काठमाडौं । विश्वकप विजेता ब्राजिलियन फुटबलर रोबर्टो कार्लोस मंगलबार बिहान नेपाल आइपुगेका छन्। नेपाल सुपर लिग (एनएसएल) को तेस्रो सिजनका खेल हेर्न उनी नेपाल आएका हुन्।
एनएसएलका आयोजक नेपाल स्पोर्ट्स एण्ड इभेन्ट म्यानेजमेन्ट (एनएसइएम) का अनुसार कार्लोस मंगलबार बिहान ८:१५ बजे त्रिभुवन अन्तर्राष्ट्रिय विमानस्थलमा अवतरण गरेका हुन्। उनले बुधबार हुने दोस्रो क्वालिफायर खेल— धनगढी एफसी र पोखरा थान्डर्सबीचको प्रतिस्पर्धा — हेर्ने कार्यक्रम रहेको छ।
यसअघि कार्लोस शुक्रबार नेपाल आउने कार्यक्रम तय भए पनि स्वास्थ्य समस्याका कारण भ्रमण स्थगित भएको थियो।
५१ वर्षीय कार्लोसलाई विश्व फुटबलका उत्कृष्ट डिफेन्डरमध्ये एक मानिन्छ। उनले सन् १९९२ देखि २००६ सम्म ब्राजिलको राष्ट्रिय टोलीबाट खेल्दै सन् २००२ मा ब्राजिललाई फिफा विश्वकप जिताउन महत्वपूर्ण भूमिका खेलेका थिए।
