काठमाडाैं । राष्ट्रिय स्वतन्त्र पार्टी का सभापति रवि लामिछाने विरुद्ध जिल्ला अदालत कास्कीमा विचाराधीन सम्पत्ति शुद्धीकरण र संगठित अपराधसम्बन्धी मुद्दा तत्काल फिर्ता नहुने भएको छ।
सोमबार जिल्ला अदालत, कास्की मा परेको मुद्दा फिर्ता सम्बन्धी निवेदनमाथि सुनुवाइ गर्दै न्यायाधीश नितिश राईको एकल इजलासले मुद्दा तत्काल फिर्ता नहुने आदेश दिएको हो। अदालतले यस सम्बन्धमा सर्वोच्च अदालत बाट हुने आदेशपछि मात्रै अन्तिम निर्णय गरिने जनाएको छ।
यसअघि रूपन्देही जिल्ला अदालतले पनि लामिछानेविरुद्धको संगठित अपराध र सम्पत्ति शुद्धीकरणसम्बन्धी मुद्दा तत्काल फिर्ता नगर्ने निर्णय गरेको थियो।
महान्यायाधिवक्ता सविता भण्डारी ले गत पुस ३० गते लामिछानेविरुद्धको सम्पत्ति शुद्धीकरण र संगठित अपराधसम्बन्धी मुद्दा फिर्ता लिने निर्णय गरेकी थिइन्। सो निर्णयअनुसार जिल्ला सरकारी वकिलको कार्यालय कास्कीले अदालतमा मुद्दा फिर्ताका लागि निवेदन दिएको थियो।
लामिछानेविरुद्ध रूपन्देही, कास्की, काठमाडौं र चितवन जिल्ला अदालतमा सहकारी ठगी, संगठित अपराध र सम्पत्ति शुद्धीकरणसम्बन्धी मुद्दा दायर भएका छन्।
