कञ्चनपुर: बेलौरी नगरपालिका–२ टेढुवा गाउँबाट नियन्त्रणमा लिइएको वयस्क भाले पाटेबाघलाई शुक्लाफाँटा राष्ट्रिय निकुञ्जको कोर एरियामा छाडिने भएको छ।

वन प्राविधिक टोलीले आइतबार गहुँ खेतमा पसेको उक्त बाघलाई डार्टिङ गरी (बेहोस पारेर) नियन्त्रणमा लिएको थियो। नियन्त्रणपछि बाघलाई डिभिजन वन कार्यालय कञ्चनपुरको संरक्षणमा राखिएको थियो।

डिभिजन वन कार्यालयका प्रमुख रामविचारी ठाकुरका अनुसार बाघको स्वास्थ्य परीक्षण गर्दा कुनै घाउचोट नदेखिएको र पूर्ण रूपमा स्वस्थ रहेको पुष्टि भएको छ। “बाघ तन्दुरुस्त छ, त्यसैले यथाशीघ्र सुरक्षित स्थानमा छाड्ने तयारी भइरहेको छ,” उनले बताए।

बाघलाई नियन्त्रणमा लिन डिभिजन वन कार्यालय कञ्चनपुर, शुक्लाफाँटा राष्ट्रिय निकुञ्ज, तथा राष्ट्रिय प्रकृति संरक्षण कोषका १२ प्राविधिकसहितको टोलीले दुई हात्तीको सहायता लिएको थियो। बस्तीबीचको गहुँ खेतमा पसेको बाघको अवस्थिति पत्ता लगाउन ड्रोन क्यामेराको प्रयोग गरिएको थियो।

त्रिवेणी (नवलपरासी): नारायणगढ–बुटवल सडक निर्माण योजनाको पूर्वी खण्डमा ५० किलोमिटर सडक कालोपत्र गरिएको छ। गैँडाकोटदेखि दाउन्नेसम्मको ६३ किलोमिटर खण्डमध्ये एकतर्फी रूपमा ५० किलोमिटर सडक कालोपत्र गरिएको हो।

योजनाका सूचना अधिकारी शिव खनालका अनुसार बाँकी १३ किलोमिटर सडक पनि आउँदो बर्खाअघि नै कालोपत्र गर्ने लक्ष्यसहित काम भइरहेको छ। यात्रुहरूलाई सास्ती कम गर्न दाउन्ने क्षेत्रमा चार किलोमिटर र घुमाउरो घुम्तीमा चार किलोमिटर सडक वर्षाअघि नै ढलान गरिनेछ। ढलान कार्य यसै सातादेखि सुरु हुनेछ।

“पहिलो चरणमा यातायात सहज बनाउने लक्ष्य राखेर एकतर्फी रूपमा सडक कालोपत्र गरिँदैछ, साथै दोस्रो खण्डको काम पनि समानान्तर रूपमा अघि बढिरहेको छ,” सूचना अधिकारी खनालले बताए।

२०७५ माघमा सम्झौता भएर २०७९ साउनसम्ममा सडक निर्माण सम्पन्न गर्ने लक्ष्य राखिएको थियो। नारायणगढ–बुटवल सडकको ११३ किलोमिटर खण्डलाई दुई भागमा विभाजन गरी काम भइरहेको छ। तर, निर्धारित समयमै काम नसकिएपछि म्याद २०८१ साउनसम्म दोस्रोपटक थप गरिएको थियो। उक्त अवधिमा पनि काम नसकिएपछि २०८२ साउनसम्मका लागि तेस्रोपटक म्याद थपिएको छ।

एसियाली विकास बैंक (एडिबी)को ऋण सहयोगमा रु १६ अर्ब ९९ करोड ५३ लाखको लागतमा सडक निर्माण कार्य भइरहेको छ। ११३ किलोमिटर सडकमध्ये ७० किलोमिटर चार लेनको हुनेछ भने २९ किलोमिटर खण्डमा चार लेनसहित दुवैतर्फ ६–६ मिटरको सर्भिस लेन बनाइनेछ। दाउन्ने क्षेत्रमा १४ किलोमिटर सडक तीन लेनको हुनेछ।

काठमाडौँ: इन्डियन प्रिमियर लिग (आइपिएल) २०२५ को १२औँ खेलमा मुम्बई इन्डियन्सले कोलकाता नाइट राइडर्सलाई आठ विकेटले पराजित गर्दै जारी प्रतियोगितामा पहिलो जित दर्ता गरेको छ।

मुम्बईस्थित वानखेडे अन्तर्राष्ट्रिय क्रिकेट रंगशालामा भएको खेलमा मुम्बईले कोलकातालाई १२.५ ओभरमै दुई विकेट गुमाएर ११७ रनको लक्ष्य पूरा गर्यो। यसअघि खेलेका दुई खेलमा पराजित मुम्बईले यो जितसँगै प्रतियोगितामा खाता खोलेको छ।

मुम्बईका लागि रायन रिकेलटनले अविजित ६२ रन बनाए। उनले ४१ बलमा पाँच छक्का र चार चौका प्रहार गरे। यस्तै, सूर्यकुमार यादवले अविजित २७ रन जोड्दा विल ज्याक्सले १६ र रोहित शर्माले १३ रनको योगदान दिए। मुम्बईले अतिरिक्त तीन रन प्राप्त गर्यो। कोलकाताका लागि आन्द्रे रसेलले दुई विकेट लिए।

त्यसअघि, टस गुमाएर पहिले ब्याटिङ गरेको कोलकाताले १६.२ ओभरमै सबै विकेट गुमाउँदै ११६ रन मात्र बनाउन सक्यो। कोलकाताका लागि अंगकृष रघुवंशीले १६ बलमा तीन चौका र एक छक्कासहित सर्वाधिक २६ रन बनाए।

अन्य खेलाडीमध्ये रमनदीप सिंहले २२, मनिष पाण्डेले १९, रिङ्कु सिंहले १७, कप्तान अजिंक्य रहाणेले ११ र आन्द्रे रसेलले पाँच रन बनाए। हर्षित राणाले चार, वेंकटेश अय्यरले तीन, क्विन्टन डि कक र स्पेन्सर जानसनले समान एक/एक रन जोड्दा सुनील नारिन शून्यमा आउट भए। कोलकाताले अतिरिक्त सात रन प्राप्त गर्यो।

मुम्बईका बलरमध्ये अश्विनी कुमारले उत्कृष्ट प्रदर्शन गर्दै चार विकेट लिए। दीपक चाहरले दुई विकेट लिँदा कप्तान हार्दिक पाण्ड्या, ट्रेन्ट बोल्ट, विग्नेश पुथुर र मिचेल सान्टनरले समान एक/एक विकेट लिए।

काठमाडौँ: प्रधानमन्त्री केपी शर्मा ओली मित्रराष्ट्र थाइल्याण्डको औपचारिक भ्रमणका साथै बङ्गालको खाडी बहुक्षेत्रीय प्राविधिक तथा आर्थिक सहयोग (बिमस्टेक) को छैटौँ शिखर सम्मेलनमा सहभागी हुन आज बैंककतर्फ प्रस्थान गर्दै हुनुहुन्छ।

थाइल्याण्डका प्रधानमन्त्री फेथोङथान सिनावात (पैटोङ्टार्न शिनावात्रा) को निमन्त्रणामा नेपालका प्रधानमन्त्रीबाट पहिलो पटक औपचारिक रूपमा थाइल्याण्डको भ्रमण हुन लागेको हो। प्रधानमन्त्री ओलीको नेतृत्वमा रहेको भ्रमण टोली चैत १९ गते दिउँसो १:३० बजे थाइ एयरलाइन्समार्फत बैंककतर्फ प्रस्थान गर्नेछ। प्रधानमन्त्रीको सचिवालय र परराष्ट्र मन्त्रालयले भ्रमणको सम्पूर्ण तयारी पूरा गरिसकेको छ। साथै, प्रधानमन्त्री ओलीले भ्रमणबारे सङ्घीय संसद्का दुवै सदनलाई औपचारिक जानकारी गराइसक्नुभएको छ।

चैत २० गतेदेखि सुरु हुने औपचारिक भ्रमणका क्रममा प्रधानमन्त्रीस्तरमा द्विपक्षीय वार्ता हुनेछ, जसमा पर्यटन र संस्कृतिसम्बन्धी दुईवटा तथा निजी क्षेत्रबीच छ वटा समझदारीपत्रमा हस्ताक्षर हुनेछन्। वार्तापछि प्रधानमन्त्री ओली र थाइल्याण्डका प्रधानमन्त्री सिनावातले संयुक्त प्रेस ब्रिफिङ गर्नेछन्। साथै, प्रधानमन्त्री ओलीले थाइल्याण्डका नरेशसँग पनि शिष्टाचार भेट गर्नुहुनेछ।

प्रधानमन्त्री ओलीले चैत २१ गते बिहान थाइल्याण्डका प्रतिष्ठित व्यवसायीहरूसँग भेटघाट र छलफल गर्नुहुनेछ। दिउँसो एसियन इन्स्टिच्युट अफ टेक्नोलोजीमा आयोजित कार्यक्रममा सम्बोधन गर्ने कार्यक्रम रहेको छ। साँझ बिमस्टेक शिखर सम्मेलनका नेताहरूलाई दिइने औपचारिक रात्रिभोजमा उहाँ सहभागी हुनुहुनेछ।

चैत २२ गते प्रधानमन्त्री ओली बिमस्टेक शिखर सम्मेलनमा सहभागी हुनुहुनेछ। सम्मेलनपछि अन्य मुलुकका नेताहरूसँग ‘साइडलाइन वार्ता’ गर्ने उहाँको योजना छ। त्यस्तै, मेरिटाइम ट्रान्स्पोर्ट कोअपरेशन सम्झौतामा हस्ताक्षर हुने समारोहमा पनि उहाँ सहभागी हुनुहुनेछ। साँझ बैंककस्थित नेपाली दूतावासमा आयोजना हुने कार्यक्रममा समेत प्रधानमन्त्री ओलीको उपस्थिति रहनेछ।

प्रधानमन्त्रीको भ्रमण टोलीमा प्रथम महिला राधिका शाक्य, परराष्ट्रमन्त्री डा. आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक–विकास सल्लाहकार डा. युवराज खतिवडा, नेपाल सरकारका मुख्यसचिव एकनारायण अर्याल, परराष्ट्र मन्त्रालयका सचिव अमृतबहादुर राई, प्रधानमन्त्रीका निजी चिकित्सक डा. दिव्यासिंह शाह, प्रमुख स्वकीय सचिव राजेश बज्राचार्य, सुरक्षाकर्मी तथा सञ्चारकर्मीसहित २१ जना सहभागी हुनेछन्।

यस भ्रमणका लागि परराष्ट्र मन्त्रालयका दुई अधिकारी अग्रिम रूपमा बैंकक पुगिसकेका छन्। साथै, थाइल्याण्डका लागि नेपाली राजदूत धनबहादुर वलीसहित दूतावासका चार अधिकारी नेपाल सरकारलाई कुनै आर्थिक भार नपर्ने गरी भ्रमण दलमा समावेश हुनेछन्। भ्रमणमा नेपालको निजी क्षेत्रका प्रतिनिधिहरू पनि सहभागी हुनेछन्।

प्रधानमन्त्री ओलीले भ्रमणपूर्व आइतबार पूर्वप्रधानमन्त्री तथा पूर्वपरराष्ट्रमन्त्रीहरूसँग परामर्श गर्नुभएको थियो। छलफलमा नेपालको आर्थिक विकास, पूर्वाधार, ऊर्जा, पर्यटन तथा सांस्कृतिक सहकार्यलाई प्रवर्द्धन गर्दै भ्रमणलाई नेपालको हितमा कसरी उपयोग गर्न सकिन्छ भन्ने विषयमा सुझाव दिइएको थियो।

प्रधानमन्त्री ओली नेतृत्वको टोली यही चैत २३ गते स्वदेश फर्किनेछ।

काठमाडौं। युक्रेनी राष्ट्रपति भोलोडिमिर जेलेन्स्कीले आइतबार राति आफ्नो देशका जनतालाई सम्बोधन गर्दै रुसमाथि थप दबाब दिन आवश्यक रहेको बताएका छन्।

उनले अमेरिकी पूर्वराष्ट्रपति डोनाल्ड ट्रम्पले रुसी राष्ट्रपति भ्लादिमिर पुटिनमाथि दिएको पछिल्लो टिप्पणीप्रति प्रतिक्रिया जनाउँदै भने, “पुटिनलाई कूटनीतिको कुनै वास्ता छैन, युद्ध रोक्नका लागि कडा कदम चाल्न आवश्यक छ।”

जेलेन्स्कीका अनुसार पछिल्ला केही हप्तामा अमेरिकाबाट बिना शर्त युद्धविरामका प्रस्तावहरू आएका छन्। तर, प्रत्येक प्रस्तावको प्रतिक्रियामा रुसले ड्रोन, बम, तोपखाना र ब्यालिस्टिक आक्रमण गरेको छ।

“हामीले रुसमाथि कडा प्रतिबन्ध लगाउनु पर्छ,” उनले जोड दिए, “रुसी युद्ध मेसिनलाई कमजोर बनाउन आर्थिक, सैनिक, र कूटनीतिक दबाब निरन्तर आवश्यक छ।”

यसैबीच, एनबीसीलाई दिएको अन्तर्वार्तामा ट्रम्पले आफू पुटिनसँग धेरै रिसाएको र दुःखी भएको बताएका छन्। उनले पुटिनले युक्रेनी राष्ट्रपति भोलोडिमिर जेलेन्स्कीको विश्वसनीयतामाथि आक्रमण गरेको आरोप पनि लगाए।

जेलेन्स्कीले भने, “रुससँग युद्ध अन्त्यका लागि केवल वार्ताले मात्र पुग्दैन, ठोस कदम उठाउनु अपरिहार्य छ।”

काठमाडौं। अमेरिकी राष्ट्रपति डोनाल्ड ट्रम्पले यसै हप्तादेखि लागू हुने नयाँ कर सबै देशहरूमा प्रभावकारी हुने बताएका छन्।

यो घोषणा यस्तो समयमा आएको हो जब ट्रम्पले बुधबारदेखि नयाँ आयात शुल्क लागू गर्ने तयारी गरिरहेका छन्, जसलाई उनले “अमेरिकाको मुक्ति दिवस” भनेका छन्।

यी नयाँ शुल्कहरू पहिलेदेखि लागु भइसकेका शुल्कहरूमा थप हुनेछन्। अमेरिका पहिले नै आल्मुनियम, स्टील, सवारी साधन, र चीनबाट आयात गरिने सबै उत्पादनहरूमा उच्च कर लगाइसकेको छ। ट्रम्पको नयाँ घोषणापछि सोमबार एसियाली शेयर बजारमा गिरावट देखिएको छ।

“हामी सबै देशहरूसँग सुरु गर्नेछौं,” ट्रम्पले एयर फोर्स वानमा पत्रकारहरूलाई भने, “हामीले वार्ता गरिरहेका सबै देशहरूलाई यो लागू हुनेछ।”

उनले आफ्नो सरकार व्यापारिक नीतिमा अन्य देशहरूभन्दा “बढी उदार” र “दयालु” हुने दाबी पनि गरे।

ट्रम्प प्रशासनका आर्थिक सल्लाहकार केभिन ह्यासेटले हालै भनेका थिए कि नयाँ भन्सार मुख्यत: अमेरिकासँग सबैभन्दा ठूलो व्यापार घाटा भएका १०–१५ देशहरूमा लक्षित हुनेछ, तर उनले ती देशहरूको नाम भने खुलाएनन्।

ट्रम्पको विश्वास छ कि यी शुल्कहरूले अमेरिकालाई अनुचित व्यापार प्रतिस्पर्धाबाट जोगाउने र राम्रो व्यापार सम्झौताहरू हासिल गर्न मद्दत गर्ने छन्।

काठमाडौं। म्यानमारमा शक्तिशाली भूकम्पका कारण १७०० भन्दा बढीको मृत्यु, एक हप्ताको राष्ट्रिय शोक घोषणा

म्यानमारको सत्तारुढ सैन्य सरकारले देशभर एक हप्ताका लागि राष्ट्रिय शोक घोषणा गरेको छ। मार्च २८ मा गएको शक्तिशाली भूकम्पका कारण १७०० भन्दा बढीले ज्यान गुमाएका छन्।

समाचार एजेन्सी एएफपीका अनुसार, राष्ट्रिय शोक अप्रिल ६ सम्म जारी रहनेछ, जसअन्तर्गत देशभर झण्डा आधा झुकाइनेछ।

यसैबीच, विश्व स्वास्थ्य संगठन (डब्लुएचओ) की प्रवक्ता मार्गरेट ह्यारिसले बीबीसीसँग कुराकानी गर्दै म्यानमारका अस्पतालहरू घाइतेहरूले भरिएको जानकारी दिइन्। उनका अनुसार, भूकम्पबाट धेरै अस्पतालहरू क्षतिग्रस्त भएका छन्।

उनले भनिन्, “कम्तीमा तीन अस्पताल पूर्ण रूपमा बन्द छन्, जबकि अन्य २२ अस्पताल आंशिक रूपमा क्षतिग्रस्त भएका छन् र प्रभावकारी रूपमा सञ्चालन गर्न सकेका छैनन्।”

ह्यारिसका अनुसार, अर्को ठूलो चुनौती भनेको सत्तारुढ सैन्य सरकारसँग सहकार्य गर्नु हो। यसअघि, केही क्षेत्रमा अन्तर्राष्ट्रिय सहायता अवरुद्ध गरिएको आरोप सैन्य प्रशासनमाथि लागेको थियो।

काठमाडौं: रवि लामिछाने पुनः राष्ट्रिय स्वतन्त्र पार्टी (रास्वपा)को सभापतिको जिम्मेवारीमा फर्किएका छन्।

रास्वपाको केन्द्रीय समितिको आज बसेको पहिलो बैठकले लामिछानेलाई सभापतिको जिम्मेवारी दिने निर्णय गरेको हो। बैठकमा कार्यवाहक सभापति डोलप्रसाद अर्यालले आफ्नो कार्यकालका लागि धन्यवाद ज्ञापन गरे।

यसपछि, सभापति लामिछानेको नेतृत्वमा दोस्रो बैठक बसेको कार्यवाहक महामन्त्री कविन्द्र बुर्लाकोटीले जानकारी दिए। उक्त बैठकमा पार्टी र संसदीय गतिविधिबारे संक्षिप्त समीक्षा गरिएको थियो। साथै, ‘लिडरसिप एकेडेमी’को ‘फ्लो चार्ट’, जनयात्रा कार्यक्रम, अधिवेशन/महाधिवेशन कार्यतालिका, तथा पार्टीको राजनीतिक प्रतिवेदनमा आधारित देशव्यापी जागरण र बहसबारे छलफल भएको जनाइएको छ।

सहकारी ठगीलगायत चारवटा कसुरमा अदालतमा मुद्दा दायर भएपछि लामिछाने सभापति पदबाट अलग भएका थिए। त्यसयता, अर्यालले कार्यवाहक सभापतिको जिम्मेवारी सम्हाल्दै आएका थिए।

लामिछानेको सम्बोधन: ‘लुटतन्त्रको खबरदारी गर्न जीवनभर लड्नेछु’

सभापतिमा पुनः फर्केपछि लामिछानेले विशेष बैठकमा सम्बोधन गर्दै लोकतन्त्र र गणतन्त्रको आडमा लुटतन्त्र मच्चिएको आरोप लगाए। उनले भ्रष्टाचारविरुद्ध संघर्ष गर्न आफ्नो अडान कायमै रहने स्पष्ट गरे।

उनले भने, “सरकारले सक्ने जति बल प्रयोग गरिसक्यो। यदि केही नभएको भए अदालतले धरौटी माग्ने थिएन भन्नेहरूलाई भन्न चाहन्छु— दुईतिहाइ बहुमतको सरकारले मलाई जिउँदै छोड्नु नै मेरो जित हो। मेरो शरीरमा एक थोपा रगत रहुञ्जेल लुटतन्त्रविरुद्ध लड्नेछु। जतिसुकै मुद्दा लगाउनुहोस्, ज्यानै लिने भए पनि लिउन्, तर म पछि हट्दिन।”

लामिछानेले सरकारको षड्यन्त्र नसकिएको दाबी गर्दै कुनै दिन पनि हार नमानेको र नमान्ने बताइए।

उनले थपे, “सरकारको षड्यन्त्र अझै जारी छ। तर म कहिल्यै हार मान्नेछैन। जुनसुकै आरोप लागे पनि, जुनसुकै तराजुमा बसेर म आफैंलाई तौलन तयार छु। राजनीति गरेकै कारण यो पीडा भोग्नुपरिरहेको छ, तर म समाधान खोज्न मैदानमा आएको छु।”