तनहुँ, ५ असार: बन्दीपुर गाउँपालिका–२ कुवादीका ६ वर्षीय उत्सव गुरुङको चितुवाको आक्रमणमा परि मृत्यु भएको नौ दिन बितिसक्दा पनि चितुवालाई अझै नियन्त्रणमा लिन सकिएको छैन।
गत जेठ २६ गते साँझ आफ्नै घरआँगनमा खेलिरहेको अवस्थामा चितुवाले बालकमाथि आक्रमण गरी ज्यान लिएको थियो। घटनापछि सिद्धथान सामुदायिक वन क्षेत्रमा बाख्रासहित पाँचवटा खोर राखेर चितुवा फसाउने पासो थापिएको छ।
चितवन राष्ट्रिय निकुञ्जका भेटेरिनरी प्राविधिक दिनेश ढकाल, राष्ट्रिय प्राकृतिक संरक्षण कोषका किरणराज रिजाल, र वन्यजन्तु प्राविधिक थिरुलाल थारूको डार्टिङ टोली उक्त क्षेत्रमा निगरानी गरिरहेको छ। डार्टिङ टोलीले चितुवा देखिएमा त्यसलाई बेहोस बनाई अन्यत्र स्थानान्तरण गर्ने योजना बनाएको छ।
डिभिजन वन कार्यालयका वन अधिकृत तथा सूचना अधिकारी राजकुमार श्रेष्ठका अनुसार, चितुवाको पदचिह्न र हिँडाइको दिशा पत्ता लागेकाले चाँडै नियन्त्रणमा ल्याइनेमा टोली आशावादी छ।
बन्दीपुरमा चालु आर्थिक वर्षको साउनदेखि अहिलेसम्म चितुवाको आक्रमणमा परी तीन बालबालिकाले ज्यान गुमाइसकेका छन्। तीमध्ये दुई बालक र एक बालिका छन्। डिभिजन वन कार्यालयका अनुसार २०७४ फागुन ९ देखि अहिलेसम्मको आठ वर्षको अवधिमा १२ बालक र पाँच बालिकाले चितुवाको आक्रमणमा परि ज्यान गुमाएका छन्।
तनहुँका भानु, बन्दीपुर, आँबुखैरेनी, व्यासलगायतका पालिकामा चितुवाको आक्रमणले मानवीय क्षति पुर्याउँदै आएको छ। सो अवधिमा चितुवाको आक्रमणबाट २१ जना घाइते भएका छन्।
चितुवाको पुनः आक्रमणको सम्भावना उच्च रहेकाले प्रभावित क्षेत्रमा पासो राखिएको र सावधानी अपनाउन स्थानीयवासीलाई आग्रह गरिएको छ। अर्का वन अधिकृत नवीन विश्वकर्माका अनुसार चितुवा प्रायः साँझपख सिकार खोज्न निस्कने भएकाले बालबालिकालाई एक्लै छाड्न नहुने र साँझबेलामा घरबाहिर ननिस्कन सर्तक रहनु जरुरी छ।
कार्यालय प्रमुख शरदकुमार अधिकारीले मृग, कुकुर वा बाछाबाछी नभेटिएमा चितुवा बालबालिकालाई नै निशाना बनाउन सक्ने जोखिम उच्च हुने भएकाले सबैमा उच्च सतर्कता अपनाउन अनुरोध गर्नुभएको छ।
