कोशी प्रदेशका तराईका जिल्लाहरूमा पछिल्ला दिनहरूमा अत्यधिक गर्मी बढेसँगै जनजीवन प्रभावित बनेको छ। तापक्रम ३९ डिग्री सेल्सियससम्म पुगेपछि बालबालिकाको स्वास्थ्यमा असर पर्ने चिन्ताका कारण इटहरी लगायत विभिन्न पालिकाहरूले विद्यालयहरू बन्द गर्ने निर्णय लिएका छन्।
विराटनगर महानगरपालिकाले आज (२८ गते) सहित भोली र पर्सिसम्म विद्यालय बन्द गर्न निर्देशन जारी गरेको छ। इटहरी उपमहानगरपालिकाले पनि आजको विदा थप गर्दै भोली र पर्सिसम्म विद्यालय बन्द गर्ने निर्णय गरेको छ।
प्राप्त जानकारी अनुसार, सुनसरीको इनरुवा नगरपालिका र झापाको कमल गाउँपालिकाले समेत विद्यालय बन्द गर्ने निर्णय गरेका छन्।
हाल कोशी प्रदेशका तराई क्षेत्रमा लगातार गर्मी बढिरहेको छ। मौसममा हावा नचल्ने र आकाश खुलेको अवस्थामा तापक्रम झनै बढ्ने भएकाले सर्वसाधारणको दैनिकीमा समेत असर परेको देखिन्छ।
