काठमाडौं । नेपाली भाषामा केन्द्रित नयाँ डिजिटल एप ‘हजुर एआई’ सार्वजनिक गरिएको छ। ‘नेपालीका लागि, नेपालीद्वारा निर्मित’ भन्ने नारासहित विकास गरिएको उक्त एप आगामी फागुन १७ गतेदेखि औपचारिक रूपमा सञ्चालनमा आएको जनाइएको छ।
नेपाली प्रयोगकर्तालाई लक्षित गर्दै ल्याइएको एपले सामाजिक सञ्जाल, अध्ययन, स्वास्थ्य र मनोरञ्जनलगायतका सेवा एउटै माध्यममार्फत उपलब्ध गराउने दाबी कम्पनीले गरेको छ।
एपअन्तर्गत ‘ठीकठाक’ नामक सामाजिक सञ्जाल फिड समावेश गरिएको छ। कम्पनीका अनुसार प्रयोगकर्ताले ‘ठीकठाक’ मा राख्ने प्रत्येक पोस्टले ‘ठीकठाक स्कोर’ प्राप्त गर्नेछ। सोही स्कोरका आधारमा हरेक महिना उत्कृष्ट १०० जना प्रयोगकर्तालाई नगद पुरस्कार प्रदान गरिने व्यवस्था गरिएको छ। महिनाकै उत्कृष्ट सामग्री निर्माता लाई २५ हजार रुपैयाँ नगद पुरस्कार दिइने जनाइएको छ।
‘हजुर एआई च्याट’ फिचरमार्फत नेपाली भाषा बुझ्ने र प्रतिक्रिया दिने एआई च्याटबोट पनि उपलब्ध गराइएको छ। उक्त च्याटबोटले अध्ययन, जानकारी खोजी तथा सामान्य परामर्शमा सहयोग गर्ने कम्पनीको भनाइ छ।
भाषा सिकाइसम्बन्धी फिचरमार्फत कथाका माध्यमबाट विभिन्न भाषा सिक्न सकिने सुविधा राखिएको छ। उत्कृष्ट प्रदर्शन गर्ने प्रयोगकर्ताले मासिक १५ हजार रुपैयाँसम्म पुरस्कार पाउने व्यवस्था गरिएको बताइएको छ। स्वास्थ्यसम्बन्धी ‘प्राणायाम’ फिचरमार्फत नेपाली भाषामै ध्यान तथा श्वास–प्रश्वास अभ्यास सिक्न सकिने उल्लेख गरिएको छ।
मनोरञ्जनतर्फ समाचार, संगीत, प्रत्यक्ष रेडियो, नेपाली चलचित्र तथा टेलिभिजन च्यानलहरू एउटै फिडमार्फत उपलब्ध गराइने कम्पनीले जनाएको छ। सामाजिक सञ्जाल, अध्ययन, स्वास्थ्य र मनोरञ्जनलाई एउटै एपमा समेटेर प्रयोगकर्तालाई एकीकृत डिजिटल अनुभव दिने लक्ष्य राखिएको दाबी गरिएको छ।
लन्च अफरअन्तर्गत सन् २०२६ जुलाई १ सम्म सबै प्रयोगकर्तालाई निःशुल्क प्रिमियम सदस्यता उपलब्ध गराइने जानकारी दिइएको छ।
