जुम्ला: नेपाली ‘खस’ भाषाको जन्मथलो सिञ्जा सभ्यतालाई विश्वसम्पदाको सूचीमा समावेश गर्नका लागि अध्ययन टोली जुम्ला पुगेको छ। केन्द्रीय पुरातत्व विभागको टोली यहाँ पुगेर विश्वसम्पदा सूचीमा राख्नका लागि आवश्यक आधारबारे अध्ययन र स्थानीयसँग छलफल गरिरहेको सिञ्जा गाउँपालिकाका अध्यक्ष पूर्णप्रसाद धितालले जानकारी दिनुभयो।

सिञ्जा सभ्यताको ऐतिहासिक, वर्तमान र भविष्यका सन्दर्भमा पुरातत्व विभागको टोली स्थानीयसँग छलफल गर्दैछ। उहाँले भन्नुभयो, “विभागका महानिर्देशक सौभाग्य प्रधानाङ्गको नेतृत्वमा टोली सिञ्जा उपत्यकामा अध्ययन गर्न पुगेको हो।” टोलीले सिञ्जा, हिमा र कनकासुन्दरी गाउँपालिकाका क्षेत्रका सभ्यताबारे छलफल सुरु गरेको अध्यक्ष धितालले जानकारी दिनुभयो।

“सिञ्जा गाउँपालिकामा पुरातत्व विभागको टोली पहिलो पटक जुम्ला आइपुगेको हो,” महानिर्देशक प्रधानाङ्गले भन्नुभयो। “सिञ्जालाई विश्वसम्पदा सूचीमा समावेश गर्नका लागि यहाँका स्थानीय, स्थानीय सरकार र सरोकारवाला निकायका प्रतिनिधिसँग पहिलो चरणमा छलफल गरिएको छ।”

सिञ्जालाई विश्वसम्पदा सूचीमा राख्नका लागि सबैको सकारात्मक सुझाव आएको उल्लेख गर्दै उहाँले आधुनिक विकासका नाममा प्राचीन सभ्यताहरूको संरक्षण गर्न महत्त्वपूर्ण भएकोमा जोड दिनुभयो। पुरातत्व विभागले देशका १५ नयाँ क्षेत्रलाई विश्वसम्पदा सूचीमा समावेश गर्न तयारी थालेको छ।

कर्णाली प्रदेशका सिञ्जा सभ्यता र दैलेखको दुल्लुका २२ देवल पनि विश्वसम्पदा सूचीमा राख्नको लागि प्रक्रियामा रहेका छन्। विभागले सिञ्जालाई विश्वसम्पदा सूचीमा समावेश गर्ने काम अघि बढाएको महानिर्देशक प्रधानाङ्गको भनाइ छ। गाउँपालिकाका उपाध्यक्ष सीतली रोकायाले सिञ्जालाई विश्वसम्पदा सूचीमा समावेश गर्नका लागि विभागसँग पहल भइरहेको बताउनुभयो।

दमौली (तनहुँ): च्याउ खाँदा बिरामी परेका एक व्यक्तिको मृत्यु भएको छ। व्यास नगरपालिका–६ शान्तिटोलका ३० वर्षीय नारायण मगरको म्याग्दे गाउँपालिका–६ सर्वलाङबाट उपचारको क्रममा पोखरामा सोमबार मृत्यु भएको जिल्ला प्रहरी कार्यालयले जनाएको छ।

गत शुक्रबार राति च्याउ खाएर बिरामी परेका १० जनामध्ये नारायणको सोमबार मृत्यु भएको प्रहरी नायब उपरीक्षक अशोक थापाले जानकारी दिए। उनका अनुसार अन्य नौ जनाको स्वास्थ्य स्थिति अहिले खतरामुक्त रहेको छ। उक्त घटनामा बिरामी परेका सबै व्यक्तिहरूले बारीमा उम्रिएको च्याउ खाएका थिए।

काठमाडौं: नेपाल प्रहरीका ३१औं महानिरीक्षक (आईजीपी)का रूपमा दीपक थापा नियुक्त भएका छन्। सोमबार सम्पन्न मन्त्रीपरिषद्को बैठकले थापालाई आईजीपीको जिम्मेवारी दिने निर्णय गरेको हो।

आईजीपीको पदका लागि तीन प्रतिस्पर्धीमध्ये वरीयताका आधारमा केन्द्रीय अनुसन्धान ब्युरो (सीआईबी)का प्रमुख थापा पहिलो स्थानमा थिए। दोस्रो स्थानमा प्रहरी अतिरिक्त महानिरीक्षक सुदीप गिरी र तेस्रो स्थानमा टेकबहादुर तामाङ थिए।

३०औं आईजीपी वसन्तबहादुर कुँवर ३० वर्षे सेवा अवधि पूरा गरी आज राति अवकाश लिँदैछन्। एआईजी थापाले भोलि, चैत ५ देखि आईजीपीको कार्यभार सम्हाल्नेछन्।

थापाले आफ्नो करियरमा इन्स्पेक्टरबाट एआईजीसम्मको यात्रा तय गरेका छन् र २० भन्दा बढी युनिटको नेतृत्व गरेका छन्। नेतृत्व क्षमताका आधारमा उनले सबैभन्दा धेरै युनिट कमाण्ड गर्ने अफिसरको रूपमा प्रतिष्ठा कमाएका छन्। एआईजी भएपछि उनले उपत्यका प्रहरी कार्यालय र प्रहरी प्रधान कार्यालयको प्रशासन विभागको प्रमुखका रूपमा कार्यसम्पादन गरेका थिए।

हाल, थापा केन्द्रीय अनुसन्धान ब्युरो (सीआईबी)को नेतृत्व गर्दै आएका छन्। प्रशासन विभागमा उत्कृष्ट कार्यसम्पादनका लागि उनलाई पुरस्कृत पनि गरिएको छ।

डीआईजीको रूपमा बागमती प्रदेश प्रहरी प्रमुख, प्रहरी प्रधान कार्यालयको प्रबन्ध विभाग प्रमुख, र एसएसपीको रूपमा काठमाडौं उपत्यका अपराध अनुसन्धान कार्यालय प्रमुख र प्रधान कार्यालयको आर्थिक प्रशासन महाशाखा प्रमुखका रूपमा कार्य गरेका थापा, एसपी र डीएसपीको रूपमा विभिन्न प्रमुख कार्यालयहरूमा कार्यरत थिए। उनले ११ वर्ष इन्स्पेक्टर दर्जामा रहँदा २० फरक युनिटको नेतृत्व गरेका छन्।

थापाले आफ्नो व्यापक नेतृत्व अनुभव, कमाण्ड कन्ट्रोलको उत्कृष्ट ट्रयाक रेकर्ड, र प्रहरी संगठनभित्रको प्रभावशाली छवि स्थापित गरेका छन्। उनका नेतृत्वमा रहेका सबै युनिटहरूले महत्त्वपूर्ण उपलब्धि हासिल गरेका छन्।

हालै चर्चामा रहेको नुवाकोटस्थित शेरा दरवारक्षेत्रको १ सय ६४ रोपनी जग्गाको अनुसन्धान पनि थापाकै नेतृत्वमा रहेको सिआइबीको टोलीले गरेको थियो।

काठमाडौं। नेकपा एमालेले मुलुकलाई पश्चगामी दिशामा फर्काउने कुनै पनि प्रयास सफल हुन नसक्ने निष्कर्ष निकालेको छ।

पार्टी कार्यालय च्यासलमा सोमबार बसेको एमाले सचिवालय बैठकले एक विशेष प्रस्ताव पारित गर्दै उपलब्धि अस्वीकार गर्ने, नकारात्मक भाष्य निर्माण गर्ने, जनता र राष्ट्रको मनोबल कमजोर पार्ने र त्यसको बहानामा मुलुकलाई अलोकतान्त्रिक दिशामा फर्काउने प्रयासलाई अस्वीकार गरेको जनाएको हो।

पार्टीको विशेष प्रस्तावमा भनिएको छ कि केही समयदेखि लोकतान्त्रिक गणतन्त्र र नेपालको संविधानविरुद्ध हुने सुनियोजित गतिविधिहरूको प्रति गम्भीर ध्यानाकर्षण गरिएको छ। बैठकले मुलुकको परिवर्तन उल्ट्याउने र मुलुकलाई पश्चगामी दिशामा फर्काउने कुनै पनि प्रयास सफल हुन नसक्ने निष्कर्षमा पुगेको उपमहासचिव प्रदीप ज्ञवालीले जानकारी दिए।

२१औं शताब्दीमा पनि जन्मजात श्रेष्ठताको वंशगत शासनको बहस आफैंमा हाँस्यास्पद, हानिकारक र निरर्थक हो भन्ने कुरा बैठकले विशेष ध्यानमा राखेको ज्ञवालीले बताए।

त्यस्तै बैठकले लुम्बिनी प्रदेश कमिटीले अनुमोदनका लागि पठाएको प्रदेशमा थप २८ सदस्यहरूको नाम अनुमोदन गरेको जानकारी पनि ज्ञवालीले दिए।

काठमाडौँ: नेपाल प्रहरीका महानिरीक्षक (आईजीपी) वसन्त बहादुर कुँवर सोमबारदेखि सेवा निवृत्त हुँदैछन्। २०७९ चैत १० गते आईजीपी नियुक्त भएका कुँवर ३० वर्षे सेवा अवधि पूरा गरेर अवकाशमा जान लागेका हुन्।

कुँवरसँगै छ जना एआईजी र तीन जना डीआईजी पनि अवकाश हुँदैछन्। अवकाश हुने एआईजीहरूमा टेक प्रसाद राई, बुद्धिराज गुरुङ, दुर्गा सिंह, कुबेर कडायत र जनक भट्टराई छन्। यस्तै, उनीहरूकै ब्याचमेट डीआईजीहरू गणेश चन्द, भोला रावल र ध्रुवराज राउत पनि आजैदेखि अवकाश पाउँदैछन्।

आईजीपी प्रतिस्पर्धा : को बन्ने नयाँ प्रहरी प्रमुख?
कुँवरको अवकाशसँगै नेपाल प्रहरीको ३१ औँ आईजीपीको छनोटलाई लिएर चासो बढेको छ। नयाँ प्रहरी ऐन समयमै लागू नहुने र ३० वर्षे सेवा अवधि कायमै रहने भएपछि सरकारले सोमबारै प्रहरी प्रधान कार्यालयमा कुँवरलाई बिदाइ गर्ने कार्यक्रम राखेको छ।

नयाँ प्रहरी प्रमुखको नियुक्तिका लागि सोमबार मन्त्रिपरिषद् बैठक बस्ने तय भएको छ। प्रतिस्पर्धामा रहेका तीन अतिरिक्त महानिरीक्षक (एआईजी)हरू हुन् –

दीपक थापा – केन्द्रीय अनुसन्धान ब्युरो (सीआईबी) प्रमुख
सुदीप गिरी – राष्ट्रिय प्रहरी प्रशिक्षण प्रतिष्ठान प्रमुख
टेकबहादुर तामाङ – उपत्यका प्रहरी कार्यालय प्रमुख
वरीयता सूची अनुसार को अगाडि?
यी तीनमध्ये दीपक थापा वरीयता सूचीमा पहिलो नम्बरमा छन्, सुदीप गिरी दोस्रो र टेकबहादुर तामाङ तेस्रो स्थानमा छन्। यदि मेरिटकै आधारमा नियुक्ति भएमा थापा प्रहरी प्रमुख बन्ने सम्भावना उच्च छ।

थापा २०७९ चैत ६ गते कुँवरसँगै एआईजीमा बढुवा भएका थिए, भने गिरी र तामाङ २०७९ चैत २४ मा बढुवा भएका थिए।

एआईजी टेक प्रसाद राई : कुँवरसँगै प्रतिस्पर्धा गरेका अधिकारी
अवकाशमा जान लागेका एआईजी टेक प्रसाद राई पनि कुँवरसँगै आईजीपीको प्रतिस्पर्धामा थिए। सोही ब्याचका श्यामलाल ज्ञवाली र किरण बज्राचार्य यसअघि नै अवकाश भइसकेका छन्।

यसबीच, अवकाशमा जान लागेका डीआईजी गणेश चन्द सुदूरपश्चिम प्रदेश प्रहरी प्रमुख थिए भने भोला रावल गण्डकी प्रदेश प्रमुख थिए। रावल आइतबार नै गण्डकी प्रदेश प्रहरी कार्यालयबाट बिदा भएर काठमाडौँ आएका छन्।

अब मन्त्रिपरिषद्को निर्णयले नेपाल प्रहरीको नयाँ नेतृत्व को सम्हाल्ने भन्ने टुंगो लगाउनेछ।

बन्दीपुर (तनहुँ): आँबुखैरेनी गाउँपालिका–३ की २५ वर्षीया सरिश्मा गुरुङले विसं २०७७ मा रु ३,५०० को लगानीबाट सुरु गरेको फूल व्यवसाय छोटो समयमै सफल बन्न पुगेको छ।

फूलको व्यापार विस्तार गर्दै सभा–सेमिनार, पास्नी, विवाहलगायतका कार्यक्रमहरूको सजावट गर्दै आएकी गुरुङ हाल मासिक रु २ लाखसम्म आम्दानी गर्ने बताउँछिन्।

उहाँका अनुसार, सिजनमा मासिक रु २० लाखसम्म कारोबार हुने गर्छ भने अन्य समयमा रु ८–९ लाख हाराहारी व्यापार हुने गरेको छ। खर्च कटाएर मासिक करिब रु २ लाख बचत हुने उहाँले जानकारी दिनुभयो।

“हाल पोखरा र काठमाडौँमा काम भइरहेको छ। ग्राहकलाई थप सहज बनाउन काठमाडौँमा नयाँ शाखा खोल्ने तयारीमा छौँ,” गुरुङले बताउनुभयो।

अब फूल व्यवसायलाई अझ व्यवस्थित बनाउन नर्सरी स्थापना गर्ने योजना रहेको बताउँदै, “व्यवसाय विस्तारका लागि जग्गा खोजी गरिरहेका छौँ। फूल तथा बिरुवा उत्पादन र बिक्री अझ प्रभावकारी बनाउनेछौँ,” उहाँले जानकारी दिनुभयो।