काठमाडौं । बीबीसी फारसी सेवाका अनुसार इरानको विदेश मन्त्रालयका प्रवक्ता इस्माइल बगाईले अमेरिका र इरानबीच जारी वार्तामा केही मुद्दामा सहमति भएको पुष्टि गरेका छन्।
तर उनले तत्काल सम्झौतामा हस्ताक्षर हुने अवस्था नरहेको बताएका छन्।
यसअघि आइतबार इरानी सरकारी सञ्चारमाध्यमले दुई देशबीचको मतभेद अब ‘एक वा दुई’ मुद्दामा मात्र सीमित रहेको दाबी गरेका थिए।
बगाईले अमेरिकी अधिकारीहरूको विरोधाभासी अभिव्यक्ति तथा वार्ताका क्रममा अमेरिकाको विगतको आक्रामक भूमिकाका कारण सम्झौता प्रक्रियामा ढिलाइ भएको बताएका छन्।
यसअघि अमेरिकी विदेशमन्त्री मार्को रुबियोले दिल्लीमा पत्रकारहरूसँग कुरा गर्दै इरान र अमेरिका सोमबार नै युद्ध अन्त्यसम्बन्धी सम्झौतामा पुग्न सक्ने बताएका थिए।
अमेरिकी राष्ट्रपति डोनाल्ड ट्रम्पले पनि आइतबार सम्झौता नजिक पुगेको बताएका थिए। तर पछि उनले सम्झौतामा पुग्न कुनै हतार नभएको प्रतिक्रिया दिएका छन्।
