वासिङ्टन । पर्सियन खाडी र होर्मुज जलडमरूमध्य (स्ट्रेट अफ होर्मुज) मा बढ्दो सुरक्षा चुनौतीका बीच संयुक्त राज्य अमेरिका र बेलायतले व्यापारिक जहाजहरूको सुरक्षाका लागि अन्तर्राष्ट्रिय समुद्री गठबन्धन गठन गर्ने तयारी सुरु गरेका छन्।
विदेशी सञ्चारमाध्यम एक्सियोसका अनुसार आगामी हप्ता लन्डनमा यस विषयमा उच्चस्तरीय बैठक आयोजना गर्ने योजना छ। बैठकमा अमेरिकी रक्षा सचिव पीट हेग्सेथसहित विभिन्न पश्चिमी तथा मध्यपूर्वी मुलुकका रक्षा मन्त्री र सैन्य अधिकारीहरू सहभागी हुने सम्भावना रहेको बताइएको छ।
यद्यपि बैठकको मिति र अन्तिम कार्यक्रमबारे अझै छलफल भइरहेको छ। ह्वाइट हाउसका एक अधिकारीले संयुक्त पहलको पुष्टि गरेका छन् भने वासिङ्टनस्थित बेलायती दूतावासले यसबारे टिप्पणी गर्न अस्वीकार गरेको छ।
अमेरिकी नेतृत्वमा बेलायत र फ्रान्सले पछिल्ला महिनाहरूमा होर्मुज जलमार्गको सुरक्षा सुनिश्चित गर्न सम्भावित अन्तर्राष्ट्रिय सहकार्यबारे विभिन्न देशसँग परामर्श गर्दै आएका छन्। एक युरोपेली कूटनीतिज्ञका अनुसार यो पहल इरानसँग जारी तनाव व्यवस्थापन गर्ने अमेरिकी रणनीतिको एक हिस्सा हुन सक्छ।
यसअघि अमेरिकी राष्ट्रपति डोनाल्ड ट्रम्पले होर्मुज जलमार्गमा हुने कुनै पनि आक्रमणको कडा जवाफ दिइने चेतावनी दिएका थिए। उनले आवश्यक परे इरानका रणनीतिक पूर्वाधारलाई लक्षित गरी सैन्य कारबाही गरिने बताएका थिए। साथै, अमेरिकाले आफ्ना सैन्य उद्देश्य अझै पूरा नभएकाले अभियान तत्काल अन्त्य गर्ने संकेत नदिएको पनि जनाइएको छ।
होर्मुज जलमार्ग वरपर बढेको तनाव र व्यापारिक जहाजमाथिका आक्रमणका कारण विश्वव्यापी तेल ढुवानी प्रभावित भएको छ। यसको प्रत्यक्ष असर अन्तर्राष्ट्रिय बजारमा कच्चा तेलको मूल्य वृद्धिका रूपमा देखिएको छ, जसले विश्व अर्थतन्त्रमा थप दबाब सिर्जना गरेको छ।
यसैबीच, संकट समाधान र युद्धविरामका लागि कूटनीतिक प्रयास पनि जारी छन्। ओमानको एक उच्चस्तरीय प्रतिनिधिमण्डल शुक्रबार तेहरान पुगेको छ। इरानी सरकारी समाचार एजेन्सी इरनाका अनुसार इरानी विदेशमन्त्री अब्बास अराघची र ओमानी विदेशमन्त्री बद्र अलबुसाइदीबीच क्षेत्रीय सुरक्षा, होर्मुज जलमार्ग पुनः सञ्चालन तथा व्यापारिक जहाजहरूको सुरक्षित आवागमनबारे विस्तृत छलफल भएको छ।
