काठमाडौं: थाइल्याण्डको फुकेटबाट नयाँ दिल्लीका लागि उडेको एयर इन्डियाको उडान एआई–३७९ मा बमको धम्कीपछि विमानलाई फिर्ता बोलाएर आपतकालीन अवतरण गराइएको छ। बीबीसीले थाइल्याण्डस्थित आफ्ना संवाददातालाई उद्धृत गर्दै जानकारी दिएको हो।
फुकेट अन्तर्राष्ट्रिय विमानस्थलका अनुसार पाइलटले स्थानीय समयअनुसार बिहान ९:३० बजे एयर ट्राफिक कन्ट्रोल (ATC) लाई विमानमा बमको धम्की प्राप्त भएको जानकारी गराएका थिए। तुरुन्तै विमानलाई आपतकालीन अवतरणका लागि अनुमति दिइएको थियो।
उडान ट्र्याकिङ वेबसाइटका विवरणअनुसार १५६ यात्रु सवार उक्त विमान स्थानीय समयअनुसार बिहान ९:१५ बजे प्रस्थान गरेको थियो। धम्कीपछि विमान सुरक्षित रूपमा फुकेट विमानस्थलमा अवतरण गरिएको छ।
हाल विमानको सुरक्षात्मक जाँच भइरहेको विमानस्थल प्रशासनले जनाएको छ। यात्रुहरूको सुरक्षालाई सर्वोच्च प्राथमिकता दिँदै सम्पूर्ण प्रक्रिया चाँडो सक्ने प्रयास भइरहेको छ। घटनाबारे विस्तृत विवरण अनुसन्धानपछि सार्वजनिक गरिने जनाइएको छ।
