दमौली (तनहुँ): मुग्लिन–पोखरा सडक विस्तार अन्तर्गत पश्चिम खण्डको निर्माण कार्य ५३ प्रतिशत पूरा भएको छ। तनहुँको जामुनेदेखि पोखराको सेतीपुलसम्मको ४० किलोमिटर खण्डमा हालसम्म आधा भन्दा बढी काम सकिएको मुग्लिन–पोखरा सडक योजना (पश्चिम खण्ड) कार्यालयले जानकारी दिएको हो।
योजना प्रमुख कृष्णबहादुर कुँवरका अनुसार, पश्चिम खण्ड अन्तर्गत २४ किलोमिटरमा दुईतर्फी र १२.८ किलोमिटरमा एकतर्फी कालोपत्र सम्पन्न भइसकेको छ। अझै तीन किलोमिटर एकतर्फी कालोपत्र गर्न बाँकी रहेको र जेठ मसान्तसम्म सो कार्य सक्ने लक्ष्य रहेको उहाँले बताउनुभयो।
पुल तथा कल्भर्ट निर्माणमा पनि उल्लेखनीय प्रगति भएको छ। पश्चिम खण्डमा निर्माणाधीन १२ पुलमध्ये १० वटा सम्पन्न भइसकेका छन् भने १०० मध्ये ९२ वटा कल्भर्ट निर्माण सकिएको छ। तर, ४२४ विद्युत् पोल अझै नहटाइएकाले काममा ढिलाइ भएको योजना प्रमुख कुँवरले बताउनुभयो। विशेष गरी तालचोकदेखि आदर्शचोक र डाँडाको नाकदेखि विजयपुरसम्म पोल हटाउन ढिलाइ हुँदा समस्या भएको र ती पोल एक साताभित्र हटाइने प्रतिबद्धता आएको उहाँले जानकारी दिनुभयो।
यदि सबै काम समयमै भएमा, असार मसान्तसम्म कोत्रेदेखि सेतीपुलसम्मको चार लेन सडक सम्पन्न हुने योजना छ।
विसं २०७८ जेठ ३ गते सम्झौता भएको यो खण्डको निर्माण कार्य विसं २०८२ पुस १६ गतेसम्म सम्पन्न गर्ने समयसीमा तोकिएको छ। ठेक्का एनहुई केयूएन हाइवे एन्ड ब्रिज कम्पनीलाई रु ७ अर्ब ४० करोड मा दिइएको हो।
उता, पूर्वी खण्ड अर्थात् आँबुखैरेनीदेखि जामुनेसम्मको खण्डको काम करिब अन्तिम चरणमा पुगेको छ। हालसम्म ८५ प्रतिशत कार्य सम्पन्न भइसकेको छ।
इञ्जिनियर विष्णुप्रसाद पाण्डेका अनुसार, मादी पुल नजिक र विमलनगर क्षेत्रमा एकतर्फी कालोपत्र मात्र बाँकी छ। दमौली बजार क्षेत्रको कालोपत्र पनि अन्तिम चरणमा पुगेको छ। तेस्रो पटक म्याद थपिएको यस खण्डको नवीन म्याद आगामी २९ गतेसम्म रहेको छ र त्यसअघि नै काम सक्ने लक्ष्य रहेको पाण्डेले जानकारी दिनुभयो।
पूर्वी खण्डमा २०७७ माघ १७ गते ठेक्का सम्झौता भई २०७८ वैशाख २ गतेदेखि काम सुरु गरिएको थियो। यसको निर्माण कार्यको ठेक्का चाइना कम्युनिकेशन कन्स्ट्रक्सन कम्पनी (CCCC) ले रु ६ अर्ब २१ करोड ३१ लाख १३ हजारमा पाएको हो।
सवारी चाप बढ्दै गएपछि विसं २०२६ सालमा रेखाङ्कन गरिएको यो सडकलाई एसियाली विकास बैंक (ADB) को ऋण सहयोगमा चार लेनमा विस्तार गर्न लागिएको हो।
