सोल । दक्षिण कोरियाको अदालतले सन् २०२४ मा लागू गरिएको विवादास्पद मार्सल लसँग सम्बन्धित मुद्दामा पूर्व रक्षामन्त्री किम योङ–ह्युनलाई तीन वर्षको कारावास सजाय सुनाएको छ। गोप्य सैन्य जानकारी अनुचित रूपमा सार्वजनिक गरेको अभियोगमा अदालतले उनलाई दोषी ठहर गरेको हो।
सियोल सेन्ट्रल डिस्ट्रिक्ट अदालतका अनुसार किमले पूर्वराष्ट्रपति युन सुक योलले उठाउँदै आएको चुनावी धाँधलीसम्बन्धी दाबीको अनुसन्धान गर्न गठन गरिने विशेष टोलीसँग सम्बन्धित संवेदनशील सैन्य जानकारी एक सर्वसाधारण व्यक्तिलाई उपलब्ध गराएका थिए।
अदालतले उक्त कार्यलाई राष्ट्रिय सुरक्षासम्बन्धी नियमको गम्भीर उल्लंघन ठहर गर्दै त्यसले मार्सल ल घोषणा गर्ने वातावरण निर्माण गर्न महत्त्वपूर्ण भूमिका खेलेको निष्कर्ष निकालेको छ। न्यायाधीशहरूको इजलासले किमको गतिविधिलाई मार्सल ल कार्यान्वयनतर्फ उन्मुख गराउने प्रमुख कारकमध्ये एक मानेको छ।
यसअघि अभियोजन पक्षले किमलाई पाँच वर्षको जेल सजाय हुनुपर्ने माग गरेको थियो। तर अदालतले तीन वर्षको कारावास सजाय सुनाएको हो।
पूर्वराष्ट्रपति युन सुक योलले डिसेम्बर २०२४ मा चुनावी अनियमितताको आरोप लगाउँदै मार्सल ल घोषणा गरेका थिए। तर राष्ट्रिय सभाको आपत्कालीन बैठकले मतदानमार्फत उक्त निर्णय करिब छ घण्टामै निष्क्रिय बनाएको थियो। त्यस घटनाले देशमा गम्भीर राजनीतिक संकट सिर्जना गरेको थियो।
मार्सल ल घोषणापछि देशभर विरोध प्रदर्शन भएका थिए भने वित्तीय बजारमा समेत असर परेको थियो। साथै, संयुक्त राज्य अमेरिकासहित दक्षिण कोरियाका प्रमुख साझेदार राष्ट्रहरूले घटनाप्रति चिन्ता व्यक्त गरेका थिए।
उक्त घटनापछि पूर्वराष्ट्रपति युनमाथि विद्रोहको नेतृत्व गरेको अभियोग लगाइएको थियो। हाल उनी आजीवन कारावासको सजायविरुद्ध अपिल प्रक्रियामा रहँदै हिरासतमा छन्।
किम योङ–ह्युनमाथि मार्सल ल प्रकरणसँग सम्बन्धित अर्को मुद्दामा यसअघि नै ३० वर्षको जेल सजाय सुनाइसकिएको छ। पछिल्लो फैसला उनीविरुद्धको छुट्टै कानुनी कारबाहीअन्तर्गत आएको हो।
दक्षिण कोरियाको हालैको राजनीतिक इतिहासकै सबैभन्दा विवादास्पद घटनामध्ये एक मानिएको मार्सल ल प्रकरणसँग सम्बन्धित अन्य मुद्दाहरू अझै अदालतमा विचाराधीन छन्। पछिल्ला फैसलाले घटनामा संलग्न उच्च राजनीतिक तथा सुरक्षा अधिकारीहरूमाथि न्यायिक निगरानी थप कडा बन्दै गएको संकेत गरेका छन्।
