हेटौंडा: बागमती प्रदेशको प्रदेश खेलकुद परिषद्, हेटौंडाले २ करोड १६ लाख रुपैयाँ बराबरको सामग्री सार्वजनिक बोलपत्र बिना नै सोझै खरिद गरेको पाइएको छ। गत आर्थिक वर्षमा परिषद्ले ठूलो रकमलाई ४४ वटा टुक्रामा बाँडेर विभिन्न फर्महरूबाट वितरणमुखी शैलीमा सोझै खरिद गरेको महालेखा परीक्षकको कार्यालयले जनाएको छ।
सार्वजनिक खरिद ऐनअनुसार २० लाख रुपैयाँभन्दा बढीको कार्य ठेक्का प्रक्रियामार्फत गर्नुपर्ने कानुनी व्यवस्था छ। तर परिषद्ले कानुनको उल्लंघन गर्दै सोझै खरिद प्रक्रिया अपनाएको भन्दै महालेखाले आपत्ति जनाएको हो।
परिषद्ले अन्तरप्रदेश राष्ट्रिय खेलकुद प्रतियोगिताको उद्घाटन तथा समापनका लागि खेलमैदान निर्माण, खेल सामग्री खरिद, साउण्ड सिस्टम, झण्डा, खादा, छपाइ लगायतका शीर्षकमा ४४ वटा फर्महरूमार्फत सोझै खरिद गरेको थियो।
त्यस्तै, परिषद्ले बितेको आर्थिक वर्षमा विभिन्न संघसंस्थाहरूलाई प्रदान गरिएको अनुदानबारे पनि महालेखाले प्रश्न उठाएको छ। अनुदान वितरण भएपनि सो रकमको सदुपयोग भएको नहुन सक्ने आशङ्कासहित अनुगमन तथा मूल्याङ्कन नभएको विषयमा महालेखाको ध्यानाकर्षण भएको हो।
