काठमाडौं । सेयर बजारमा दुई चर्चित कम्पनीको आईपीओ सेयर कारोबार आजदेखि सुरु भएको छ। सालपा विकास बैंक र रिलायन्स स्पिनिङ मिल्सको सेयर आजदेखि दोस्रो बजारमा कारोबारमा आएको हो।

नेपाल स्टक एक्सचेन्ज (नेप्से) को नयाँ व्यवस्थाअनुसार दुवै कम्पनीको सुरुवाती कारोबार मूल्य अधिकतम ३०० रुपैयाँ तोकिएको थियो। दुवै कम्पनीको सेयर कारोबार अधिकतम मूल्यमै सुरु भएको हो।

कारोबारको सुरुवातसँगै सालपा विकास बैंकको सेयरमा सकारात्मक उत्साह देखिएको छ। पहिलो सात कारोबारमै उक्त बैंकको सेयरमा सकारात्मक सर्किट लागेको छ। समाचार तयार पार्दासम्म बैंकको १४ पटक कारोबार भइसकेको छ। बैंकले आईपीओ प्रतिकित्ता १०० रुपैयाँमा निष्कासन गरेको थियो।

त्यस्तै रिलायन्स स्पिनिङ मिल्सको सेयरको सात पटक कारोबार भएको छ। कम्पनीको सेयर मूल्य सुरुवाती कारोबार मूल्यभन्दा २ प्रतिशतले बढेर अन्तिम कारोबार ३०६ रुपैयाँमा पुगेको छ। कम्पनीले आफ्नो आईपीओ प्रतिकित्ता ८२० रुपैयाँमा बिक्री गरेको थियो।

दुवै कम्पनीको सेयर कारोबार सुरु भएसँगै लगानीकर्तामा नयाँ उत्साह देखिएको बजार विश्लेषकहरूको भनाइ छ।

भक्तपुर । भक्तपुर जिल्लामा पछिल्लो एक महिनामा आपराधिक घटनामा वृद्धि देखिएको छ। जिल्ला प्रहरी परिसर भक्तपुर ले सार्वजनिक गरेको प्रतिवेदनअनुसार गत माघ महिनामा १५२ वटा आपराधिक मुद्दा दर्ता भएका छन् भने विभिन्न घटनामा संलग्न ११० जनालाई पक्राउ गरिएको छ।

जिल्ला प्रहरी प्रमुख एवं प्रहरी उपरीक्षक सूर्यबहादुर खड्का का अनुसार माघ महिनामा दुई वटा जघन्य हत्याका घटना दर्ता भएका छन्। त्यस्तै लागुऔषधका आठ, बहुविवाहका एक, बैंकिङ कसुरका ६२, ठगीका सात, चोरीका १६, जुवाको एक तथा आत्महत्याका दुई वटा मुद्दा दर्ता भएका छन्।

प्रहरीका अनुसार विभिन्न घटनामा संलग्न ३२ जनालाई कैद सजायका लागि कारागार चलान गरिएको छ भने फैसला कार्यान्वयनतर्फ दुई वर्ष नौ महिना एक दिन कैद सजाय भुक्तानका लागि कारागार पठाइएको छ। साथै ६७ लाख ४७ हजार रुपैयाँभन्दा बढी जरिवाना तथा बिगो सङ्कलन गरिएको प्रहरीले जनाएको छ।

प्रहरीले भक्तपुर नगरपालिका–३ मा ३८ वर्षीया महिलाको हत्या प्रकरणमा एक जनालाई पक्राउ गरी पुर्पक्षका लागि जेल चलान गरेको छ। यस्तै मध्यपुरथिमिमा आमाको हत्या अभियोगमा पक्राउ परेका एक व्यक्तिलाई पनि कारागार पठाइएको छ।

महिला हिंसासम्बन्धी ३६ उजुरीमध्ये २६ वटा मिलापत्र भएका छन् भने १० वटा घटनाको अनुसन्धान जारी रहेको छ। हराएका ३२ जनामध्ये २३ जना फेला परेको प्रहरीले जनाएको छ।

यसैबीच सवारी दुर्घटनातर्फ माघ महिनामा २२७ दुर्घटनामा ५ जनाको मृत्यु भएको र ११५ जना घाइते भएको जानकारी प्रकाश जवेगु ले दिएका छन्। साथै ट्राफिक कारबाहीबाट ११ लाख ४२ हजार रुपैयाँ राजस्व सङ्कलन भएको प्रहरीले जनाएको छ।

काठमाडौं । लामो समयदेखि सुस्त देखिएको घरजग्गा कारोबार चालु आर्थिक वर्ष २०८२/०८३ मा पुनः लयमा फर्किएको देखिएको छ। भूमि व्यवस्थापन तथा अभिलेख विभागले सार्वजनिक गरेको तथ्याङ्कअनुसार चालु आर्थिक वर्षको साउनदेखि माघसम्म घरजग्गा कारोबारबाट २६ अर्ब ९६ करोड रुपैयाँ राजस्व सङ्कलन भएको छ। अघिल्लो आर्थिक वर्षको सोही अवधिमा २४ अर्ब ७१ करोड रुपैयाँ मात्र राजस्व उठेको थियो। यस वर्ष राजस्व २ अर्ब २५ करोड रुपैयाँले वृद्धि भएको हो, जुन करिब ९.१२ प्रतिशतको वृद्धि हो।

तथ्याङ्कअनुसार माघ महिनामा देशभर १ लाख ५३ हजार ९२० वटा घरजग्गा सम्बन्धी कारोबार भएका छन्, जुन गत वर्षको माघको तुलनामा झन्डै २२ हजारले बढी हो। यद्यपि पुस महिनाको तुलनामा भने माघमा कारोबार केही घटेको देखिएको छ।

नेपाल जग्गा तथा आवास विकास महासंघ का अध्यक्ष विष्णु घिमिरे ले पछिल्लो समय कित्ताकाट प्रतिबन्ध हटेसँगै बजार चलायमान हुन थालेको बताएका छन्। उनका अनुसार बैंकिङ नीतिको जटिलताका कारण सर्वसाधारणले कर्जा लिन कठिनाइ भने अझै कायम रहेको छ।

क्षेत्रगत रूपमा हेर्दा काठमाडौं उपत्यकाको कलंकी मालपोत कार्यालयमा कारोबार उल्लेख्य रूपमा बढेको छ। उपत्यका बाहिर नेपालगञ्ज र इनरुवा मा पनि घरजग्गा कारोबार तीव्र रूपमा बढेको देखिएको छ।

विश्लेषण अनुसार चाडपर्वको समयमा कारोबार घटे पनि मंसिरपछि बजारमा सुधार देखिएको छ। समग्र रूपमा देशका प्रमुख सहरी क्षेत्रमा कारोबार बढ्दै जानुले घरजग्गा क्षेत्रमा लगानीकर्ताको विश्वास पुनः बढेको संकेत देखिएको विभागले जनाएको छ।

काठमाडौं । कालीमाटी फलफूल तथा तरकारी बजार विकास समितिले मंगलबारका लागि विभिन्न कृषिउपजको न्यूनतम थोक मूल्य सार्वजनिक गरेको छ। समितिले सार्वजनिक गरेको सूचीअनुसार गोलभेँडा ठूलो (भारतीय) प्रतिकिलो ६० रुपैयाँ, गोलभेँडा सानो (लोकल) २५ रुपैयाँ, गोलभेँडा सानो (टनेल) ४० रुपैयाँ र गोलभेँडा सानो (तराई) ४० रुपैयाँ तोकिएको छ। आलु रातो २२ रुपैयाँ, आलु रातो (भारतीय) २४ रुपैयाँ तथा प्याज सुकेको (भारतीय) ३६ रुपैयाँ कायम गरिएको छ।

तरकारीतर्फ गाजर (लोकल) ५० रुपैयाँ, गाजर (तराई) ४० रुपैयाँ, बन्दा (लोकल) ४० रुपैयाँ, बन्दा (नरिवल) २० रुपैयाँ, काउली (स्थानीय र तराई) दुवै २२ रुपैयाँ, रातो मूला २५ रुपैयाँ, सेतो मूला (लोकल) १० रुपैयाँ र सेतो मूला (हाइब्रिड) १५ रुपैयाँ तोकिएको छ। भन्टा लाम्चो ५० रुपैयाँ र भन्टा डल्लो ५५ रुपैयाँ कायम गरिएको छ।

यसैगरी मटरकोसा ४० रुपैयाँ, घिउ सिमी (लोकल) ९० रुपैयाँ, घिउ सिमी (हाइब्रिड) ६० रुपैयाँ, घिउ सिमी (राजमा) १२० रुपैयाँ, टाटे सिमी ६० रुपैयाँ, तितो करेला १६० रुपैयाँ, लौका ६० रुपैयाँ र फर्सी पाकेको ४५ रुपैयाँ तोकिएको छ। हरियो फर्सी (लाम्चो र डल्लो) दुवै १० रुपैयाँ, सलगम ४० रुपैयाँ, भिन्डी १०० रुपैयाँ, सखरखण्ड र पिँडालु ५५ रुपैयाँ कायम गरिएको छ।

सागसब्जीतर्फ रायोसाग १० रुपैयाँ, पालुङ्गो २० रुपैयाँ, चमसुर २० रुपैयाँ, मेथीको साग ३० रुपैयाँ र हरियो प्याज ५० रुपैयाँ निर्धारण गरिएको छ। अन्य वस्तुमा च्याउ (कन्य) ७० रुपैयाँ, च्याउ (डल्ले) ३०० रुपैयाँ, राजा च्याउ २८० रुपैयाँ, ब्रोकाउली ३० रुपैयाँ, सेलरी १५० रुपैयाँ, पार्सले ३५० रुपैयाँ, पुदिना ३०० रुपैयाँ र गुन्द्रुक २८० रुपैयाँ तोकिएको छ।

फलफूलतर्फ स्याउ (झोले) २०० रुपैयाँ, स्याउ (फुजी) २५० रुपैयाँ, केरा (दर्जन) १७० रुपैयाँ, अनार २९० रुपैयाँ, अंगुर (हरियो) २०० रुपैयाँ, अंगुर (कालो) ३५० रुपैयाँ, सुन्तला १५० रुपैयाँ, तरबुजा ८० रुपैयाँ, मौसम र जुनार १०० रुपैयाँ तोकिएको छ। साथै भुइँकटहर प्रतिगोटा १३५ रुपैयाँ, काँक्रो (लोकल) १३० रुपैयाँ, काँक्रो (हाइब्रिड) ४० रुपैयाँ, निबुवा ५५ रुपैयाँ, नास्पाती (चाइनिज) २२० रुपैयाँ, मेवा ६० रुपैयाँ, स्ट्रबेरी ४५० रुपैयाँ, आभोकाडो २५० रुपैयाँ र अमला ९० रुपैयाँ निर्धारण गरिएको समितिले जनाएको छ।

अत्तरिया । नेपाली कांग्रेस कैलाली क्षेत्र नम्बर ४ का प्रतिनिधिसभा सदस्य उम्मेदवार गोरख बहादुर विष्टले आफ्नो चुनावी प्रतिबद्धता पत्र सार्वजनिक गरेका छन्। एक कार्यक्रममार्फत उनले आफ्नो प्रतिबद्धता पत्र सार्वजनिक गर्दै राष्ट्रवाद, लोकतन्त्र र समाजवादका मूल्य–मान्यतामा आधारित समावेशी विकास, सुशासन र सामाजिक न्यायलाई प्राथमिकतामा राख्ने बताएका छन्।

प्रतिबद्धता पत्र सार्वजनिक गर्दै विष्टले कैलाली क्षेत्र नम्बर ४ को भौगोलिक विकटता, बेरोजगारी, गरिबी, पूर्वाधार अभाव तथा शिक्षा र स्वास्थ्य क्षेत्रका चुनौती समाधानका लागि स्पष्ट कार्य योजना तयार गरेको बताए। उनले स्थानीय तह, प्रदेश सरकार र संघीय सरकारबीच समन्वय, सहकार्य र सहभागितामार्फत दिगो विकास सुनिश्चित गर्ने प्रतिबद्धता व्यक्त गरे।

कृषि, पशुपालन र सहकारी क्षेत्रलाई पहिलो प्राथमिकतामा राख्दै आधुनिक कृषि प्रणाली, सिँचाइ विस्तार, मल–बीउको सहज आपूर्ति तथा कृषि उत्पादनको बजारीकरण सुनिश्चित गर्न विशेष कार्यक्रम ल्याइने उनले उल्लेख गरे। कृषकलाई उत्पादनसँगै प्रशोधन र बजार व्यवस्थापनमा जोड दिँदै ग्रामीण अर्थतन्त्र बलियो बनाउने योजना अघि सारिएको छ।

युवालाई कृषि उद्यमतर्फ आकर्षित गर्न अनुदान, सहुलियत कर्जा तथा प्राविधिक तालिमको व्यवस्था गरिने प्रतिबद्धतामा समेटिएको छ। शिक्षा क्षेत्रमा गुणस्तरीय तथा व्यवहारिक शिक्षामा जोड दिँदै सामुदायिक विद्यालयको स्तरोन्नति, प्राविधिक तथा सीपमूलक शिक्षाको विस्तार र विद्यालय तथा कलेजमा डिजिटल पूर्वाधार विकास गर्ने योजना उनले प्रस्तुत गरेका छन्।

प्रत्येक वडामा निःशुल्क वाईफाइ जोन, ई–लाइब्रेरी र डिजिटल सीप तालिम सञ्चालन गरिने तथा विपन्न र जेहेन्दार विद्यार्थीलाई छात्रवृत्ति उपलब्ध गराइने उल्लेख गरिएको छ। स्वास्थ्य क्षेत्रमा आधारभूत सेवाको पहुँच विस्तार, स्वास्थ्य संस्थामा आवश्यक जनशक्ति र उपकरण व्यवस्थापन, मातृ तथा शिशु स्वास्थ्य सुधार तथा विशेषज्ञ सेवाको पहुँच बढाउने योजना समेटिएको छ।

त्यसैगरी उद्योग, लगानी र रोजगारी सिर्जनालाई प्राथमिकतामा राख्दै स्थानीय स्रोत–साधनमा आधारित साना तथा मझौला उद्योग प्रवर्धन गर्ने, लगानीमैत्री वातावरण निर्माण गर्ने र युवालाई स्वरोजगारीमुखी बनाउन सहुलियत कर्जा कार्यक्रम सञ्चालन गरिने प्रतिबद्धता जनाइएको छ। सामाजिक न्याय र समावेशितालाई जोड दिँदै दलित, आदिवासी जनजाति, थारू, मुस्लिम, महिला, ज्येष्ठ नागरिक तथा फरक क्षमता भएका व्यक्तिका अधिकार सुनिश्चित गर्न लक्षित कार्यक्रम सञ्चालन गरिने उनले बताएका छन्।