल बनाउँदै थप लगानी आकर्षित गर्न, नवप्रवर्तनलाई प्रोत्साहन गर्न तथा दिगो विकास लक्ष्य हासिल गर्न सरकार प्रतिबद्ध रहेको बताए।

प्रधानमन्त्री शाहले व्यापार, लगानी, हरित ऊर्जा, जलवायु कार्यवाही तथा पर्यटनलगायत क्षेत्रमा साझेदारी थप गहिरो बनाउन सरकार इच्छुक रहेको उल्लेख गरे।

भेटमा संयुक्त अरब इमिरेट्स, युरोपेली संघ, फिनल्याण्ड, नर्वे, म्यानमार, अष्ट्रेलिया, रुस, थाइल्याण्ड, स्विडेन, बेल्जियम, पोर्चुगल, साइप्रस, बुल्गेरिया, इस्टोनिया, नेदरल्यान्ड्स, स्पेन, इटाली, ग्रीस, डेनमार्क, रोमानिया, स्लोभेनिया, लक्जेम्बर्ग, अस्ट्रिया, स्लोभाकिया, ब्राजिल, मलेसिया, पोल्याण्ड तथा चेक गणतन्त्रका राजदूत तथा नियोग प्रमुखहरूको सहभागिता रहेको थियो।

राजदूत तथा नियोग प्रमुखहरूले प्रधानमन्त्री शाहलाई बधाई दिँदै आफ्ना राष्ट्राध्यक्ष तथा सरकार प्रमुखहरूको शुभकामना सन्देश हस्तान्तरण गरेका थिए। उनीहरूले नेपालसँगको सहकार्यका विभिन्न क्षेत्रबारे चर्चा गर्दै नयाँ सरकारलाई सहयोग र समर्थन रहने प्रतिबद्धता व्यक्त गरेका थिए।

भेटमा परराष्ट्रमन्त्री शिशिर खनाल, प्रधानमन्त्रीका राजनीतिक सल्लाहकार असिम शाह, मुख्यसचिव सुमनराज अर्याल, परराष्ट्र सचिव अमृतबहादुर राईलगायत उच्च सरकारी अधिकारीहरूको पनि उपस्थिति रहेको थियो।

काठमाडौं । हाल देशमा पश्चिमी वायु, स्थानीय वायु तथा नेपालको पूर्वी भूभाग नजिक रहेको न्यून चापीय क्षेत्रको प्रभाव रहेको मौसम पूर्वानुमान महाशाखाले जनाएको छ।

महाशाखाका अनुसार गण्डकी प्रदेशसहित देशका हिमाली तथा पहाडी भूभागमा सामान्य बदली रहेको छ भने बाँकी तराई क्षेत्रमा मुख्यतया मौसम सफा रहेको छ। गण्डकी प्रदेशका धेरै स्थान तथा कोशी र बागमती प्रदेशका केही स्थानमा चट्याङसहित मध्यम वर्षा भइरहेको छ।

आज दिउँसो कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी क्षेत्रमा सामान्य बदली रहनेछ। लुम्बिनी र सुदूरपश्चिमका तराई क्षेत्रमा आंशिक बदली रहने मौसमविद्ले बताएका छन्।

कोशी, बागमती र गण्डकी प्रदेशका हिमाली तथा पहाडी भूभागका केही स्थानमा तथा मधेस प्रदेशसहित कोशी, बागमती र गण्डकीका तराई क्षेत्रमा चट्याङसहित मध्यम वर्षाको सम्भावना रहेको छ। लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रमा पनि हल्कादेखि मध्यम वर्षा हुन सक्ने अनुमान गरिएको छ।

लुम्बिनी प्रदेशका तराईका एक–दुई स्थानमा चट्याङसहित हल्का वर्षाको सम्भावना रहेको छ। साथै सुदूरपश्चिम र लुम्बिनी प्रदेशका तराई क्षेत्रमा तातो दिन रहने सम्भावना महाशाखाले जनाएको छ।

मधेस प्रदेशसहित कोशी, बागमती र गण्डकी प्रदेशका तराईका केही स्थानमा हावाहुरी चल्न सक्ने चेतावनी पनि दिइएको छ।

आज राति कोशी र मधेस प्रदेशका केही स्थान तथा बागमती र गण्डकी प्रदेशका थोरै स्थानमा मध्यम वर्षाको सम्भावना रहेको छ। लुम्बिनी, कर्णाली र सुदूरपश्चिम प्रदेशका हिमाली तथा पहाडी क्षेत्रमा चट्याङसहित हल्का वर्षा हुन सक्ने महाशाखाले जनाएको छ।

काठमाडौं । नेपाल राष्ट्र बैंकले मंगलबारका लागि विदेशी मुद्राको विनिमयदर सार्वजनिक गरेको छ।

राष्ट्र बैंकका अनुसार अमेरिकी डलर एकको खरिददर १५२ रुपैयाँ ०८ पैसा र बिक्रीदर १५२ रुपैयाँ ६८ पैसा कायम गरिएको छ।

युरोपियन युरो एकको खरिददर १७७ रुपैयाँ ०९ पैसा र बिक्रीदर १७७ रुपैयाँ ७९ पैसा रहेको छ। यस्तै, युके पाउण्ड स्टर्लिङ एकको खरिददर २०५ रुपैयाँ २४ पैसा तथा बिक्रीदर २०६ रुपैयाँ ०५ पैसा निर्धारण गरिएको छ।

स्वीस फ्र्याङ्क एकको खरिददर १९४ रुपैयाँ ६४ पैसा र बिक्रीदर १९५ रुपैयाँ ४१ पैसा कायम हुँदा अष्ट्रेलियन डलर एकको खरिददर १०९ रुपैयाँ ०३ पैसा र बिक्रीदर १०९ रुपैयाँ ५४ पैसा रहेको छ।

क्यानेडियन डलर एकको खरिददर ११० रुपैयाँ १० पैसा र बिक्रीदर ११० रुपैयाँ ५४ पैसा तोकिएको छ भने सिङ्गापुर डलर एकको खरिददर ११९ रुपैयाँ ०६ पैसा र बिक्रीदर ११९ रुपैयाँ ५३ पैसा कायम गरिएको छ।

यसैगरी, जापानी येन १० को खरिददर ९ रुपैयाँ ५७ पैसा र बिक्रीदर ९ रुपैयाँ ६१ पैसा रहेको छ। चिनियाँ युआन एकको खरिददर २२ रुपैयाँ ४२ पैसा र बिक्रीदर २२ रुपैयाँ ५० पैसा निर्धारण गरिएको छ।

साउदी अरेबियन रियाल एकको खरिददर ४० रुपैयाँ ५३ पैसा र बिक्रीदर ४० रुपैयाँ ६९ पैसा रहेको छ भने कतारी रियाल एकको खरिददर ४१ रुपैयाँ ७२ पैसा र बिक्रीदर ४१ रुपैयाँ ८८ पैसा कायम गरिएको छ।

युएई दिराम एकको खरिददर ४१ रुपैयाँ ४० पैसा र बिक्रीदर ४१ रुपैयाँ ५७ पैसा रहेको छ। मलेसियन रिङ्गेट एकको खरिददर ३८ रुपैयाँ ४८ पैसा तथा बिक्रीदर ३८ रुपैयाँ ६३ पैसा निर्धारण गरिएको राष्ट्र बैंकले जनाएको छ।

भारतीय रुपैयाँ १०० को खरिददर १६० रुपैयाँ र बिक्रीदर १६० रुपैयाँ १५ पैसा तोकिएको छ।

काठमाडौं । काठमाडौं महानगरपालिकाभित्रका विद्यालयहरूमा कक्षा ११ र १२ को छात्रवृत्तिका लागि २६ हजार ८८८ जना विद्यार्थीले अनलाइन आवेदन दिएका छन्।

आवेदन दिनेमा १६ हजार ५४९ जना छात्र, १० हजार ३३३ जना छात्रा तथा ६ जना अन्य रहेका छन्।

शिक्षा अधिकृत तथा परीक्षा समितिका सदस्य सचिव रामचन्द्र खड्काका अनुसार हालसम्म २३ हजार ४९९ आवेदन स्वीकृत भइसकेका छन्। ३ हजार ३०२ आवेदकको विवरण त्रुटिपूर्ण देखिएकाले मोबाइल र इमेलमार्फत सच्याउन सूचना पठाइएको छ। सम्बन्धित आवेदकले भोलि दिउँसो १२ बजेसम्म विवरण सच्याएर पुनः पेश गर्नुपर्नेछ।

अनलाइन आवेदनमा समस्या हुने अभिभावक तथा विद्यार्थीलाई सहयोग गर्न शिक्षा विभागमा सहायता कक्ष स्थापना गरिएको छ।

हालसम्म ८४ आवेदन अस्वीकृत भएका छन्। एउटै कागजात विभिन्न ठाउँमा राखिएको, अनावश्यक कागजपत्र अपलोड गरिएको वा आवश्यक विवरण नदिएको कारण आवेदन रद्द गरिएको विभागले जनाएको छ।

जेठ १३ गतेसम्म आवेदन स्वीकृत गर्ने प्रक्रिया जारी रहनेछ। स्वीकृत भएका आवेदकले जेठ १४ गते बिहान १० बजेदेखि प्रवेशपत्र डाउनलोड गरी रंगीन प्रिन्ट गर्न सक्नेछन्। परीक्षा केन्द्र तथा परीक्षा सम्बन्धी जानकारी प्रवेशपत्रमै उल्लेख हुनेछ।

आवेदकमध्ये सबैभन्दा धेरैले विज्ञान विषय रोजेका छन्। विज्ञानतर्फ १८ हजार ९९६, व्यवस्थापनमा ७ हजार २७१, कानुनमा ४०७, शिक्षामा १३५ तथा मानविकीमा ७९ जनाले आवेदन दिएका छन्।

कक्षा १० सम्मको छात्रवृत्तिका लागि वडा स्तरीय समितिले सिफारिस गर्ने व्यवस्था छ भने कक्षा ११ र १२ को छात्रवृत्तिका लागि शिक्षा विभागले परीक्षा सञ्चालन गरी नतिजाका आधारमा विद्यार्थी छनोट गर्नेछ।

परीक्षापछि प्रकाशित योग्यता क्रम र म्याचिङ सूचीका आधारमा नाम सिफारिस गरिनेछ। सिफारिस भएका विद्यार्थीहरूले कक्षा ११ र १२ मा कुनै पनि शैक्षिक शुल्क तिर्नु पर्ने छैन।

काठमाडौं । प्रधानमन्त्री वालेन्द्र शाहले युरोपेली संघ (इयू) मा आबद्ध देशका गैरआवासीय राजदूत तथा मिसन प्रमुखसँग आज संयुक्त भेटवार्ता गर्ने भएका छन्।

प्रधानमन्त्री तथा मन्त्रिपरिषद्को कार्यालयमा बिहान ११ः३० बजे सामूहिक भेट तथा संवाद कार्यक्रम तय गरिएको छ।

प्रधानमन्त्री शाहका प्रेस तथा अनुसन्धानविज्ञ दीपा दाहालका अनुसार भेटवार्तामा नेपालको वर्तमान प्राथमिकता, द्विपक्षीय सम्बन्ध सुदृढ गर्ने विषय तथा विभिन्न सहकार्यका सम्भावनाबारे छलफल हुनेछ।

यसअघि पनि गत चैत २५ गते प्रधानमन्त्री शाहले नेपालस्थित विभिन्न देशका राजदूत तथा कूटनीतिक नियोगका प्रमुखसँग सामूहिक भेट तथा संवाद गरेका थिए।