काठमाडौं । सामाजिक सञ्जालमार्फत ‘प्राइभेट भिल्ला पार्टी’को नाममा ठगी गरेको आरोपमा प्रहरीले एक भारतीय नागरिकलाई पक्राउ गरेको छ। पक्राउ पर्नेमा १९ वर्षीय भारतीय नागरिक शुभम मोहन्ती रहेका छन्।
काठमाडौं उपत्यका अपराध अनुसन्धान कार्यालयका अनुसार उनलाई बिहीबार बसन्तपुर क्षेत्रबाट पक्राउ गरिएको हो।
प्रहरीको प्रारम्भिक अनुसन्धानअनुसार मोहन्तीले फेसबुक, टिकटक र विभिन्न सामाजिक सञ्जाल पेजमार्फत काठमाडौंको गोप्य स्थानमा ‘एक्सक्लुसिभ प्राइभेट भिल्ला पार्टी’ आयोजना हुने भन्दै विज्ञापन गर्ने गरेका थिए। उक्त विज्ञापनमार्फत निश्चित रकम तिरेपछि पार्टीमा सहभागी हुन पाउने तथा युवती उपलब्ध गराइने प्रलोभन देखाएर उनले ठगी गरेको आरोप छ।
अनुसन्धानका क्रममा पार्टीमा सहभागी हुन इच्छुक व्यक्तिहरूबाट अनलाइनमार्फत रकम लिने र त्यसपछि सम्पर्कविहीन हुने गरेको खुलेको प्रहरीले जनाएको छ।
प्रहरीका अनुसार ‘पार्टी इन्टरटेनमेन्ट सर्भिस’ नामक पेजमार्फत एआई प्रविधिबाट बनाइएका भिडियो प्रयोग गरेर काठमाडौंमा विशेष पार्टी आयोजना हुने दाबी गर्दै विज्ञापन गरिएको पाइएको छ।
प्रारम्भिक अनुसन्धानअनुसार आरोपीले सुरुमा पार्टीमा सहभागी हुन करिब १० हजार रुपैयाँको टिकट लिनुपर्ने बताउने र त्यसपछि आकर्षक तस्बिरहरू पठाएर ३० हजार रुपैयाँसम्मका विभिन्न प्याकेज प्रस्ताव गरी रकम असुल्ने गरेको देखिएको छ।
प्रहरीले घटनाबारे थप अनुसन्धान जारी रहेको जनाएको छ।
