वीरगञ्ज (पर्सा): वीरगञ्जमा सञ्चालित मारवाडी प्रिमियर लिग (एमपीएल) क्रिकेट प्रतियोगिताको उपाधि वीरगञ्ज बासर्सले जितेको छ।
बुधबार राति आर्दशनगर रंगशालामा भएको फाइनल खेलमा बासर्सले टाइटन ११ लाई ६ विकेटले पराजित गर्दै उपाधि हात पारेको हो। पहिलो ब्याटिङ गरेको टाइटन ११ ले १५ ओभरमा ४ विकेटको क्षतिमा ७५ रन बनाएको थियो। जवाफी ब्याटिङमा उत्रिएको बासर्सले ७.३ ओभरमै ४ विकेट गुमाएर लक्ष्य भेट्टाउँदै ७८ रन बनाएर जित सुनिश्चित गर्यो।
प्रतियोगिताको विजेता टोलीलाई नगद रू. २ लाख ५१ हजार र प्रमाणपत्र प्रदान गरिएको छ भने उपविजेता टाइटन ११ ले पनि नगद रू. २ लाख र प्रमाणपत्र प्राप्त गरेको छ।
पुरस्कार वितरण समारोहमा वीरगञ्ज महानगरपालिकाका प्रमुख राजेशमान सिंह र पर्साका प्रमुख जिल्ला अधिकारी गणेश अर्यालले विजयी तथा उपविजेता टोलीलाई पुरस्कार प्रदान गरे।
व्यक्तिगत प्रदर्शनतर्फ, ‘प्लेयर अफ द सिरिज’को उपाधि वीरगञ्ज बासर्सका सर्वनाथले प्राप्त गरे भने उत्कृष्ट ब्याट्सम्यानको उपाधि टाइटन ११ का गौतम अग्रवालले जिते।
