काठमाडौं। समाजवादी मोर्चा नेपालले प्रदर्शनको नाममा सार्वजनिक तथा निजी सम्पत्तिमाथि आक्रमण गर्ने आपराधिक तत्वहरूमाथि कडा कारबाही गर्न सरकारसँग माग गरेको छ।
आज जारी गरेको विज्ञप्तिमा मोर्चाले राजनीतिक दलका कार्यालय तथा नागरिकको जनधनको सुरक्षा सुनिश्चित गर्न सरकारको ध्यानाकर्षण गराएको छ। साथै, यस्ता अराजक गतिविधिको कडा शब्दमा भत्र्सना गरेको छ।
मोर्चाले आफ्नो जनप्रदर्शनबाट अत्तालिएका यथास्थितिवादी समूहहरूले नेपाल कम्युनिष्ट पार्टी (एकीकृत समाजवादी)को केन्द्रीय तथा काठमाडौं जिल्ला कार्यालय, अध्यक्ष माधवकुमार नेपालका भाइ सरोज नेपालको निजी निवास, निजी तथा सार्वजनिक सम्पत्ति तथा सञ्चार गृहमा तोडफोड र आगजनी गरेको आरोप लगाएको छ।
गणतन्त्रको संवर्द्धन र राष्ट्रिय स्वाधीनताको संरक्षणका लागि आयोजित जनप्रदर्शनमा उल्लेखनीय नागरिक सहभागिता रहेको भन्दै मोर्चाले सहभागीप्रति आभार प्रकट गरेको छ।
समाजवादी मोर्चामा नेपाल कम्युनिष्ट पार्टी (माओवादी केन्द्र), नेपाल कम्युनिष्ट पार्टी (एकीकृत समाजवादी), नेपाल कम्युनिष्ट पार्टी र नेपाल समाजवादी पार्टी आबद्ध छन्।
