रौतहट । यही चैत १९ गतेदेखि देशभर सञ्चालन हुने माध्यमिक शिक्षा परीक्षा (एसइई) २०८२ का लागि रौतहट जिल्लामा तयारी अन्तिम चरणमा पुगेको छ। शिक्षा विकास तथा समन्वय इकाई रौतहटका अनुसार यस वर्ष जिल्लाभरबाट कुल १० हजार ८८ जना परीक्षार्थी सहभागी हुनेछन्।
परीक्षार्थीमध्ये ५ हजार २७१ छात्र र ४ हजार ८१७ छात्रा रहेका छन्। साधारण धारसँगै प्राविधिकतर्फ २४९ जना र ग्रेड वृद्धितर्फ २४५ जना विद्यार्थीले परीक्षा दिनेछन्। जिल्लाका १३० वटा विद्यालयका विद्यार्थीहरू सहभागी हुनेछन्, जसमा १०२ सामुदायिक, २० संस्थागत (निजी) र ८ प्राविधिक विद्यालय रहेका छन्।
परीक्षालाई व्यवस्थित बनाउन जिल्लाभर ३९ वटा परीक्षा केन्द्र निर्धारण गरिएको छ। परीक्षा सञ्चालनका लागि ३९ जना केन्द्राध्यक्ष खटाउने तयारी पूरा भएको छ। शिक्षा विकास तथा समन्वय इकाईका निमित्त प्रमुख उपेन्द्र सिंहका अनुसार सहायक केन्द्राध्यक्ष, निरीक्षक तथा अन्य कर्मचारीहरूको व्यवस्थापन पनि भइसकेको छ।
परीक्षाको संवेदनशीलतालाई ध्यानमा राख्दै केन्द्रहरूमा कडा सुरक्षा व्यवस्था मिलाइएको छ। परीक्षा मर्यादा विपरीत कार्य गर्ने, चिट चोर्ने वा अन्य अवाञ्छित गतिविधिमा संलग्न हुनेलाई कानुनबमोजिम कडा कारबाही गरिने चेतावनी दिइएको छ।
‘हामी परीक्षालाई शान्तिपूर्ण र मर्यादित बनाउन प्रतिबद्ध छौँ,’ सिंहले भने, ‘परीक्षा केन्द्रमा मोबाइल फोन निषेध गरिनेछ र निगरानीका लागि विशेष टोली परिचालन गरिनेछ।’
चैत १९ गतेदेखि २९ गतेसम्म सञ्चालन हुने परीक्षालाई सफल बनाउन अभिभावक, सुरक्षाकर्मी, सञ्चारकर्मी तथा शिक्षा क्षेत्रका सरोकारवालाहरूको सहयोग आवश्यक रहेको इकाईले जनाएको छ। साथै विद्यार्थीहरूलाई शान्त र सुरक्षित वातावरणमा परीक्षा दिन सहयोग गर्न जिल्ला परीक्षा समन्वय समितिले आग्रह गरेको छ।
गत वर्षको तुलनामा यस वर्ष परीक्षा प्रणालीलाई थप व्यवस्थित र प्रविधिमैत्री बनाउने प्रयास गरिएको कार्यालयले जनाएको छ।
