काभ्रे । प्रधानमन्त्री केपी शर्मा ओलीले सरकारले अब रोजगारी खोज्ने होइन, रोजगारी सिर्जना गर्ने आत्मनिर्भर शिक्षा प्रणालीतर्फ अघि बढ्ने बताएका छन्। काठमाडौँ विश्वविद्यालयको ३०औँ दीक्षान्त समारोहलाई सम्बोधन गर्दै कुलपति ओलीले प्रमाणपत्रले मात्र दक्षता सुनिश्चित नहुने र नागरिकको चरित्र र नैतिकताले उनीहरूको पहिचान निर्धारण गर्ने कुरामा जोड दिए।
प्रधानमन्त्री ओलीले भने, “हामी अब जब सिर्जना गर्ने किसिमको आत्मनिर्भर शिक्षातर्फ अघि बढिरहेका छौँ। यस दिशामा केयूलगायतका विश्वविद्यालय नमुनाका रूपमा स्थापित भइरहेका छन्।” उनले विद्यार्थीलाई अध्ययनसँगै रोजगारीमा जोड्न तथा आत्मनिर्भर बनाउने उद्देश्यले देशका प्रमुख विश्वविद्यालयहरूसँग सहकार्य र समन्वय गर्दै अघि बढ्ने बताए।
प्रधानमन्त्रीले सर्टिफिकेट रोजगारीको आधार मात्र भएको तर दक्ष नागरिकका लागि आचरण, व्यवहार, म्यानर, र बोलीचाली महत्त्वपूर्ण हुने कुरा स्पष्ट पारे। उनले भने, “विद्यार्थीको सीप र उत्तरदायित्वले देश र नागरिकको पहिचान कायम राख्न मद्दत पुर्याउनुपर्छ।”
दीक्षित विद्यार्थीहरूप्रति इंगित गर्दै प्रधानमन्त्रीले विद्यार्थीको आचरण, नैतिकता, र सकारात्मक सोच अनिवार्य रहेको बताए। उनले भने, “विद्यार्थीहरू मृदुभाषी, नम्र, मानवतावादी, शान्तिप्रिय, र म्यानरतावादी हुनुपर्छ। सफलताका लागि परिष्कृत म्यानरको विकास गर्नुपर्छ।”
