काठमाडौँ: हाल देशभर पश्चिमी न्यूनचापीय प्रणाली र स्थानीय वायुको आंशिक प्रभाव रहेको छ।
मौसम पूर्वानुमान महाशाखाका अनुसार, देशका पहाडी भू–भागमा आंशिकदेखि सामान्य बदली रहनेछ भने बाँकी भू–भागमा आंशिक बदलीसहित मौसम मुख्यतः सफा रहनेछ।
आज सुदूरपश्चिम र कर्णाली प्रदेशका पहाडी क्षेत्रमा केही स्थानमा तथा अन्य पहाडी भू–भागका एक-दुई स्थानमा मेघगर्जन र चट्याङसहित हल्का वर्षा हुने सम्भावना रहेको महाशाखाले जनाएको छ।
त्यस्तै, यी दुई प्रदेशका उच्च पहाडी तथा हिमाली क्षेत्रमा केही स्थानमा तथा अन्य उच्च पहाडी तथा हिमाली भू–भागका एक-दुई स्थानमा हल्का हिमपात हुन सक्ने अनुमान गरिएको छ।
साथै, कोशी र मधेस प्रदेशका केही स्थानमा हावाहुरी चल्न सक्ने भएकाले सामान्य जनजीवन, स्वास्थ्य, सडक तथा हवाई यातायातमा आंशिक प्रभाव पर्न सक्ने महाशाखाले जनाएको छ। सम्भावित असरबाट बच्न आवश्यक सतर्कता अपनाउन अनुरोध गरिएको छ।
