काठमाडौं: यस सिजनको इन्डियन प्रिमियर लिग (आईपीएल) को प्ले अफमा प्रवेश गर्ने चौथो टोलीको टुंगो लागेको छ। बुधबार भएको खेलमा दिल्ली क्यापिटल्सलाई ५९ रनले पराजित गर्दै मुम्बई इन्डियन्सले प्ले अफको यात्रा सुनिश्चित गरेको हो।
यसअघि नै गुजरात टाइटान्स, रोयल च्यालेन्जर्स बैंगलोर र पन्जाब किङ्स प्ले अफमा प्रवेश गरिसकेका छन्। अब मुम्बईले आफ्नो अन्तिम लिग खेल पन्जाब किङ्ससँग खेल्नेछ।
मुम्बईले दिएको १८१ रनको लक्ष्य पछ्याउने क्रममा दिल्ली क्यापिटल्स १० बल बाँकी छँदै सम्पूर्ण विकेट गुमाउँदै १२१ रनमै समेटियो। दिल्लीका समीर रिज्वीले ३९ रन, विपराज निगमले २० रन र आशुतोष शर्माले १८ रनको योगदान दिए। के. एल. राहुलले ११ रन बनाए भने अन्य ब्याट्सम्यानले दोहोरो अंकमा रन जोड्न सकेनन्।
मुम्बईका बलर माइकल सान्टनरले चार ओभरमा मात्र ११ रन खर्चेर तीन विकेट लिँदा जसप्रित बुमराहले ३.२ ओभरमा १२ रन दिएर तीन विकेट हात पारे।
यसअघि टस हारेर पहिला ब्याटिङ गरेको मुम्बईले पाँच विकेटको क्षतिमा १८० रन बनाएको थियो। खेल मुम्बईको वानखेडे रंगशालामा सम्पन्न भएको हो।
