वासिङ्टन डी.सी.: एसोसिएशन अफ नेपालीज इन द अमेरिकाज (एएनए) द्वारा आयोजित यस वर्षको अन्तर्राष्ट्रिय नेपाली सम्मेलन आगामी अगस्त २२, २३, र २४ मा क्यानडाको क्यालगरीमा आयोजना हुने भएको छ।
एएनएका अध्यक्ष खगेन्द्र अधिकारीले जारी गरेको आधिकारिक प्रेस विज्ञप्तिअनुसार सन् २०२५ को सम्मेलन क्यानडाको क्यालगरीमा सम्पन्न हुनेछ। एएनएको ४२ वर्षको इतिहासमा ३७ वर्षपछि दोस्रोपटक क्यानडामा अन्तर्राष्ट्रिय नेपाली सम्मेलन आयोजना हुन लागेको अध्यक्ष अधिकारीले बताएका छन्।
गत मार्च ५, २०२५, बुधबार बसेको एएनएको कार्यसमिति, संरक्षक समिति, र सल्लाहकार समितिको संयुक्त भर्चुअल बैठकले सर्वसम्मत रूपमा सम्मेलनको स्थान र मिति तय गरेको थियो।
एएनए अध्यक्ष अधिकारीले देश-विदेशमा रहेका सम्पूर्ण नेपाली समुदायलाई सपरिवार उपस्थित भई सम्मेलनका विभिन्न कार्यक्रमहरूमा सहभागी हुन आग्रह गरेका छन्।
