काठमाडौं: महिला टी-२० विश्वकपको एसिया क्षेत्रीय छनोटको सुपर थ्री चरणमा युएईलाई ५ विकेटले पराजित गर्दै नेपालले ग्लोबल छनोटमा स्थान बनाएको छ।
थाइल्यान्डमा आज सम्पन्न खेलमा युएईलाई हराउँदै नेपालले विश्वकपको अर्को चरणका लागि टिकट पक्का गरेको हो।
टस हारेर पहिले ब्याटिङ गरेको युएईले निर्धारित २० ओभरमा ७ विकेट गुमाउँदै ११४ रन बनायो। जवाफी इनिङमा नेपालले ३ बल बाँकी छँदै लक्ष्य भेट्टायो।
नेपालका लागि कप्तान इन्दु बर्माले अविजित ३० रनको योगदान दिइन्। त्यस्तै, रुबिना क्षेत्रीले २३, सम्झना खड्काले २१ र पूजा महतोले १३ रन बनाइन्।
बलिङतर्फ युएईका मिचेल बोथा, सुरक्षा कोटे, वैष्णवी महेश र कप्तान इशा ओजाले समान १-१ विकेट लिए।
युएईका लागि कप्तान इशा ओजाले सर्वाधिक ३९ रन बनाइन्। तीर्था शतीशले २१, हिना होतचन्दानीले २० र लावन्या केनीले १२ रनको योगदान दिइन्। नेपालका लागि मनिषा उपाध्यायले उत्कृष्ट प्रदर्शन गर्दै ४ विकेट लिइन्। कविता कुँवरले २ र राजमति ऐरीले १ विकेट हात पारिन्।
९ टोली सहभागी प्रतियोगिताबाट नेपाल र आयोजक थाइल्यान्ड ग्लोबल छनोटमा पुग्ने दुई टोली बनेका छन्। यद्यपि नेपालले थाइल्यान्डसँग एक खेल खेल्न बाँकी छ, तर दुवै टोली छनोट भइसकेकाले अबको खेल प्रतिष्ठाको खेल मात्र हुनेछ।
ग्लोबल छनोटमा कूल १० टोली रहनेछन्। अहिलेसम्म पाँच टोलीको टुंगो लागिसकेको छ — अघिल्लो विश्वकपबाट बंगलादेश र स्कटल्याण्ड, अमेरिकाको छनोटबाट अमेरिका, तथा एसियाबाट नेपाल र थाइल्यान्ड छनोट भएका हुन्।
अब नेदरल्याण्डमा हुने युरोप छनोटबाट २ टोली, नामिबियामा हुने अफ्रिका छनोटबाट २ टोली र फिजीमा हुने इस्ट एसिया प्यासिफिक छनोटबाट १ टोली छनोट हुनेछन्। यी सबै गरी १० टोलीले महिला टी-२० विश्वकपको ग्लोबल छनोटमा प्रतिस्पर्धा गर्नेछन्।
