काठमाडौं: प्रधानमन्त्री तथा नेकपा एमालेका अध्यक्ष केपी शर्मा ओली र पूर्वराष्ट्रपति विद्यादेवी भण्डारीबीच मंगलबार साँझ बालुवाटारमा भेटवार्ता भएको छ। एक घण्टा लामो उक्त भेटमा समसामयिक राजनीतिक अवस्था र हालै सम्पन्न भण्डारीको चीन भ्रमणबारे छलफल भएको स्रोतहरूले जनाएका छन्।
पूर्वराष्ट्रपति भण्डारी ओलीलाई भेट्न बालुवाटार पुगेकी थिइन्। प्रधानमन्त्री ओलीकै प्रस्तावमा दुई कार्यकाल राष्ट्रपति बनेकी भण्डारी पछिल्लो समय सक्रिय राजनीतिमा फर्कन खोजिरहेकी छिन्। एमालेको आगामी नेतृत्वप्रति आकांक्षी देखिएकी भण्डारीप्रति ओली असन्तुष्ट रहेको चर्चा रहँदै आएको छ।
तिक्ततापूर्ण सम्बन्धका बीच भएको यो भेटलाई राजनीतिक वृत्तमा अर्थपूर्ण रूपमा हेरिएको छ। एमालेभित्रको शक्ति सन्तुलन र आगामी महाधिवेशनको सन्दर्भमा पनि भेटलाई महत्त्वका साथ लिइएको छ।
