काठमाडौँ: गृह मन्त्रालयले तिनकुने क्षेत्रमा शुक्रबार भएका घटनाको प्रमुख जिम्मेवार दुर्गा प्रसाईलाई ठहर्याएको छ।
शुक्रबार साँझ आयोजित पत्रकार सम्मेलनमा गृह मन्त्रालयका प्रवक्ता रामचन्द्र तिवारीले भने, “हामीले प्राप्त गरेको जानकारीअनुसार आन्दोलनको नेतृत्व दुर्गा प्रसाईले गरेका कारण उहाँ नै यो घटनाप्रति मूल जिम्मेवार हुनुहुन्छ।”
मन्त्रालयले प्रदर्शनका क्रममा अराजक गतिविधि देखिएको निष्कर्ष निकाल्दै भएको क्षतिको जिम्मेवारी पनि आयोजककै हुने स्पष्ट पारेको छ।
राजतन्त्र पुनःस्थापनाको माग गर्दै प्रसाईको नेतृत्वमा शुक्रबार राजधानीमा आयोजित प्रदर्शन हिंसात्मक बनेको थियो। प्रदर्शनका क्रममा तोडफोड र आगजनीका घटना भएका थिए, जसको जिम्मा प्रसाईले लिनुपर्ने मन्त्रालयको भनाइ छ।
