काठमाडौं: पहिलो संस्करणको नेपाल प्रिमियर लिग (एनपीएल) को उपाधि जनकपुर बोल्ट्सले जित्न सफल भएको छ। मधेस प्रदेशको प्रतिनिधित्व गर्दै प्रतियोगितामा सहभागी जनकपुरले शनिबार सुदूरपश्चिम रोयल्सलाई ५ विकेटले पराजित गर्दै इतिहास रच्यो।
जितसँगै जनकपुरले १ करोड १० लाख नगद पुरस्कारसहित ट्रफी आफ्नो कब्जामा लियो।
ऐरीले जिते कार
नेपाल प्रिमियर लिगमा सुदूरपश्चिम रोयल्सका कप्तान दीपेन्द्र सिंह ऐरीले उत्कृष्ट नेपाली खेलाडीको रुपमा कार जितेका छन्। प्रतियोगितामा उत्कृष्ट प्रदर्शन गर्ने खेलाडीलाई नेपाल क्रिकेट संघ (क्यान) ले ओमाडो एण्ड जेईकोको सहयोगमा कार प्रदान गरेको हो।
६१ लाख ९९ हजार रुपैयाँ मूल्यको उक्त कार नेपाल क्रिकेट संघ, ब्रान्ड डिजिटल लजिक प्रालि र शारदा ग्रुपको सहकार्यमा दिइएको हो।
लुम्बिनीले फेयर प्ले अवार्ड हात पार्यो
नेपाल प्रिमियर लिगको फेयर प्ले अवार्ड लुम्बिनी लायन्सले जितेको छ। फाइनल खेलपछि यो पुरस्कार घोषणा गरिएको हो।
खेल अवधिभर अनुशासित प्रदर्शन गर्ने टोलीलाई यो अवार्ड प्रदान गरिन्छ।
मिलन्था बने प्लेअर अफ द म्याच
जनकपुर बोल्ट्सका लाहिरु मिलन्थाले प्लेअर अफ द म्याचको उपाधि जित्दै टोलीलाई जित दिलाए। उनले ४९ बलमा ८७ रन बनाउँदै ९ चौका र ४ छक्का प्रहार गरे। यो प्रतियोगितामा उनको दोस्रो अर्धशतक थियो।
मिलन्थाले प्लेअर अफ द म्याचको रुपमा ५० हजार रुपैयाँ पुरस्कार जिते। साथै, सुपर फोरका लागि २५ हजार रुपैयाँ र ५ हजार रुपैयाँको रिचार्ज भौचर पनि हात पारे।
अन्य पुरस्कारहरू
क्याच अफ द म्याचको अवार्ड शेर मल्लले जित्दै २५ हजार रुपैयाँ पाए। एनर्जेटिक मुमेन्ट अफ द म्याचको अवार्ड हेमन्त धामीले जिते, जसका लागि उनले पनि २५ हजार रुपैयाँ प्राप्त गरे।
