अदानचुली (हुम्ला): हुम्लाको अदानचुली गाउँपालिका र मुगुको सोरु गाउँपालिकामा चौथो पुस्ताको मोबाइल डाटा सेवा (फोरजी) सञ्चालनमा आएपछि स्थानीयवासी हर्षित भएका छन्। नेपाल टेलिकमले २०७३ पुस १७ गते काठमाडौँ र पोखराबाट फोरजी सेवा सुरु गरेको भए पनि यी दुर्गम बस्तीहरूमा बल्ल यसको पहुँच पुगेको हो।
पहिले वडा कार्यालय वा गाउँपालिकाको कार्यालयमा गएर मात्र इन्टरनेट सेवाको उपयोग गर्नुपर्ने बाध्यता थियो। तर अब स्थानीयवासी घरमै बसेर भिडियोकल तथा अन्य इन्टरनेट सुविधाहरू सहज रूपमा प्रयोग गर्न सक्ने भएका छन्। अदानचुली गाउँपालिका-५ का सिंह बोहराले यस परिवर्तनले आम नागरिकको जीवनस्तरमा सकारात्मक प्रभाव पार्ने बताए।
फोरजी सेवाको विस्तारसँगै हुम्लाको ताँजाकोट, अदानचुली, सर्केगाड गाउँपालिका तथा मुगुको सोरु गाउँपालिका लगायत बाजुरा र मुगुका विभिन्न बस्तीहरूमा इन्टरनेट पहुँच सुधारिएको छ। अदानचुली गाउँपालिकाका अध्यक्ष मोहनविक्रम सिंहका अनुसार, यसले स्थानीय प्रशासनको कामकाज मात्र होइन, शिक्षा, स्वास्थ्य, सामाजिक सेवा, तथा सूचना आदान-प्रदान समेत सहज बनाउनेछ।
गाउँपालिकाका उपाध्यक्ष केशरबहादुर शाहीले लामाकाँधमा राखिएको फोरजी टावर सञ्चालनमा आएको जानकारी गराउँदै सेवा प्रभावकारी रूपमा सञ्चालन भइरहे-नभएको जनप्रतिनिधिहरूलाई जानकारी गराउन अनुरोध गरे। यसैगरी, च्याममा राखिएको अर्को टावर भने शनिबार दिउँसो १ बजे सञ्चालनमा आउनेछ।
नेपाल टेलिकमका प्रतिनिधि रिन्जिन लामाका अनुसार, महतारा चौरमा निर्माणाधीन टावर पनि सञ्चालनमा आएपछि अदानचुली र सर्केगाड गाउँपालिकाको तल्लो क्षेत्रमा इन्टरनेट सेवा अझ विस्तार हुनेछ।
स्थानीयवासी यस प्रविधि विस्तारप्रति उत्साहित देखिएका छन्। अदानचुलीका निवर्तमान प्रमुख प्रशासकीय अधिकृत हंस महताराले लामो प्रयासपछि सेवा उपलब्ध गराउन सफल भएकोमा खुसी व्यक्त गरे। उनले भने, “अब अन्य टेलिकम सेवाहरू अवरुद्ध भए पनि फोरजी सेवाले काम गर्ने भएकाले डिजिटल पहुँचमा सुधार आउनेछ।”
स्थानीय अम्मर रावलले भने, “पहिले मोबाइलमा कुरा गर्न अग्ला डाँडामा जानुपर्ने बाध्यता थियो, अहिले भने घरमै बसेर भिडियो कल गर्न सकिन्छ।”
फोरजी सेवा विस्तारका लागि अदानचुली गाउँपालिकाले विगत दुई वर्षदेखि नेपाल टेलिकमसँग समन्वय गरिरहेको थियो। गाउँपालिकाका अध्यक्ष सिंहले निरन्तर दबाब दिएका कारण छिटो निकास पाएको बताए।
सोरु गाउँपालिकाका अध्यक्ष धर्मबहादुर शाहीका अनुसार, लामाकाँधमा राखिएको टावर सञ्चालनमा नआएसम्म हुम्लामा सेवा उपलब्ध हुन सक्दैनथ्यो। उनले भने, “अब फोरजी सेवा सुरु भएपछि सरकारी तथा निजी कार्यालयहरू, विद्यालय, स्वास्थ्य संस्था र स्थानीय तहमा प्रविधिको उपयोग बढ्नेछ। डिजिटल शिक्षा र अनलाइन स्वास्थ्य सेवा प्रवर्द्धन गर्न सकिनेछ।”
फोरजी सेवाको विस्तारले दुर्गम गाउँहरूलाई प्रविधिसँग जोड्ने महत्त्वपूर्ण योगदान गर्ने विश्वास गरिएको छ।
