कञ्चनपुर: बेलौरी नगरपालिका–२ टेढुवा गाउँबाट नियन्त्रणमा लिइएको वयस्क भाले पाटेबाघलाई शुक्लाफाँटा राष्ट्रिय निकुञ्जको कोर एरियामा छाडिने भएको छ।
वन प्राविधिक टोलीले आइतबार गहुँ खेतमा पसेको उक्त बाघलाई डार्टिङ गरी (बेहोस पारेर) नियन्त्रणमा लिएको थियो। नियन्त्रणपछि बाघलाई डिभिजन वन कार्यालय कञ्चनपुरको संरक्षणमा राखिएको थियो।
डिभिजन वन कार्यालयका प्रमुख रामविचारी ठाकुरका अनुसार बाघको स्वास्थ्य परीक्षण गर्दा कुनै घाउचोट नदेखिएको र पूर्ण रूपमा स्वस्थ रहेको पुष्टि भएको छ। “बाघ तन्दुरुस्त छ, त्यसैले यथाशीघ्र सुरक्षित स्थानमा छाड्ने तयारी भइरहेको छ,” उनले बताए।
बाघलाई नियन्त्रणमा लिन डिभिजन वन कार्यालय कञ्चनपुर, शुक्लाफाँटा राष्ट्रिय निकुञ्ज, तथा राष्ट्रिय प्रकृति संरक्षण कोषका १२ प्राविधिकसहितको टोलीले दुई हात्तीको सहायता लिएको थियो। बस्तीबीचको गहुँ खेतमा पसेको बाघको अवस्थिति पत्ता लगाउन ड्रोन क्यामेराको प्रयोग गरिएको थियो।
