मध्यविन्दु (नवलपरासी): यातायात व्यवस्था कार्यालय नवलपरासी (बर्दघाट सुस्तापूर्व)ले चालु आर्थिक वर्षको पहिलो नौ महिनामा २३ करोड ५४ लाख रुपैयाँभन्दा बढी राजस्व सङ्कलन गरेको छ।
कार्यालयका प्रमुख सुरेश जैसवालका अनुसार साउनदेखि चैत मसान्तसम्म सवारीसाधन कर, चालक अनुमतिपत्र, सवारी दर्तालगायत शीर्षकमा कूल रु २३ करोड ५४ लाख ३० हजार ९८० राजस्व उठाइएको हो।
उनका अनुसार:
सवारीसाधन करबापत: रु १९ करोड १२ लाख ३६ हजार ८२०
सवारी चालक अनुमतिपत्र तथा दर्ता किताबबापत: रु चार करोड नौ लाख ५४ हजार ६५५
यातायात क्षेत्रको आम्दानी राजस्व: रु २३ लाख ५८ हजार ४६०
अन्य प्रशासनिक सेवा शुल्कबापत: रु आठ लाख ७५ हजार ६०० सङ्कलन भएको हो।
राजस्व वृद्धि र कर प्रणालीलाई चुस्त बनाउन कार्यालयले चैत महिनामा विशेष अभियान सञ्चालन गरेको थियो। यो अभियानमा बिलबुक नवीकरण, जाँचपास, रुट परमिट तथा सवारी चालक अनुमतिपत्रको नियमितता जाँचमा विशेष ध्यान दिइएको थियो।
प्रमुख जैसवालका अनुसार, “अभियान सफल बनाउँदा चैत महिनामा मात्रै रु चार करोड ८० लाख २५ हजार ६२५ राजस्व सङ्कलन भएको छ। यो अभियानले कर सङ्कलनमा उल्लेखनीय वृद्धि ल्याएको छ।”
प्रदेश सरकारको राजस्व वृद्धि गर्ने लक्ष्यअनुरूप यातायात सेवालाई नियमित, पारदर्शी र सहज बनाउँदै कार्यालयले विभिन्न योजना अघि सारेको पनि उनले जानकारी दिए।
सेवाग्राहीलाई सहज सेवा दिने उद्देश्यले कार्यालयले विशेष व्यवस्था गरेको सूचना अधिकारी टेकनारायण तिवारीले बताए। “कर तिर्न आउने सेवाग्राहीको भीडलाई व्यवस्थापन गर्न थप कर्मचारी खटाइएको छ,” उनले भने, “सेवा छिटो होस् भनेर छुट्टै काउन्टरको व्यवस्था गरिएको छ र आवश्यक कागजात तथा जानकारी सहजै उपलब्ध गराइएको छ।”
गएको आर्थिक वर्ष २०८०/८१ मा सो कार्यालयले कूल रु ३० करोड ३५ लाख ५३ हजार ९५३ राजस्व सङ्कलन गरेको थियो।
